PR Taur Propoin Estende Lere Ba Tinan Rua

DILI - Enkontru Konsellu Superior Defeza Siguransa, hakotu ona polemika konaba nomeiasaun no ezonersaun Komandante F-FDTL foun, tamba Prezidente Republika (PR) Taur Matan Ruak propoin estende Jeneral Lere ba tinan rua.

Tuir Primeiru Ministru (PM) Rui Maria de Araujo katak enkontru Konsellu Suprior Defeza Seguransa nee azenda unika, PR Taur husu fila fali opinaun husi Konselleru sira hotu konaba kestaun nomeiasaun ba Xefia F-FDTL. Needuni reniaun semana liu ba Prezidente husu ba governu atu halo konsulta detailadas liu tan ho komponentes sira iha forsa laran, liu-liu sira neebe laos veteranus.

Neebe ohin lokraik nee Prezidente Republika hare hotu rezultadu konsullta, neebe mai husi governu nunee mos rona opiniaun konsellu Superior Defeza Seguransa sira hotu, Prezidente tetu buat sira nee hotu, Prezidente konkorda atu estende nafatin mandatu Jeneral Lere Anan Timur hanesan Xefi Estadu Maior Jeneral, Filomeno Paixao hanesan Vice Maijor Jeneral, ba mandatu tinan rua tan purtantu husi fulan Outobru 2017,” hateten PM Rui, ba Jornalista sira, hafoin remata enkontru Konsellu Superior Defeza Siguransa, iha Palasiu Prezidensial, Aitarak Laran, Dili, Tersa (17/05/2016).

PM Rui hatutan konaba estende tan Jeneral Lere ba tinan rua, lei fo dalan, tamba iha lei dehan Militar sira neebe ho idade 60 ba leten, wainhira iha nesesidade husi estadu, atu fo nafatin servisu ba sira, tamba lei artigu 195 iha lei kareira nia fo dalan mantein sira nia sevisu, estensaun nee halo tinan-tinan e governu propoin ba Prezidente, Prezidente konkorda.

Iha fatin ketak Prezidente Parlamentu Nasional Aderito Hugo hatete nia parte apresia tebes desizaun Prezidente Republika neebe halo dialogu ba Asuntu neebe importante tebes ba Nasaun. Informasaun kompletu iha STL Jornal no STL Web, edisaun Kuarta (18/5/2016). Joao Anibal/ Timotio Gusmao

Suara Timor Lorosae