Sobu Estrada, Moras no Asidente Ameasa Lospalos

LOSPALOS: Orientasaun governu hodi sobu estrada ne’ebé liga Lautem ho kapital Lospalos, hamosu preokupasaun públiku. Juventude Rezistensia-Veteranus konsidera kondisaun estrada ne’e, sei fó impaktu negativu ba komunidade sira-nia saúde no bele hamosu asidente.

Kompañia sobu tomak estrada, no daudauk ne’e nahe de’it ho rai-mutin ne’ebé hamosu rai-rahun maka’as no namdoras bainhira udan monu rai.

Porta voz Juventude Rezistesia no Veterenus Munisipiu Lautem,  Octavio da Conceição “Oslo” hatete, kondisaun estrada ne’e sei hamosu moras infeksaun respiratoria (ISPA) no hamosu asidente, tanba namdoras.

“Komunidade iha Munisípiu Lautem, sei afetadu ba moras infeksaun respiratoriu (ISPA), tanba rai-rahun no dezastre tanba namdoras iha tempu udan,” hatete porta voz ne’e liu husi konferensia imprensa iha fatin Selebrasaun 28 Novembru, Lospalos, Domingu (27/11).

Tuir nia, preparasaun fizika ba seremonia 28 Novembru foin la’o iha fulan Outubru. Tanba, sistema koordenasaun entre governu sentral ho munisípiu ne’ebé ladún apropriadu. 

Lee mós: Jeneral Lere Preokupa Estrada Lautem-Lospalos

Tanba ne’e, sira ezije ba kompañia ne’ebé sobu estrada no governu sentral atu hadia lalais estrada ne’ebé ateru de’it ho rai-mutin ne'e.

Ba kestaun ne’e, Administradór Munisípiu Lautem, Zeferino Pereira hatete, hahú hosi Aldeia Rasa to’o Lospalos Vila, komunidade han rai-rahun no afeta ba komunidade sira balun sofre moras.

“Governu sentral nia hanoin atu tau alkatraun husi Rasa mai iha ne’e, mais tanba ho tempu, difikuldades no orsamentu entaun ita altera no ateru de’it. Ida ne’e kompetensia aprovizionamentu nivel nasionál la’ós kompetensia Administrasaun Munisípiu Lautem nian,” hatete Zeferino ba olatimornews iha fatin komemorasaun loron 28 Novembru, Lospalos Vila, Segunda (28/11).

Nia hatete, konstrusaun estrada ne’e sei halo dala ida de’it ho projetu estrada Baukau-Lautem ne’ebé nia prosesu tenderizasaun remata tiha ona.

“Bainhira tau alkatraun mak kualidade la di’ak, iha tempu badak nia laran sei sobu fila-fali, tanba agora dadauk mós estrada husi Baukau to’o Lautem tuir informasuan katak tenderizasaun hotu ona no ita hein implementasaun de’it,” dehan nia. (*)

Ola Timor - Aquino Campos - Editór: Tellukoro 

Foto: Kompañia ne'ebé sobu alkatraun iha estrada ne'ebe liga Lospalos Vila-Lautem ateru de'it ho rai mutin, nune'e provoka rai rahun no namdoras iha tempu udan. (Olatimornews Foto/Aquino Campos)