Timor Triste Ba El-Komandante Fidel Castro Nia Mate

DILI, (ANTIL) - Parlamentu Nasionál (PN) Timor-Leste, liuhosi reniaun plenaria ohin Kuarta, hato’o sentimentu kondolensia “Triste” ba saudoso Fidel Castro, direjenti estadista nasaun Cubano, inklui familia, Governu no povu Cubano, liuhosi resolusaun ne’ebé deputadu sira aprova ho Unanimidade ho votu afavor 56.

“Komandante Fidel Castro, amigo di’ak ba Timor -Leste, tanba apoiu iha polítika dezenvolvimentu saúde, liu hosi simu estudante medixina sira estuda iha Cuba,” Prezidenti Parlamentu Nasionál Aderito Hugo da Costa, esplika bainhira preside plenaria votasaun votu kondolensia ba Saudosu Fidel Castro iha Parlamentu Nasionál, Kuarta (30/11)

Prezidenti Parlamentu mós dehan, nudar rekuñesimentu povu Timor nia ba apoia sira ne’ebé mak saudosu Fidel Castro halo ba Timor-Leste iha tempu funu no ukun rasik án, mak iha tinan hirak liu ba Timor-Leste atribui ona medulla grande colar ordem de Timor-Leste.

Deputadu Bankada FRETILIN, Mari Alkatiri reforsa katak, ko’alia Cubano hanesan  ko’alia kona ba saúde, edukasaun, desportu no investigasaun sientifika. Setór hirak ne’e,  tuir Mari Alkatiri,  Fidel Castro dezenvolve hodi sai hanesan investimentu ba nasaun nia futuru, ne’ebé Timor -Leste mós halo tuir.

Deputadu Partidu CNRT, Natalino dos Santos dehan, timoroan triste boot bainhira simu rekadu, katak, Fidel Castro hakotu is iha loron 25 Novembru 2016 . Timor-Leste fó sentidu kondelensia, tanba sente lakon eroi boot ida iha mundu rai klaran.

“Fidel Castro atinji realizasaun signifikan iha area saúde, edukasaun no agrikulutura.  Timor-Leste la haluha bainhira nia (Fidel) halo koperasaun ho Timor-Leste,” Natalino dos Santos realsa.

Cuba mós delega ona brigade Saúde, hodi servi povu Timor-Leste iha area Saúde no eduka timoroan sira iha area medixina. Oras-ne’e timoroan barak ne’ebe’ remata estudu iha Cuba, servisu ona iha teritoriu Timor Leste tomak. Agraddese mos ba Cuba tanba ajuda kombate analfabeto no dezenvolvimentu setór agrikultura.

Iha fatin hanesan Prezidenti bankada Partidu FRENTE-MUDANÇA, José Luis Guterres informa, tinan 1978 hamutuk ho Alkatiri  bainhira asiste eventu festifal mundial juventude iha Cuba,  Fidel Castro ko’alia kona ba asunto mundu nian, maibé la koalia kona ba Timor-Leste.

”Nudar timoroan, ami sente la kontenti tanba Fidel Castro la koalia Timor nia luta,” nia dehan. Maibe hafoin diskursu ne’e, Jose Luis ho nia maluk aprezenta án ba Fidel Castro iha tempu resesaun. Iha momentu ne’e mak  Fidel Castro hateten, ““Ha’u sei koalia kona ba Timor oriental.”

Jose Luis Guterres husu povu Cubano atu kontinua onra nafatin ba solidaridade ne’ebé mak durante ne’e sira hatudu. “Ita kontenti ema apoia ita, maibé ita mós iha dever atu apoia ema,  Obrigadu barak ba Fidel Castro nia apoiu,” José Luis Guterres hateten.  (Jornalista : Manuel Pinto/Editor: Otelio Ote)