Klínika Privadu La Priénse Kritériu Sei Hetan Sansaun

DILI, (ANTIL) – Klínika privadu barak mak durante ne’e eziste, maibé bainhira la prienxe kritéria hotu, sei hetan sansaun, inklui taka.

Klínika privadu liu 10, maibé balun de’it mak priénse. “  Klínika ne’ebé mak seidauk prienxe kritéri, labele ativu. Tenki priénse konsiderasaun farmasia medikamentu hato’o ona mak foin loke,” Diretora Jerál Prestasaun Servisu, Ministériu Saúde, Odete Viegas ba jornalista sira hafoin semináriu kona-ba prevensaun moras HIV/SIDA iha Ministériu Solidariedade Sosiál (MSS), Dili Kuarta (30/11).

Farmasia medikamentu distribui formulariu kona-ba kritériu harii Klínika, maibé klínika 7-8 mak sei iha faze kompletu dokumentu. “ Ne’e di’ak atu regula Klínika privadu ba aimoruk ne’ebé sira fa’an labele arbiru,” nia dehan.

Kona-ba loja sira fa’an aimoruk, Odete dehan, “Signifika sira fó aimoruk arbiru. Komunidade sira moras, bá hola aimoruk ruma iha loja, la laiha reseita hosi doutór sira, “ nia dehan tan.

Lejislasaun ba Klínika privada no farmasia sira importante tebes, atu iha futuru emprezariu sira ne’ebé servisu relasaun ho aimoruk, tenke la’o tuir regulamentu. Aimoruk sira tenki iha justifikasaun no akreditasaun husi fabrika, la iha efeitu ba komplikasaun.

VI Governu Konstitusional hahú ona minimiza problema aimoruk no utilizasaun laloos.Tanba aimoruk sira bele fó reasaun ba isin, hodi hamosu moras komplikadu.

Inspetór Jerál Saúde ho Gabinete Kontrolu Kualidade iha ministériu Saúde mak sei tun bá terenu, inklui farmasia atu haree besik kondisaun husi klínika sira ne’e. (Jornalista : Zezito Silva/Editór: Otelio Ote)