MANUTENSAUN TRAKTOR, DESKONFIA ESTANISLAU FÓ BA FAMÍLIA

Membru Parlamentu Nasional (PN) husi Bankada Partidu Demokratiku (PD), Virgilio Hornai, dun Ministru Estado Koordenador Asuntu Ekonomia (MEKAE) no Ministru Agrikultura e Peskas (MAP), Estanislau Aleixo da Silva halo azudikasaun direta hodi fo projetu manutensaun traktor ba nia familia.

“Ministru Estanislau koalia kona ba traktor at, se mak halo ajudikasuan direita ba kompanhia ne’e, hau atu hateten kompanhia ne’ebe mak halo manutensaun ba trator ne’e ninia rian nian, kompanhia naran Liberti, iha tendensia nepostismu no kolusaun iha ninia ministeriu, tanba manutensaun tratores laliu husi prosesu manutensaun normal, mais halo ajudikasaun direita ba ninia rian nia kompanhia,” hateten Deputadu Virgilio ba Jornalista sira bainhira iha diskusaun Orsamentu Jeral Estado (OJE) 2017, iha Parlamentu Nasional, Sesta (25/11/2016).

Hatan ba preukupasaun ne’e, MEKAE Estanislau, dehan katak, sira loke duni prosesu tenderizasaun ka tuir lei aprovizionamentu ne’ebe mak iha, maibe loke dala rua lahetan kompanhia ne’ebe mak iha kapasidade atu halo manutensaun. Nune’e, desidi fo deit ba kompanhia rua, kompamhia Liberti (nasional) no kompanhia internasional Tratorindo.

“Prosesu manutensaun ne’e, ami halo tiha aprovizionamentu, lahetan kompanhia ne’ebe mak diak, ne’ebe tanba presiza lalais, entaun ami deside fo ba kompanhia rua, ida Timor oan no ida Indonesia, ami deside fo duni, tanba urjente ona, se lae traktor ladiak kritika, maibe hadia tiha hakarak kritika nafatin,” esplika Estanislau ho lian maka’as.

Nia argumenta katak, sira deside fo deit ba kompanhia rua, tanba antes sira halo prosesu tenderizasaun maibe lahetan, tanba ne’e maka sira bolu deit kompanhia rua ne’e hodi forma ekipa ida hodi halo entrevista ba kompanhia refere, iha entrevista rezultadu ikus deside fo duni, tanba konsidera iha kualidade no kbi’it duni atu halo manutensaun ba traktores hirak ne’e.

“Tuir loloos ami foti fo ba kompanhia ida deit, tanba lei aprovizionamentu permite, kompanhia ne’e laiha relasaun familia dereita ho ha’u, maibe los duni katak ema ne’e ha’u nia aman mak hakiak, maibe sira involve iha rezistensia, no mate restu 12 Novembru nian, sira mos iha kompanhia konhesidu,” konfirma Estanislau.

Traktores sira ne’ebe mak halo manutensaun hamutuk 300 resin, maibe konsege hadia ona no funsiona fali ona hamutuk, 259, wainhira husu kona ba Orsamentu, tuir MEKAE, Estanislau katak, lafiksa ona ninia orsaentu, tanba Jornalista sira husu urjentemente, ne’ebe nia dehan ninia kakutak la’os makina.

Iha biban ida ne’e mos MEKAE, Estanislau ameasa Jornalista sira atu hodi ba tribunal, kuandu la fo sai klaru liafuan ne’ebe mak nia rasik koalia, no nia dehan hodi ba tribunal nia lapresiza buka tan advogadu, maibé nia oan mane rasik advogadu.

Nune’e mós MEKAE dun Jornalista balu involve iha Partidu Demokratiku (PD), tanba jornalista ne’e husu perguntas lapara, tanba ne’e maka nia deskonfia.

“Hakarek halo loloos, la’e ha’u hodi ba tribunal, kuandu ba tribunal ha’u lapresiza buka tan adovogadu ha’u nia oan mane rasik advogadu, ne’ebé o litik bei-beik ne’e o ketak PD ida karik,” dehan eis Deputadu bankada FRETILIN ne’e.mia

Jornal Nacional