‘Mota-kiik’ iha Aeroportu Komoro, PM Rui Husu Deskulpa

DILI: Primeiru Ministru Rui Maria de Araujo husu deskulpa ba pasajeirus aviaun iha Aeroportu Internasional Nicolau Lobato Komoro ne’ebé tenke atravesa udan no inundasaun ne'ebe atu hanesan ‘mota kiik’ hodi bele sa’e aviaun.

Kazu ne’e akontese iha Tersa (13/12), bainhira udan monu iha Kapital Dili kuaze oras lima resin, hahú husi tuku 12 meiudia to’o tuku 4.00 lororaik.

"Primeiru hodi governu nia naran hato’o deskulpa ba pasazeiru sira horseik ne’ebé mak atravesa iha udan laran hodi sa’e aviaun iha Aeroportu Komoro," dehan Rui hafoin halo inspesaun ba Aeroportu Nicolau Lobato, Kuarta (14/12).

Xefe Governu akompaña husi Ministru Obras Públika Gastão de Sousa tuun direitamente hodi buka hatene problema loloos, tanba inundasaun sempre akontese iha uniku aeroportu iha kapital Dili ne’e.

"Ita hotu hatene Inundasaun laos horseik mak akontese maibe bebeik ona. Drainajen aeroportu la funsiona 100 porsentu, tanba foer no populasaun kuda kangko (iha bee dalan), bainhira udan boot drainajen sira ne’e la sufisiente," esplika PM Rui.

Tan ne’e, PM Rui orienta MOP atu esforsu nune’e iha semana ne’e nia laran halo funsiona fali kanal bee nunee bele iha garantai katak bainhira udan tun ho tempu ne’ebé kleur inundasaun sei la akontese ona.

Iha fatin hanesan, Ministru Gastão promete katak iha fulan ida ne’e nia laran nia parte sei hadia drainajen iha area Komoro liga ba Aeroportu Nicolau Lobato.

"Ohin ami haree ona, primeiru ita tenke limpeza ba kanal sira ne’e hotu, liliu area aeroportu nian no INAP nian ne’e to’o iha rotunda no iha mota," dehan Gastão.

Aleinde ne’e, nia dehan, MOP sei prepara dezeñu ida hodi loke drainajen ida iha aeroportu laran, ne’ebé bele sai hanesan aternativa atu hasai bee husi aeroportu sorin ba tasi.

"Dezeñu sira ne’e iha hotu ona, integra iha projetu ne’ebé governu halo imprestimu ba governu Xineza. Problema ne’e mak sei iha tribunal kontas," katak nia refere ba orsamentu ne’ebé governu TL empresta husi governu Xina hamutuk millaun $50 hodi uza ba hadia drainajen sira iha Dili laran.

Maibé, nia afirma, MOP sei haree ba orsamentu ne’ebé sira iha atu bele rezolve situasaun iha aeroportu no halo drainajen aternativa ida. (*)

Frei Belo – Ola Timor -  Editór: Tellukoro

Foto: Primeiru Ministru Rui Maria de Araujo halo inspeksaun ba drainajen iha Ministeriu Agrikultura no Peska nia oin ne'ebe liga ba rotunda Komoro to'o Aeroportu. (olatimornews FOTO: Frei Belo)