Prezidente rona partidu hothotu no sei marka kalendáriu eleitorál ba tinan 2017

Prezidente Repúblika, Taur Matan Ruak horisehik hateten katak, depois maka sei fó sai kalendáriu ba eleisaun prezidensiál no lejislativa tinan 2017 nian, hafoin iha tersa-feira rona tiha Governu no partidu hirak ne’ebé hetan kadeira parlamentár. 

Iha komunikadu badak ne’ebé fó sai horisehik, gabinete xefe Estadu esplika katak Taur Matan Ruak sei delibera kona-ba “data di’ak” hodi hala’o eleisaun ba iha tinan 2017, ne’ebé sei fó sai hanesan “momentu importante”.

“Prezidente Repúblika, Taur Matan Ruak, horisehik, loron 13-dezembru, rona hotu ona hosi Governu no partidu sira ne’ebé hetan kadeira iha parlamentu, kona-ba markasaun ba loron eleisaun prezidensiál no lejislativa tinan 2017 nian”, esplika.

“Hafoin rona tiha pozisaun hosi kada interveniente, prezidente, sei halo deliberasaun kona-ba loron di’ak, hodi hala’o eleisaun ba tinan oin nian.

Prezidente Repúblika sei hein tempu di’ak hodi fó sai loron ba eleisaun prezidensiál no lejislativa, tuir Konstituisaun no Lei, nomós publikasaun hosi Dekretu idaidak nian”, hakotu.

Antesipa katak, volta dahuluk ba eleisaun prezidensiál, sei hala’o iha fulan marsu, volta daruak iha abril, no xefe Estadu foun sei simu tomada posse iha 20-maiu.

To’o oras, iha ona kandidatura tolu ba kargu Prezidente Repúblika: prezidente Fretilin, Francisco Guterres Lu-Olo (aponta hanesan favoritu), António Maher Lopes (Fatuk Mutin), apoia hosi Partido Socialista de Timor (PST), no José Neves, eis-visi-komisáriu hosi Komissaun Antikorrupsaun (CAC), hanesan independente.

Eleisaun lejislativa sei hala’o iha fulan jullu, tuir obrservadór polítiku sira hateten.

SAPO TL ho Lusa