Polisia Entrega Kondutór Kareta Estadu na’in Rua ba KAK

DILI: Polisia Nasionál Timor-Leste Munisipiu Dili entrega ona kondutór kareta estadu ne’ebé uza estadu nia sasan ba interese privadu ba Komisaun Anti Korrupsaun hodi bele prosesa.

Foin lalais ne’e, liu husi operasaun ne’ebé Polisia Tranzitu Dili hala’o durante loron rua nia laran, Kuarta (7/12) no Kinta (8/12), ne'ebé governu deside hanesan loron feriadu, konsege kaptura kareta estadu lubuk ida no hatama funsionariu públiku balun ba prizaun.

“Na'in ida iha sela detensaun ami (PNTL) nian. Aman fó karreta ba nia oan lori, karta kondusaun laiha. (na’in ida seluk) Detensaun iha sela KAK, suspeitu lori karreta estadu tula familia nakonu ba Manatuto," informa Komandante PNTL Munisipiu Dili, Pedro Belo, Sesta (9/12).

Hafoin kumpri prizaun durante oras 72, PNTL entrega kondutór kareta estadu ba KAK hodi kontinua prosesu tuir mai.

"Kondutór na’in rua ne’ebé foin lalais tama iha (sela) 72 oras, entrega fali ona ba KAK no sira mak sei tomakonta nia prosesu,” deklara Komandante Polisia Tranzitu Munisipiu Dili, Matias da Silva iha Kuartel PNTL Munisipiu Dili, Kuarta (14/12).

Nia dehan, tuir informasaun, prosesu ba funsionariu hirak ne’e la’o hela, no ba kareta ne’ebé prende daudauk ne’e sei para iha Kuartel PNTL Kaikoli-Dili.

Nia dehan, polisia tranzitu sei kontinua hala’o operasaun ba kareta estadu ne’ebé funsionariu públiku sira uza la tuir orariu serbisu ne’ebé iha no ba interese privadu. (*)

Pachar Malay – Ola Timor - Editór: Tellukoro

Foto: Kareta estadu hirak ne'e mak Polisia Tranzitu Munisipiu Dili prende. Daudauk ne'e sei para iha kuartel PNTL Dili hodi hein prosesu tuir mai. (olatimornews FOTO: Pachar Malay)

Lee mós: Funsionariu Públiku na'in Ida Tama Sela KAK