Kareira Calistro Gonzaga ne’ebé ‘Namlele’

DILI: Prosesu julgamentu ba kazu arguidu Calistro Gonzaga to’o ohin loron seidauk la’o, ne’ebé fó impaktu boot ba kareira eis Komandante Servisu Investigasaun Kriminal Nasionál (SIKN) ne’e iha Instituisaun Polisia Nasionál Timor-Leste (PNTL).

Calistro sai arguidu ba kazu liberta autór droga iha tinan 2012. Ministériu Públiku akuza arguidu komete krime naun partisipasaun no sekuestro ho ameasa pena prizaun tinan 8 fulan 6.

Tuir dadus husi MP, Iha 20 no 21 Outobru 2012, bainhira Calistro assume kargu nudar Komandante SIKN, halo kapturasaun ba ema estranjeiru nain 5 ne’ebé lori droga tama mai Timor-Leste hodi lori detein iha Otel Sentral durante 72 oras, maibé la lori ba aprezenta iha Ministériu Públiku. Arguidu rasik ho nia ajente Faustino lori autór na’in 5 ba entrega iha Badan Narkotika Nasional (BNN) Jakarta, Indonesia.

Tinan ida liu ona, maibé seidauk iha desizaun final ba kazu Calistro, tan ne’e, advogadu arguidu Calistro, Sergio Quintas, ezije ba Tribunal atu halo julgamentu lalais ba ninia kliente.

Maske dadauk ne’e sei serbisu iha PNTL, maibé Calistro la assume ona kargu ruma, nia tenke lakon mós ninia pozisaun nudar Komandante SIKN.

“Husu ba Tribunal atu halo julgamentu lalais. Tanba ha’u-nia kliente asume kualidade hanesan arguidu hodi impede nia servisu. Tanba la hetan promosaun ka hetan kareira iha nia servisu durante ne’e,” hatete defeza arguidu Calistro ba jornalista sira iha Tribunal Distritu Dili (TDD), Kuarta (14/12).

Nia dehan, ba repetisaun julgamentu ba ninia kliente ne’ebé Tribunal Rekursu haruka mai TDD, ne’e depende ba juiz prosesu hodi marka loron julgamentu.

Tan ne’e, nia husu ba TDD atu bele ajenda ona repetisaun julgamentu nune’e bele hatene arguidu Calistro komete duni krime ne’ebe mak MP akuza ka lae.

“Kuandu akuzasaun laiha provas no faktus, hakarak ka lakohi (kazu ne’e) tenke absolve,” nia dehan.

Molok ne’e, Juis Konsileiru Tribunal Rekursu (TR), Deolindo dos Santos hatete, TR hatun ona desizaun ba TDD hodi halo julgamentu foun ba kazu Calistro Gonzaga.

“Kazu Calistro, Tribunal Rekursu ninia desizaun iha ona no notifika ba perte sira hotu mak foin haruka fali ba TDD atu halo julgamentu foun, tanba ha’u mak kaer prosesu ne’e,” nia hatete. (*)

Aquino Campos – Ola Timor - Editór: Tellukoro

Foto: Calistro Gonzaga iha PNTL la klaru ona tanba to’o ohin loron seidauk iha desizaun ba kazu ne’ebé nia komete. (FOTO: jndiario.com)