Estanislau: Labele Gasta Arbiru Osan Estadu

DILI, (ANTIL) - Ministru Estadu Koordenadór Asuntu Ekonómiku (MEKAE), Estanislau Aleixo da Silva iha enkontru ho grupu benefisiáriu ba subvensaun públika 2016, Kuarta (14/12/2016) husu atu labele gasta arbiru estadu nia osan, tanba apoiu ne’e fó tuir Estadu nia kbiit.

Governu hatur kritéria ba benefisiariu sira, atu halakon tiha akuzasaun públiku. “Ema labele dehan osan ne’e fó de’it ba ida-ne’e no ne’ebá. Se laiha kritériu, ita duun malu tinan bailoro de’it. Ida ne’e mak ami lakohi. Ami halo kritériu, biar atraza uitoan mas vale a tarde do qeu nunca,”, MEKAE dehan iha Timor Plaza.

Durante tinan 2016, MEKAE fó apoiu orsmentu ho totál USD $ 425.000.00, ne’ebé distribui ona ba grupu 115 ho total USD $424,403.65. Iha  tinan 2015, MEKAE apoiu grupu benefisiáriu hamutuk 20 no la’o di’ak susesu.

Tinan 2016, fó ba grupu 115 husi programa subvensaun husi MEKAE. No Ministériu Agrikultura no Peska (MAP) fó apoiu ba joven sira hamutuk grupu 142. Bainhira iha grupu joven sira servisu ladi’ak, sei iha evaluasan. Entretantu iha tinan 2017,  laiha orsamentu subvensaun públika husi MEKAE, tanba tama ba tinan eleisaun sira.

Estanislau husu ba benefisiáriu sira, atu hala’o negosiu didi’ak no susesu. Governu kontinua akomkompaña no hare posibilidade imprestimu husi Banku Nasionál Timor-Leste (BNCTL), bainhira hakarak habelar negósiu iha futuru.

Aleinde ne’e, Governu liuhusi MAP servisu hamutuk ho Izrael, haruka joven na’in 30 partisipa treinamentu agrikultura. Alemde ne’e, timoroan balun, iklui ne’ebé iha esperiensia servisu Peskas iha Korea, oras-ne’e servisu ona iha Ró Peska sira iha rai-laran.

Foin daudaun iha reuniaun estraordináriu, BNCTL konkorda atu haree prioridade ba área rurál. Primeiru-Ministru mós husu atu konjela tranferénsia USD $ 5 milloens, hodi hein BNCTL uluk planu negósiu.

“Bainhira iha problema ruma, kona-ba peska ka nogósiu direitamente ba tékniku sira atubele ajuda,” Estanislau hateten.

Molok aprova proposta husi benefisiariu, Governu halo uluk prosesu selesaun proposta no avaliasaun bazeia ba kriteria no hare tuir atividade ekonómika ida-idak. Benefisiariu sira maihusi grupu haki’ak ikan, manu, fahi, karau, agrikultura, suku roupa, karpitaria no ofisina. (Jornalista : Maria Auxiliadora/Editór: Otelio Ote)

Foto: Grupu Benefisiáriu sira ne’ebé hetan apoiu husi MEKAE halo sorumutu ho Ministru Estanislau da Silva no estrutura.