UZA RIKEZA NE’EBE IHA HODI FO BENEFISIU BA NASAUN

Ministro Estadu Coordenador Assunto Economia (MECAE) e Ministro Agricultura e Pesca (MAP), Estanislau da Silva hateten, tenki uza rikeza ne’ebe hanesan fatin turismu no animal uniku ne’ebe diak iha illa Jaco hodi bele fo benefisiu ba nasaun no povu.

“Ita iha beleza natural inklui animal uniku hanesan manu mateklamar ne’ebe ho modelu uniku iha ninia posesu moris tanba wainhira atu tolun nia tenki ke rai barak ho nune’e ami iha preokupasaun bot para oinsa bele proteze areas protejidas hanesan illa Jaco ho nune’e ita tenki uza rikeza naturais ne’ebe iha hodi benefisia estadu inklui populasaun,”hateten Estanislau da Silva, ba jornalista sira hafoin hala’o konvoiu haleu illa Jaco, Munisipiu Lauten, Sesta (03/02/2017).

Nia dehan, objektivu prinsipal husi vizita ne’e mak atu hare direitamente saida mak MECAE bele halo iha fatin ne’e iha futuru.

“Planu sei aumenta ema nain tolu hodi ajuda guarda florestal no hau sei koalia ho Ministru Interior atu bele fo apoiu membru PNTL balun mai iha fatin ne’e hodi tau matan ba illa Jaco ho nune’e ema ne’ebe ba vizita labele soe foer arbiru, tanba dalabarak ema mai tau ahi arbiru deit iha ne’e e karik la kumpri regras ne’ebe iha mak sei selu multa ba Estadu,”dehan Estanislau.

Alende ne’e nia hatutan, konaba estrada sei koalia ho Ministeriu Obras Publiku (MOP) karik bele hadia estrada hahu husi Tutuala mai to’o Jaco.

“Konaba estrada hau koalia ona ho MOP e sira dehan osan iha ona, maibe la hatene kontratu asina ona ka sidauk ho kompaňia ne’ebe manan e estrada importante, tanba ohin ita tama mai kondisaun estrada ladiak ho nune’e tenki hadia,”hatutan Estanislau.

Iha fatin hanesan Sekretariu Estadu Arte e Kultura (SEAC), Maria Isabel de Jesus Ximenes hateten, vizita ne’e ho objektivu atu haree direitamentu saida deit mak presija tau no hadia iha fatin turismu refere.

“Kondisaun infrastutura hanesan estrada sai hanesan preokupasaun bot husi komunidade iha ne’e, maibe sei halo kordenasaun ho MOP, tanba tinan agora hanesan tinan eleisaun nian ho nune’e ita sei preokupa ho aktividade eleisaun jeral nian,”dehan Maria.ita

Jornal Nacional Diário