Governu timoroan fiksa limiti ba folin sira hosi ligasaun aéreu sira ho Bali

Governu timoroan fiksa ona folin mínimu ho máximu ne'ebé konsidera "justu", entre dolár 110 no 175 ba viajen ida ba no fila nian, ba ligasaun aéreu sira Díli-Bali, interfere iha merkadu privadu ne'ebé iha ona.

Diretór-jeral hosi Transporte sira nian, Joanico Gonçalves, hatete ona ba Lusa katak desizaun ne'e foti "hamutuk" iha enkontru ida entre Governu ho responsável sira hosi aviasaun sivil ho operador tolu ho ligasaun aéreu sira entre Timor-Leste no Indonézia.

Akordu ba folin sira - ne'ebé estabelese folin mínimu ida ho dolár 110 no máximu dolár 175 ba viajen ba no filan nian entre Díli ho Denpasar, iha illa indonéziu Bali - sei hala'o pelumenus durante tinan ida, refere hosi responsável ne'e no nia hatete katak objetivu hosi governu maka evita atu presu sira sai karun liu.

Iha troka maka konsege limiti máximu ida, Governu tenki konkorda ho presaun sira hosi empreza hodi fiksa folin mínimu ida.

Nia hatete katak agora daudaun sei la aplika medida hanesan ba ligasaun sira entre Díli ho Darwin, iha norte Austrália nian, no ho Singapura, área sira ne'ebé iha de'it operadór ida (AirNorth ho Air Timor), ka laiha konkorénsia ruma.

Desizaun hosi Governu kona-bá ligasaun sira ba Bali konfirma tiha ona iha despaxu ida ho loron 31 Maiu no fahe ona ba kliente sira hosi AirTimor, empreza ida ne'ebé mantén ligasaun ba Bali loron-loron liuhosi indonéziu Citilink.

Operadór rua seluk maka hosi Indonézia: Sriwijaya ho Nam.

"Iha referénsia ba reuniaun loron 18 Maiu, entre visi-ministru Transporte ho Telekomunikasaun sira nian ho reprezentante sira hosi operadór aéreu sira ne'ebé serbisu iha área Díli-Denpasar-Díli, Ministériu nia opiniaun maka folin mínimu tuir área maka dolár amerikanu 110 no máximu maka dolár amerikanu 175", hatete iha testu ne'e.

Despaxu ne'ebé asina hosi Joanico Gonçalves esplika katak medida ne'e hala'o hahú loron 01 Juñu.

Despaxu, ne'ebé hahú ona fahe iha rede sosial sira, hamosu debate maka'as iha Timor-Leste ho krítika sira ba Governu tanba interfere iha merkadu ida ne'ebé tenki livre no, liuliu tanba estabelese folin mínimu ida.

Internauta sira balun fó hanoin katak, iha pasadu, no tanba konkorénsia ne'ebé iha, fa'an tiha ona billete sira ho folin ne'ebé ki'ik liu duké folin mínimu ne'ebé agora estabelese hosi Governu.

SAPO TL ho Lusa