RAHMAN SABON AKUZA RAMOS HORTA APOIA KILAT BA PAPUA

Observador sosial polítika Indonesia, Rahman Sabon, akuza eis Prezidenti Repúblika Timor Leste (RDTL), José Ramos Horta apoia kilat kontiner rua ba Kelompok Gerakan Papua Merdeka (KGPM) ou Grupo Movimentu Papua Independenti).

Rahman dehan, situasaun ida ne’e, iha relasaun ho vizita Ramos Horta nian foin lalais ba Papua, hodi partisipa mós iha enkontru ida hodi ko’alia kona-ba PKI iha Pasangrahan Klaten Jateng, ne’ebé partisipa mós husi SOBSI sira husi Jakarta.

Rahman Sabon mós deskonfia Ramos Horta hanesan liman ain ema estranjeiru atu hala’o atividade subversive ne’ebé iha relasaun ho PKI no Papua merdeka.

Ho ida ne’e, Rahman Sabon husu ba BIN no POLRI atu halo kapturasaun ba José Ramos Horta.

“Informasaun ne’ebé ha’u hetan, kontiner rua ho kilat ne’ebé lakon iha Timor Leste, deskonfia tama tiha ona iha rai Papua, no simu tiha ona husi Kwalik, (Kelompok Gerakan Papua Merdeka), hatete Rahman Sabon hanesan públika husi http://4bintanges.com/?p-9808.

Hatan kona-ba informasaun ne’e, José Ramos Horta dehan, nasaun ida bo’ot hanesan Indonesia ne’e, hotu-hotu la konkorda ho ida ne’e.

Nia haktuir, Prezidenti Joko Widodo hakarak rezolve problema Papua, maibé ema barak deskonfia hanesan ne’e.

“Ne’e normal, ita kuandu tama iha diplomasia no ajuda, ita tenke simu buat sira ne’e hotu, laiha problema,” katak Ramos Horta ba jornalista sira iha Comite Central FRETILIN (CCF) Comoro Dili, Kinta (02/06).

Horta haktuir, nia vizita foin lalais ba iha Papua, tanba hetan konvite husi Estadu Indonesia hodi haree ho matan kona-ba situasaun iha Papua.

“Ha’u sei haree, hanoin atu halo rekomendasaun ba autoridades Indonesia, atu haree oinsa mak sira bele tau matan di’ak liu ba situasaun iha Papua, atu rezolve liu-liu problemas direitus humanus,” katak Ramos Horta.

Tanba Ramos Horta dehan, Prezidenti Joko Widodo ema ida ne’ebé iha komitmentu boot tebes atu rezolve problema Papua ninian iha tinan lima nia laran ne’e.

Ramos Horta hatutan, buat ne’ebé mak pozitivu tebes mak ne’e, Estadu Indonesia halo ona ninia inisiativa loke diálogu iha Jakarta, ba asuntus no problemas oi-oin konaba Papua, maibé iha kotroversi bo’ot.

“Buat ne’ebé ha’u bele kontribui para ajuda Indonesia hetan dalan ne’ebé di’ak, ba problemas balun iha Indonesia, li-liu hanesan Papua, ita kontribui nu’udar viziñu di’ak no amigu Indonesia nian, tanba sira mós buka tulun ita iha tinan sira ne’e nia laran,” katak katak eis Prezidenti Repúblika TL ne’e.

Ramos Horta esklarese, foin lalais Indonesia konvida nia ba Papua ne’e, la’os nu’udar reprezentante ONU, maibé nu’udar Ramos Horta no eis Prezidenti Timor Leste.

“Ha’u ba nu’udar ema ida ne’ebé sira koñese hanesan amigu Indonesia nian, sira fiar tanba, Timor Leste nia polítika tinan 14 nia laran, polítika ida di’ak no matenek mak sira konvida, sé Timor Leste nia polítika ladi’ak karik, sira la konvida duni ha’u,” Ramos Horta fundamenta.cos

Jornal Nacional