segunda-feira, 1 de abril de 2019

Misaun timoroan iha ONU sei taka temporariamente tanba difikuldade iha Díli

PARTILHAR

Misaun Permanente Timor-Leste nian iha ONU sei taka temporariamente iha loron-domingu tanba atrazu sira iha entendimentu ho Estadus Unidus kona-ba arendamentu hosi rai sira hosi nia misaun iha Díli, konfirma hosi ministru Negósiu Estranjeiru.

"Triste tebes tanba difikuldade halo ami labele hakotu kontratu arendamentu nian hosi instalasaun sira tanba ami seidauk iha autorizasaun nesesáriu hosi Governu norte-amerikanu", esplika hosi Dionísio Babo bainhira hetan kontaktu hosi Lusa.

Taka ba tempu ne'ebé seidauk defini iha relasaun ho prosesu naruk ida ne'ebé maka dura kleur ona no iha ligasaun ho "falta akordu" entre Estadus Unidus ho Governu timoroan ne'ebé maka akontese beibeik kona-ba kondisaun sira arendamentu nian hosi fatin ne'ebé maka situa Embaixada iha Díli.

Babo, ne'ebé halo ona vizita serbisu nian iha Japaun, konfirma ona katak kontratu arendamentu rai nian, asina hosi Governu konstitusional daruak, válidu to'o tinan 2032 maibé "autoridade amerikanu sira hakarak renova ona" no hanaruk arendamentu hodi iha serteza jurídiku tanba sira hakarak halo obra sira iha fatin.

Semana ne'e, Governu timoroan anunsia ona katak Konsellu Ministru "aprova ona proposta hosi Memorandu Entendimentu, aprezenta hosi Ministériu Negósiu Estranjeiru no Koperasaun no hosi Ministériu Justisa, kona-ba kontratu aluga rai nian hosi Embaixada Estadus Unidus Amérika nian iha Timor-Leste".

"Memorandu entendimentu ne'e sei defini termu sira hodi aluga rai hosi embaixada no regra sira hodi harii no mudansa hosi instalasaun diplomátiku sira", refere hosi komunikadu ida ne'ebé la refere ba efeitu sira hosi dezentendimentu nian.

Babo esplika ona katak Ministériu Justisa sei informa autoridade norte-amerikanu sira no katak "hakarak atu rezolve lalais" hodi nune'e bele ultrapasa dezentendimentu.

"Mudansa hosi instalasaun sira hosi Misaun Timor nian hanoin ona iha tinan haat liubá, maibé iha atrazu beibeik iha negosiasaun sira iha Díli entre Ministériu Justisa timoroan ho amerikanu sira kona-ba termu sira hodi aluga espasu atual ne'ebé okupa hosi Embaixada Estadus Unidus nian", refere hosi fonte seluk hosi Governu timoroan nian.

Ne'e "halo Departamentu Estadu nian iha Washington reaje ho la autoriza mudansa ba instalasaun sira" hosi misaun timoroan nune'e tenki taka odamatan durante períudu ida ne'ebé seidauk defini.

"Ami laiha autorizasaun nesesáriu ne'e no, tanba ne'e, sei taka temporariamente", Babo hatete.

Maski misaun timoroan nian iha Nova Iorke prezenta iha ONU, Washington tenki autoriza mudansa ba instalasaun foun sira, prosesu ida ne'ebé hanoin ona durante tinan barak nia laran no tuir loloos tenki halo agora, tanba kontratu hosi instalasaun atual sira hotu iha loron-domingu.

Foreign Missions Act, ne'ebé regula operasaun hosi misaun sira hosi Estadus Unidus iha estranjeiru no hosi misaun estranjeiru sira iha Estadus Unidus, obriga misaun diplomátiku tomak ne'ebé iha sede iha Nova Iorke hodi iha nafatin autorizasaun hosi Departamentu Estadu nian hodi bele sosa ka muda instalasaun sira.

Fonte diplomátiku iha Díli esplika ona katak Estadus Unidus hein resposta ida hosi Governu timoroan durante tinan haat kona-ba pedidu renovasaun hosi arendamentu fatin ne'ebé maka situa embaixada, no iha ne'ebé maka hakarak hala'o mós obra sira.

Dezentendimentu kontinua nafatin to'o Governu anterior sira no sai aat liu, haktuir hosi fonte hanesan, hafoin atual ministru Justisa, Manuel Cáceres da Costa, hatudu nia diskordánsia kona-ba termu sira ne'ebé hato'o hosi norte-amerikanu sira.

Taur Matan Ruak, xefe Governu, nomeia ona ministru Estadu nian iha Prezidénsia hosi Konsellu Ministru, Agio Pereira, hodi halo negósiu diretamente ho embaixada norte-amerikanu kona-ba termu sira hosi proposta final.

Atrazu sira ne'ebé akontese beibeik hamosu nafatin problema ba misaun timoroan nian ne'ebé hetan ona nia fatin alternativu sira hetan kanselamentu no labele formaliza instalasaun foun sira lahó autorizasaun hosi Departamentu Estadu nian, konfirma hosi fonte hosi Ministériu Negósiu Estranjeiru timoroan nian iha Díli.

Diplomata sira arruma hela misaun tanba asuntu bele demora "fulan rua ka tolu" nia laran hodi bele rezolve.

Taka ne'e akontese iha momentu ne'ebé hanoin hela halo vizita oioin hosi membru sira hosi Governu timoroan ba Nova Iorke no ne'ebé maka hala'o hela asaun oioin iha misaun timoroan nian, inklui debate sira kona-ba Objetivu sira hosi Dezenvolvimentu Sustentável nian.

Lusa, iha Sapo TL
PARTILHAR

Author: verified_user

Publicação luso-timorense sem fins lucrativos

0 comentários: