segunda-feira, 1 de abril de 2019

Ramos-Horta husu prudénsia hosi Governu hasoru investidor sira antigu liu iha Timor-Leste

PARTILHAR

Eis-Prezidente Repúblika timoroan, José Ramos-Horta, husu ona iha loron-kinta ne'e "prudénsia" ba Governu bainhira trata investidor estranjeiru sira antigu liu iha nasaun, ne'ebé mai ona Timor-Leste iha tinan 20 liubá, evita "diskursu agresivu sira" ne'ebé bele prejudika nasaun.

"Bainhira ita hakarak promove investimentu, ita hahú fó kariñu ba investidor sira ne'ebé iha ne'e kuaze tinan 20 ona", nia hatete ba Lusa bainhira hakotu lansamentu hosi asosiasaun dahuluk hosi proprietáriu sira hotel nian iha Timor-Leste, HOTL.

"Bainhira ita halo diskursu agresivu sira hasoru investidor sira ne'ebé iha ne'e no ita uza media no la'ós konvida sira ba diálogu, klaru investidor foun sira sei haree: hanesan ne'e maka sira trata investidor sira ne'ebé iha ona nasaun, entaun ita lalika ba", nia afirma.

Eis-xefe hosi diplomasia timoroan hatete mós katak hanesan importante rekoñese esforsu hosi investidor barak ne'ebé asumi ona risku sira hodi investe iha nasaun iha tinan 20 liubá, no ne'ebé nasaun nia imajen bele afetadu hosi oinsá projetu sira ne'e hetan tratamentu.

"Timor tenki hatene katak hanesan rai-henek musan ida iha kompetividade boot ne'ebé iha Ázia tomak. Bainhira ita laiha kuidadu no la matenek, investidor sira iha Ázia sei la liga nafatin ita", nia hatete.

Ramos-Horta, ne'ebé husik mensajen hanesan iha nia diskursu iha lansamentu HOTL nian, fó ona ezemplu hosi investidor pioneiru sira hosi área, Carlos Monjardino ho Fundação Oriente "ne'ebé ho korajen no vizaun" no hasoru susar boot iha tinan 2001 no 2002 loke ona Hotel Timor.

"Lahó infraestrutura hoteleira ruma hodi simu konvidadu sira ba independénsia, Fundasaun Oriente asumi ona risku tomak no ho konfiansa hosi Governu iha momentu ne'ebá, restaura ona Hotel iha tempu ne'ebé badak tebes, no iha fulan neen nia laran loke ona odamatan sira", nia hatete.

"Durante tinan barak nia laran, maski iha polítika sira ne'ebé sala, maski la apoia setór privadu ho sériu, ho insentivu fiskal ka finanseiru sira, Fundasaun Oriente no investidor sira, investe ona hodi moderniza, restaura ho reabilita hotel", nia afirma.

Motivu ne'ebé halo nia fó ona konsellu ba Governu "kona-ba Hotel Timor oinsá hanesan ho investidor sira seluk, balun iha ne'e tinan 20 ona, hodi trata sira ho respeitu liután, ho sensibilidade maka'as".

Entre medida sira ne'ebé Governu bele aplika, Ramos-Horta refere ona ba insentivu sira hanesan diminuisaun ba eletrisidade ka benefísiu sira seluk.

"Iha ne'e, ita iha eletrisidade ne'ebé karun liu iha mundu. Ita bele hahú ajuda investidor sira hodi hamenus nia konta elétrika", nia hatete.

Timor-Leste - nasaun ida ne'ebé kiak liu iha mundu, ne'ebé nia orsamentu hanesan finansiadu tomak hosi Fundu Petrolíferu ida - aplika ba empreza sira presu ida séntimu 24 tuir kilowatt, folin ida ne'ebé aas liu duké aplika iha nasaun sira hanesan España, Reinu Unidu ka Nova Zelándia.

Lusa | iha Sapo TL
PARTILHAR

Author: verified_user

Publicação luso-timorense sem fins lucrativos

0 comentários: