Prezidente Repúblika Apoia Direitu Auto-Determinasaun Povu Sahara Osidentál

DILI, (TATOLI) – Prezidente Repúblika (PR), Francisco Guterres Lú Olo, hato’o mensajen fó apoiu ba direitu auto-determinasaun povu Sahara Osidentál.

Liuhusi Konferénsia Internasionál ba Direitu auto-determinasaun povu Sahara Osidentál nian iha Pretória, Afrika Sul, iha loron 25-26 Marsu, foin lalais ne’e, reprezentante Xefe Estadu Timor-Leste, Roque Rodrigues, hato’o mensajen Xefe Estadu Timor-Leste nian hodi afirma katak, Prezidente Repúblika Timor-Leste apoia direitu auto-determinasaun povu Sahara Osidentál.

“Ha’u fiar katak partisipante konferénsia ne’e sei kriativu no kontribui atu buka dalan seguru no solidu hodi hakotu dezafiu kolónia ikus iha kontinente Afrika liuhusi respeitu direitu inaliavel povu Sahara ba auto-determinasaun. Ami iha ne’e hamutuk ho imi atu espresa ami-nia apoiu tomak ba inisiativa ida ne’e no hametin ami-nia suporta ba auto-determinasaun povu Sahara”. Ne’e mak sitasaun Prezidente Repúblika, Francisco Guterres Lú Olo nia mensajen ne’ebé haktuir husi Roque Rodrigues iha  konferénsia internasionál ne’e.

Komunikadu imprensa ne’ebé haklaken husi gabinete media Prezidénsia Repúblika katak, Timor-Leste nu’udar nasaun ida ne’ebé kontinua fó nia apoiu ba direitu auto determinasaun povu Sahara Osidentál.

Desizaun ba  Konferénsia Solidariedade ida ne’e  deside liuhusi Simeira Ordináriu ba dala 38 husi Xefe Estadu no Governu SADC iha Agustu 2018. Nasaun 24 hamutuk ho lider Movimentu Libertasaun Afrika no partidu polítiku ho reprezentante organizasaun sosiedade sivíl partisipa iha Konferénsia Internasionál ne’e  apoiu atu implementa rezolusaun ONU no desizaun African Union kona-ba Sahara Osidentál atu hetan solusaun dame no permanente hodi hatán ba nesesidade povu Sahara Osidentál.

Sahara Osidentál nu’udar úniku kolónia iha Afrika ne’ebé to’o ohin loron moris iha okupasaun Maroko no seidauk hetan solusaun internasionál.  Iha tinan-1960 Asembleia Jerál ONU hasai rezolusaun atu garante independénsia nasaun kolónia  no povu no rezolusaun ba Sahara Osidentál atu España liberta Sahara husi dominasaun koloniál. Iha tinan 1991 Konsellu Seguransa ONU hasai rezolusaun 690 atu estabelese misaun ONU ba referendum.

Southern Africa Development Communities nu’udar organizasaun intergovernamentál ne’ebé harii iha 1992 atu hametin kooperasaun no integrasaun Sosioekonómiku, polítiku no seguransa nasaun Afrika Austral. Konferénsia Internasionál ne’e ko-partrosinadu husi Afrika Sul no Namíbia.

EKIPA TATOLI

Imajen: Prezidente Repúblika, Francisco Guterres Lú Olo. Imajen/António Gonçalves