segunda-feira, 1 de abril de 2019

Ramos-Horta: Timor-Leste sai refém maka'as hosi kompañia aéreu "gangster" sira

PARTILHAR

Timor-Leste moris iha "trajédia" tanba sai "refém maka'as hosi kompañia aérea sira hosi Austrália ho Indonézia ne'ebé atua "ho komportamentu hosi "gangster" sira", hodi mantén folin sira ne'ebé aas tebes, hatete hosi José Ramos-Horta iha loron-kinta ne'e. 

"Ami iha trajénsia hosi nasaun ne'ebé hanesan refém maka'as hosi "gangsterizmu" aéreu ne'e hosi parte Garuda nian", hatete hosi eis-Prezidente Repúblika, hodi refere ba empreza estatal hosi Indonézia, proprietáriu hosi empreza sira Sriwijaya ho Citilink ne'ebé maka semo ba Timor-Leste.

"No ami kontinua hanesan refém hosi AirNorth ne'ebé klaru hanesan naok ida", nia afirma hodi ko'alia kona-ba kompañia Qantas ne'ebé mantén monopóliu ida iha semo sira entre Timor-Leste ho Austrália, iha dalan ida ne'ebé hanesan karun liu iha mundu.

Ramos-Horta ko'alia iha Díli iha lansamentu ofisial hosi asosiasaun hoteleiru dahuluk iha nasaun, HOTL, harii hosi unidade hoteleira sanulu ne'ebé barak liu situa iha kapital nasaun nian.

Líder istóriku timoroan ironiza mós kona-ba folin sira ne'ebé aas tebes bainhira haree ba kualidade hosi aviaun balun.

Kestaun hosi folin viajen aéreu sira agora daudaun hanesan susar boot ida ba turizmu iha Timor-Leste ne'ebé hanesan fraku ona tanba hasoru dezafiu sira seluk liuliu iha nível infraestrutura sira.

Hahú hosi loron 01 Abril nasaun sei sai izoladu liu tanba laiha ona semo entre Díli ho Singapura, ligasaun ida hosi ligasaun internasional atual tolu, ho ligasaun rua seluk, ba Bali, iha Indonézia ho ba Darwin (Austrália), sai hanesan karun liu iha mundu iha presu tuir kilómetru.

Ho monopóliu ida, dezde tinan 1999, iha ligasaun ba Darwin, AirNorth, hosi empreza boot australianu Qantas, kontinua nafatin ho presu tuir kilómetru ne'ebé aas tebes.

Ba fulan-Abril, folin indikativu hosi viajen ida ba-mai Díli-Darwin (kilómetru 722 ba perkursu ida) hanesan aas liu dolar amerikanu 600 (euro 530 resin).

Iha períudu hanesan, semo ida ba-mai entre Darwin ho Singapura (kilómetru 3.350 tuir perkursu ida) kusta besik metade.

Ligasaun ho Indonézia depende mós hosi monopóliu ida, iha kazu ne'e, hosi grupu Garuda ho marka sira Citilink ho Sriwijaya. Iha fulan neen ikus ne'e, folin sira hosi semo sira hosi transportador sira ne'e triplika maka'as tebes.

Viajen ida ba-mai entre Díli ho Denpasar, kapital Bali nian, (kilómetru 1.140 tuir perkursu) kusta liu dolar 590, bainhira semo ida entre Kupang, kapital Timor Osidental nian, ho Surabaya, sidade boot daruak iha Indonézia, (kilómetru 1.236 tuir perkursu) kusta de'it 150.

Ne'e signifika katak folin tuir kilómetru no tuir fatin Díli-Bali maka séntimu 26, sentímu 20 liu duké séntimu neen entre Kupang-Surabaya.

Ramos-Horta aproveita ona diskursu hodi husik rekadu ba Governu, hodi afirma katak "lideransa ko'alia barak kona-ba turizmu, hanesan alternativu ba petróleu ho gás", maibé deklarasaun sira "la reflete iha orsamentu".

"Ha'u hatene katak ema sira iha Ministériu Turizmu, iha tinan barak nia laran, luta hodi iha orsamentu di'ak ida, ne'ebé la to'o ba kustu operasional sira hosi ministériu rasik", nia deklara.

Eis-Prezidente no Prémiu Nobel Dame nian refere mós ba reuniaun ne'ebé halo foin lalais ne'e ho ministru Negósiu Estranjeiru, Dionísio Babo, kona-ba kampaña ida promosaun hosi investimentu iha Timor-Leste.

"Ha'u hatete ba nia katak ita tenki hahú hakohak, felisita investidor sira ne'ebé iha ona nasaun laran, ne'ebé mai bainhira ema ida lakohi mai, ne'ebé hetan ona risku sira no investe ona", nia hatete.

Ba proprietáriu sira hosi área hoteleiru nia husik mós rekadu sira hodi afirma katak folin sira tenki konsistente ho serbisu.

Prezidente HOTL nian, Tony Jape, ne'ebé harii ona sentru komersial timoroan boot dahuluk, Timor Plaza - ne'ebé iha mós unidade hotel ida -, asinala ona katak asosiasaun moris hodi hametin parseria sira iha área turizmu nian.

Hodi afirma katak prepara hela "hodi estabelese parseria ho Governu, ho setór privadu no mós ho parseiru sira seluk", Tony Jape ko'alia kona-ba fator sira ne'ebé afeta dezenvolvimentu hosi turizmu hanesan "estrada sira, asesu ba internet ka formasaun", hodi konsidera katak "laiha empreza ida mesak, laiha organizasaun ida mesak, laiha parseiru ida no mós Governu ida mesak maka konsege loke dalan".

Lusa | iha Sapo TL
PARTILHAR

Author: verified_user

Publicação luso-timorense sem fins lucrativos

0 comentários: