Membru UPM La Hatene Nani Tasi, Tenki Prontu Simu Konsekuensia

DILI -  Komandante Unidade Polísia Marítima (UPM), Superintendente Lino Saldanha hatete, doutrina polísia marítima nian tenke nani tasi, kuandu la hatene, tenke prontu mate.

Unidade Polísia Marítima (UPM)  hosi klase 16 hamutuk ema na’in 20 maka tuir formasaun bázika kona-ba nani tasi durante loron 20 nia laran.

Komandante UPM, Lino Saldanha esplika, membru UPM hamutuk 155 ne’e hotu-hotu tenke obrigasaun hatene nani tasi.

“Tanba ami nia doutrina maka hanesan ne’e, primeiru prontu atu bokon, segundu prontu metan, terseiru prontu servisu iha ekipa, kuartu prontu kumpri lei no orden, kintu prontu mate kuandu nani la hatene, tanba ne’e maka formasaun nani tasi ne’e hanesan formasaun báziku ba membru hotu-hotu katak se de’it maka iha unidade ne’e tenke hatene nani tasi,” Komandante Unidade Polísia Marítima, Superintendente, Lino Saldanha ba Timor Post iha Lecidere, Sesta (09/09).

Lino dehan, formasaun espesializasaun ba unidade foun sira ne’e fulan tolu hamutuk iha área 6 maka hanesan, rekoñesimentu unidade tanba membru sira foun tama ne’e tenke hate uluk uniade ninia natureza ne’e durante semana ida, tuir maka exersisiu fisiku ne’e to’o semana rua.

Nune’e mós nani tasi ne’e to’o loron 20, formasaun iha aula atu estuda kona-ba estrutura lei.

Membru UPM mós estuda lei UNCLOS ka konvensoens internasionál kona-ba tasi nian, tanba UPM tenke hatene lei UNCLOS.

Tuir mai, sei lori sira ba iha Ataúro hodi halo marsa ezerísiu, ikus liu maka enseramentu kursu ne’e sei lori Boiña ba tau iha tasi laran maka sira nani ba to’o ba foti tiha Boiña maka nani fila-fali mai.

“Fó formasaun hanesan ne’e para aban bainrua sira la’o iha dalan maka sira taka boiña ne’e karik sira orgullu no respeita boiña ne’e, tanba boiña ne’e mós sira ba foti ho mate, tanba kuandu nani tasi ne’e só ema ne’ebé is boot maka ba, kuandu la hatene nani tasi bele mate iha tasi klaran,” tenik nia.

Komandante Lino Saldanha esplika, membru sira nani kuaze metro 1800, membru hirak ne’e mai hosi Aileu, Bobonaro, Ainaro, Viqueque inklui Rejiaun Oe-Cusse, hamutuk ema na’in 20.

“Ami iha unidade UPM ne’e bolu tuir klase, 2013 nian ne’e bolu klase 13, 2014 nian ne’e ami bolu 14, 2015 nian ne’e ami bolu 15, maibe sira agora dadaun tuir hela formasaun ne’e bolu klase 16 tanba sira ne’e tinan 2016 nian,” katak nia.(mj4)

Timor Post