KAZU ASALTA MALU IHA HERA, SUSPEITU 10 KONTINUA SAI ‘BURONAN’

Komandante Jeral Polisia Nasionál Timor Leste (PNTL), Komisáriu Julio Hornay informa katak, kazu asalta malu entre grupu artemarsiais iha Hera foin lalais ne’e, PNTL kaptura ona suspeitu na’in walu (8) no na’in sanulu (10) mak kontinua sai buronan ka fujitivu Polisia nian.  No na’in 8 ne’ebé Polisia kapturadu ne’e, entrega ona ba justisa hodi prosesa tuir lei ne’ebé vigora.

“Akontesementu ne’ebé barak liu ne’e, mak akontesementu kona-ba artemarsiais, iha kazu Hera, rezulta uma lima ahi han, motor rua hetan sunu, motor ida ema estraga. Suspeitu na’in 8 ita kaer tiha ona, agora aprezenta ba tribunal, sei iha mandadu kapturasaun tan ba na’in sanulu (10) atu kaptura ba prosesu,” informa Julio Hornay ba jornalista sira iha Palácio Prezidensia Repúblika Aitarak Laran Dili, Kinta (10/11), hafoin hasoru malu ho Xefi Estadu Taur Matan Ruak.

Konaba sorumutu ho Prezidenti Repúblika ne’e, Komandante Jeral PNTL ne’e esplika katak, nia ho Segundu Komandante PNTL, Komisáriu Faustino da Costa   informa ba PR Taur  kona-ba, situasaun jeral seguransa iha rai laran nian, nomós eleisaun ninian, i akontesementu balu ne’ebé akontese iha fulan Outubru nia laran.

Julio Hornay afirma, problema ne’e mai husi grupu artemarsiais sira mak ataka malu, PSHT ho KERA SAKTI.

“Ita baku malu oho malu manan saida, ita ho ita mesak Timoroan de’it, sé bele karik, ha’u husu ba ita nia joven sira, hapara tiha buat ida sona malu ne’e, tanba ita la manan buat ida, ita lakon mak iha, terus mak iha, no terus ba familia mak iha,” katak Julio Hornay.

Nia haktuir, situasaun ba oin ne’e, PNTL kontinua halo antisipasaun ho aumenta volumentu patrullamentu, no halo kapturasaun ba suspeitu sira hodi entrega ba justisa.

Julio Hornay esklarese, membru artemarsiais ne’ebé mak polisia kaptura iha Batugade, agora dada’uk iha hela prosesu investigasaun.

“Ita sei haree, balu ne’ebé mak foin dada’uk ba ne’e mak involve iha laran, ita sei konfirma fali ho dadus sira ne’ebé mak ita hetan iha Batugade,” tenik Julio Hornay.

Nia haktuir, rezolusaun Governu nian kona-ba taka artemarsiais ne’e mak Polisia ezekuta, no kuaze ema barak ona mak polisia kaptura hodi aprezenta ba tribunal.

“Maibé tribunal desidi hodi liberta, husu ba tribunal, tanba saida, rezolusaun ne’e nia aktus kriminalidade iha atu ka laiha. Só tribunal mak bele responde, ami ezekuta rezolusaun ne’ebé Governu hasai,” katak Julio Hornay.

Nia haktuir, kestaun artemarsiais hamosu bebeik problema ne’e, la’os polisia mak tenki responsabiliza mesak, parte kompetente hot-hotu mak tenki responsabiliza, no responsabilidade másimu liu ne’e, hahú husi inan-aman.

“Ita hot-hotu labele laran metin katak, polisia iha ne’e, polisia nia responsabilidade, ita Timoroan hotu iha responsabilidade ba ida ne’e,” tenik nia.cos

Jornal Naciona