Ukun Na’in Presiza Vontade Boot Buka Tuir Vítima Sira

DILI, (ANTIL) - Komité 12 Novembru esforsu maka’as ona hodi buka tuir joven sira ne’ebé lakon iha Masakre Santa Cruz 1991 maibé la konsege deskobre. Tanba ne’e, ukun na’in sira presiza iha vontade boot liu-tan atu buka tuir vítima sira.

“Tuir ami família vítima nia hanoin, importante ba Komemorasaun Masakre Santa Cruz la’ós maka mensajen de’it maibé iha ida maka sidauk responde loloos maka vítima lubun sidauk hetan nia paradeiru,” João da Silva “Choque” nu’udar alin hosi vítima Francisco Binaraga ne’ebé mate iha Masakre Santa Cruz 1991 ba ANTIL iha nia hela fatin, Becora, Dili, Sesta.

João informa nu’udar família matebian sei la ezije justisa tanba justisa hotu ona iha povu maioria nia desizaun liuhusi Referendu 1999, ne’ebé hili opsaun ba ukun rasik án. “Triste no kontente mós. Triste tanba maluk lubun mate no la hetan to’o agora. Kontente tanba objetivu ne’ebé sira hakarak konsege atinji. Prefere akontesementu violasaun ba direitu umanu ne’e para ona iha ne’e,” dehan joven ida ne’ebé iha tempu rezisténsia aswain iha Suku Becora ne’e.

Choque dehan Nasaun presiza ema matenek no badinas hodi kontribui ba dezenvolvimentu. Tuir nia katak tuda malu no oho malu la’ós solusaun ba Nasaun nia futuru. “Ita akompaña dadauk invasaun foun mai TL. Xinés, javanes, australianu, ect, nakonu iha ita nia rain hodi goza liberdade ne’ebé ita lori mai. Tan ne’e, ita hotu tenki haka’as án atu kompete ho ema sira ne’e,” nia sujere.

Nia husu ba joven sira atu keta lakon tempu demais ba baku no tuda malu. Gasta enerjia ba halo sasán ne’ebé maka di’ak ba ita nia án, família, komunidade no ba mós Nasaun, estuda maka’as. “Dalaruma ita bele infrenta kiak iha futuru mai tanba hahalok baruk ten no la estuda,” João tenik. (Jornalista: Xisto Freitas)

Foto: João da Silva “Choque”