SEI HALO DEBATE FINAL GLOBAL ALTERASAUN LPV

Prezidente Parlamentu Nasional (PPN), Aderito Hugo da Costa, hateten katak, iha tempu badak Parlamentu Nasional sei halo debate final global ba alterasaun Lei Pensaun Vitalisia (LPV).

“Hau hakarak hateten katak, alterasaun lei pensaun vitalisia diskute iha faze especialidade remata ona, ne’ebe hein halo ajenda submete ba diskusaun final Global,” hateten Prezidente PN, Aderito Hugo da Costa ba Jornalista sira hafoin abertura ba seminario Panorama Orsamental 2017 nian iha salaun Hotel Novo Turismo, Dili, Kuarta (09/11/2016).

Nia hatutan, maske ajenda PN nian nakotu, maibe sei esforsu para hare espasu mamuk hodi aproveita loron ida atu aprova lei refere.

Iha parte seluk, prezidente PN ne’e dehan, kona ba lei rai oras ne’e dadauk komisaun especializadas hala’o hela diskusaun. Lei rai difisil atu aselera, tanba na realidade loron ida aprova artigu ida, ne’e signfika katak lei ne’e importante ne’ebe presija hare didiak.

“Komisaun especializadas la’o nafatin, kuandu diskute lei sira ne’e, tempu limitadu teb-tebes, tanba iha lei barak ne’ebe mak sai mos importansia, maibe PN esforsu atu deskute klean, lei rai ne’e importante teb tebes, tanba ne’e maka sei hare didiak hodi nune’e bele benefisia povu,” dehan Aderito Hugo.

Aderito Hugo dehan katak, lei rai ne’e kaduka, nia hanoin katak tanba kaduka ne’e iha segundu diskusaun atu aselara lalais, maibe kontrario iha segundu debate ne’e maka kleur liu tan, realidade deit loron ida aprova arigu ida deit.

“Lei rai iha artigu 10 resin mak aprova ona, hau akompanha hela iha diskusaun ninia laran, ne’ebe ami sei nafatin esforsu an, maske ho ajenda ne’ebe mak akonu teb-tebes,” garante Aderito.

Entretantu, lei rai aprova ona iha faze jeneralidade, ne’ebe oras ne’e dadauk sei iha hela diskusaun iha faze especialidade. mia

Jornal Nacional