DILI,
(ANTIL) – Atu fó sertifikasaun ba profesionalizmu jornalista nomos rejistu
mídia sira, Konsellu Imprensa (KI) Timor-Leste – Indonézia, Sesta, (11/11) iha
Otel Execelsior Resort Praia dos Coqueros Dili, asina akordu hodi formaliza
akordu antes.
“Ami
halo ona konkordansia entre Konsellu Imprensa Indonézia ne’ebé servisu hamutuk
durante semana rua, nune’e, ohin formaliza MoU liu hosi Ketua Dewan Pers
Indonezia, Yosep Adi Prasetyo ne’ebé mai Timor-Leste”, Prezidente KI TL,
Virgilio Guterres ba jornalista sira hafoin serimonia asinatura.
KI
TL konsentra ba preparativu eleisaun ne’ebé hahú hodi identifika figura no
instituisaun ne’ebé mak bele hetan kompeténsia atu fó ezame ba jornalista sira
liu-liu ba ezame sertifikasaun nian.
Nia
esplika, kompeténsia KI mak sei atribui maibé bainhira halo teste ka akompaña
ema atu halo estajiu sei servisu hamutuk ho orgaun kompetente liu hosi sentru
formasaun jornalista no universidade sira hafoin bele fó sertifikasaun formál
ba sira.
“Tarjetu
ba meiadu tinan oin, iha ona grupu dahuluk ba jornalista sira ne’ebé iha ona
kartaun hodi fó sertifikasaun ba jornalista sira”, nia dehan.
Indonézia
prosesu halo teste fahe ba parte tolu hanesan jornalista foin tama (muda),
jornalista iha esperiénsia oituan ona (madia) no jornalista seniór (utama).
Hanesan iha Portugal mós fahe ba tolu hanesan estajiu, jornalista no
kolaboradór maibé prefere uza sistema Indonézia nian.
Formaliza
akordu ne’e hodi fó apoiu tékniku ba KI TL atu prepara esbosu ba mekanizmu
instituisaun KI.
Biban
ne’e, KI-TL ofisialmente distribui kode étika jornalista ba parseiru sira, asosiasaun
jornalista, mídia nain no mós sosedidade sivíl atu fó pareser hodi bele to’o
versaun finál.
Serimonia
ne’e hetan partisipasaun hosi Asosiasaun Jornalista sira, Nain ba Mídia,
Sosiedade Sívil, Universitariu no Jornalista sira hosi mídia ida-idak. (jornalista:
Zezito Silva; editora: Rita Almeida)
Foto:
Prezidenti KI Indonézia, Yosep Adi Prasetyo ho Prezidenti KI TL, Virgilio
Guterres hafoin asina nota intendementu iha área Praia dos Coqueiros, Sesta,
(11/11). Foto ANTIL/António Goncalves
Sem comentários:
Enviar um comentário