Marsa Forsada Relembra Istória Pasada

DÍLI, (ANTIL) - Grupu Aventureiru Timor-Leste (AGTL) sei hala’o longa marsa ka marsa forsada husi Mota-Ain ba to’o munisípiu Lautem iha ámbitu komemora loron proklamasaun indepedénsia, 28 Novembru ba dala 41.

Sekretáriu Estadu Administrasaun Estatál, Samuel Mendonça hateten, tinan 41 ba kotuk depois ita hasa’e bandeira RDTL proklama ita-nia indepedénsia, iha tempu ne’ebá, eroi sira halo longa marsa hanesan ne’e hodi ba ailaran halo rezisténsia.

“Halo funu barak mak mate no balun moris. Sira dedika sira nia vida ba rai ida ne’e hodi sai estadu indepedente. Tanba ne’e, atividade marsa forsada ne’e hodi relembra istória pasada,” Sekretáriu Estadu, Samuel Mendonça perante aventureiru sira no media sira iha Arkivu no Múzeu Rezisténsia Timor-Leste (AMRT), Sesta (11/11).

Barak mak la iha ona, la hamutuk ona ho ita maibé sei iha ida rua moris hela akompaña ita, akompaña konstrusaun estadu Timor-Leste nian. “Ita halo reflesaun tempu pasadu, hanoin tuir katak hanesan jerasaun foun hakarak saida mak atu halo ba ita-nia rain. Hanoin ba oin katak ita tenke sai juventude ida ne’ebé éroi ba dezenvolvimentu nian,” sekretáriu estadu ne’e hatutan tan.

To’ o ohin loron ha’u sei fó ordem ba administradór sira hotu, xefe postu administrativu sira, xefe suku sira hotu nune’e rute sira ne’ebé ita boot sira liu ba sira mós bele tau matan. Agradese tebes ba ita-boot sira nia boa vontade ne’ebé mak di’ak tebes hanesan juventude eroismu. Ita tenke hadomi malu, hadomi ita-nia rain.

Reprezentante xefe estadu maior jenerál, Kapitaun Fragata, João da Silva, afirma katak longa marsa ka marsa forsada hanorin ita iha unidade hodi to’o iha ita-nia objetivu tanba ne’e eziji dever morál no mentalidade oinsa atu ajuda malu entermude tau-matan no la husik malu hodi to’o iha objetivu no finalidade ida.

Ita-nia líder, ita-nia éroi ne’ebé oferta nia an, dedika nia an hodi bele liberta rai ida ne’e. Inisiativa ne’e pozitiva oinsa bele kontribui, oinsa prense dezenvolvimentu ba ita-nia rain. Motiva atu la’o ho ita-nia hakarak, ita-nia konsiénsia hodi to’o iha objétivu.

Koordenadór Grupu Aventureiru Timor-Leste, Elvino Alves informa, rute ne’ebé AGTL sei hala’o mak hahú husi Mota-ain ba to’o iha Munisípiu Lautem. Rute sira ne’e mak hanesan Mota ain, Ponte Nunura, Faularan, Fazenda, Darlete, Bazartete, Tibar, Tasi Tolu, Díli.

Husi Díli liu ba Metinaru, Manatutu, Laleia, Vemase, Baucau vila, Buibau, Samalari, Makalaku, Quelicai Vila, Matabean tutun, Haeconi, Baguia vila, Iliomar no ikus liu iha Lospalos fatin realiza serimónia 28 Novembru. Marsa ne’e rasik hala’o durante loron 17 nia laran.

Nia mós informa katak sira nia longa marsa ne’e hetan apoiu husi Grupu Jerasaun Patriota (GJP), Arkivu no Múzeu Rezisténsia (AMRT), autoridade seguransa hanesan Polícia Nacional Timor-Leste (PNTL) no Força Defesa de Timor-Leste (F-FDTL), Ministériu Administrasaun Estatál (MAE) Gabinete Prezidénsia Repúblika (GPR) nomós entidade estadu no privada sira seluk tan.

Grupu Aventureiru Timor-Leste (AGTL) harii bazea ba inspirasaun husi grupu Estudante Hadomi Natureza (ESHANA) ne’ebé harii iha 2008, iha Fakuldade Ekonómia no Jestaun (FEJ), Universidade Nacional Timor Lorosa’e (UNTL) no Akademia Hadomi Natureza (AKAHANA), UNTL nian inklui mós Juventude Hadomi Natureza (JHN). (Jornalista:Rafy Belo/Editor, Otelio Ote)

Foto: Grupu Aventureiru Timor-Leste (GATL) pose hamutuk ho Sekretáriu Estadu Administrasaun Estatál, Samuel Mendonça, Kapitaun Fragata F-FDTL, João Alves, reprezentante universitáriu sira inklui reprezentante husi instituisaun estadu no privada seluk molok atu halo longa marsa, iha Arkivu no Múzeu Rezisténsia Timor-Leste (AMRT), Sesta (11/11)//Foto. Luís Cs