PR Taur Husu Membru Komité 12 Novembru Labele Fahe Malu

DILI, (ANTIL) - Prezidente Repúblika (PR), Taur Matan Ruak, husu ba membru Komité 12 Novembru atu labele haketak malu maibé kontinua hamutuk hanesan tempu rezisténsia.

“Hanesan Prezidente Repúblika no hanesan imi nia Maun ne’ebé uluk hamutuk ho imi fakar ran ba ukun rasik án, hakarak hateten ba imi para imi hamutuk,” Xefe Estadu hato’o asuntu ne’e liuhusi nian deskursu iha komemorasaun Masakre Santa Cruz ba dala 25 iha Semitériu Santa Cruz, Balide, Dili, Sábadu (12/11).

Tuir Taur, katak fahe malu iha partidu no lisan laiha problema tanba ne’e ki’ik-oan liu kompara ho buat ne’ebé halibur ita. Halibur ita maka ita nia futuru no halibur ita maka ita nia oan sira nia futuru.

Nia dehan hanesan Prezidente no hanesan Maun ida la moe hateten buat ne’ebé la loos para hotu-hotu senti. Taur afirma katak uluk iha situasaun ida difisil ita la soe malu, maibé tanbasá agora tenki soe malu?

“Tanbasá ha’u hateten ida ne’e? Iha ha’u nia Gabinete, ha’u deside atu kondekora Organizadór 12 Novembru maibé imi balun hateten katak labele no hein lai. Ne’e signifika katak imi la hamutuk,” nia realsa.

Tuir eis gerileiru katak daruma iha oin ita hatudu buat di’ak maibé iha kotuk buat ne’ebé dodok ita subar tiha.

Iha okaziaun ne’e, Xefe Estadu presta omenajen ba família Masakre 12 Novembru ne’ebé jenerozu demais hodi fó oan sira sosa liberdade nasionál. “Ita hotu fó maibé imi fó liu tanba ita moris la fa’an no la sosa iha merkadu. Tanba ne’e, obrigadu barak. Lori imi ami moris. Lori imi nasaun moris,” Taur haklaken.

Iha Loron Nasionál Juventude ida-ne’e, Prezidente mós hato’o ninia saudasaun ba foinsa’e timoroan sira ne’ebé maka ohin hanoin hikas fali sakrifísiu eroiku ne’ebé halo hosi foinsa’e barak, hodi hamriik hasoru Timór nia okupasaun no luta ba libertasaun ita-nia rain no ita-nia povu.

“Ha’u fó omenajen ba memória hosi mártir sira Santa Cruz nian no foinsa’e hotu-hotu ne’ebé maka mate iha masakre sira seluk, iha Dili no iha fatin selu-seluk,” nia haklaken.

Liu tiha tinan 25 dezde 12 Novembru tinan 1991, aleinde rekoñesimentu ne’ebé uluk fó ba sira-ne’ebé ho aten brani prezente iha Santa Cruz, Prezidente Repúblika apela ba organizasaun juvenil tomak rezistensia nian atu halibur hamutuk nune’e memória koletivu trajédia 12 Novembru tinan 1991 labele haluha. (Jornalista: Xisto Freitas/Editor, Otelio Ote)

Foto: PR Taur hato´o nia deskursu iha Komemorasaun Masakre Santa Cruz ba dala 25 iha Semitériu Santa Cruz, Balide, Dili, Sábadu (12/11). Foto ANTIL/Xisto Freitas