Liberdade Imprensa TL Sei Iha Pergunta

Dili, (ANTIL) – Liberdade imprensa iha Timor-Leste (TL) sei iha pergunta balun, tanba relasiona ho jornalista nai rua hosi Mídia Timor-Post ne’ebé hetan prosesu julgamentu iha tribunál. Prezidente Konsellu Imprensa Republika Indonezia (RI), Yosep Adi Prasetyo, informa ba jornalista sira hafoin hala’o asina akordu iha Execelsior Resort Pantai Kelapa, Dili, Sesta (11/11).

“Jornalista nia servisu mak rekolla informsaun, hakerek notísia no emite ba públiku liu hosi orgaun komunikasaun sosiál maibé molok atu divulga iha koresaun liu hosi desizaun polítika redasaun hafoin publika” Xefe Konsellu Imprensa Indonezia, Yosep Adi Prasetyo informa.

Jornalista ne’ebé ba hatan iha tribunál, Yosep hateten, tuir lolos pesoál jornalista labele ba hatan direita, tanba ne’e responsabilidade instituisaun mídia nia.  Jornalista sira servisu ba interese públiku liu hosi emisaun informasaun ba komunidade sira ne’ebé hakarak hatene situasaun saida mak akontese iha rai laran.

Maske nune’e, prosesu julgamentu ne’ebé adia ba loron 2 fulan Dezembru, Xefe Yosep garante katak jornalista la tama prijaun tanba wainhira nia sala, mídia ne’ebé nia servisu ba tenke husu deskulpa, koima (denda) no la’os atu hatama nia ba prizaun.

Wainhira jornalista sala, tenke uza direitu resposta, direitu koresaun hodi husu deskulpa, wainhira ida ne’e mak seidauk sufisiente labele kondena jornalista maibé tenke husu ba midia.(Jornalista: Zezito Silva/Editor: Otelio Ote)