ESTRANJEIRU DOMINA HALO NEGOSIU IHA TL

DILI - Oras nee dadaun ema estranjeirus husi nasaun barak mak domina halo atividades negosiu ninian inklui loke loja boot iha Timor-Leste (TL).

Tuir Deputadu CNRT, Antonio Ximenes, iha Dili laran tantu ba too iha distritu, ema estranjeirus sira mak domina liu tiha ona, tanba ema sira nee loke loja boot, loke restorante no suku sapatu sira nee mos estranjeirus sira mak domina liu.

“Ita haree deit katak, loke warung sira nee mos ema estranjeirus sira mak barak liu, maibe ita nia Governu Timor-Leste mos presiza halo kontrolu maximu ba ema sira nee mai ho viza turista ka viza ser­visu ninian,” dehan Deput­adu Antonio ba STL iha Uma Fukun Parlamentu Nasional (PN), Dili, Kinta (07/05/2015).

Iha fatin hanesan, Deputa­du Bankada FRE­TILIN, An­toni­nho Bianco husu ba Go­vernu tenke halo kontrolu maxi­mu ba ema estranjeirus sira nee, liu-liu Xina sira nee, tanba Xina sira nee faan sira nia sasan laos deit iha Dili laran, maibe ba too iha distritu ka sub-distritu hotu iha teritoriu TL.

“Ita nia Gove­rnu tenke halo kontrolu maxi­mu ba ema estranjeirus sira nee, liu-liu  Xina sira nee, tanba Xina sira nee faan sira nia sasan laos deit iha Dili laran, maibe ba  too iha distr­itu ka sub-distritu hotu iha teritoriu Timor-Leste,” nia hate­ten.

Nunee mos Deputadu husi Bankada PD, Paulino Mont­eiro, hateten, ida nee hanesan komp­etensia Governu ninian atu bele halo kontrolu diak ba sidadaun estranjeirus sira nebe mak tama mai halo vida negosiu iha rai laran, maibe atu halo kontro­lu ba ema sira nee kompetensia Governu ninian.

“Hau hanoin ida nee hanesan kompetensia Gov­ernu ninian atu bele halo kontrolu  diak ba sida­daun estranjeirus sira nebe mak tama mai halo vida negosiu iha rai laran, maibe atu halo kontrolu ba ema sira nee kompetensia Gove­rnu ninian,” dehan Paulino. Jacinta Sequeira

Suara Timor Lorosae