US$ 32 Mill La Merese Ba Uma MDG’s Ida – Xanana Rekoñese Iha Fallansu

Reprezentante povu iha Parlamentu Nasional (PN), kestiona kualidade uma Millenium Development Goal’s (MDG’s) ba vulneravel sira, tanba kada uma ida Governu gasta osan US$ 32 mill.

Francisco Branco husi bankada FRETILIN hatete katak, iha buat balu ne’ebé lalos ba uma vuneravel ka MDG sira ne’e, tanba kada uma ida Governu gasta osan US$ to’o fali 32 mill.

“US$ 32 mill ne’e, ba ami nia pontu revista, ida ne’e lalos, tanba uma vuneravel ho ho realidade povu Timor Leste nian ne’ebé se mukit no kiak, maibé halo uma ida hanesan ho osan US$ 32 mill, hau hanoin ida ne’e lalos ona,”dehan Francisco Branco iha Ministeriu Negosiu Estranjeiru i Koperasaun Dili, Kinta (14/5), bainhira partisipa iha enkontru Governu hodi define programa prioridades ba 2016 to’o 2017.

Tanba ne’e, Francisco Branco husu ba Governu atu hare fila-fali programa uma MDG sira ne’e, tanba presu ida ne’e, lamerese ba uma ida hanesan ne’e, no la merese atu fó uma ida hanesan ne’e, ba sosiadade vuneravel sira.

Tanba ne’e, Francisco Branco sujere ba Governu, atu ba futuru uma vuneravel sira ne’e, halo ho material husi natureza Timor Leste nian, hodi Governu labele depende barak liu ba importasaun semente.

Branco dehan, diak liu Governu muda uma MDG sira ne’e atu uja tezoru, tanba ida ne’e obsaun ida ne’ebé diak tebes, maibé tenki hare fali nia presu.

Hatan ba preokupasaun Francisco Branco nian ne’e, Ministru Planeiamentu Investementu Estratejiku, Kay Rala Xanana Gusmão rekuñese katak, material ne’ebé Governu uza ba uma MDG sira ne’e, iha problema.

“Ami mós dehan, uma ida US$ 32 mill ne’e labele duni. Maibé MDGs ne’ebé atu konsentra populasaun atu asesu ba bee mós, asesu ba edukasaun, asesu ba sira nia kontrolu rasik, no asesu ba saúde i merkadu,”rekuñese Xanana.

Nia dehan, Governu bele halo uma lima iha fatin ida no uma lima iha fatin seluk tan, atu sosiadade bele moris diak liu tan, maibé komunidade rasik sei susar atu asesu ba bee mós, Saude no buat seluk tan, tanba Governu labele monta klinika no eskola iha kada uma lima.

Maibé Xanana dehan, Governu sei hare fali programa uma ba vuneravel ka MDG ne’e, tanba nia mós rekuñese katak, iha buat balu la’o lalos.tap

Jornal Nacional