Igreza Bandu Fen-Laen So’e Malu – PM Rui: “So’e Malu Ne’e Sala Bo’ot”

Igreja Katólika bandu atu feto ho mane ida so’e malu, bainhira simu ona sakramentu kaben iha Altar oin.

Bispu Dioseze Baucau, no assume mós Administradór Apostoliku Dioseze Dili Don Basilio do Nascimento hatete katak, matrimóniu hanesan sosiál (bakti) ida, feto ho mane moris hamutuk, atu nune’e sira na’in rua nia estatutu ne’e, sosiedade rekoñese moris nu’udar fen ho laen.

“Hodi dehan katak labele soe malu, tenke moris to’o finalidade, ne’ebé ema haree familia ne’e uma kreda Katólika katak labele soe malu, tenke moris ho finalidade, ne’ebé ema haree buat ida familia ne’e uma kreda nia invensaun,”dehan Dom Basilio.

Dom Basilio dehan, selebrasaun loron familia ne’e, nia objetivu oinsa grupu ida naran Katólikus, ne’ebé lori Nai Jesus Kristu nia sinál, oinsa hanoin atu fó sasin kona-ba instituisaun ida familia ne’e, maibé tuir prespektiva Katóliku sira nian.

Dom Basilio dehan, bai-bain ema koalia temi familia. ida ne’e pensamentu ema nian la hanoin loos de’it ba familia sakramentu, maibé Uma Kreda mak forma tiha instiutisaun ida ho naran Familia ne’e.

Maibé tuir loloos moris vida ne’e kompostu husi familia, matrimóniu, no sakramentu. Don Basilio esplika, familia hanesan sosiedade natural ida ne’ebé estavel entre mane ho feto iha komplementalidade iha sexu, atu hodi bele kontribui ba iha kriasaun.

Ida sakramentu ne’e, molok Jesus moris familia iha ona. Jesus mai ne’e dehan entre feto ho mane ida tenke tuir lei naturál sosiál, atu nune’e simu sakramentu ne’e hanesan sarani tuir doutrina Kristu nian.

“Tanba dala barak ema koalia familia ne’e, uma Kreda maka inventa tanba ne’e maka dehan, nusa mak familia tenke moris tuir uma kreda hanorin. Ha’u hanoin ho selebrasaun ne’e ita nu’udar sarani lori Jesus Kristu nia ren to’os ne’e hodi hanoin hamutuk, oinsa maka Katolikus oan sira moris iha instituisaun familia ne’e hodi serve ba umanidade,”katak Dom Basilio.

Iha parte seluk, Primeiru Ministru Rui Maria de Araújo hatete katak, Dom Basilio nia mensazen ne’e klaru katak, hanesan sidadaun, familia ne’e, hanesan nukleu sosiadade ninian, no familia ne’e tau hamutuk feto ho mane ida liu husi instituisaun ne’ebé maka hanaran matrimonio.

“Hanesan sarani, familia ne’e laos deit sosiadade, laos deit matrimonio, maibé familia ne’e mós sakramentu ida. sakramentu kaben lolos ne’e indismuvel, labele fahe,”katak PM Rui Araújo iha Largo Lecider Dili, Sabadu (16/5).

Tanba Timor-oan hotu maioria ema sarani, maibé iha sarani barak depois simu tiha sakramentu kaben, infrenta difikuldade. Maibé Rui Araújo dehan, tuir sarani lolos ne’e, maske infrenta difikuldade saida deit mós, labele fahe malu.

Maibé Xefe Governu ne’e dehan, realidade ne’ebé maka iha, ema barak maske kaben ona, sira la konsege moris hamutuk to’o fin. Entaun Rui Araújo dehan, mensagen igreja nian ne’e importante tebes ba sarani hotu kona-ba divorsiu ne’e.

Rui Araújo relata, tuir doutrina igreja Katolika nian katak, ema sarani ida bainhira simu ona sakramentu kaben, sakramentu ida ne’e labele hafahe ona.

“Kuandu fahe malu depois ba moris hamutuk fali ho ema seluk, ida ne’e bolu dehan adultery ona, ida ne’e signifika halo sala bo’ot,”katak Rui Araújo.tap

Jornal Nacional