DIAK LIU PR TAUR RONA POVU

 

Prezidente Repúblika (PR), Taur Matan Ruak, diak liu rona povu nia interese no akomoda povu nia hanoin antes deside harii partidu politiku.

Membru Parlamentu Nasional nu’udar mos Xefi Bankada PD, Maria Lourdes Besa, hateten, PR Taur iha direitu politiku atu harii partidu no involve iha partidu, maibe presiza mos rona povu nia hanoin atu la bele hakat sala no bele hetan votus konfiansa husi povu.

‘’Kuandu harii partidu tenki hetan votus mai husi povu. Ita hotu-hotu iha direitu atu hari partidu no atu buka ita nia dalan, maibe ha’u nia hanoin mak ne’e PR Taur iha direitu tomak atu haree ba oin nia atu la’o oinsa, maibe nia tenki rona povu,” hateten Deputada Maria Besa hodi responde JN-Diário iha PN, Tersa (26/05/2015).

Nia fiar katak, figura PR Taur nian sei foti desizaun ne’ebe justu no diak ba povu nia interese no sei haree ou hili dalan ne’ebe maka los ba nia an rasik no mos ba povu nia diak.

Nia hateten, karik PR Taur harii nia partidu konserteza sei iha impaktu bot, tanba prezidente Taur laos lider ida ne’ebe foin mosu, maibe lider ne’ebe tuan I nia mos konsege halo prezidensia ida ne’ebe nakloke no hakbesik ba povu konserteza iha impaktu bot iha sela politika agora.

Iha fatin hanesan deputadu Arão Noe husi Bankada CNRT hatete, komunidae iha direitu atu espresa sira nia hanoin ba PR Taur, mas harii partidu ne’e mos ema hotu-hotu iha direitu.

‘’Taur Matan Ruak hanesan Preszidente Republika labele harii partidu, tanba sei asumi hela kargu hanesan Prezidente Republika, mas hanesan sidadaun bain-bain iha direitu tomak atu harii partidu bainhira deit kuando nia hakarak, ejijensia komunidade ne’e prezidente Taur rasik mak bele responde,’’ hateten Deputadu Arão.

Nia hatutan, atu harii partidu ou lae, depende ba PR Taur, maibe tuir parte legal bainhira nia hanesan sidadaun Timorense halo tuir regras ne’ebe regula iha nasaun Timor kona ba harii partidu.

‘’Karik nia harii partidu iha influnesia ne’e tuir ema ida-ida nia interpretasaun, ema ne’ebe harii partidu ne’e mak nia interpretasaun ne’e onisa ba oin nia harii partidu ne’e iha infulensia ka lae,’’ koalia deputadu Arão. Lia

Jornal Nacional