MADRE MARISA ‘TAMA GAIOLA’ JORGE TEME

Madre (Me.) Marisa Fernandes hateten katak, nia parte monu “tama gaiola’ eis Ministru Administrasaun Estatal (MAE) aktual deputadu Parlamentu Nasional husi bankada Frente Mudanca, Jorge da Conceição Teme nian, tanba sai sasin prosesu fa’an no hola rai iha loron 8 setembru 2014 iha Aldeia avansa Perumnas, Suku Bairo Pite, Postu Administrativu Dom Aleixo, Munisípiu Dili.

Monu ‘tama ba gaiola’ Teme nian tanba rai ne’ebe maka hola husi Jorge Teme hodi apoiu ba Associação Menino Jesus (AMJ), deskonfia hetan ajudus husi doador no Governu maibe iha surat hola rai nian deklara rai refere partense ba propriedade Jorge Teme nian.

Madre Marisa haktuir, nia parte sai sasin iha momentu hola rai, tanba momentu ne’eba AMJ emfrenta problema, maibe ikus mai tuir informasaun ne’ebe maka nia parte asesu katak, rai ne’e laos apoiu husi Jorge Teme maibe husi doador no Governu.

“Antes hola rai ne’e ha’u mós sai saksi ba rai ne’e, maibe ikus mai ha’u hatene ajudus ne’e husi doador sira ba labarik (orfaun) ha’u mós hakfodak, seandainya ha’u hatene antes ajudus ne’e ba labarik oan sira, ha’u la asina sai sasin ba surat ne’ebe maka prepara hanesan ninian (Teme) privadu,”afirma Me. Marisa Fernandes Ba JN-Diário iha Balide Dili, Tersa (26/05).

Me. Marisa Fernandes dehan, iha momentu sai sasin laos obrigatoriu, tanba iha momentu ne’e rai ne’ebe hola husi Jorge Teme atu ajuda duni ba AMJ. Iha momentu ne’e Me. Marisa ho madre Maria Fátima sira nain rua maka sai sasin.

Husu kona-ba orsamentu no doasaun husi ne’ebe? nia parte labele fo sai ba publiku tanba kazu ne’e relata ona iha Ministériu Públiku.

“Ema sira ne’e to’o rasik mai ami nia fatin no hatudu an katak sira ajudus hanesan ne’e ba AMJ tanba ne’e to’o ikus mai nia (doador-red) sei deklara,”haktuir tan Madre Marisa.

Antes ne’e, Rai nain Jacob da Costa de Jesus haktuir, partisipasaun iha prosesu negosiasaun hola rai perumnas, Jorge Teme akompaña husi Madre nain rua ho lori kedas osan ho montante 25 mil dolares Amerikanu.

“Prosesu hola rai, partisipasaun iha momentu ne’e nia (Teme) sei Ministru ESTATAL hela akompaña madre nain rua, no nia mai lori kedan osan, ha’u nia rai atu sosa, ha’u prontu tanba ha’u nia rai ha’u atu fa’an ho montante 25 mil dolar amerikanu,”afirma rai nain ba jornalista iha hela fatin, Sabado (23/05).

Kontroversial mosu iha prosesu hola rai maka, rai ne’ebe hola tau nia oan nia naran maibe aman (Teme ) maka asina laos oan maka asina.

“Nia dehan hola rai, atas nama nia oan nia naran, ok nia maka asina, nia lori osan mai ha’u fa’an ha’u nia rai,”Jacob haktuir tan.

Iha parte seluk, Madre Marisa Informa mós katak, vizita eis primeiru Ministru aktual Ministru Planeamentu Estratejiku Dezemvolvimentu, Kay Rala Xanana Gusmão ho Ministeriu Solidariedade Sosial (MSS) mai fatin Congregasaun Emitutu Jesus (CEJ), fatin ne’ebe labarik sira husi Orfanatu AMJ dadaun ne’e hela ba tanba Kay Rala Xanana gosta anima labarik sira laos tanba Madre sira.

“Koana-ba ba problema ne’e sira mai fo perhatian ba labarik sira, tanba labarik sira hanesan future nasaun no Igreja, tanba ne’e marka sira nia prezensa no ha’u agradese tebes ba Governu ne’ebe maka tau matan ba labarik sira,”haktuir Madre Marisa.

Madre Marisa mós rekoñese, liafuan ne’ebé deputadu Jorge Teme hatete dehan katak nia laos madre no sai ona husi Kongregasaun FCJ ona, tanba ne’e, nia parte la satisfeitu ho liafuan husi Jorge Teme.

“Nu’udar Timor oan lolos ne’e fo apoiu ami, dehan sai tiha ona sai tiha ona, maksudnya apa (Intensaun saida)? Ami Timor oan ami laos estranejeiru, ami perjuan baa mi nia pangilan, ha’u 23 tahun (tinan) sai madre maibe ha’u sai husi CEJ tanba ha’u defende lia los,”haktuir Madre Marisa.

Madre Marisa sente triste tanba durante ne’e partisipasaun ba prosesu ukun rasik-an hamutuk ho veteranus katuas Tuloda, Kranik, komandante F-FDTL Falur Rate Laek.

“Ema dehan hasai batina tama ai laran, ha’u dehan ha’u la hasai, berjuang ba lialos ha’u la hasai ha’u lori ba nafatin, biar bapa sira tiru ha’u mos ha’u la tauk ba nafatin maibe ikus mai Jorge Teme insulta ami tirste tebes,”nia koalia ho mateben nakonu.

“Memang ami sai duni, ami sai husi kongregasaun FCJ, maibe agora dadaun ami berjuang fali ba ami nia kongregasaun Menino Jesus to’o ne’ebe deit tanba ha’u fiar amo bispo sei lori ami ba dalan los,”haktuir Madre Marisa.

Iha loron 25 fulan Agosto Me. Marisa hasoru malu ho Amo Dom Alberto Ricardo no mós iha loron 6 fulan Outobru 2014, no Amo Matebian ho kondisaun moras fo korajen nafatin katak servisu forte nafatin, fiar nafatin maromak.

Iha momentu ne’eba Me. Marisa defende Me. Maria Fatima ikus mai madre lideransa CEJ hasai sira nain rua. Maibe sira nain rua mos hato’o ona problema refere ba amo bispu Matebian Dom Alberto Ricardo.

Antes ne’e ne’e Asosiasaun ida naran Henrique Leven troka fali ba grupu labarik Asosiasaun Menino Jesus (AMJ) ikus mai Amu Bispu matebian Dom Alberto fo apoiu tanba ne’e kontinua hatais ropa madre FCJ.

“Amo bispu   hatete ha’u la haree ba imi nia hatais maibe ha’u haree ba imi nia fuan servi ba maromak. no iha momentu ne’e ami hasai faru FCJ hodi entrega simu faru Asosiasaun Menino Jesus liu husi retiru,”nia haktuir liafuan Dom Alberto.

Ikus mai amo bispo dom Alberto fila hikas ba aman maromak madre Marisa ho madre Fatima mos hasoru ona amo Bispu Dom Basilio do Nascimento maibe kontinua fo apoiu ba madre nain rua.

“’Bispo dom Ricardo maromak bolu ona, ami hasoru ona Amu Bispu Dom Basilio, Amo Bispu dehan katak ha’u apoiu nafatin imi nain rua harii nafatin, ha’u la taka ida,”Madre Marisa haktuir tan.

MSS Sei Re-integra Orfaun AMJ Nain 30 ba Familia

Diretora Reinsersaun Sosial Tau Matan ba Departementu Protesaun Labarik Ministeriu Solidaridade Sosial, Antonia Carmen da Cruz, hatete, Governu sei re-integra labarik sira husi Asosiasaun Menino Jesus (AMJ) ba familia tanba labarik hirak ne’e inan aman sei moris.

Problema ne’e, Deputadu husi bankada Frente Mudanca, Jorge da Conceição Teme duni sai Madre no labarik orfaun nain 30 husi Asososiasaun Menino Jesus (AMJ) ne’e, Governu liu husi Ministeriu Solidariedade Sosial (MSS) sei re-integra fali labarik nain 30 ba familia.

Tersa (26/05) ne’e, Diretora MSS Antonia Carmen, ofisialmente hala’o entrevista ba labarik husi AMJ kona-ba tanbasa maka tama iha asosiasaun, I sira mai ne’e sira nia inan ho aman hatene ka lae, toba fatin diak ka lae, han loron ida dala hira, hariis fatin sentina no be moos iha ka lae.

“Entre labarik sira ne’ebe maka muda mai iha Forum Komunikasaun Juventude (FCJ) ne’e so ida deit maka inan mate aman ba komarka,restu ne’e inan aman sei iha hotu, tanba ne’e ami sei re –integra labarik sira ne’e ba familia ida-idak,”afirma Diretora ba JN-Diário iha CEJ Balide hafoin entrevista labarik sira.

Nia hatutan katak, desde inisiu labarik sira sei hela iha Perumnas no to’o agora enfrenta problema MSS maka tau matan hamutuk ho CEJ, Nune’e hein labarik sira exame remata sei reintegra ba familia.

Nia dehan, nesesidade báziku maka hanesan Be laiha labarik sira tenke kuru, toba iha rai ,tanba ne’e MSS tenke halo intervensaun duni hodi lori sira mai tau provisoria iha FCJ para depois idak idak fila ba uma.

“Dadaun ne’e ami sei presiza tempu akompaña labarik sira tanba dadaun ne’e labarik sira sei eskola, sei kordena ho eskola ,kordena ho ofisial protesaun labarik director munisipal sira atu identifika inan aman atu halo re integrasaun labarik hirak ne’e ba sira nia familia”dehan tan diretora ne’e.

Iha fatin hanesan, Madre Marisa mos rekoñese katak, labarik sira ne’e inan aman sei moris duni maibe labarik sira ne’e nia parte simu husi Congregasaun Emituto Jesus (CEJ).

“Ha’u remata kuliah iha Kupang mai fali tugas iha Dili, labarik sira ne’e ha’u mai iha tiha ona iha madre CEJ nia liman, kuaze nain 12, ha’u husu ba madre sira katak labarik sira ne’e inan aman mate hotu duni ka lae, madre sira dehan balun inan mate ,balun aman mate I balun inan aman sei iha maibe,”afirma Me. Marisa.

Nia dehan ,balun ne’ebe maka inan aman sei moris maibe tanba inan aman sira labele sustenta oan, tanba sira presiza oan asesu ba edukasaun tanba ne’e maka madre sira simu.eby

Jornal Nacional