TESI FUUK SOLUSAUN KA VIOLASAUN DIREITUS HUMANOS?

Parlamentu Nasionál seidauk dehan fó limitasaun ba populasaun nia atividade. Só dehan de’it halo operasaun maibé la’os atu limita ema no depois baku ema. Sé ema halo krime polísia ba kaptura.

Operasaun kontra grupu Mauk Moruk la tuir lei. Iha operasaun ne’e, la’os elementu grupu Mauk Moruk de’it maka hetan impaktu maibé komunidade baibain barak sai vítima. Bainhira viajen ba distritu no sub-distritu la lori kartaun eleitorál, sei hetan pankada (baku) hosi oknum polísia sira. Pior liu, ferik no katuas sira ne’ebé ba to’os no natar mós hetan ameasas no presaun oi-oin bainhira la lori kartaun eleitorál.

La’os ne’e de’it. Komunidade sira ne’ebé maka fuuk naruk, oknum polísia sira tesi sira nia fuuk ho obrigatoriamente. Hahalok ida ne’e fó solusaun ba problema grupu Mauk Moruk ka violasaun direitus umanus?

“Ha’u dehan atetude no tratamentu ne’ebé halo hosi ajente estadu hanesan Polísia Nasionál Timor-Leste (PNTL) no Forsa Defeza Timor-Leste (F-FDTL) hatudu hahalok krime ba maluk sira iha Baucau ne’e nu’udar tratamentu krime tanba baku ema arbiru no tesi ema nia fuuk,” informa Diretór Asia Justice and Right (AJAR), José Luis Oliveira ba Matadalan iha nia kna’ar fatin Farol, Kinta (23/04).

Tuir Diretór AJAR katak sé sira ajente estadu entaun sira tenke atua tuir lei tanba ajente estadu ne’e tuir misaun no halo tuir lei no órden.

“Ita la haree hosi farda  maibé haree hosi hahalok nu’udar ajente estadu ne’ebé hala’o operasaun ruma ho objetivu katak oinsá atu hametin lei. Signifika katak atu obriga grupu ka ema seluk tenke respeita lei no hametin órden publiku,” nia dehan.

Oliveira informa, ko’alia kona-ba violasaun direitus umanus ne’e responsabilidade estadu tanba lei direitus umanus ne’e lei ne’ebé estadu halo no estadu maka iha konstituisaun RDTL la’os organizasaun naun governamentál maka halo

Nia esplika katak lei ne’e dehan labele baku ema arbiru, labele halo torturasaun, respeita ema nia vida. Ne’e hakerek ona iha konstituisaun, maibé agora hahalok la tuir buat ne’ebé nia promete no la tuir buat ne’ebé hakerek iha konstituisaun. Ne’e konsidera sira (ajente estadu) implementa lei ne’e la justu tanba iha impresaun (kesan) interese polítika maka domina liu. Dala barak interese polítika ne’e ba ema ida ka rua nian de’it.

“Ha’u dehan sira la justu tanba la implementa lei ho di’ak. Primeiru, operasaun ne’e rasik viola ona lei estadu de sítiu no estadu de emerjénsia. Bainhira forsa defeza atu tun ba terenu halo operasaun emerjénsia governu tenke husu Parlamentu depois Prezidente Repúblika deklara katak ne’e estadu de sítiu ka estadu de emerjénsia,” nia argumenta José Luis akresenta atetude baku ema no tesi ema nia fuuk sira ne’e parte ida bele hamihis konfiansa  povu nian ba ajente estadu sira tanba atu hetan povu nian konfiansa ne’e mosu bainhira tratamentu ba povu ho di’ak. Sé la di’ak ne’e susar atu hetan konfiansa bainhira povu ne’e iha laran moras ona.

“Hosi prespetiva polítika hahalok ajente estadu ne’e ita bele konsidera nu’udar traisaun ba povu tanba estadu ne’e harii liu hosi povu la’os ema balun ninia kusta, povu maka ba vota, povu maka ba partisipa, povu maka fó haan maun boot sira dezde uluk maka foin estadu ne’e harii” nia subliña.

Nia rekomenda ba nai ulun sira maka ne’e favor ida sira ne’e hatene-an nu’udar líder estadu la’os líder ba organizasaun kriminozu bainhira hasai órden tenke implementa ho di’ak no mós nai ulun sira iha obrigasaun atu halo tuir lei internasionál ne’ebé sira ratifika hanesan direitu sivíl polítiku  konvensaun internasionál kontra tortura no tuir sira nia komprimísiu.

Iha parte seluk, Dosente Fakuldade Siénsia Sosiais, Camílio Ximenes Almeida haforsa katak instituisaun ida ne’ebé maka la kumpri ona lei no órden klaru katak kontra direitus umanus tanba hahalok ka atetudi ne’ebé polísia no F-FDTL sira halo ne’e la tuir lei.

Tuir nia katak atetudi ne’ebé sira (polísia) halo hanesan presaun psikolójika ida ne’ebé maka hasoru ninia povu rasik tanba dala barak tesi ema nia fuuk no baku ema ne’e tuir loloos labele akontese.

“Ha’u konsidera problema ne’e la’os problema polítika. Problema privadu kahur ona ho problema polítika,” nia tenik.

Tuir nia katak Konselu Revolusau Maubere (KRM) ne’ebé lidera hosi Mauk Moruk hanesan ideolojia hanesan mós ideolojia komunista ne’ebé uluk Timor Leste uza. Parte hosi Indonézia nia haree katak Timor ne’e komunista afinal ema Timor ne’e la’os komunista.

“Doutrina ka ideolojia kona-ba KRM ne’e de’it ema ne’ebé la sala sai inosente hotu maibé ita hatene didi’ak katak liafuan revolusaun ne’e katak halo mudansa,” nia afirma.

Camílio hatutan, klaru katak ema iha poder na’in sira maka iha agoránsia polítiku tanba ita haree parte primeiru maka aspeitu polítika no aspeitu krime. Polítika katak sé bainhira ema ida iha interese buat ruma hato’o ba sosiedade ne’e klaru iha liberdade no krime katak asaun sira ne’ebé ligasaun ho krime.

Emtretantu, Prezidenti Komisaun B trata assuntu Defeza no Seguransa, David Dias Ximenes hatete, Parlamentu Nasionál uluk dehan ajente estadu hanesan PNTL no F-FDTL ba halo aprosimasaun maibé la dehan atu fó limitasaun ba populasaun nia movimentasaun.

“Parlamentu Nasionál seidauk dehan fó limitasaun ba populasaun nia atividade. Só dehan de’it halo operasaun maibé la’os atu limita ema no depois baku ema. Sé ema halo krime polísia ba kaptura,” dehan Prezidente Komisaun B.

Pior liu, nia dehan, tesi tan ema nia fuuk. Tuir loloos, nia informa, ne’e labele tanba ne’e violasaun direitus umanus. Kuandu iha estadu desizaun, de sítiu no estadu de nesesidade Parlamentu la dehan ida ne’e. Parlamentu só dehan de’it operasaun de aprosimasaun la’os halo violénsia. (Mj5)

Matadalan