António da Conceição maka sai hanesan Ministru Edukasaun

VI Governu Konstitusionál foti desizaun hosi hili atuál Ministru Komérsiu, Indústria no Ambiente, António da Conceição hodi asumi kargu nu’udar Ministru Kordenadór ba Asuntu Sosiál no Ministru Edukasaun, tuir informasaun hosi Suara Timor Lorosa’e. 

Primeiru ministru Rui Maria de Araújo haktuir ba jornalista sira katak Nia aprezenta ona nomeasaun hosi António da Conceição ba Prezidente Repúblika hodi troka fatin ne’ebé molok ne’e okupa hosi matebian Fernando Lasama de Araújo, no xefe Estadu konkorda.

“Prezidente Repúblika aseita ho proposta hosi naran ne’ebé aprezenta hodi aokupa kargu Ministru Edukasaun. No Constâncio Pinto, Visi-Ministru Komérsiu, Indústria no Ambiente maka sei troka António da Conveição no ninia visi maka Nino Pereira, nu’udar ema ne’ebé aprezenta hosi Partidu Demokrátiku”, dehan Primeiru ministru.

Tuir xefe Governu, atu troka kargu ruma hosi Governu nian, ninia kritériu balun maka iha ona koñesimentu kona-ba governasaun nomós domina iha sistema serbisu nian.

SAPO TL ho STL