Patrullamentu hosi Polisia no Militar iha Tasi Mane Paradu

DILI - Unidade Polísia Marítima (UPM) ho Komponente Naval F-FDTL labele hala’o patrullamentu iha tasi mane tanba ró ne’ebé durante ne’e sira uza át hotu ona.

Ró ki’ik lansa hamutuk 17 iha UPM, no ró naton hirak ne’ebé Timor Leste hetan apoiu labele halo ona operasaun tanba a’at no balun tenke para hodi halo manutensaun. Entretantu ró rua ne’ebé governu sosa hosi Xina maka sei halo hela operasaun maibé la tó tasi mane tanba ró nia kapasidade ki’ik hela.

Ministru Defesa (MD), Cirilo Cristovão ba Jornalista sira informa, nia parte propoin ona osan iha orsamentu jerál estadu tinan 2017 hodi halo manutensaun.

“Ró agora para de’it iha Behau. primeira faze, governu halo ona manutensaun, kontinuasaun ba segunda faze ita propoin osan rihun $700 iha orsamentu jerál estadu tinan oin mai atu kontinua ba manutensaun segunda faze hodi kompleta,” Cirilo ba jornalista iha nia kna’ar fatin Fatuhada, Kinta, (20/10).

Iha oportunidade, Cirilo hatete, dezafiu ba komponente naval maka fasilidade liuliu ró bo’ot ne’ebé bele halo patrullamentu to’o tasi mane, tanba sé la’e atividade peskas ilegais kontinua la’o. 

“Ita haré ba nasaun Indonézia iha ekipamentus di’ak tebes no iha ró boot, mas peska ilegál kontinua iha, ita nia esforsu hanesan estadu, la’ós  atu asegura de’it  peska ilegál, maibé atu asegura tomak ba soberania país ida ne’e tomak,” Cirilo subliña.

Entretantu Komandante Jerál Polísia  Nasionál  Timor Leste (PNTL), Komisáriu  Júlio  da Costa Hornay dehan, durante fulan hirak liu ona UPM labele halo patrullamentu tanba ró a’at hotu.

“Ita nia UPM nia ró hamutuk 17 maka a’at hotu,” Júlio  ba Jornalista iha Batugade, Kinta (20/10).

“Agora fulan ida ne’e ita halo manutensaun. Ha’u rona di’ak ona ita sei halo inpeksaun sé di’ak hotu ona sira (UPM) bele uza ona hodi halo pattullamentu iha tasi,” dehan Júlio.(gus/way)

Timor Post

PD Fahe Informasaun Lideransa ba Estudante Siénsia Polítika

DILI, (ANTIL) – Partidu Demokrátiku (PD) liuhusi nia Sekretáriu Jerál, Mariano Sabino Asanami fahe informasaun lideransa ba estudante departamentu Siénsia Polítika, Fakuldade Siénsia Sosiál, Universidade Nasionál Timor Lorosa’e (UNTL) hodi mellora estudante sira nia hanoin atu sai líder ne’ebé mak di’ak iha futuru.

“Universidade fatin ne’ebé mak fó informasaun, aprende no asegura nasaun ne’e ba oin,” Sekretáriu Jerál PD, Mariano Sabino Asanami perante estudante siénsia polítika iha Kampus Kaikoli, Kinta, (20/10).

Sekretáriu Jerál ne’e hatutan tan, universidade no estudante presiza hatene programa partidu no saida mak partidu tan funsaun partidu nu’udar instrumentu ba kadernizasaun.

“Informasaun nu’udar instrumentu hodi luta ba povu no sosiedade. Akademia mak fatin ida ne’ebé neutru liu no sai fatin hodi analiza “tasak” atu haree ba partidu no nia lider sira,” nia hateten.

Iha nia intervensaun, Sekretáriu Jerál PD ne’e mós akresenta katak Polísia Nasionál Timor-Leste (PNTL) no FALINTIL–Forsa Armada Libertasaun Nasionál (F-FDTL) hala’o funsaun públika, nu’udar instrumentu ne’ebé serve ba povu, nune’e labele partidariza.

“Partidu polítiku eziste nu’udar instrumentu hodi serbi estadu, estadu ne’ebé mak sai hanesan ema hotu nian,” nia akresenta. Hodi hatutan, ema ne’ebé iha baze bele sai “Ai kakeu” tanba ita-nia kondisaun, maske ema matenek maibé iha partidu ema la uza, la hetan buat ida ho nune’e ema hili dalan seluk.

Ho nune’e, nia hateten ba estudante sira katak hanesan jerasaun uluk sira iha esperansa boot ba jerasaun foun ne’ebé iha idaidak nia fatin hodi serve nasaun ne’e.

“Labele haree ba ida ne’ebé mak uluk ka di’ak liu ou eroi liu. Jerasaun foun imi iha dezafiu ida ne’ebé própriu no lori nasaun ne’e ba oin,” Sekretáriu jerál ne’e husu. Jerasaun foun tenke iha nia dezafiu rasik no iha responsabilidae rasik.

Iha fatin hanesan, estudante, Rumão Piedade Mendonça apresia tebes ba prezensa partidu politiku sira hodi bele mai fahe informasaun kona-ba programa politiku no oinsá atu sai lider ne’e di’ak no fó informasaun kona-ba luta lideransa sira nian iha tempu okupasaun Indonézia no klandestina.

“Ami kontente ba lideransa ne’ebé ho hanoin di’ak mai fahe ninia matenek hodi ami bele prepara ami nia-án no bele lori buat di’ak ruma ba sosiadade no nasaun ida ne’e,” hateten estudante Rumão Piedade.

Nia hatutan katak tanba situasaun ne’ebé agora la’o, ema barak haree liu ba figura, laharee ba progama partidu nian ne’ebé mak atu dezenvolve rai ida ne’e.

Estudante Rumão Piedade mós akresenta, estudante nu’udar ajente transformativu no presiza rona komprimisiu partidu polítiku sira nune’e bainhira hetan ukun partidu politiku sira la-kumpri sira nia komprimisu ne’e, estudante sira labele nonok hodi fó opiniaun ba partidu sira hodi realiza nia komprimisiu hodi bele kontribui ba dezenvolvimentu nasionál.

Prezensa Asanami tanba hetan konvite husi estudante Departamentu Polítika Públika, Fakuldade Siénsia Sosiál, UNTL no hetan partisipasaun másimu husi estudante sira.

Iha biban ne’e marka mós prezensa husi lider ka Portavoz Ofisiál Partidu Libertasaun Populár (PLP), Abel Pires da Silva hodi hato’o mós nia intervensaun. (jornalista: Rafy Belo; editora: Rita Almeida)

Foto: Mariano Sabino

Redus Mal-nutrisaun, Povu Ejiji Estadu Hamos Pensaun Vitalisia

HATUQUESSI – Atu redus Malnutrisaun iha Timor Leste neebe maioria mai husi Labarik kiik no feto, Povu Suku Hatuquessi ejiji Estadu atu hamos pensaun vitalisia ba ukun nain sira.

Preokupasuan nee fo sai husi Povu Hatuquessi, Luis dos Santos katak nia parte rona malnutrisaun neebe mak iha Timor Leste, maioria hetan husi Labarik no inan feton sira.

Hau rona mal Nutrisaun Aas iha ita nia rai no mos ami iha Liquissa tan nee atu redus malnutrisaun ami husu estadu atu atu hamos pensaun vitalisia hodi hadia povu nia moris,” dehan Luis liu Sesaun husu no hatan Durante dialogu Prezidente Republika Taur Matan Ruak ho povu Suku Hatuquessi, Kuarta (19/10/2016).

Iha fatin seluk Povu Suku Tibar, Horacio da Conceição Araujo hatete nia parte akompania informasaun liu husi media, estudante no povu husu atu preve lei pensaun vitalisia.

Hatan ba Preokupasuan nee, Prezidente Republika Taur Matan Ruak hatete kada orgaun soberanu iha Timor Leste ida-idak halao ninia knar, tan nee parlamentu Nasional agora halo diskusaun makas kona ba lei pensaun vitalisia. Informasaun kompletu iha STL Jornal no STL Web, edisaun Sesta (21/10/2016). Timotio Gusmao

Suara Timor Lorosae

L4: Veteranus La Halo Korupsaun, Deputada Ilda Lakohi Jeneraliza

DILI – Tuir Veteranu Andre da Costa (L4) katak korupsaun neebe mak buras iha Timor Leste, komete husi membru governu sira duke husi veteranus.

Tuir L4 katak ema barak mak kestiona korupsaun no dalaruma hare CAC no tribunal bolu ona ema ida, hodi justifika ninia pozisaun ba iha CAC no Ministeriu Publiku.

Balun Prezidente Parlamentu, balun Ministru ka Ministra, balun Vise Ministru balun, Sekretariu Estadu nee kerdizer buat ruma sala iha neeba,” dehan L4 ba STL iha ninia Edifisu UNDIL, Kinta (20/10/2016).

Nia hateten, too oras nee realidade hatudu katak komete korupsaun laos veteranus maibe komete husi membru governu, hatudu katak veteranu hakarak liberta no ukun povu no rai ida nee hodi hasai husi povu kiik no kiak husi terus no mukit.

Iha fatin ketak, tuir Deputada Ilda da Conceição katak koalia konaba korupsaun, presiza iha faktus katak se mak halo no se mak la halo. Informasaun kompletu iha STL Jornal no STL Web, edisaun Sesta (21/10/2016). Domingos Piedade Freitas

Suara Timor Lorosae

Tanba juiza isin-rua adia sesaun ikus hosi julgamentu ba eis-ministra timor-oan sira

Sesaun ikus hosi julgamentu eis-ministra rua ne’ebé hetan akuzasaun tanba partisipasaun ekonómika iha negósiu no administrasaun danoza, ne’ebé tuir lolos hala’o ohin, adia hikas tanba juis hosi prosesu ida ne’e, isin-rua. 

Sesaun ba loron ohin ne’e marka tiha ona desde 22-setembru, atu arguida ida hosi rua ne’e, ministra Finansas Emília Pires, tenke fó ninia deklarasaun ikus.

Tanba juiza ida isin-rua (koletivu ne’e iha majistradu tolu) entaun tenke adia fali sesaun ne’e ba loron 24-outubru, hanesan loron ne’ebé juis José Maria Araújo maka sei prezidi prosesu refere, nomós sei husu pergunta ikus ba Emília Pires no fó sai loron ba leitura sentensa nian.

Emília Pires ho eis-visi ministra Saúde Madalena Hanjam hetan akuzasaun tanba hamosu iregularidade durante sosa kama atus ida ba ospitál liu hosi kontratu ne’ebé halo fali ho empreza hosi Emília nian, atu nune’e sira na’in tolu bele hetan lukru hosi negósiu ne’ebé ho valór dolár rihun 800.

Faze ikus hosi julgamentu ne’e, hala’o kleur latuir loron ne’ebé marka ona tanba alegasaun ikus hosi defeza ne’e, adia fali ba 22-setembru, hodi impede Emília Pires bele halo parte, ho autorizasaun tribunál nian, tanba nia sei bá estranjeiru hodi reprezenta Estadu Timór.

Iha sira-ninia alegasaun ikus, Ministériu Públiku fó sai akuzasaun hothotu hanesan evidénsia no husu pena prizaun tinan 10 ba arguida na’in rua.

Alegasaun ikus hosi defeza nian maka krítika hasoru Ministériu Públiku no oinsá forma hosi prosesu ne’e hahú desde inisiu 2012.

Iha ninia deklarasaun ikus ba tribunál, Hanjan dehan katak nia respeita justisa, Ministériu Públiku no advogadu sira, haktuir hikas kona-ba istória hosi ninia serbisu iha rai-laran no garante katak sei sempre kumpri prosedimentu hothotu ba iha funsaun ne’ebé kumpri/halo ona.

Julgamentu ne’e hahú tinan ida ona no rona testamuña sanulu resin ona, inklui eis-prezidente Xanana Gusmão ho José Ramos Horta, nomós eis-primeiru ministru Mari Alkatiri.

Iha julgamentu ninia rohan, parte rua halo krítika, tanba ne’e maka prokuradora Angelina Saldanha konsidera katak defeza, ba iha sira-ninia alegasaun, halo ataka ba iha sistema justisa nasaun soberanu nian ida.

Hanesan resposta, Morais Sarmento, advogadu hosi Madalena Hanjam, dehan katak atu defende sistema justisa maka konsidera katak serbisu ne’ebé Ministériu Públiku halo, “labele fó fatin ba sistema justisa Timór nian”.

"Halo mo’e. Tanba tuir lolos, iha defeza hosi sistema justisa Timor-Leste nian maka tenke mo’e tanba laiha prova maibé apoia fali akuzasaun ne’e. Ha’u nunka haree serbisu at ida hanesan Ministériu Públiku ne’ebé larekoñese sala flagrante únika ne’ebé nia komete”, nia dehan.

Bettencourt Ferreira, hanesan defeza hosi Emília Pires nian mos lamenta ho postura hosi Ministériu Públiku, ne’ebé tuir lolos hatan ba defeza maibé “hakarak ko’alia fali buat seluk, halo ataka no halo sai vítima”.

“Bainhira laiha argumentu lalika ko’alia”, dehan hodi halo krítika ba observasaun barak ne’ebé nia rona durante julgamentu tanba “lejitimidade no tuir termu lei timor-oan nian” advogadu portugés sira envolve iha prosesu ne’e.

SAPO TL ho Lusa 

Apoiu internasionál ba Justisa timor-oan kontribui iha pás sosiál

Programa Justisa ba Timor-Leste, ne’ebé apoiu hosi  Uniaun Europeia no Portugál, kontribui "ho desizivu" ba  aprofundamentu no konsolidasaun  pás  sosiál iha nasaun, afirma iha ohin hosi ministru Justisa, Ivo Valente.

"Esperiénsia ne’ebé dezenvolve iha  ámbitu Programa Justisa, foka maka’as liu ba kapasitasaun rekursu  umanus, liuhosi  realizasaun  asaun formasaun, nomós akompañamentu tékniku ba ami nia kuadru sira, kontribui tebes ba aprofundamentu no konsolidasaun pás sosiál nomós ba demokrasia", afirma Ivo Valente.

Maski  rekoñese katak programa sira iha área sensível hanesan  justisa nunka livre hosi krítika, Ivo Valente konsidera ona hanesan dadus "passu desizivu", liliu iha apoiu ba kriasaun  no halo  funsionamentu  Câmara de Contas (CC) no Polícia Científica de Investigação Criminal (PCIC).

Ivo Valente koa’lia iha Díli liuhosi  enkontru  ne’ebé  marka ensseramentu Programa Justisa hosi Uniaun  Europeia, maka  dezde 2012 fó apoiu ba setór ne’e iha Timor-Leste ajuda, entre inisiativa seluk, harii PCIC, ne’ebé hetan  posse iha janeiru tinan kotuk, no CC, ne’ebé kumpre ona ninia atividade ba tinan tolu foin lalais ne’e.

Komponente justisa integra Programa alargadu iha Apoiu ba Governasaun  Demokrátika Timor-Leste, ne’ebé  Uniaun Europeia (UE) dezenvolve iha nasaun, liuhosi  kooperasaun ne’ebé  delega ba instituisaun portugés sira.

Iha kazu Polísia Sientífika nian, apoiu ne’e hetan finansia hosi UE no implementa ho  apoiu hosi Camões - Instituto da Cooperação e da Língua, no parseiru ho Polísia Judisiária Portugál no Ministériu Justisa Timor-Leste.

UE anunsia ona katak iha  2017 seu hahú programa apoiu foun ida iha ámbitu Fundu Europeu ba Dezenvolvimentu maibé, to’o iha ne’ebá, tenik  Ivo Valente, " importante maka garante atu kooperasaun bilaterál bele asegura kontinuidade parseria ne’e".

Servisu ida,nia afirma, ne’ebé  kontribui ona "ba  hametin baze demokrátiku kontrolu nian, fiskalizasaun no transparénsia" no ajuda ba "hadia seguransa no jurídika ne’ebé loos no  ámbitu investigasaun kriminál nian".

Ivo Valente haktuir moos  apoiu portugés no UE ba operasionalizasaun hosi Câmara de Contas, bele haforsa " kapasidade nasionál ba fiskaliza finansa públika  no atuasaun Governu nian", ho nune’e kontribui " ba efisiénsia no transparénsia iha despeza públika".

"Operasionalizasaun hosi Câmara de Contas hala’o  pepel fundamentál ida iha reforma ba setór públiku no governasaun di’ak", tanba" konfiansa sidadaun nian iha instituisaun públika no Governu ne’e konsidera hanesan pré-rekizitu ida ba lala’ok afirmasaun nasionál", nia haktuir.

Relasiona ba apoiu kriasaun Polísia Sientífika, permite konkretiza " meta ida importante iha  ámbitu dezenvolvimentu institusionál".

Espesiál liu, permite formasaun  inisiál ba investigadór 47 no peritu  forense 31, ikus mai, realiza ho "asaun formasaun  espesializadu iha  investigasaun krime inséndiu, falsifikasaun dokumentu, tráfiku estupefasiente, kontrafasaun moeda, omisídiu no ofensa ba integridade fízika".

Apoiu europeu no portugés konkretiza moos ba entrega iha fulan-novembru tinan kotuk  ekipamentu  Laboratório de Polícia Científica (LPC) no ho ninia Unidadel Móvel espesiál sira, hodi hala’o Kursu Atualizasaun ida ba Formasaun Polísia Sientífika - Identifikasaun Judisiária, Lofoskopia no Análiza ba Sena Krime –nomós  balístiku.

Kontinua realiza moos iha Lisboa, parseria ho Laboratório da Polícia Cientifica da Polícia Judiciária de Portugal, asaun formasaun datoluk  iha Investigasaun Kriminál kona-ba Balístika.

Programa ida ne’ebé luan liu konta, afirma ministru, ho apoiu hosi parseiru ooin, inklui, aléinde UE no Instituto Camões, Tribunal de Contas, Ministério Justisa, Polísia Judisiária no Direção-Geral da Política de Justiça de Portugal.

Programa ne’e konta moos ho apoiu hosi Fundu Dezenvolvimentu Kapitál Umanu hosi Ministériu Planeamentu no Investimentu Estratéjiku (FDCH/MPIE) Timor-Leste nian.

SAPO TL ho Lusa – Foto: @humbertobartolomeu

Abel: Pensaun Vitalisia Halo Ita Moe

DILI, (ANTIL) – Portavoz Ofisiál Partidu Libertasaun Populár (PLP), Abel da Silva iha resintu Fakuldade Siénsi Sosiál, Universidade Nasionál Timor Lorosa’e, Kampus Kaikoli, Kinta, (20/10) katak pensaun vitalisia ne’e halo moe tanba, ema barak sei ki’ak, labarik barak sei mal nutrisaun.

Portavoz PLP ne’e mós reforsa katak pensaun vitalisia ne’e la justu tanba, se bainhira ema ruma tama iha Parlamentu Nasionál (PN) ho tinan 30, tuur no hiit liman de’it pois hetan pensaun ne’e no mandatu hotu hetan lei ne’e, la justu.

“Ema hotu tenke hisik kosar lai mak foin han, labele haki’ak ema ne’ebé hakarak benefísia nia-án de’it,” portavoz hatutan ne’e bainhira sai mós oradór ba palestra ne’ebé organiza husi estudante departamentu siénsia polítika, UNTL.

Ho nune’e, tuir nia, vizaun ezisténsia partidu PLP mak hakarak harii povu ida ne’ebé demokratiku no justu no altu sufisiente nomós hakarak kore-án husi dependénsia mina Timor-Leste nian.

Iha fatin hanesan, responsável atividade ne’e, Duarte da Silva afirma katak atividade ne’e sira organiza hodi kompletu teória ne’ebé aprende iha sala laran.

Nune’e mós aproveita tempu, estudante sira- bele iha sira-nia koñesimentu kle’an liután iha área polítika liuliu estudante sira ne’ebé maka estuda iha Departamentu Siénsia Polítika. (jornalista: Rafy Belo; editora: Rita Almeida)

Primeiru Ministru Lansa Rehabilitasaun Kafe

LETEFOHO (ANTIL) - Primeiru Ministru, Rui Maria de Araújo akompaña husi Ministru Agrikultura no Peska no Ministru Koordenador Asuntu Ekonomiku, Estanislau da Silva simbilikamente lansa reabilitasaun kafe iha suku Dukurai, Postu Administrativu Letefoho,  Munisípiu Ermera.

Lansamentu ba reabilitasaun kafe ne’ebé hala’o iha loron 21 Outubru 2016, tau  importansia atu hasa’e produsaun kafé.

Kafe, mak produtu importante iha Timor-Leste no reprezenta porsentu 80 husi produtu esportasaun naun petrolíferu sira seluk, ne’ebé sai fonte rendimentu ba agrikultór rurál no kontribuisaun reseita nasaun.

Toma konsiderasaun, katak, plantasaun kafe iha Timor-Leste kuaze ektare 21.000 la produtivu, tanba tuan tiha ona. Nune’e, presiza halo reabilitasaun atu hasa’e produtividade no kualidade atu kompete iha merkadu international.

Iha Lansamentu ba reabilitasaun kafé ne’e, Primeiru Ministru no Ministru Agrikultura no Peska mós entrega ekipamentu ba kafekultor sira no kontinua tesi kafe simbolikamente no ikus kuda kafe.

Marks mós prezensa iha lansamnetu ne’e, Jacinta Abucau hanesan reprezentante Parlamentu Nasional, Komisaun D, Prezidente Autoridade Munisipal Ermera, Jose Martinho dos Santos, Komandante Polisia Autoridade Munisipal Ermera, Natercia de Jesus, Adminitrador Postu Letefoho, Joao Felisberto de Deus, Diretor Kooperativa Kafe Timor, Xefe Suku sira no komunidade Suku Dukurai.  (Jornalista: Maria Freitas/Editór: Otelio Ote)

Foto: Primeiru Ministru, Rui Maria de Araújo akompaña husi Ministru Agrikultura no Peska no Ministru Koordenador Asuntu Ekonomiku, Estanislau da Silva simbilikamente lansa reabilitasaun kafe, Sesta (21/10) iha Ermera. Foto ANTIL/Maria Freitas

KANDIDATURA XEFI SUKU 2071, FETO 319

Diretor Jeral Sekretariadu Tekniku Administrasaun Eleitoral (STAE), Acilino Manuel Branco, deklara katak, total kandidatura xefi suku ba tinan 2016 ne’e hamutuk 2071. Husi numeru kandidatura ne’e, feto hamutuk 319, no mane 1752, no total kandidatura ne’e husi Munisipiu 12, inklui Rejiaun Espesial Autonomia Oe-Cusse.

Kandidatura xefe suku Munisipiu Ermera hamutuk 275 kompostu husi kandidatura mane 239 no feto 36, Munisipiu Baucau 219 kompostu husi kandidatura mane 187 no feto 32, Munisipiu Bobonaro 184 kompostu husi kandidatura mane 166 no feto 18,  Munisipiu Covalima 157 kompostu husi kandidatura mane 135 no feto 22,  Munisipiu Aileu 156 kompostu husi kandidatura mane 129 no feto 27.

Munisipiu Dili 156 kompostu husi kandidatura mane 119 no feto 37, Munisipiu Lautem 147 kompostu husi kandidatura mane 120 no kandidatura feto 27,  Munisipiu Manufahi 155 kompostu husi kandidatura mane 129 no kandidatura feto 26, Munisipiu Liquiça 149 kompostu husi kandidatura  mane 123 no feto 26, Munisipiu Ainaro 131 kompostu husi kandidatura mane 118 no feto 13.

Munisipiu Viqueque 124 kompostu husi kandidatura mane 107 no feto 17, Munisipiu Manatuto 109 kompostu husi kandidatura mane 78 no feto 3, no kandidatura xefe suku Rejiaun Espesial Autonomia Oe-Cusse ( REAO) hamutuk 109 kompostu husi kandidatura mane 102 no feto 7.

“Bazeia ba rezultadu aprezentasaun kandidatura xefi suku ne’ebe hala’o iha loron 14 fulan Outubru tinan 2016 ne’ebe prejidi no registu husi membru eleitoral suku ita konsege hetan 2071, kandidatura ba pozisaun xefi suku ne’ebe kompostu husi feto 319 no mane 1752 husi 13 Munisipiu no 442 aldeia iha Timor,”Diretor Jeral Sekretariadu Tekniku Administrasaun Eleitoral (STAE), Acilino Manuel Branco, ba Jornalista sira Kuarta (19/09/2016) liu husi konferensia imprensa iha edifisiu STAE, Caicoli-Dili. Relasiona eleisaun Suku ne’ebe sei hala’o iha loron 29 fulan Outobru tinan 2016 ne’e.

Dadus ne’ebe refere bazeia ba grafiku husi rezultadu aprezentasaun kandidatura xefi suku ne’ebe maka hala’o ona iha loron 14 fulan Outubru foin lalais ne’ebe  prosesu aprezentasaun kandidatura la’o ho susesu iha Suku 442.

“Prosesu husi aprezentasaun kandidatura ne’e rasik la’o ho susesu iha 442 suku e akontese iha dader tuku 10:00 to’o tuku 18:00 lokraik sem iha akontesimentu ruma ne’ebe prejudika prosesu ne’e rasik, maibe iha dunik dezentendimentu iha suku balun husi Munisipiu sira, maibe ho kordenasaun no servisu hamutuk ne’ebe masimu entre parte hotu-hotu liu-liu autoridade Munisipal sira konsege rezolve problema hirak ne’e ho nune’e prosesu aprezentasaun kandidatura kontinua la’o ho normal fali,”esplika diretur jeral STAE.

Nia hatutan,  prosesu aprezentasaun ba kandidatura husi orgaun suku la’os  to’o iha ne’e deit, maibe antes loron votasaun iha loron 29 fulan Outubru iha dader sei hahu ho prosesu aprezentasaun kandidatura xefi aldeia no delegadu ou delegada sira.

“Prosesu aprezentasaun ba kandidatura xefi suku la’os to’o iha ne’e deit, maibe sei kontinua iha loron votasaun nian, tanba antes tama ba prosesu votasaun ita sei hahu ho prosesu aprezentasaun kandidatura ba xefi aldeia no delegadu ou delegada iha tempu dader e wainhira prosesu ne’e remata maka kontinua kedas ho votasaun hodi hili xefi suku, xefi aldeia inklui delegadu no delegada,”tenik nia.

Alende ne’e, rejultadu husi votasaun ne’e rasik sei rona iha momentu votasaun remata e wainhira laiha kandidatura ida maka sai hanesan vensedor, maka sei akontese votasaun segundu volta.

“Rejultadu ita sei rona kedan iha momentu votasaun remata, e wainhira laiha kandidatu ida maka sai hanesan vensedor maka akontese kedas votasaun segunda volta, e suku nian kuandu iha loron 29 sei transporta akta apuramentu husi kada aldeia mai iha suku ho nune’e membru eleitoral asembleia suku sei halo fali rejultadu final husi aktas ba kada aldeia,”esplika Diretur Jeral STAE ne’e.

Acilino Manuel Branco akresenta, atu fasilita eleitores hodi hili orgaun suku, STAE fasilita buletin de votus ho modelu oin tolu atu nune’e eleitores bele eskolla kandidatura xefi suku ho diak.

“STAE fasilita bulletin de votus ho modelu oin tolu hanesan, ba xefi aldeia bulletin de votus ho kor mutin no fotografia, xefi aldeia ho kor kinur e ba delegadu ou delegada ho kor verde e hakarak enkoraja nafatin ba eleitores sira atu nune’e bele partisipa nafatin iha prosesu tuir mai liu-liu prosesu ne’ebe sei akontese iha loron 29 fulan Outubru,”hateten Acilino.

Iha oportunidade ne’e nia hateten mos katak, nia parte apresia tebes ho servisu hamutuk husi parte hotu-hotu liu-liu populasaun no eleitores inklui Polisia Nasional Timor Lorosa’e (PNTL).

“Ha’u apresia tebes ho servisu hamutuk husi parte hotu-hotu hahu husi populasaun liu-liu eleitores ne’ebe kontribui ona ba prosesu tomak ne’ebe durante ne’e lao hela liu liu iha prosesu aprezentasaun kandidatura ne’ebe maka susesu tebes no ba membru orgaun konsellu do suku ne’ebe maka prejidi ona meja eleitoral suku no parte seguransa PNTL ne’ebe maka fo ona seguransa seguru ba iha prosesu ne’e rasik,”tenik Acilino.ita

Jornal Nacional

Ha´u La Moe

Ha´u nia kondisaun difisiente maibé ha´u la moe atu la´o sai iha tempu ne’ebá enkuantu ha´u la´o serbisu hanesan seksaun liturjia ikus mai sai profesora.

Inísiu ne´ebé ki´ik oan, finaliza ho rezultadu ne´ebé boot. Ne´e maka viajen no lala´ok moris husi mana ho karakterístika fuuk been be metan no naruk ne’e. Isin morena, okulista no sempre hamnasa midar. Aten-brani no laran luak, prontu serbi ba uma kreda, familia no nasaun. La sente baruk hodi hakur laloran moris. Neon boot. Fiar an ho esperansa hodi luta kore korente moris hodi la´o nafatin. La sura kolen. Hisik kosar, koko moruk moris nian. Esperiénsia moris hanesan la´o iha aitarak leten, iha fatuk laran maibé nafatin iha esperansa. Ho Maromak nia liafuan, pasiénsia hala´o moris nu´udar kriatura babain iha mundu ida ne´e.

Tinan tolu nolu resin ona halo dedikasaun, ba família, kreda no labarik eh foinsa´e sira, prepara futuru nasaun nian liuhusi edukasaun, nu´udar profesora. Maria Elizita Berta (56) hala´o kna´ar murak ida ne´e maske ho kondisaun difisiente. Difisiente la moris ho nanis, difisiente la mai husi nia tempu warik-oan maibé konsekuénsia husi funu naruk husi rai badin, buka hadau no ukun Timor.

Ba ha´u (ANTIL), nia haktuir katak durante tinan tolu nolu (30) resin moris nu´udar difisiénsia, ho ain karuk laek. Ain karuk morteru nia istilasu tetak-rahun tanba iha tinan 1976 hetan tiru husi liman kro´at javanes sira nian iha nia ain no morteiru ne’ebé mai liuhusi nia uma hodi kona mós nia iha tempu ne’ebá. “Ha´u nia ain ema tiru kona no ha´u tama ospitál la to´o tinan ida. sira hanoin ha´u ema GPK (Gerakan Pengacau Keamanan), entaun sira lakonsege kura ha´u to´o hotu,” haktuir.

Gariuai oan ne´e bainhira iha biban dada lia ho ha´u (ANTIL) durante minutu balun iha Sentru Konvensaun Dili, foin lalais ne´e. Nia haktuir tan, iha kama ospitál, kuartu mamuk, nonok de´it mak fó sasin lian laek ba nia moras tan inan-aman, tiu-tia no família sira iha hela hotu ailaran. Loron no kalan kontinua troka malu, ponteiru nafatin nakdulas, tempu mós la´o ba bebeik, la kle´ur padre João Magalhães mak ba haree no tau-matan nia, to´o nia alta hikas husi fatin moras ne´e.

Ho neon arepende hodi hanoin hikas tempu uluk, ho laran kraik, nia kontinua konta katak ne´e realidade ne´ebé hakarak ka lakohi, todan eh kamaan maske ho otas ki´ik, idade sei nurak, nia tenke simu naha ida ne´e. Tenke tutur eh hulan todan ida ne´e. Maske nune´e, ho aten-brani nafatin, fiar iha prínspiu, banati tuir Maromak nia liafuan kontinua iha mehi no esperansa hala´o kna´ar nu´udar ema normál. Maske sasidik haka´it, maske laloran satan netik ho aten-boot hala´o nafatin moris ne´e no agradese ba buat ne´ebé iha.

“Ha´u moris difisiente maibé grasa Maromak, ha´u sai profesora,” hateten Kulugisa oan ne´e ho oin lakan nabilan nakonu ho esperansa.

Aitonka iha liman, hatais kazaku metan, faru mutin taka isin, hafutar ho gravata modelu borboleta, kór metan iha kakorok. Profesora ne´e haktuir nia moris. “Ha´u ema ida moris simples”. Lori hikas moris ba tempu uluk, nostalgia moruk Gariuai oan ne´e, sani nia istória, haktuir nia vida ho neon susar. Basá, realidade moruk koko nia kbiit, istória laran susar koko hafalun nia fuan no hanoin, tan inan ne´ebé nia tau laran hili dalan seluk, korta dalan hodi ba moris ho ema (mane) seluk. Realidade foun ne´ebé nia tenke simu tan, pájina foun ne´ebé nia presiza loke duni tan.

Tanba sá? Basá dalan ne´ebé nia inan hili, nia kbiit laek satan netik. Hakarak ka lakohi tenke simu realidade ida ne´e ho fuan boot. Maske nune´e nia haktuir, Maromak la taka dalan ba nia emar be nia hadomi, Maromak la husik leet nia kriatura ne´ebé iha susár maibé sempre hatudu dalan husi ema seluk nu´udar nia saseluk hodi fó naroman hatudu dalan ne´ebé lós. Naroman hodi ukun kbiit nakukun be hafalun esperansa no taka dalan moris nian.

“Agora paun fuan ida iha ha´u nia liman,” katak profesora ensinu báziku Gariuai ne´e. Maske nune´e, nia haktuir paun ne´e la mai rasik, sorte ne´e la mosu rasik maibé tan grasa Maromak liuhusi nia saseluk sira. Nune´e, hatudu ema laran di´ak no fuan boot amu Elisio Locateli hodi sai nia benfeitór.

Grasa no tulun Amu Locateli nian ne´e, kruz moris ne´ebé nia hulan iha kabaas moris hahú sai kamaan nune´e kore tiha nia isin lolon husi korente difikuldade ne´ebé haksumik iha nia an, bobar metin nia futuru, kesi metin nia neon no hakarak hodi lolo liman haku´ak futuru nabilan no sente loromatan nia roman.

“Ohin loron ha´u bele hamriik iha ne´e hanesan profesora,” tenik tan profesora ne´ebé gosta kór matak (verde) ho kor-de-roza. Ba nia, gosta kór ne´e la naran de´it maibé tanba iha nia magarti, magarti ne´e nia esplika katak matak ne´e esperansa no hetan ksolok, kor-de-roza ne´e katak ksolok ita-nian.

Ho nune´e esperansa no ksolok nu´udar mehi naruk ne´ebé nia koko no buka atu kaer toman nia ilas no lalatak iha tempu naruk. Ikus mai nia kaer toman duni. Matan wa´in sai sasin, tilun wa´in mak rona no isin-lolon atus mak asiste. Maka´as! Basa, entre manorin na´in ka profesór sira iha rai ilas “Avó lafaek”, Timor-Leste, feto eh mane, as ou badak, hela dook ka besik, nia mós sai eroina ida.

Eroina la´os tan kaer kilat, eroina la´os tan halo funu hasai ema nia iis husi ema nia isin lolon hodi manan funu balu. Lae!maibé badaen demais forma liafuan hodi sai istória furak. Kaneta kro´at demais hodi hedi liafuan, lapijeira meik demais hodi fó sentidu ba fraze, hodi nune´e ikus mai nia bele sai manan na´in ba hakerek istória ho liafuan 1.500 ho dalen portugés hodi sai istória kmanek ida iha konkursu nasionál.

Maske nune´e, profesora ne´e, rekoñese katak hirak ne´e hotu mai husi dalan naruk no kbiit korajen husi Amu Locateli bainhira nia otas sei ki´ik. Ha´u rona, ha´u nia fuan ki´ik kontinua bisi-bisi, laran tuku halo maka´as tan de´it, ha´u husu, halo istória hetok sai naruk. Ha´u mós hetok kurioza hodi ke´e tuir, buka nani kle´an istória feto aten-brani ne´e. Ohin loron nia biban fahe nia matenek, dadaun ne´e nia bele hanorin tan grasa husi nia esforsu no laran luak padre Locateli hodi bolu nia, hanorin iha igreja molok sai profesora iha tinan 1983.

Maske nune´e, profesora ne´e konfesa katak fofoun nia moe lós ho nia kolega eskola sira, kolega feto eh mane. Nia moe sei nurak-nurak, amu konsege lee kona, nia moe amu konsege kaer toman, nune´e kbiit moe nu´udar unuk hafalun nia an, nia kolu, sobu no soe sai tiha husi isin lolon tan amu haku´ak no fó bensa ba nia hodi dehan: “Sé ó iha uma de´it, ó-nia sirkulasaun ladun forte ó bele hetan moras,” nia lembra.

Nia konta nia istória nafatin katak iha tempu ne’ebá mós Padre Locateli sempre lori nia sai ba misa, hafoin kontinua nafatin iha tinan 1983 Padre Locateli hateten: “Maske ó nune’e tenke liuhusi katekista hodi toman labarik sira ne’e hodi nune’e bele ba fali iha hanorin. Iha tempu ne’e, hau halo tuir to´o ha´u ba hanorin iha Fatumaka iha tinan 1983 nu´udar honorer. Iha ne’ebá Padre Locateli mak tau matan ba labarik sira dormitóriu (asrama), halo uma-du´ut hodi fó mai ami,” eis katekista ne´e dalen tuir nia lala´ok moris.

Mout iha istória pasadu nian, nia lori ha´u semo ho liras nurak hodi lees biti kalohan, haborus odamatan lalehan hakat tuir odan moris nian kontinua la´o hamutuk ho Baucau gimata ne´e hodi hatene nia istória no moris ne´e oinsa.

“Iha tempu ne’e Padre Locateli hatama ha´u ba profesora relijiaun hodi hanorin labarik sira. Iha tempu ne’e, ami mai tuir formasaun kona-ba profesora relijiaun nian. Iha tempu ne’e Padre Domingus Maubere mak lori hau ba tuir formasaun lorloron. Ha´u tuir formasaun ne’e hotu hafoin Padre Locateli mai tula ha´u fila fali ba hanorin,” konta tuir nia lala´ok hahú atu sai profesora ne´e.

“Ha´u fila, ha´u halo nafatin ha´u nia kolaborasaun servisu iha igreja hanesan seksaun liturjia. Ha´u disponível hala’o tuir sira ne’e hotu, nafatin to´o ikus ha´u hetan susesu ida hanesan ne’e,” konta tan Baucau Fatuk laran oan ne´e mai ha´u la sente kolen.

Nia hateten, Maromak nia domin boot tebes, liu lalehan no rai, tasi no foho. Maromak la di´uk ba nia halerik, Maromak la delek ba nia hamulak basá komunikasaun ne´ebé nia halo liuhusi orasaun ikus mai nia konsege kaer toman naroman, haku´ak hodi sente mós futuru nia kmanek, koko mós mundu nia midar no sente mós moris nia furak hodi halo kolaborasaun kontribui ba Maromak nia obra iha mundu rai klaran.

“Serbisu hamutuk atu ita bele eduka ita-nia oan sira ba futuru nasaun Timor-Leste,” nia haklaken, “Hau agradese tebes ba Padre sira no ba Amu Locateli. Husi sira ha´u bele moris di´ak to´o ohin loron maske ho ha´u nia kondisaun difisiente maibé ha´u la moe atu la´o sai iha tempu ne’ebá enkuantu ha´u la´o serbisu hanesan seksaun liturjia ikus mai sai profesora,” agradese profesora kurioza husi Gariuai ne’e.

Entretantu, susesu ne´ebé nia iha. Matenek ne´ebé nia hetan ona la sai nu´udar dalan rohan, la´os nu´udar ninin ba nia vontade hodi kontinua estuda no aprende, aprende no aprende nafatin tanba, tuir nia, ita ema kriatura nu´udar obra Maromak nian ne´ebé furak tebes, iha hanoin, fuan no kakutak. (Rafy Belo)

Matadalan

Autoridade Seguransa Kaptura Membru PSHT Na’in 79

BATUGADE - Polísia  Nasionál  Timor Leste (PNTL)-Unidade Setia Hati Terate (PSHT) na’in 79, inklui feto na’in 11, tanba kontinua uza farda no ba hasai sintu iha Atambua-Indonézia.

Hosi membru 79 ne’e iha mos funsionáriu  alfândega  na’in  ida, funsionáriu  tribunal na’in  ida no professor na’in  ida baihira ba sa’e  sintu iha Atambua-Indonézia.

Membru PSHT sira ne’e UPF kaptura iha loron Kuarta (19/10).

Kronolozia kapturasaun, bainhira membru PSHT sira ne’e sa’e  tiha sintu iha gor Atambua fila mai balun sei uza nafatin atributu artemarsiais nian no balun polísia  detekta liu hosi Fecebook tanba ne’e maka polísia  halo pasa revista iha area fronteira tomak no balun kaptura iha area Maliana, Tunu Bibi, Batugade, Mota ain no na’in  12 kaptura iha Suai.

Membru PSHT hirak ne’e parte UPF hahú  kaptura balun iha oras tuku 04 lokraik to’o tuku 08 dader.

Hafoin halo identifikasaun parte UPF entrega  ba iha Polísia  Munisipiu Bobonaro nian hodi hala’o  investigasaun no sei detein iha sela durante 72 oras maka sei lori halo primeiru interogatoriu iha Tribunal Suai.

Funsionáriu  Alfândega  ho inisiál Nelson R. dos Santos nu’udar  despaisu dokumentus kontabilidade Alfândega  nian, funsionáriu  Tribunal Distrital Dili maka Jacob dos Santos nu’udar  motorista, ho Giomar de Jesus Pereira nu’udar  professor iha eskola EBC 20 Agostu Ermera, inklui mós Kiai ida ho naran Supriyohadi Purnomo hosi Malang Indonézia no sai mane foun iha Manatutu.

Entre membrus PSHT sira ne’ebé maka hetan kaptura ne’e na’in  19 maka uza dokumentus legal pasaporte hodi ultra pasa fronteira restu liu hosi dalan ilegál de’it, membru hirak ne’e mai hosi munisipiu 13 nian.

Tuir informasaun ne’ebé maka UPF hetan hosi parte Indonézia katak membru PSHT hosi TL ba sa’e  sintu iha Indonézia hamutuk ema na’in  300 resin.

 Komandante Jerál  PNTL Komisáriu  Júlio  da Costa Hornay dehan, antes ne’e nia maka fó ordem ba komandante munisípiu tolu iha fronteira ho UPF hodi asegura fronteira nune’e bele kaptura Timor oan sira ne’ebé maka viola rezolusaun governu nian hodi ba sa’e  sintu iha Atambua no konsege duni kaptura membru PSHT balun.

“Ami polísia nia servisu hala’o  ona no ita entrega  ba parte Tribunal maka uza sira nia kompetensia tuir lei hodi bele foti desijaun ba membru PSHT sira ne’e,” dehan Júlio  ba Jornalista iha Batugade, Kinta (20/10).

Nia hatutan, ho kapturasaun ne’e nu’udar  prevensaun ida ba timoroan sira viola rejolusaun governu nian ne’ebé maka taka artemarsiais tolu PSHT, Kera Sakti no KORKA,  tanba hanesan PNTL asegura rejulusaun no lei sira ne’ebé maka vigora iha nasaun ida ne’e.

“Tanba saida maka ita ba jura fali ba bandeira seluk, ita husik hela ita nia simbulu ka ita nia bandeira nasionál  ba fali ema nian, ita nia bandeira ne’e hetan ho ruin ho ran,” dehan Júlio.

Nia dehan, PNTL nia preokupasaun maka ne’e Polísia  ezekuta rejulusaun maibé  dala barak kaptura tiha ema sira viola ne’e ba Tribunál liberta ka aprejentasaun priodika de’it ne’e tuir nia ida forte ne’e halo nusa, rejulusaun ne’e bale ka la’e atu kondena membru artemarsiais sira ne’ebé viola ne’e ka la’e? Ne’e lei na’in  sira maka hatene polísia  kumpri de’it ordem.

Entertantu, kona-ba deskonfia membru PNTL balun mós ba hotu sa’e  sintu nia dehan, karik ne’e maka hetan la iha toleransia ba sira, sei hasai sira hosi polísia  tanba uluk sira jura ona atu soe artemarsiais no servi de’it ba nasaun.

“Ita ohin rona ida ne’e no ita sei halo investigasaun karik hetan ha’u la tolera no sei hasai hosi polísia ,” dehan Hornay.

Iha fatin hanesan Komandante UPF Superintendenti João dos Reis dehan, iha rai maran ne’e sira bele asegura hotu maibé susar ba sira maka parte Tasi nian, tanba ema balun bele liu hosi area Tasi.

“Ami araska maka ema liu hosi Tasi, rai maran ami asegura hotu ona ami koloka ami nia membru sira hala’o  pasa revista kalan loron,” dehan João.

Nia hatutan, iha parte Maliana nian ema hamutuk 200 maka tama hosi ne’eba maibé sira rona ona informasaun maka halai fila hotu ba Atambua, mais parte UPF sei kontinua halo hela monitorizasaun ba sira nia movimentu.

Membru PSHT sira ne’e sai hosi TL ba sa’e  sintu iha Atambua iha loron (04/10) no prosesu sa’e  sintu hahú  iha loron Tersa (18/10). (way)

Timor Post

Programa foun hosi Uniaun Europeia hodi apoia governasaun iha Timor-Leste hahú iha 2017

Programa foun hodi Apoia ba Governasaun Demokrátiku Timor-Leste nian hosi Uniaun Europeiu (UE) hahú iha inísiu tinan 2017 no sei aumenta ba euro millaun 30, ho millaun 12 resin sei hato'o ba Institutu Camões.

Informasaun sira ne'ebé fó sai iha loron-kinta ne'e hosi Simon Le Grand, responsável hosi koperasaun ba delegasaun UE nian iha Timor-Leste, iha semináriu ida iha Díli kona-ba knaar hosi polísia investigasaun kriminal nian hodi hametin Estadu Direitu nian.

Área hosi investigasaun kriminal sai daudaun hanesan fatór ida ne'ebé hetan apoiu hosi programa ne'e, liuhosi nia komponente justisa ne'ebé, iha kazu ne'e, delega iha Institutu Camões no inklui asisténsia ba Polísia Sientífiku Investigasaun Kriminal nian (PCIC) no Kámara Konta nian (CC).

Simon Le Grand destaka ona kontributu katak programa - ne'ebé halibur "apoiu finanseiru hosi UE no esperiénsia hosi Institutu Camões" - fó ona ba área sira hanesan prevensaun no kombate ba tráfiku ema sira nian no droga nian, no sira seluk tan.

Komponente justisa ne'e, ne'ebé hotu iha semana ne'e, agora permiti loke dalan "ba projetu ida ambisiozu liu ne'ebé sei hahú iha inísiu 2017 nian", ne'ebé "sei inklui tan área sira seluk koperasaun nian" hodi tulun hadi'a situasaun finanseiru hosi instituisaun sira.

Programa, ne'ebé sei iha durasaun tinan lima, sei inklui osan euro millaun 15 ne'ebé haruka diretu ba Orsamentu Estadu nian, no ne'ebé Governu timoroan sei aloka, liu millaun 12 hamutuk ho koperasaun delegadu iha Institutu Camões no millaun tolu resin iha despeza kontijénsia nian.

Simon Le Grand esplika ona ba Lusa katak iha prátika implika maka'as programa anterior, ne'ebé iha total hamutuk millaun 10,5 resin iha apoiu sira ne'ebé kanaliza hosi Camões e hosi UNDP (Programa hosi ONU ba Dezenvolvimentu) millaun haat resin ba apoiu orsamentu Estadu nian.

"Hanesan importante tebes atu Governu iha kapasidade adekuadu hodi garanti prosesu orsamentu di'ak sira no sistema governasaun sira ne'ebé di'ak, hodi garanti aplikasaun adekuadu liu hosi nia fundu sira", esplika hosi Le Grand.

Tuir nia esplika katak, nune'e, programa foun sei inklui apoiu ba Parlamentu Nasional, Kámara Konta nian, Komisaun Antikorupsaun, komunikasaun sosial no sosiedade sivil.

Ba koperasaun ne'ebé konfia iha Institutu Camões kalkula osan euro millaun 12 (ne'ebé tau hamutuk ho rihun 600 resin ne'ebé hosi instituisaun portugeza rasik). Camões maka "hanoin planu serbisu nain, ko'alia ho parseiru sira no hatán ba nesesidade hosi entidade oioin nian", nia hatete.

SAPO TL ho Lusa

Timor-Leste tenke aumenta prevensaun hosi prátika arbitrária ba ajente Estadu

Autoridade timor-oan sira tenke aumenta liu tan mekanismu hodi prevene pr’atika arbitrária no diskriminatória ba ajente Estadu, inklui abuzu poder ho nepotismu, tuir Prokuradór Jerál Repúblika (PGR) Timor-Leste, José da Costa Ximenes dehan ohin.

José da Costa Ximenes, ne’ebé ko’alia durante semináriu ida iha Dili, nia haktuir kona-ba “hahalok hirak ne’ebé hamosu prátika refere iha Estadu hothotu, maibé liu-liu ba iha forsa seguransa sira”, no garante “atu tenke respeita direitu, liberdade no garantia konstitusionál konsagrada”.

PGR ko’alia lia hirak ne’e durante abertura hosi semináriu loron rua, kona-ba papel polisia investigasaun nian hodi konsolida Estadu Direitu, ne’ebé halibur espesialista oioin iha Timor-Leste.

Nia dehan katak enkontru ne’e relevante no atuál, no hatutan tan katak abranje matéria ida ne’ebé sai “prioridade hosi Prokuradoria Jerál Repúblika nian tanba importante atu halo konsolidasaun formál ba direitu fundamentál hothotu no garante prosesu kriminál ida ne’ebé justu no ekuitativu”.

Maski Timor-Leste konsege iha avansu, maibé “sei iha nafatin obstákulu balun ba iha konstrusaun no konsolidasaun Estadu Direitu Demokrátiku”, inklui “hametin mekanismu kontrolu ierárkiku no disiplinár” nomós “asegura norma konduta no padraun hothotu hosi kualidade prestasaun serbisu públiku”, nia dehan.

Tuir PGR importante mos atu insentiva komunikasaun permanente ho komunidade “atu nune’e justisa bele la’o ho efetiva no populasaun sira mos bele komprende” no halo atuasaun atu “lamosu situasaun ne’ebé hafahe ema iha fatin ne’ebé sira serbisu ba (interna), liu-liu kria hosi ajente kriminozu sira”.

“La’os segredu katak organizasaun kriminozu sira serbisu hodi hafraku, hafahe no dezestabiliza forma oinsá investigasaun kriminál sei dezenrola”, nia dehan.

Prokuradór jerál ko’alia kona-ba importánsia hosi matéria ne’e no iha matéria seluk, hodi kria orgaun polísia kriminál espesializada iha Timor-Leste, hodi “fó kontribuisaun ba formasaun sistema investigasaun kriminál ida ne’ebé metin liu tan”.

Nia dehan importante maka atu apoia koperasaun foun entre estrutura hirak ne’e, tanba koperasaun institusionál “tenke la’o no insentivada, hodi labele hamosu sobrepozisaun ba iha kompeténsia, zona konflitu no konkorénsia entre forsa polísia sira”.

José Ximenes konsidera katak hosi 2014 to’o 2015 “kazu barak iha Timor-Leste hetan rezultadu di’ak durante investigasaun kriminál, ne’ebé envolve ekipa majistradu estreita, perfeita no halo kordenasaun permanente ho serbisu polísia kriminál nian”.

Semináriu ne’ebé ohin hahú, hakotu mos Programa Justisa Uniaun Europeia nian ne’ebé desde 2012 fó ona apoiu ba setór ne’e iha Timor-Leste, entre apoiu ne’ebé iha, ajuda kria ona Polísia Sientífika Investigasaun Kriminál (PCIC), ne’ebé simu pose iha janeiru tinan kotuk.

Iha programa ne’ebé hala’o tuir ámbitu koperasaun delegada hosi Uniaun Europeia ba iha Institutu Camões, iha mos apoiu ba Kámara Kontas (CC) ne’ebé durante tinan tolu apoiu ona atividade foun.

Komponente justisa halo parte barak liu iha Programa Apoiu ba Governasaun Demokrátika Timor-Leste, ne’ebé maka Uniaun Europeia (UE) dezenvolve iha rai-laran, liu hosi koperasaun delegasaun iha instituisaun portugés nian sira.

Kona-ba Polísia Sientífika, apoiu ne’e selu hosi UE no implementa ho apoiu Camões - Instituto da Cooperação e da Língua, hanesan parseiru ba Polísia Judisiária Portugal ho Ministériu Justisa Timor-Leste nian. 

SAPO TL ho Lusa

Polísia timoroan hakarak kolabora nafatin ho parseiru sira seluk investigasaun nian - diretór

Polísia Sientífiku hosi Investigasaun Kriminal (PCIC) timoroan hakarak kontinua kolabora ho estrutura sira seluk investigasaun iha nasaun nia laran hodi garanti efikásia maka'as, hatete hosi diretór nasional instituisaun nian ba Lusa.

"Atuasaun hosi PCIC, iha perspetivu hosi investigasaun kriminal halo hamutuk ho entidade sira seluk, Polísia Nasional Timor-Leste nian (PNTL) no ho Komisaun AntiKorupsaun (CAC). PCIC mesak sei la halo buat ida", Vicente Fernandes e Brito hatete ba Lusa.

"Ami presiza koperasaun maka'as entre instituisaun sira. No ami presiza prosesu ida hodi esklarese ba públiku kona-ba importánsia hosi PCIC, hodi hametin koperasaun hosi instituisaun nasional sira", nia hatete.

Vicente Fernandes e Brito ko'alia ba Lusa bainhira hakotu semináriu ida loron rua nian kona-ba knaar hosi polísia investigasaun nian hodi hametin Estadu Direitu ne'ebé halibur espesialista oioin iha Timor-Leste.

Semináriu loron rua ne'ebé hahú iha loron-kinta ne'e halibur espesialista oioin hodi debate aspetu oioin kona-ba polísia investigasaun kriminal nia knaar hodi hametin Estadu Direitu.

Marka mós rohan hosi Programa Justisa hosi Uniaun Europeiu ne'ebé hahú tinan 2012 apoia área ne'e iha Timor-Leste ho tulun inisiativu oioin inklui harii Polísia Sientífiku hosi Investigasaun Kriminal (PCIC) Timor-Leste nian ne'ebé simu pose iha fulan-Janeiru tinan liubá.

Halo parte mós hosi programa, ne'ebé dezenvolve iha ámbitu hosi koperasaun ne'ebé diriji hosi Uniaun Europeiu iha Institutu Camões, iha mós apoiu ba Kámara Konta nian (CC) ne'ebé kumpri ona atividade tinan tolu foin lalais ne'e.

Diretór nasional rejeita mós relatu sira ne'ebé hatete katak bele iha, agora daudaun, kompetisaun entre PCIC, ne'ebé harii iha Janeiru tinan liubá,ho PNTL, hodi konkista liu "prémiu sira" iha investigasaun ba kazu sira iha Timor-Leste.

"Laiha kompetisaun. Ha'u hasoru malu ho responsável nasional no distrital sira hosi PNTL no laiha kompetisaun ruma. Bele iha kazu ruma, hosi ema ruma, maibé ne'e la'ós importante", nia afirma.

Fernandes e Brito destaka ona esforsu sira ne'ebé maka instituisaun halo hodi hametin nia kapasidade serbisu nian, hodi subliña katak iha "faze atuál ba instalasaun no tranzisaun", ne'ebé sei hala'o daudaun, "intervensaun hosi asesór internasional sira hosi Polísia Judisiáriu Portugal nian hanesan importante".

"Ami fó ona hakat balun ne'ebé importante, inklui harii laboratóriu, ami organiza ona formasaun espesializadu, iha kazu rua ho apoiu hosi espesialista sira hosi Portugal. Hanesan hakat importante sira ne'ebé serve hanesan baze hodi ami bele hametin prosesu investigasaun kriminal nian.

Agora daudaun PCIC iha investigadór hamutuk na'in 46 no espesialista sira laboratóriu hamutuk na'in 33 no iha hela prosesu aprovizionamentu hodi harii sede PCIC foun, projetu ida ne'ebé sei iha folin total hamutuk dolar millaun 22.

Diretor nasional esplika katak, dezde harii, polísia ne'e konklui ona besik investigasaun atus resin ho destake ba kazu sira halo falsu dokumentu sira, homisídiu sira, naok maka'as.

"Prosesu sira haruka ona ba Ministériu Públiku hodi desidi atu avansa ho akuzasaun ka atu halo arkivu", nia esplika.

SAPO TL ho Lusa

LA IHA HUMANISMU, DUNI NEGOSIANTES IHA DALAN NININ

Duni sai negosiantes local iha dalan ibun sira, sai ona tradisaun ne’ebe opta iha kapital Timor-Leste. Lei no dekretu lei fo dalan no poder tomak ba Diresaun Gestaun Merkadoria no Higiene, atu hasai negosiantes sira ne’ebe okupa dalan ninin no trotoar leten hodi buka moris. Maibe, Prezidenti Partidu FFRENTI-MUDANSA (FM), José Luis Gueterres, triste haree situasaun ne’e, tanba aktu ne’e la iha liu sentidu humanismu.

 “Hau triste tebes, tanba hau belun diak ho alin sira ne’ebe fa’an sabraka, hau koalia ho sira dala barak hau husu ba sira katak presija saida, ne’ebe sira dehan sira protesta hasoru atitude seguransa sira ne’ebe mak sempre duni sira wainhira sira fa’an sira nia sasan,” hateten José Luis Guterres, atual membru Parlamentu Nasional ba Jornalista sira iha uma fukun Parlamentu Nasional (PN), Kuarta (19/10/2016).

Nia dehan, implementasaun lei ne’ebe mak husi Governu dala ruma lahanoin ninia konsikuensias, tanba hakarak cidade mos mais haluha tiha katak povu sira presiza moris liu husi fila liman ne’ebe hanesan dadauk sira halo.

“Wainhira hau koalia, sira husu ba hau katak karik iha kreditu sira bele sosa motor ida ho roda tolu ne’e para sira bele lori sira nia sasan tama sai uma, ne’ebe Estado bele fo kredito ba ema sira ne’e, tanba sira lahalo krime, sira buka serbisu para sustenta sira nia familia, hau konhese diak sira balu, tanba hau sempre sosa sasan iha sira,” afirma Lugu.

Nia husu ba Governu hadia regras sira ne’e atu nune’e permite ba populasaun atu fila liman ho seguru hodi nune’e bele ajuda sira nia ekonomia familia nian.

“La’os Estado halo ninia povu rasik sai atan, maibe dala ruma lei ne’e mak seidauk los, ita presizu reve, mais hau hatene katak ita nia Polisia no mos seguransa guarda municipiu sira ne’e mos Timor oan ne’ebe sira hatene susar, no moris ho difikuldade, maibe sira mos tenke hatene implementa regras ne’ebe ita iha, tanba ne’e maka hanesan politikus, ukun na’in sira mak presija regras atu nune’e fo oportunidade ba negosiante sira ne’e fila liman ho seguru,”  hateten Jose Luis.mia

Jornal Nacional

PM RUI: EMA OBRIGA POVU TAMA RELIJIAUN RUMA, KEIXA BA PNTL

“Iha país direitu demokratiku ne’e, hotu-hotu iha direitu atu koalia konabá sira-nia relijiaun, koalia konabá sira-nia fiar. Sé karik komunidade senti iha ema ruma maka viola sira-nia direitu liu-liu mai obriga sira atu tama relijiaun ruma, ita tenki aprezenta keixa ba Polisia Nasional Timor Lorosa’e (PNTL),” Primeiru Ministru (PM), Rui Maria de Araújo ba jornalista sira iha salaun Nobre MNEK, Praia dos Coqueiros-Díli, Kuarta (19/10/2016).

PM Rui haklaken katak, República Democratica de Timor-Leste (RDTL), nasaun ida demokratiku, nune’e fó liberdade ba kualker ema atu hanorin ninia relijiaun, tanba hotu-hotu iha direitu atu koalia konabá fiar ne’ebé maka sira iha. Maibé kuandu ema ruma halo krimi, ne’e Estadu tenki interven, tanba ne’e kontra ona ema nian liberdade no direitu atu moris iha nasaun demokratiku.

“Kona-bá atu estabelese lei ruma hodi asegura ema limita ema halo buat ne’ebé maka la kondis ho sira-nia objetivu mai ita-nia rai, hanesan sira influensia fiar sarani sira ninian liu husi sekte (seitas) relijiaun ninian, ne’e ha’u hanoin katak lei de imigrasaun iha ona para regula ida ne’e,”dehan PM Rui.

Nia akresenta katak, sosiedade sivil balun preokupa ho seitas relijiaun balun ne’ebé maka oras ne’e dau-dauk kontinua movimenta no influensia Timoroan barak iha teritoriu tomak ne’e, tenki haree mos ho lalaok demokratiku ne’ebé rai ne’e adopta ona.

Antes ne’e, Diretór ONG Belun, Luis da Costa Ximenes, husu ba Ministériu Justisa (MJ) atu bele regula ho lei konaba identidade relijiaun, tamba oras ne’e dadaun iha seitas barak mak buras iha sosiedade nia leet, ne’ebé halo konfuzaun boot ba komunidade sira. Vês

Jornal Nacional

CAC SEI ESTABELESE SELA PRIZAUN PREVENTIVA

Adjuntu Comisário Comissão Anti Corrupção (CAC) Rui Pereira hateten katak, iha tempu badak CAC sei konstrui sela prizaun preventiva rua (2) iha Palapaço, hodi sulan funsionáriu públiku ne’ebé uza patrimóniu Estadu nian la tuir dalan hodi submete ba Tribunal atu bele prosesa tuir lei.

“Fatin ne’e iha ona, hein de’it atu konstrui sela ne’e tuir estandar ne’ebé mak iha, kuandu prontu ona ami sei koordena ho órgaun sira seluk hanesan, Ministériu Públiku (MP), Tribunal nomos maluk Polisia sira para iha futuru CAC kaer ema ruma lori ba tau sela karik, nia tenki kumpri ba régra ne’ebé mak iha kódigu prosesu penal nian, depois tenki submete ba tribunal para prosesa,”esplika Rui Pereira ba JN-Diário, iha Ministériu dos Negocios Estranjeiros e Cooperação (MNEC), Praia dos Coqueiros, Díli wainhira partisipa seremonia Konferensia Nasional Auditoria Nacional ne’ebé organiza husi Forum Nasional ONG Timor Leste (FONTIL) Kuarta (19/10).

Nia hatutan katak, sela prizaun ne’ebé CAC estabelese hanesan meius de preventiva, atu nune’e bele eduka funsionáriu públiku sira katak, lori kareta ne’ebé Estadu fó ba sira tenki lori ho kuidadu, sé iha régra dehan katak, labele uza kareta Estadu nian ba loron Sábadu no Domingu, entaun tenki kumpri.

Rui Pereira haktuir katak, durante ne’e CAC seidauk bele halo atuasaun ba funsionáriu sira ne’ebé la kumpri régras Estadu nian, tamba sira ho Polisia seidauk iha intendimentu ne’ebé hanesan, i CAC rasik laiha prizaun ba 72 oras, nune’e sira tenki uza sala detensaun Polisia nian, tamba ne’e CAC iha ona planu hodi konstrui rasik sela prizaun preventiva.

“Ha’u hanoin maluk média sira imi mós bele kontribui, sé iha Sábadu no Domingu ita boot sira hetan kareta Estadu la’o ba mai tula animal ka ai-maran ruma. Sé imi hetan, hasai númeru plat kareta nian ho ita boot sira nia filmajen fotografia i depois imi haruka mai ami hodi bele lacak kareta plat hanesan ne’e Ministériu ne’ebé nian? Ne’e para ita bele utiliza artigu 296 konaba pekulatu de uzu ne’e atu bele husu funsionáriu sira ne’e nia responsabilidade,” Rui afirma.ías

Jornal Nacional