REKONSILIASAUN HALO ITA HAMUTUK MAIBE JUSTISA MAKA BELE HAMETIN, LAIHA JUSTISA REKONSILIASAUN FOLIN LAEK

Abel Amaral*, opiniaun

Dadaun ne’e ita hotu hatene no rona katak ita nia maluk pro-otonomia sira hato’o proposta mai iha estadu Timor Leste hodi husu atu halo rekonsiliasaun nune sira bele fila hikas mai Timor Leste. Maibe iha reasaun direita ou indireita husi publiku hasoru proposta ne’e, ida ne’e signifika katak proposta ne’e lasimu ho diak tanba ho historia pasadu liu-liu liga ba konflitu 1999. Liga ho ida ne’e, hau pesoal halo analiza kiik ida liu-liu ida ba proposta ne’e rasik no ida seluk kona-ba rekonsiliasaun. Hau hakarak fo komentariu uluk kona-ba proposta husi maluk pro-otonomia sira ba estadu Timor Leste hodi husu atu halo rekonsiliasaun. Tuir hau nia hanoin, buat ida proposta ne’e la problema no ema individu ka grupu husi ne’ebé deit bele hato’o ninia proposta tanba ita moris iha ambiente demokratiku maibe atu simu ka lasimu ida ne’e kompetensia estadu.

Analiza seluk kona-ba rekonsiliasaun, ba hau estadu Timor Leste hakarak simu ka lasimu atu halo rekonsliasaun ho pro-otonomia sira, ida ne’e mos buat ketak ida mos. Tanba probelma pasadu liu-liu liga ho kazu krime kontra humanidade ne’ebé akontese iha 1999, ita halo deit rekonsiliasaun lato’o, nune tenke iha justisa. Ita bele halo rekonsiliasaun no rekonsliasaun halo ita bele simu malu ka halo ita hamutuk fila fali maibe atu hametin rekonsliasaun ne’e tenke iha justisa tanba justisa laiha rekonsliasaun abut lametin. Selutan mos, rekonsiliasaun ho autor krime grave 1999 depois justisa la-la’o, ita sei labele resolve problema krime seluk ne’ebé akontese iha Timor Leste tanba kazu krime grave kontra ema barak nia vida iha 1999 justisa la’o, maibe la la’o ho maximu, ida ne’e bele difikulta politika implemenstaun sistema justisa iha seitor justisa iha futuru.

Ba Timor oan se deit maka hakarak fila mai Timor Leste, Timor Leste lataka dalan inklui ba maluk pro-otonomia sira, maibe ba sira hotu liu-liu maluk pro-otomonia sira hakarak fila mai Timor Leste, bele maibe tenke fila ho kondisaun/syarat. Fila ho kondisaun katak tenke prontu atu responsabiliza aktu violensia no aktu sira seluk ne’ebé akontese iha 1999, karik ita boot sira involve, karik involve!! tanba hanesan sefi estadu Timor Leste dehan rasik hateten “Rekonslisaun ne’e persiza tempu” (http://timoragora.blogspot.pt/2016/07/pro-otonomia-husu-rekonsiliasaun-pr.htm. signifila katak sefi estadu Timor Leste rasik seidauk hatan atu halo rekonsliasaun iha tempu besik.

Iha ne’e hau mos hakarak liga oituan kona-ba situasaun ne’ebé hasoru husi pasiente ida ne’ebé tuir alegasaun sei iha relasaun familia  ho leader pro-otonomia, Eurico Gutere, pasiente ne’e bele halo tratamentu iha rai liur ka lae? Hau hanesan sidadaun babain bele responde labele, maibe hau hare fila fali aspeitu seluk liu-liu Timor Leste hanesan estadu de direitu e demokratiku, hare didiak tuir lei dehan bele. nune ba maluk sira ne’ebé hateten labele inklui hau, ida ne’e lasala tanba ne’e maka demokrasia maibe ida ne’e tuir demokrasia, la’os tuir lei. Tanba sa maka hau dehan hanesan ne’e? tanba ita moris iha ambiente estadu de direitu e demokratiku, ita kolia ka kometariu tanba demokrasia deit lato’o, nune tenke hare mos aspeitu juridiku. Tanba, atu dehan deit katak Demokrasia ne’e halo ita atu kolia ba malu no fo hanoin ba malu maibe atu kolia no hanoin hirak ne’e atu los liutan tenke hare mos ninia aturan main alias regras ka lei. Nune, atu diak liutan demokrasia tenke lao hamutuk ho lei, Se lae tanba demokrasia deit lei bele habit fali ita, tanba demokrasi ho lei ne’e hanesan fen-laen. Ida ne’e la’os kritika maibe fo hanoin deit.

Lidun ne’ebé maka haforsa dehan ema se deit iha direitu konstitusional ba halo tratamentu saude inklui familia pro-otonomia tanba hare husi aspeitu saude no humanu. Ba aspeitu krime ne’e buat ketak ida. Nune hau hakarak fo hau nia perpetiva tuir lei ba asuntus kriminal no aspeitu saude nian. Husi aspeitu krime ninian maka tuir konstitusaun RDTL no kode penal Timor Leste katak responsabilidade penal labele da’et ba ema seluk, Iha konstitusaun RDTL art. 32.3 hateten “Labele tula resposabilidade penal ba ema seluk”. Lei Penal Timor Leste iha art.12.1 hateten “Responsabilidade kriminal tanba infrasaun sira ne’ebé hakerek iha kodiku ida ne’e monu deit ba pesola singular sira no labele transmite ba ema seluk”. Ida ne’e siginifika katak se maka komete krime nia rasik maka toma responsabiliza, laos nia familia, habadk liu katak aman halo krime karik aman nia responsabilidade laos ba ona ka fen. Maibe ba kazu civil ne’e buat seluk ida, aman maka debe ema nia sasan, karik aman laiha ona, nia oan ka familia bele selu maibe krime labele.

Hare husi aspeitu saude ka asesu ba tratamentu saude, ida ne’e mos konstitusaun RDTL kolia katak ema Timor Oan hotu –hotu iha direitu atu asesu ba tratamentu ba saude, tuir konsitusaun RDTL art.57.1 hateten “Estadu hatene katak ema hotu iha direitu ba saude, asistensia medika sanitaria, no mos dever atu defende no promove direitu ne’e”. Nune tuir hau nia hanoin, politika mediku sira nia ba pasiente sira ne’ebé labele halo tramentu iha rai laran, sira mos iha direitu atu halo tratamentu iha rai liur, ida ne’e lasala tanba atu salva ema nia vida. Maibe iha ne’e hanesan rekomendasaun ida deit katak karik ha politika atu halo tratamentu saude iha rai liur karik tenke fo tratamentu ne’ebé hanesan. Obrigadu e bem hajam.

* Autor: Abel Amaral

Agora dadaun Kuliah iha UNPAZ, fakuldade Direitu,

servisu iha Fundasaun Mahein,

Email: maunabut762003@yahoo.com

Selebra Loron FALINTIL, TL Loke Merkadu Fronteira

DILI, (ANTIL) – Governu sei loke fali merkadu fronteira iha área Mota-Ain, munisípiu Bobonaro, hahú loron 18 to’o 20 Agustu hodi komemora loron Forsa Armada Libertasaun Nasionál Timor-Leste (FALINTIL) ba tinan ne’e.

Ministru Komérsiu, Indústria no Ambiente, Constâncio Pinto informa ida-ne’e ba ANTIL iha servisu fatin Mandarin Dili, Segunda (15/8), hodi hatutan, atividade merkadu fronteira ne’e atu fasilita interkámbiu entre vendedór sira hosi Timor-Leste no Indonézia.

”Ita sei halo mós mini espozisaun iha Mota-Ain ho kontestu selebrasaun FALINTIL iha loron 20 Agustu 2016. Espera iha partisipasaun di’ak, liuliu populasaun sira iha fronteira, bele atrai populasaun nasaun viziñu, atu hola ita-nia produtu lokál sira no produtu importadu sira”, katak nia.

Alende merkadu, sei iha mós atividade divertimentu liu-hosi konsertu muzika. Governu sei konvida autoridade lokál distritu Belu, Nusa Tenggara Timur (NTT), Indonézia atu partisipa no bele kria amizade di’ak.

”Autoridade lokal Belu no munisípiu Bobonaro fó sira-nia suporta tomak”, katak tan.

TL no Indonézia asina ona Provinsional Agreement iha 5 Abril 2005, depois Maiu 2012 nasaun rua ne’e asina fali akordu ba fronteira terrestre.

Tuir akordu fronteira rua ne’e iha Máiu 2012, TL no Indonézia kombina atu iha 907 koordinatu pontu fronteira terrestre ou pursentu 96 hosi komprimentu totál liña fronteira.

Liña fronteira terrestre ne’e axtende iha setór Timor, munisípiu-Belu ne’ebé baliza direita ho munisípiu Kovalima no Bobonaro juntamente 149,1 km. Iha setór Oeste iha munisípiu Kupaun-NTT  no munisípiu Timor Meiu Norte baliza direita ho territóriu Enklave Oecusse juntamente kilometru 119,7.

Realidade akordu fronteira nasaun rua ne’e kontinua iha “Provinsional Agreement 2005”.

Diferensa tuir akordu fronteira terrestre Maiu 2012, TL no Indonézia kombina atu loke odomatan sia tama-sai iha fronteira nasaun rua ne’e, ema no sasan hosi odomatan haat tama-sai mak Mata-ain, Motamasin, Napan no Wini.

Odomatan sia foun fronteira ne’e hanesan odomatan fronteira tama-sai munisípiu haat Belu mak Mota-ain Metamauk, Haekesak, Haumusu no odomatan haat fronteira tama-sai iha munisípiu Kupaung iha rejiaun Oepoli. (Jornalista: Julia Chatarina/ Editór: Otelio Ote)

Foto: Ministro Komérsiu, Indústria no ambiênte Constâncio Pinto

IC OFERESE BOLSA ESTUDU BA ESTUDANTE UNTL MELHORES 40

Governu Portugal liu husi Insitutu Camoes (IC) oferese bolsa estudu interna  ba estudante Universidade Nasional Timor Lorosae (UNTL)     hamutuk na’in 40 ne’ebe durante ne’e konsidera nudar  estudante melhores hetan valor diak.

Reitor  UNTL, Francisco Miguel Martins hatete  objetivu  husi bolsa  estudu tanba durante sira nia estudu iha UNTL hatudu duni komportamentu ne’ebe diak  ho valor  IPK 3,5.

“Bolsa interna ne’e fo mos ba mestradu dotoramentu nomos ba  lisensiatura ne’ebe mak agora dadauk hala’o hela estudu iha UNTL  sira nia peskija akademika hili liu husi selesaun ne’ebe mak rigoroja teb-tebes husi  sira nia transmisaun akademika valor  as liu mak hili sira nudar vensedor ba bolsa interna ne’e,”Reitor UNTL  Francisco Miguel Martins ba jornalista sira  iha salaun Auditoriu Liseu Sesta (12/08/2016).

Nia haktuir,  bolsa estudu interna ne’e hala’o liu husi selesaun   regiroju no variada ne’ebe kada estudante husi fakuldade no departementu  la hanesan.

“Valor kada estudante ne’e variada, husi departementu ida ba departementu seluk lahanesan  ho nia sentidu valor as liu iha kada departementu ida ne’e mak ita hili,”esklarese reitor UNTL.

Entretantu João Mendonça  nudar bolseirus husi fakuldade Folosofia Derpartementu filososia hatete, sente orguilho bo’ot ba segundu oportunidade bolsa ne’e.

“Ohin bolsa estudu ba dala rua ne’ebe marka istoria ida tanba iha ha’u nia prosesu estudu, ne’ebe ha’u sente orguilho, tanba mesmu iha UNTL kompostu husi estudante rihun ba rihun maibe hili hau nudar estudante ida ne’ebe mak hola parte iha estudante melhores ne’ebe hetan bolsa estudu interna,”haklaken nia. Ola

Jornal Nacional

BOLSA ESTUDU GOVERNU GASTA OSAN DE’IT – PR TAUR: FASILITA MALU DE’IT

Povu konsidera programa bolsa estudu ba estranjeirus ne’ebé mak durante ne’e Governu kria ne’e  gasta de’it osan, tanba Governu gasta tiha osan hodi haruka Timor-oan sira ba eskola, maibé la to’o tinan ema deporta mai fali.

Komunidade Odete de Araújo, husi Suku Matai, Postu Administrativu Maukatar, Munisipiu Covalima hatete katak, Estadu halakon ona osan lubuk ida.

“Koalia konaba eskola, ha’u hakarak koalia konaba bolsa estudu, kuandu atu hili ema ba estuda iha rai liur, tenki hili didiak ema, labele naran hili malu hodi haruka de’it, tinan ida rua sira mai fali, Estadu mak lakon osan nafatin,”Odete de Araújo bainhira dialogu ho PR Taur MAtan Ruak iha Suku refere, Sabadu (13/08/2016).

Alendene’e, nia mós kestiona katak, estrada ba Aldeia balu iha Suku refere, at tebes, hodi difikulta povu lori sira nia produtu lokal mai fa’an.

“Ami husi Suku Matai, susar tebes ba bee moos, kuandu iha tempu bailoron, ami lori masa ba buka bee iha kampu aviasaun nian,” haklaken nia.

Hatan konaba preokupasaun ne’e, Prezidenti Repúblika (PR), Taur Matan Ruak hatete katak, Bolsa Estadu ne’e iha problema duni.

“Problema ida  tanba sira hetan ajuda husi ema seluk ka fasilita malu de’it, ida seluk tanba sira nia kualidade esekola ne’e, ema nia liu ita nian, entaun sira to’o iha ne’eba lahatene, sira tenki fila fali mai,”hateten  Taur Matan Ruak.

Nia esplika, porblema seluk mak ne’e, Timor-oan balu remata eskola sekundária kleur ona mak foin atu ba eskola fali, entaun ida ne’e nia haluha tiha buat hotu ona.

“Ita nia oan sira nia kakutak lahanesan ho ema nia oan sira, tanba malae nia oan sira la halo servisu, no han diak, maibé ita nia oan sira idade se ki’ik halo ona servisu todan, no han mós ladiak,”argumenta Xefe Estadu ne’e.

Konaba bee moos, PR Taur Matan Ruak hatutan liu tan katak, bee moos ne’e problema bo’ot, la’os iha Suku refere de’it, maibé iha fatin hotu-hotu.

“Tanba ne’e mak tinan kotuk ha’u veta orsamentu Estadu, hodi husu Governu atu fó prioridade ba bee, eskola, estrada rural no saúde,” esklarese PR Taur Matan Ruak.

Tanba ne’e, Taur Matan Ruak afirma, tinan oin Governu sei fó prioridade ba área hirak ne’e, tanba área hirak ne’e mak liga direita ba povu ninia moris.

Xefi Estadu haklean liu tan katak, bee moos agora ne’e, Governu halo estandar hela, seida’uk halo di’ak, aban bainrua Governu sei halo hanesan eletrisidade, tanba eletrisidade uluk mós problema bo’ot hanesan bee moos, maibe agora komesa menus. cos

Jornal Nacional

TIMOR LESTE IHA XANANA HO TAUR NIA LIMAN

Povu iha Munisipiu Ainaro hato’o keixa ba Prezidenti Repúblika (PR), Taur Matan Ruak katak, agora dadauk iha grupu balu ne’ebé halo movimentu iha área rural hodi halo kampaña atu hafoer lideransa rejistensia sira nia naran.

Veteranu Jaime Fatima Xavier, husi Suku Maununu, Postu Administrativu Ainaro, Munisipiu Ainaro hatete katak, agora ukun an ona, mosu fali organizasaun oi-oin, hodi estraga fali nasaun ne’e nia futuru.

“Xavi Timor Leste ne’e, iha  maun bo’ot Xanana, Taur Matan Ruak, Lu- Olo ho Lere mak lori, la’os ema seluk,”deklara Jaime Fatima Xavier ba PR Taur Matan Ruak liu husi dialogu komunitária ho Xefi Estadu ne’e iha Suku refere, Sesta (12/08/2016).

Nia hatutan, povu duvidas,  tanba agora iha grupu naran grupu rin besi asu talin be korenti ne’ebé halo movimentu iha komunidade nia leet hodi halo povu trauma.

“Sira mai dehan, maun Taur, Maun Xanana, maun Lere no maun Lu-Olo mak haruka sira mai atu dada tan bandeira ida tan, ida ne’e halo ami konfuzaun,”preokupa Jaime Fatima Xavier.

Hatan ba informasaun ne’e, PR Taur Matan Ruak hatete katak, iha Timor Leste ne’e, iha buat ida ne’ebé  nunka halibur malu iha organizasaun ida de’it, mas konsege halibur malu iha objetivu ida deit.

“Uluk ita ida-idak ho ita nia organizasaun, maibé hanoin ida deit, ba ukun rasik an,”afirma katak Taur Matan Ruak.

Xefi Estadu ne’e reafirma, agora iha tan grupu talin be korenti rin besi asu, maibé labele halo arbiru de’it, tenki halo buat dia’k.

“Ha’u fó instrusaun ba imi Ainaro, kuandu Tuloda lori fali nia grupu talin be korenti rin besi asu ne’e mai fali, kaer tiha nia,”hateten Taur Matan Ruak.

Povo trauma ho rumores

Entretantu iha biban ne’e povu iha Suku Ogues, Postu Administrativu Maukatar,  Munisipiu Covalima, trauma ho rumoris husi grupu deskuñesidu balu ne’ebé hatete katak, oras ne’e dada’uk FALINTIL balu se subar hela iha ailara.

Veteranu Abel Gusmão,  informa katak, komunidade iha Covalima, agora dada’uk trauma ho ru moris oi-oin.

“Ami rona rumoris barak, tanba ne’e ha’u hakarak hatene, rejistensia uluk Prezidenti Repúblika Taur rasik iha ailaran durante tinan 24, ema iha ailaran se iha ka la’e,” relata Abel Gusmão ba PR Taur Matan Ruak, bainhira dialogu ho Xefi Estadu ne’e iha Suku refere, Sabadu (13/08).

Alende ne’e, nia mós husu ba PR Taur Matan Ruak katak, nu’udar veteranus antigus kombatentes, sira iha farda ka lae, hanesan veteranus sira uza.

Hatan konaba preokupasaun ne’e, Prezidenti Repúblika, Taur Matan Ruak hatete katak, rumoris ne’e bosok, tanba ema iha ailaran laiha ona.

“Ha’u horibaihira rona katak, ema balu hatete katak, ema balu se iha ailaran, ida ne’e bosok ita nia maun sira mate hotu ona, ita labele lori sira nia naran bosok ema, lae ita nia vida la naruk. Maun Nicolau mak se moris, ha’u fera tiha nia estatua iha Comoro no Aileu, nia mate ona mak ita halo nia estatua, se nia sei moris, ita halo nia estatua halo saida,”haklean Taur Matan Ruak.

Konaba farda, PR Taur Matan Ruak hatete katak,  komisaun homenajn halo farda ba prosesu desmobilizasaun de’it, maibé farda ba veteranus laiha.

Maibé Xei Estadu ne’e afirma, iha nasaun barak, normalmente sira iha identifikasaun atu kualker ema hasoru nia, bele kuñese katak, ema ne’e veteranus.

Konaba bee moos, PR Taur Matan Ruak hatete katak, Problema bee ne’e la’os iha Suku refere de’it, iha fatin balu povu la’o distansia dok liu  atu kuru bee.

“Iha fatin balu mós agora komesa halo jestaun ba bee, kada fulan uma kain ida tenki selu quarter, hodi selu ema tau matan ba sira nia be,” dehan Taur Matan Ruak.

Maibé Taur Matan Ruak dehan,  Governu agora dadauk komesa fó importansia ona atu rezolve problema bee moos.cos

Jornal Nacional

POVU HAKARAK HATENE: PR TAUR IHA DUNI PARTIDU KA LAE

Povu husu ba Prezidenti Repúblika (PR), Taur Matan Ruak, atu hatete sai hari’i duni partidu ka lae, tanba povu rona informasaun katak, Xefi Estadu ne’e hari’i ona Partidu, maibe to’o agora seidauk sai ba publiku.

Komunidade Elizario Bianco dehan, sira rona informasaun katak, PR Taur Matan Ruak hari’i ona Partidu ne’ebe mak dadaun ne’e rejista ona iha Tribunal Rekursu.

“Agora dadauk iha ukun na’in balu la’o lori Prezidenti nia naran katak, Prezidenti mós iha ona Partidu, tanba ne’e, ami husu atu Prezidenti esklarese lolos mai ami,”komunidade, Elizario Bianco, hateten liu husi dialogu komunitaria ho PR Taur Matan Ruak iha Suku Maununu, Postu Administrativu Ainaro, Munisipiu Ainaro, Sesta (12/08/2016).

Alende ne’e, komunidade José Bianco Gomes de Araújo mós kestiona problema veteranu iha Timor Leste, tanba veteranus sira agora la sai veteranus, maibe sai fali meteransu.

Iha fatin hanesan, Marito da Cunha mós informa katak,  Iha tinan hirak liu ba, Governu taka tiha ona artemarsiais katak, artemarsiais ne’e, la ejiste ona, entaun sira kumpri tiha ona, maibé preokupasaun bo’ot ba sira mak servisu laiha.

“Entaun dalaruma sira steres, joven sira hemu tua to’o lanu, no hamosu fali problema, maske la bo’ot hanesan tinan  hira liu ba,” katak nia.

Hatan ba preokupasaun ne’e, PR Taur Matan Ruak hatete katak, agora dadauk nia sei hala’o hela nia kna’ar hanesan Xefi Estadu atu tau matan ba estabilidade.

“Iha loron 20 de Maio tinan oin, ha’u fo resposta konaba ida ne’e, agora seidauk,”esklarese PR Taur Matan Ruak.

Kona-ba artemarsiais, PR Taur Matan Ruak dehan, joven sira kumpri duni desizaun Estadu nian, tanba agora dada’uk problema iha fatin fatin komesa menus.

“Problema desempregu nee, problema ida ne’ebe bo’ot iha Timor Leste, maibe ita nia Governu halo hela esforsu ba ida,”PR Taur haktuir. cos

Jornal Nacional

Don Carlos Fila Hikas Mai Timor

Eis Bispu Dioseze Dili, Don Carlos Filipe Ximenes Belo, fila hikas ona mai Timor-Leste iha S­ábadu (13/08/2016). Don Carlos nia chegada ne’e simu hosi família no familia komunidade Salezianu Don Bosco iha Aeroportu Internasional Nicolao Lobato, Dili.

Eis Vise Ministru Finansa, Rui Manuel Hanjam ne’ebé hanesan família hosi Don Carlos informa katak Don Carlos nia prezensa iha Timor ne’e nu’udar vizita privadu. “Amu nia prezensa iha Timor ne’e atu vizita família,” Rui dehan ba Matadalan via FB, Sábadu (13/08/2016) kalan.

Nia hateten Don Carlos iha Timor durante semana rua de’it.  Hafoin ne’e, nia hatutan, sei fila hikas ba Portugal.

Iha parte seluk, tuir fonte konfirmadu ida ba Matadalan esplika katak iha Domingu (14/08), Don Carlos sei dezloka ba nia rain moris fatin, Afasá, Postu Administrativu Quelicai, Munisípiu Baucau, atu vizita família no mós vizita ninia uma lisan.

Durante sai hosi Timor iha tinan 2002 liu-ba, Don Carlos vizita hikas Timor hamutuk dala rua ona. Dahuluk iha tinan 2006 hodi haree diretamente timoroan sira ne’ebé afetadu ba krize polítika militár iha momentu ne’ebá. (Jon)

Matadalan

Sekretáriu Estadu Autarkia sira-nian sei mai Timor-Leste ba konferénsia kona-ba desentralizasaun

Sekretáriu Estadu Autarkia Lokál sira-nian sei mai Timor-Leste hodi partisipa iha konferénsia internasionál ida kona-ba Desentralizasaun Administrativa no Poder Lokál, ne’ebé sei hala’o iha loron 17 no 18 agostu iha Dili, haktuir Governu ohin iha komunikadu.

Aleinde Carlos Miguel, sei marka prezensa iha konferénsia ne’ebé Ministériu Administrasaun Estatál timoroan mak promove ho apoiu hosi Governu portugés, "reprezentante sira hosi munisípiu portugés oioin, iha sekuénsia akordu kooperasaun ne’ebé mantein ho munisípiu sira iha Timor-Leste", lee iha testu.

Intervensaun sekretáriu Estadu portugés nian iha konferénsia ne’e, ne’ebé hakarak kontribui " ba hametin lasu kooperasaun entre Governu rua ne’e iha domíniu desentralizasaun administrativa no poder lokál", monu iha loron 17 agostu, tuku 14:15 lokál, hatutan gabinete imprensa ministru Adjuntu primeiru-ministru nian.

Molok ne’e, bainhira to’o iha Timor-Leste, iha loron 15, Carlos Miguel sei hala’o reuniaun ho vise-ministru Administrasaun Estatál no ho sekretáriu Estadu Administrasaun Estatál timoroan no, iha loron 16, ho primeiru-ministru nasaun nian, iha oras lokál ne’ebé seidauk hatene loos.

Iha loron 19 agostu, prevee vizita ida ba Semitériu Santa Krús, iha Dili, no Behau, pedreira mármore iha Manatutu.

SAPO TL ho Lusa

SOLUCIONADAS AS DIFICULDADES PARA EDITAR O TIMOR AGORA VAMOS CONTINUAR

Por cerca de três dias o acesso ao manuseamento que permite editar o Timor Agora esteve inacessível, a impossibilidade de manter o ritmo habitual de postagens refletiu-se de modo absoluto.

Neste momento, apesar de ainda existirem alguns pormenores a reparar, estamos em condições de retomar os propósitos a que a equipa do TA se propôs desde início e que tem sido acolhido com satisfação e participação frequente dos amigos que nos visitam. Vamos recomeçar.

Fazemos questão de apresentar as nossas desculpas aos que viram goradas as suas expetativas quando acederam ser êxito às divulgações habituais do Timor Agora. Podem ficar com a certeza de que não desistiremos facilmente quando encontramos escolhos no nosso caminho porque entendemos que a utilidade na divulgação de notícias, na opinião dos nossos colaboradores, na oferta de possibilidade de também poderem comentar livremente e veicular as vossas opiniões é razão superior para existirmos.

Aos que procuram dificultar e boicotar a existência do TA só temos a informar que lamentamos a recorrência a métodos de silenciamento dos que pugnam pela informação, justiça, liberdade e democracia. Métodos de silenciamento que comparativamente, descontando a evolução da tecnologia, já foram usados e perseguidos pela censura do regime Salazar-colonialista e pelo regime de Shuarto quando por quase um quarto de século ocupou criminosa e sanguináriamente Timor-Leste.

O Timor Agora vai prosseguir. Vai continuar a existir enquanto considerar possível manter a tarefa a que se propôs. Na prática temos as portas abertas para todos que queiram expressar as suas opiniões e as suas notícias. A todos que queiram pugnar pela liberdade, pela democracia. A intolerância não faz parte do nosso coletivo. Queremos e procuramos sempre divulgar informação abrangente em todas as vertentes. Queremos fomentar o debate, a exposição de ideias e ideais que visem melhorar as relações humanas, as condições de vivência de todos os que querem viver em paz, numa sociedade justa e democrática. Se esta ambição é utópica terá deixar de o ser. Ambicionamos que se traduza em realidade.

Agradecemos aos milhares que nos acompanham as suas presenças, o seu apoio e as suas colaborações. Obrigado a todos que aqui vêm por bem.

Vamos continuar. (TA)