PM Taur Kondena Autór Lori Materiál Droga Mai TL

DILI: Primeiru Ministru (PM) Taur Matan Ruak kondena autór ne’ebé lori materiál droga mai Timor Leste (TL) tanba prejudika futuru joven sira nian. 

“Aktu ida ne’ebé kondena. Hanesan Primeiru Ministru, apela ba sidadaun sira atu kuidadu, bainhira introdus buat ne’ebé ita nia lei bandu tanba prejudika ita nia joven sira nia futuru,” hateten PM Taur Matan Ruak hafoin enkontru semanál ho Prezidente Repúblika, Kinta (11/4). 

Lee kompletu informasaun ne'e bele iha jornal imprime, edisaun Sesta ohin (12/4) iha kapital Dili, ou kontaktu direita ba jornal INDEPENDENTE, iha Hudi Laran Dili...

Lee mós iha Independente

PNTL Sei Atua Uza Karreta Estadu Lahó Lisensa Durante Páskua

DILI, (TATOLI) - Komandante Jerál Polísia Nasionál Timor-Leste (PNTL), Komisáriu Faustinho da Costa, hateten, PNTL preparadu atu hala’o atividade no orientasaun operasionál ba loron páskua nian.

“Ami iha atividade rua. Asegura sarani sira atu partisipa iha páskua ne’ebé sei hahú kedas iha Domingu Ramos. Ami sei hasai diretiva ida ba ida ne’e. Ami hato’o mós ba Prezidente Repúblika katak ita nia lei la permite atu ema lori viatura Estadu iha loron boot. Komu governu fó ona toleránsia pontu hahú iha Kinta-Feira Santa, entaun iha Kinta, Sesta, Sábadu no Domingu, ita orienta ona PNTL para transporte sira governu nian ne’e di’ak liu labele utiliza bainhira la iha autorizasaun. Se lae, PNTL sei hola medida ruma bazeia ba lei ne’ebé iha”, hateten Komisariu Faustinho da Costa, ba jornalista sira, horiseik, iha Palásiu Prezidente Nicolau Lobato, Bairru Pité.

Faustinho informa katak, iha tempu badak nia laran nia sei hala’o reuniaun ho komandante polísia sira hosi munisípiu para bele implementa diretiva hosi komandu PNTL hodi halo  operasaun atu  garante seguransa iha oras 24 nia laran durante loron páskua.

Iha biban ne’e, Faustinho  haktuir, asidente iha semana ida ne’e ho númeru ki’ik (iha kazu 20-resin) no nia konsidera katak númeru ne’e tun tanba komunidade iha ona konsiénsia atu fó importánsia ba moris. Maske nune’e, polísia tenta buka oinsá atu redús nafatin.

“Ha’u aproveita apela ba komunidade, liuliu estudante sira katak tempu agora ne’e tempu estuda nian. Ita-boot sira nia tempu ne’e la’ós mete ba grupu A no B. Se ita-boot sira mete maka imi seidauk tau mehi didi’ak ba imi nia an no sei lakon futuru,” afirma Komisáriu Faustino da Costa.

Jornalista: Xisto Freitas | Editór: Francisco Simões

Imajen: Komandante Jeral PNTL, Komisáriu Faustino da Costa. Imajen/Antonio Gonçalves

Governu Sei Estabelese Embaixada iha Índia

DILI, (TATOLI) - Governu Timor-Leste iha ona planu sei estabelese embaixada permanenti ida iha Índia atu hametin kooperasaun bilateral entre nasaun rua.

“Se buat hotu lao di’ak, tinan ida ne’e, ita komesa ona estabelese embaixada iha Índia”, hateten Ministru Negósiu Estranjeiru no Kooperasaun Dionísio da Costa Babo Soares, ba Jornalista sira, ohin, iha ninia kna’ar fatin,  MNEK, Praia dos Qoqeiros, Dili.

Dionísio Babo akresenta, Estadu foti desizaun ne’e tanba kestaun da-uluk maka Timor-Leste seidauk estabelese ninia embaixada  iha Ázia Leste  no Ázia  Sudeste. Da-ruak, haree ba iha ámbitu kooperasaun ho sira durante ne’e no sira mós iha interese atu harii sira ninia embaixada iha ne’e nomos entermus jeo polítiku no estratéjiku importante polítika esterna la’ós deit rejiaun, maibé iha mundu internasionál.

Iha parte seluk, iha tinan ne’e,  estadu Timor-Leste mós deside sei taka ninia embaixada iha Angola no Afrika du súl tanba problema orsamentu. Kustu aluga uma iha nasaun rua ne’e karun  kada tinan gastu besik dollar rihun  US$500, atividade polítika la dun intensivu no  distánsia do’ok. Tanba ne’e, governu konsiente atu hamenus gastu orsamentu ne’e hodi loke fatin embaixada iha nasaun sira membru konsellu seguransa nasaun unidas hanesan Rúsia no França ba futuru  tanba  fó liu vantajen intermus jeo polítika no estratéjia  ba diplomasia esterna iha mundu.

Enkuantu, embaixadór la’ós rezidénsia Timor-Leste nian iha Nasaun Mozambique maka sei reprezenta servisu ba Afrika do súl no Angola hanesan mós embaixadór Timor-Leste iha Portugal maka oras ne’e kobre iha Cavo-verde no CPLP no iha Bruxelas maka kobre ba França.

“Ita sei iha de’it reprezentasaun hosi Maputo Mozambique maka reprezenta iha Pretória no Luanda ne’ebé karta ne’e haruka ba hotu no ministru sira iha ne’ebá konkorda hotu ona”, esplika Dionísio Babo.

Jornalista: Agapito dos Santos | Editór: Francisco Simões

Imajen: Ministru Negósius Estranjeirus no Kooperasaun (MNEK) Dionísio da Costa Babo Soares. Imajen/Egas Cristovão

ONU Komprometidu Apoiu Hakotu Hamlaha iha TL

DILI, (TATOLI) - Ajénsia Organizasaun Nasaun Unidas (ONU-sigla portugés) kompostu hosi  Organizasaun Nasaun Unidas ba Ai-han no Agrikultura (FAO-sigla inglés), Fundus Nasaun Unidas ba Labarik (UNICEF-sigla inglés), Programa Mundial Ai-han (WFP- sigla Inglés), Organizasaun Saúde Mundiál (WHO-sigla Inglés), komprometidu atu hamutuk ho estadu Timor Leste  hakotu problema hamlaha hodi hasae nutrisaun ba kombate ma-nutrisaun.

Koordenadór Rezidente ONU iha Timor-Leste, Roy Trivedy, hato’o sira nia kompromisu ne’e bainhira hamutuk ho governu hodi lansa sira nia relatóriu rejionál  iha Otél Timor, Dili, ohin,  revela katak redusaun númeru  ema hamlaha no ma-nutrisaun  ba labarik ki’ik pratikamente  lao neineik iha parte barak iha rejiaun Ázia no Pasífiku inklui Timor-Leste.

Intermus Timor-Leste,  Roy Trivedy, apresia ho polítika governu atu luta kontra hamlaha no hasae nutrisaun ai-han hodi kombate problema ma-nutrisaun tanba ne’e ONU hakarak servisu hamutuk ho governu atu hare ba asuntu ne’e.

Nia dehan, iha rejiaun Ázia no Pasífiku metade populasaun ho problema ma-nutrisaun iha mundu kuaze metade Biliaun (Millaun 486) no iha Timor-Leste pruvolta porsentu 40, liuliu labarik ho tinan 6 mai kraik maka enfrenta problema ma-nutrisaun.

Relatóriu ne’e hatudu katak númeru ema ne’ebé hamlaha kuaze laiha mudansa ba tinan rua ikus ida ne’e  sei prejudika objetivu dezenvolvimentu sustentavel atu hakotu ma-nutrisaun ho forma hotu iha 2030.

Ajénsia internasionál hirak ne’e otimista katak hosi rezultadu ne’e sei kontribui ba diálogu ne’ebé informativu, laiha dúvida no parseiru hotu tenke esforsu maka’as liután atu aselera progresu ba hakotu hamlaha, hodi hasae nutrisaun ho asaun hahú agora.

Oportunidade ne’e, Sekretáriu Jerál hosi Ministériu Agrikultura no Peska, César José da Cruz  hatete, governu iha ona polítika atu hakotu problema hamlaha hodi hasae nutrisaun liuhosi produsaun ai-han iha rai laran ho kualidade.

Atu implementa polítika ne’e maka governu kontinua servisu hamutuk ho parseiru internasionál hirak ne’e atu resolve. Nune’e, Ministériu Agrikultura no Peska nia servisu atu haree kualidade ai-han hodi hasae produsaun, tanba ne’e, ministeriu servisu hamutuk ho parseiru sira hotu atu haree kona-ba ma-nutrisaun”, hateten César José da Cruz.

Problema hela fatin, bee mós, saneamentu, estrada, ai-han  no seluk tan, hateten César da Cruz, kontribui hodi hamosu  problema ma-nutrisaun, tanba ne’e, atu kombate kestaun ne’e,  governu estabelese ona Konsellu Nasionál Seguransa Alimentár Timor-Leste (KONSANTIL) hodi involve ministériu agrikultura, saúde, edukasaun no seluk tan.

Tuir relatóriu ONU ne’ebé  Koordenadór Rezidente Roy Trivedy ho ninia ekipa aprezenta ba Primeiru Ministru Taur Matan Ruak, foin lalais ne’e, indika  situasaun nutrisaun iha Timor-Leste rejista, porsentu 50 labarik tinan neen mai kraik fó susu ben inan exluzivu durante tinan 2 fulan neen, labarik ma-nutrisaun 46%, krekas 40%, krekas aas 40%, sofre anemia tinan lima mai kraik 40%, feto 24% hosi tinan 15-49 sofre problema anemia.

Hosi persentajen labarik tinan 5 mai kraik ne’ebé hasoru problema stantin  iha kada munisípiu hanesan  Ainaro 60%, Bobonaro 53%, Viqeuque 52%, Baucau 51%, Oe-Cussé 51%, Covalima 48%, Liquiça 47%, Manatuto 46%, Aileu  46%, Dili 42 %, Lautem 41%, Manufahi 38% no Ermera 29%.

Atu resolve problema ne’e , ONU  fó hanoin  dalan ida maka kolaborasaun servisu entre instituisaun oi-oin, hanesan iha área Saúde, edukasaun, agrikultura, bee no sanitasaun no seluk tan.

Jornalista: Agapito dos Santos | Editór: Francisco Simões

Imajen: Sekretária Jeral Ministerio Agrikultura no Peskas (MAP), Cesar José da Cruz ho Koordenadór Koordenadór Rezidente ONU iha TL, Roy Trivedy, halo lansamentu Relatoriu Seguransa Aihan no Nutrisaun 2018- Vizaun Jeral Konaba Rejiaun Azia Pasifiku. Imajen/Egas Cristovão

Rede Defensór dos Diretus Umanus sei realiza konferénsia Imprensa

Konvite ba Media/Jornalista sira. Aban, Sesta feira dia 12 dadeer tuku 9.30, iha Faról-Asosiasaun Hak, Rede Defensór dos Diretus Umanus sei realiza konferénsia Imprensa ba kazu violasaun diretus Umanus sira ne'ebé involve autoridade Sivil no seguransa sira hasoru sidadaun sira.

RDDU