PR Taur Lansa Primeira Pedra Konstrusaun Monumentu Masakre Santa Cruz

DILI, (ANTIL) - Prezidente Repúblika (PR), Taur Matan Ruak maka sei lansa primeira pedra ba konstrusaun  Monumentu Masakre Santa Cruz 1991, Sabadu (12/11) iha simiteriu Santa Cruz, Dili, Prezidente Komité 12 Novembru, Gregório Saldanha informa ba jornalista sira, Kinta (10/11), hafoin hasoru malu ho Prezidente Repúblika, Taur Matan Ruak iha Palasiu Prezidente Dili.

Iha enkontru ne’e, partisipa mos Sekretáriu Estadu Juventude no Desportu, Leovigildo Hornai, hodi hato’o kona-ba preparasaun ikus selebrasaun masakre Santa Cruz ba dala 25, hanesan mos selebra Loron Nasional ba Juventude, inklui preparasaun ikus serimonia hatur fatuk ba konstrusaun monumentu ne’e.

“Ami hatama ona dezeñu ba iha Governu. Ami konsulta ho Primeiru Ministru, Dr. Rui Maria de Araújo, Ministru Planeamentu Estratéjiku, Xanana Gusmão no Sekretáriu Jerál Partidu FRETILIN no Dr. Marí Alkatiri. No deside  lansa  konstrusaun  monumentu iha komemorasaun Masakre Santa Cruz 1991,” Gregório dehan.

Konstrusaun ba monumentu ne’e la’o fazeadamente. Faze dahuluk, hadi’a kapela, harii estátua iha portaun boot nia leten no hadi’a dalan tama ba iha kapela. Faze daruak no datoluk, sei deskuti maka bele konstrui tan buat boot balun. Kustu orsamentu ba monumentu ne’e seidauk difini loloos.

Nia rekunese, konstrusaun monumentu sei fó implikasaun ba komunidade sira, ne’ebé hela besik Semitériu Santa Cruz. “Dili ne’e kloot loos, tan ne’e presiza iha planu mestre para marka populasaun sira hela iha ne’ebé no fatin memória ne’e atu konstrui iha ne’ebé,” Gregório haklaken.

Kona-ba lala´ok komemorasaun Masakre Santa Cruz, nia esklarese, komemorasaun tinan ida-ne´e diferente ho tinan sira seluk. Tanba komemorasaun ba Masakre Santa Cruz,  hala’o hosi munisípiu to’o suku sira no sei lansa mós Rádiu Komité 12 Novembru.

“Ami informa ba Xefe Estadu, katak, halo ona preparasaun ba Komemorasaun 12 Novembru Masakre Santa Cruz. Konvida mós Prezidente atu partisipa iha eventu ne’e,” Gregório tenik. Orsamentu ba komemorasaun ne´e mai hosi Sekretaria Estadu Juventude no Desportu ho montante $121,000.00. Fundu balkn se buka husi  fonte seluk, atu suporta atividade adisionál sira. (Jornalista: Xisto Freitas/Editor: Otelio Ote)

Foto: Prezidente Komité 12 Novembru, Gregório Saldanha ko´alia ba jornalista sira iha Palásiu Prezidésnia Repúblika hafoin sorumutu ho Prezidente Repúblika, Taur Matan Ruak. Iha dadalia ho jornalista sira, Prezidente Komité hetan akompaña hosi Sekretáriu Estadu Juventude no Desportu, Leovigildo Hornai. Foto ANTIL/Xisto Freitas

Estadu Rekoñese Profisaun Jornalista

DILI, (ANTIL) – Sekretáriu Estadu Komunikasaun Sosiál (SEKOMS), Nélio Isaac Sarmento hatete, estadu rekoñese profisaun jornalista hanesan doutór no advogadu tanba ne’e, jornalista tenke iha kompeténsia ida ne’ebé estadu fó.

“Imi hotu-hotu iha esperiénsia lubuk ida ona, maibé profisaun jornalista ne’e profisaun ida ne’ebé estadu ne’e rekoñese”, Sekretáriu Estadu dehan ba jornalista sira iha Palásiu Governu, Kinta, (10/11) depois enkontru ho Prezidenti Konsellu Imprensa Indonézia, Yoseph Adi Prasetyo.

Sorumutu ho Prezidente KI Indonézia ne’ebé akompaña hosi Prezidenti KI TL, Virgilio Guterres, ko’alia kona-ba asuntu oinsá atu haree kompeténsia jornalista Timor-Leste. “Kompeténsia ida mak estadu fó hela ba Dewan Pers  atu sertifika jornalista nia profisaun. Ho ida ne’e hotu mak ami husu Dewan Pers Indonézia sei ajuda Dewan Pers Timor-Leste nian atu haree meius sira kona-ba enkuadramentu”, SEKOMS informa.

Vizita kortezia ne’e mós troka informasaun kona-ba planu saida mak atu hala’o iha futuru, liuliu kooperasaun ne’ebé sei hala’o ho KI Indonézia no TL. Aleinde ne’e, toka mós informasaun kona-ba papél kontribuisaun KI Indonézia ho Timor-Leste atu foti inisiativa haree servisu mídia sira iha rejiaun, liuliu iha ASEAN (Asosiasaun Sudeste Aziátiku-red).

“Konsellu Imprensa Timor-Leste iha esperiénsia ona tanba, envolve ona iha autoridade reguladór komunikasaun sosiál país CPLP nian no iha Ázia ne’e Indonézia hanesan instituisaun ida ne’ebé iha kapasidade tebes hodi inisiativa servisu iha Ázia”, Nelio dehan.

Enkuantu, SEKOMs fó apoiu ba KI Indonézia no Timor-Leste atubele hahú ona inisiativa liberdade imprensa iha rejiaun tomak, liuliu iha ASEAN. (jornalista: Maria Auxiliadora; editora: Rita Almeida)

Foto: Vizita Kortezia KI Indonezia, Yoseph Adi Prasetyo iha Gabinete SEKOMS, Kinta, (10/11). Foto ANTIL/António Gonçalves.

Deskonfia Xefe Suku Balun Foto Kopia Buletin Votus

DILI – Deskonfia xefe suku balun iha Munisipiu Manufahi foti buletin votus hodi halo foto kopia. Tuir lolos buletin votus nee nudar material sensitivu no labele halo foto kopia.

Tuir Prezidente Autoridade Munsipiu Manufahi, Pinheiro de Araujo hatete, nia rekoinese katak iha duni problema neebe mosu tanba xefe suku foti akta materiais sensitivu lori ba foto kopia.

Nee dokumentu segredu nasaun nian, nee ema ida labele foti. Ida nee krime eleitoral depois detein tiha 72 oras lori ba rejista iha prokuradoria jeral Suai nian dia seguinte nee lori kedas ba julga,” dehan Pinheiro ba jornalista iha edifisiu STAE, Kinta (10/11/2016).

Pinheiro haktuir, lori ba tribunal hodi halo julgamentu maibe juis laiha fatin tanba nee seidauk julga, maibe problema rejista ona depois seiha kontinuasaun. Pinheiro sublina, maibe agora nee, ida nee sei iha prosesu praduga tak bersalah, nia direitu nafatin, direitu siviku bele tuir vota. Depois vota ba mak povu mak julga sira.

Iha fatin hanesan, Koordenador STAE Munisipiu Manufahi, Anjelo Cortereal dehan, problema neebe mak akontese iha munisipiu Manufahi nee krime oituan tanba oras nee ninia prosesu lao hela no ita hein deit desizaun tribunal nee oinsa. Informasaun kompletu iha STL Jornal no STL Web, edisaun Sesta (11/10/2016). Raimundo S. Fraga

Suara Timor Lorosae

Taur Lori Povu TL Kongratula Prezidente Eleitu EUA

DILI – Prezidente Republika Taur Matan Ruak hodi povu no Estadu Timor Leste nia naran kongratula Prezidente Eleitu Estadus Unidus Amerika Donald Trump.

Tuir Komunikadu Imprensa neebe STL aAsesu liu husi Media Palasiu Prezidensial Nicolao Lobato, Kinta (10/11/2016) katak, Prezidente Republika Taur Matan Ruak hatoo felisitasaun ba Vitoria neebe Trump hetan liu husi Elisaun Prezidensial Estadus Unidus Amerika iha loron 9  Novembru 2016.

Hanesan Prezidente Republika hodi povu no estadu Timor Leste nia naran hakarak kongratula Donald Trump neebe mak eleitu hanesan Prezidente Estadus Unidus Amerika nian,” dehan Taur iha komonikadu Imprensa nee.

Taur iha esperansa boot ho mandantu Prezidente foun Amerika nian sei hametin liu tan relasaun antre Timor Leste ho Amerika, liu husi koperasaun estadu ho estadu neebe mak lao ona durante nee. Iha komonikadu nee, Taur hatete prezidente foun Amerika nian sei hemetin liu tan Timor Leste ho Estadus Unidus Amerika nia servisu hamutuk hodi harii dame kria prosperidade ba mundu tomak.

Iha fatin ketak  Embaixadora EUA ba Timor Leste, Karen Stanton Antes nee  hatete, prosesu eleitoral Estadus Unidus nian nee, determina husi kolejiu eleitoral kada provinsia ida. Informasaun kompletu iha STL Jornal no STL Web, edisaun Sesta (11/10/2016). Timotio Gusmao

Suara Timor Lorosae

DOM VIRGÍLIO: DIÁLOGU MAKA DALAN DI’AK BA REZOLVE PROBLEM

Amu Bispu Diocese Díli, Dom Virgílio do Carmo da Silva, SDB hateten katak, diálogu maka dalan di’ak liu ba rezolve problema ne’ebé akontese iha sosiedade nia leet.

“Tamba foin akontese lalais ne’e katak, ita nia maluk sira baku malu no tá malu iha Hera ne’ebá, halo ita hotu fuan kanek. No ohin loron heroismu ne’e la’os hatudu ho maneira sira violentu ninian, maibé heroismu ohin loron ninian tenki uza kakutak no fuan, tamba ita agora moris iha situasaun ne’ebé foun no ejiji Timoroan mós hatene hatudu ita nia heroismu ne’e ho maneira ne’ebé di’ak liuhusi edukasaun ne’ebé ita simu,”esplika Dom Virgílio do Carmo da Silva, ba jornalista sira iha Paço Episcopal Lecidere Díli, Tersa (9/11), relasiona ho akontesimentu Hera foin lalais, konfrontu entre Grupo Arte Marsial (GAM) ne’ebé rezulta ema na’in tolu (3) kanek no sunu uma lima (5).

Husu konaba ho akontesimentu iha rai laran ne’e, liga ba komemorasaun 12 Novembru nu’udar loron nasional ba juventudi, Amu Bispu Diocese Díli ne’e reforsa katak, 12 de Novembru hanesan loron nasionál ba heroi sira ne’ebé halo funu ho brani, fakar-ran no koalia hodi defende rai ida ne’e, maibé heroismu ohin loron ne’e, tenki hatudu ho maneira seluk katak, tenki dedika no sakrifika-an atu aprende.

“12 Novembru ne’e loron nasional ba ita nia Herois sira, ita hanoin katak uluk ita koalia konaba heroi sira ne’ebé funu, fakar-ran, brani atu ba hakilar no koalia atu defende ita nia rai. Maibé ohin loron ita nia heroismu ita tenki hatudu ho maneira seluk, heroismu agora nian hahú foinsa’e sira atu didika-an no sakrifika-an atu aprende, ida ne’e maka heroismu ida ne’ebé ohin loron nian”, Dom Virgílio esplika.

Dom Virgílio fundamenta katak, heroismu ba Timoroan agora iha tempu ukun-an ne’e la’os nafatin ho violénsia mak rezolve problema ne’ebé mosu, maibé iha korajen atu tuur halo diálogu, tamba liuhusi diálogu maka bele hetan solusaun.

Amu Bispu mós fundamenta katak, entre Timoroan sira deit, jovens deit tenki rona malu, tenke diálogu. Tanba tenik Dom Virgílio, problema dalabarak mosu ne’e tamba ema nunka tuur atu rona malu no diálogu.

“Kuandu akontese problema ruma ita hakarak kondena de’it ema, maibé buat ne’ebé importante, ita Timoroan iha tradisaun antigu nian ne’e sempre tuur koalia no buka dalan. Entaun ida ne’e nu’udar ema sarani igreja ninian buat ida be fiar ne’e sai fatór ne’ebé prinsipál ba ita atu bele aprosima ba situasaun saida de’it. Wainhira ita fiar malu, rona malu ita bele halo diálogu hodi bele hetan dalan hodi rezolve problema”, dehan Dom Virgílio.

Maibé tenik Dom Virgílio, tamba buat ida be agresividade ne’e kuandu ema ruma sente buatruma ladun loos nia sente agresivu lahalimar no ho nervozu deit, entaun nunka mais rezolve problema.

“Situasaun sira hanesan ne’e ita tenki pasensia, fiar no haraik-an. Tanba ida ne’e mak virtude sira ne’ebé ita nu’udar sarani tenki kuda fanatin iha ita nia fuan. No ida ne’e mak ita dehan virtude sira heroismu tempu ida ne’e nian atu nune’e ita bele transforma ba ita nia sosiedade”, Amu Bispu Díli ne’e fundamenta.ías 

Jornal Nacional

OJE 2017, LA GARANTE DEZENVOLVE SETOR EDUKASAUN

Membru Parlamentu Nasional (PN) husi Komisaun F, Eladio Faculto, kestiona maka’as politika Orsamentu Estadu tinan fiskal 2017 nian, ne’ebe ladun fo biban atu garante dezenvolvimentu setor edukasaun.

Maske nune’e, Governu liu husi Ministeriu Finansas, argument katak, OJE 2017 nian fo mos prioridades ba dezenvolvimentu area edukasaun nian.

“Ita rona bei-beik Governu nia intensaun atu investe iha area edukasaun, maibe haree ba prioridades nebe sira difini la kondis ho realidade,”afirma Deputadu Eladio Faculto, wainhira partisipa iha serimonia panorama orsamental 2017 ne’ebe halao iha Novo Turismo, Kuarta (09/11/2016).

Eladio mos kritika Ministeriu Edukasaun ne’ebe fo bolsu estudus ba iha kondisaun nia oan deit, mas ba ema kiak no mukit nia oan la dun iha oportunidade atu asesu ba bolsu estudus.

Deputadu ne’e hateten, edukasaun ho osan nebe iha no rekursu nebe iha ho kondisaun nebe limitadu bele halo privisaun katak tinan hirak mai tan mos seidauk bele rezolve problema ne’e ho diak, problema merenda eskolar mos tinan oin seidauk bele rezolve nafatin.

Nia dehan tan durante halo fiskalizasaun koñese realidade ba faktor nebe atu ajuda Ministeriu lao diak, permeiru maka orsamentu, osamentu labele sai obstaklu, segundu maka rekursu humanu, rekursu humanu labele sai obstaklu, tanba edukasaun hanesan asesu ba dezemvolvimentu de pais.

Pesimista ho agrikultura

Husi sorin seluk, Prezidenti komisaun D PN, Deputada Jacinta Abucau Pereira, politika orsamentu 2017 nian mos seidauk bele resolve situasaun area agrikultura nian.

“Agrikultura kontinua sai prioridade iha tinan 2017, maibe hau senti labele rezolve problema agrikultura tanba atu  sai prioridade persiza tau osan barak,” hateten Jacinta Abucau.

Nia hateten, difikuldade nebe sira infrenta liga ba orsamentu nebe koloka ba Ministeriu Agrikultura liu liu ba iha infrastrutura basiku hanesan konstruksaun irigasaun nebe oras ne’e lao iha Oebaba, iha Betano ida ne’e mos akrikultur sira tinan ida kuda dala ida, lolos utiliza ona fasilidade nebe iha oinsa motiva agrikultur sira tinan ida kuda liu husi dala ida nune bele minimiza importasaun fos husi rai liur.

Nia dehan tan laos agrikultur mesak liga mos ba MCIA, seguransa alimentar sira tenki iha ko’ordenasaun wainhira atu sosa, husi grupo agrikultur ne’e hahu ona produs, entaun sira halakon ona produsaun ba fini nebe husi rai liur no hahu sosa deit husi rai laran.

“Hau atu dehan deit katak tinan 2017 maske fo prioridade maibe seidauk bele responde hotu tanba ita tama ba ano de elisaun, maske tekniku sira kontinua servisu maibe politiku sira prepara ba elisaun,” hateten Jacinta Abucau. Nes

Jornal Nacional

Insidente 35, Akontese Durante Eleisaun Suku

DILI: Rezultadu monitorizasaun ne'ebé ONG BELUN hala'o antes, durante no mós depois Eleisaun Suku 29 Outubru 2016 hatudu katak, iha 35 insidente mak akontese iha maizumenus 11 munisípiu.

“Iha Baucau (6), Viqueque (6), Aileu (5), Liquiça (4), Dili (4), Ainaro (2), Bobonaro (2), Covalima (2) no Ermera (2), Lautem (1) no Manufahi (1),” hateten Jestóra Programa AtRes-BELUN, Marilia O da Costa liuhosi konferensia imprensa, Kinta (10/11) iha Farol, Dili.

Hosi insidente hirak ne'e, tuir Marilia, insidente 13 mak uza forsa fíziku ho maneira asalta malu no tuda malu. Restu, envolve violensia verbal hanesan istoria malu, haksesuk malu no hakilar malu.

“Iha relatóriu ne'e mós hatudu, maioria insidente akontese tanba votante sira seidauk komprende regra no prosesu eleisaun, failansu tékniku, deskonfia mosu intervensaun durante eleisaun no mós votantes sira la satisfeitu ho resultadu eleisaun,” dehan Marilia.

Husi insidente 35 ne'e mós, tuir jestóra ne'e, akontesementu fahe ba parte tolu. Antes votasaun insidente 9, durante votasaun insidente 12 no depois votasaun insidente 14.

Ho insidente hirak ne'e, ONG BELUN halo ona rekomendasaun no asaun imediatu antes segunda volta Eleisaun Suku. “Tanba, maioria kandidatu xefe suku seidauk atinji votus too 50% maka sei hala'o fali eleisaun ba segundu volta, ne'ebé sei realiza iha loron 13 Novembru 2016,” Marilia afirma.

ONG BELUN mós sei rekomenda ba meza asembleia atu halo sira nia funsaun ho di'ak. Husu mós ba CNE atu asgura partisipasaun no direitu sidadaun nian iha prosesu demokratiku. (*)

Ola Timor - Pachar Malay - Editór: Alexandre Assis

Foto: Jestóra Programa AtRes hosi ONG BELUN, Marilia O da Costa hateten akontese 35 insidente antes, durante no depois Eleisaun Suku 29 Outubru 2016. (Olatimornews Foto/Pachar Malay).

AJTL-TLPU Ezije Fó Sansaun ba Oknum PNTL ho F-FDTL Baku Jornalista

DILI: Asosiasaun Jornalista Timor Lorosa’e (AJTL) no Timor-Leste Press Union (TLPU) ezije ba Komandante Jerál PNTL no mós F-FDTL, atu fó sansaun ba oknum hosi institusaun rua ne'e, ne'ebé foin lalais baku jornalista iha Suai, Munisípiu Covalima.

Sekretariu Jerál TLPU, Manuel Pinto liuhosi konferensia imprensa konjuta iha Sede AJTL, Fatuhada, Dili, Kinta (10/11) hatete, Jornalista Martinho Moniz hosi média online www.tafara.org iha momentu ne’eba, hala'o hela kobertura eleisaun suku iha Aldeia Kaikoli, Suku Maudemo, Tilomar, Munisípiu Covalima.

“Tan de'it jornalista refere hasai foto uza telemovel, bainhira membru F-FDTL ho PNTL halo hela atuasaun ba grupu deskoñesidu ne'ebé hakarak estraga prosesu eleisaun, jornalista ne'e hetan baku no tortura,” Pinto afirma.

Iha fatin hanesan, Vise Prezidente AJTL, Zevonia Vieira hatete, iha fulan Agostu liubá, bainhira asiste seremonia aniversariu média online www.tafara.org, Komandante Jerál PNTL, Komisáriu Julio Hornay rasik afirma atu fó sansaun ba membru PNTL, ne'ebé baku jornalista hosi Jornal Business Timor.

“Maibé, liu de'it fulan rua asaun hanesan akontese tan ba jornalista hosi média online www.tafara.org. Ida ne'e, hatudu buat ne'ebé ladi'ak. Tanba, bele mosu interpretasaun katak PNTL tauk jornalista sira atu loke sira nia frakeza,” Zevonia dehan.

Bazeia ba faktu, AJTL ho TLPU nu'udar mahon ba jornalista Timór oan hotu-hotu, lamenta tebes no kondena hahalok oknum membru PNTL ho F-FDTL, ne'ebé halo asaun violentu hasoru jornalista ne'ebé hala’o hela nia servisu.

“Aktu violentu ne'e, nu'udar hahalok taka dalan ba servisu média nian no direitu públiku nia atu hetan informasaun. Tuir Lei Komunikasaun Sosiál, artigu 41, hahalok hanesan ne'e, nu’udar atentadu ba Liberdade Informasaun no sei hetan kastigu ho pena prizaun tinan 2.”

AJTL ho TLPU mós ezije ba instituisaun PNTL ho F-FDTL atu respeita servisu jornalista nian iha fatin publiku no mós iha servisu fatin. Tanba, papel média mós importante nu'udar ponte informasaun ba públiku.

"Halo investigasaun kle'an ba kazu refere no fó sansaun disiplinar ba membru PNTL no F-FDTL, ne'ebe komete agresaun fiziku hasoru jornalista," Pinto afirma tan.

Entertantu, jornalista Martinho Moniz haruka ona keisa ida ba Komandu PNTL liuhosi Servisu Investigasaun Kriminal Nasionál (SIKN), maibe to'o agora laiha rezultadu.

"Sira dehan ba hau atu hein deit mak sira kontaktu mais to'o agora, ohin loron ema ruma seidauk kontaktu hau," nia dehan. (*)

Ola Timor – Chay -  Editór: Alexandre Assis

Foto: BAKU JORNALISTA - AJTL-TLPU, Kinta (10/11) hala'o konferensia imprensa konjunta kona-ba kazu oknum membru PNTL no F-FDTL baku jornalista hosi média online www.tafara.org ne'ebé akontese iha Suai, 29 Outubru 2016. (Olatimornews Foto/Chay)

PNTL Aprezenta Kazu Sunu Uma 5 Hera Ba Taur, Nain 10 Hein Mandadu Kapturasaun

DILI – Polisia Nasional Timor Leste (PNTL) aprezenta situasaun rai laran ba Prezidente Republika Taur Matan Ruak, hanesan kazu sunu uma 5 motor 2 no estraga motor 1 iha Hera.

Informasaun nee aprezenta husi komandante Jeral Polisia Nasional Timor Leste Komisariu Julio Hornay, akompaina husi Segundu Komandate Zeral Komisariu Faustinho da Costa. Remata Informa Situasaun rai laran ba Prezidente Republika Taur Matan Ruak, Komisariu Julio Hornay hatete hasoru malu ho Prezidente hodi informa situasaun jeral rai laran inkliu mos elisaun suku nian.

Ita koalia kona ba kazu sira neebe akontese hanesan kazu hera neebe rejulta uma 5 ahi han, sunu motor 2 no motor ida hetan estragus,” dehan Julio ba Jornalista Kinta (10/11/2016) iha Palasiu Prezidensial Nicolao Lobato.

Nia hatete Suspeitu husi kazu nee Polisia konsege halo kapturasaun ba ema nian 8 hodi aprezenta ona ba tribunal no mos sei iha nain 10 hein mandadu kapturasaun hodi tuir prosesu. Julio hatete problema nee akontese mai husi grupu arte marsiais sira mak ataka malu neebe oras nee iha prosesu nia laran maske mesak Timor oan deit tan nee joven sira tenki hapara oho malu.

Liu husi kontaktu viatelefone Xefe Suku Hera, Simão Pedro Ribeirro hatete konflitu neebe akontese kedas iha loron sabadu liu ba grupu arte marsiais neebe governu bandu provika malu hodi rezulta uma lima hetan sunu motuk no ema nain lima kanek. Informasaun kompletu iha STL Jornal no STL Web, edisaun Sesta (11/10/2016). Timotio Gusmao

Suara Timor Lorosae

Responde Aktu Krime Atividade GAM, Kompetensia Tribunal

DILI - Atu Responde aktu kriminalidade neebe komete husi grupu Arte marisiais (GAM), kuandu kontra rezolusaun governu nian kompetensia tribunal, tamba parte seguransa implementa tuir lei no ordem neebe iha.

Tuir Komandante jeral Polisia Nasional Timor Leste Komisariu Julio Hornay katak parte polisia nia kontrola ba aktividade grupu arte marsiais mak polisia implementa tuir rezolusaun neebe mak iha.

Ami ejekuta rezolusaun governu nian kuaze aprezenta ema barak ba tribunal agora tribunal disidi hodi liberta, atu hatene rezolusaun nia aktu kriminalidade iha ou lae nee tribunal mak bele responde,” dehan Julio ba Jornalista Kinta (10/11/2016) iha Palasiu Prezidensial Nicolao Lobato.

Nia hatete parte PNTL ejekuta rezolusaun neebe mak governu hasai agora atu liberta no hatama ba kadeia nee servisu tribunal nian, servisu polisia nian mak halao knar no patrolia kuandu iha problema halo intervensaun no kapturasaun.

Iha fatin ketak Sekretariu Estadu Joventude no Desportu Leovigildo Hornay hatete Konflitu sira mak akontese presija reforsa liu husi atuasaun Lei neebe forte. Informasaun kompletu iha STL Jornal no STL Web, edisaun Sesta (11/10/2016). Timotio Gusmao

Suara Timor Lorosae

Komemora Loron Joventude ba Dala XXV, Sei Lansa Monumentu- Historia Luta 12 Novembru

DILI - Komemora loron 12 Novembru neebe sai hanesan loron nasional ba joventude, ekipa komite hasoru Prezidente Republika, hodi husu Prezidente atu  lansa Monumentu no historia  12 Novembru.

Ekipa neebe mak hasoru malu ho Prezidente Republika Taur Matan Ruak mak hanesan Prezidente komite 12 Novembru Grigorio Saldanha, Prezidente Konseilu Nasional Joventude Timor Leste Dadi Magno inkliu Sekretariu Estadu Joventude no Desportu Leovigildo Hornay.

Remata Enkontru, Prezidente Komite 12 Novembru Grigorio Saldanha hatete hasoru malu ho Prezidente Republika, hodi informa preparasaun atu komemora 12 novembru no konvida Prezidente atu partisipa seremonia 12 Novembru.

Monumentu ba 12 Novembru nian tama ona iha ajenda atu halo lansamentu primeira Pedra, no mos sei halo mos lansamentu ba komite orentador elabora historia juvinil neebe mak ami informa ba Prezidente Republika,” dehan Grigorio ba Jornalista Kinta (10/11/2016) iha Palasiu Prezidensial Nicolao Lobato.

Nia hatete fatin hodi halo monumentu 12 Novembru sei halao iha Santa Kruz no dezeinho intrega tiha ona ba governu tan nee primeiru Ministru Rui Araujo no Eis Primeiru Ministru Xanana Gusmao ho Mari Alkatiri husu tenki lansa iha seremonia 12 novembru.

Iha fatin hanesan Sekretariu Estadu Joventude no Desportu Leovigildo Hornay hatete prezidente Republika Taur Matan Ruak sei partisipa iha seremonia lansamentu neebe mak programa tiha ona. Informasaun kompletu iha STL Jornal no STL Web, edisaun Sesta (11/10/2016). TimotioGusmao

Suara Timor Lorosae

MAE Komesa “Kahur Kanuru Tohar” Iha Prosesu Eleisaun Suku

DILI - Sosiedade Sivil sira iha Timor Leste konsidera katak Ministeriu Administrasaun Estatal (MAE) komesa kahur kanuru tohar ba iha prosesu eleisaun xefe suku nian tanba orgaun eleitoral laorganiza maibe husi fali Governu.

Informasaun nee fo sai husi Diretor Ezekutivu AJAR (Asia Justice And Right), Jose Luis Oliveira ba jornalista sira iha embaixador Estadus Unidus Amerika (EUA), Pantai Kelapa-Dili, Kuarta (09/11/2016).

Ministeriu Estatal kuandu kahur kanuru tohar ka interven asuntu nee ka prosesu eleitoral signifika katak eleisaun neebe mak ita halao biar pun nivel suku eleisaun nee lahalo ho tuir regras demokratiku universal laimparsial,” dehan Jose.

Jose haktuir, tanba problema neebe mak agora akontese iha eleisaun suku nee eleisaun foin nivel suku hatudu momos katak Governu laiha seriedade atu hametin demokrasia nee. Jose salenta, eleisaun nee mos hatudu katak orgaun eleitoral nee laiha kapasidade ka failla atu realiza eleisaun nee ho diak no ba nia konsidera tenke iha medida sansaun ba sira neebe organiza eleisaun xefe suku nee hanesan sansaun administrativu.

Iha sorin seluk, Ministru Administrasaun Estatal (MAE), Dionisio Babo hatete, lei eleisaun suku nee hatete katak eleisaun suku nee iha deit aldeias entaun ema hotu koinese malu. Informasaun kompletu iha STL Jornal no STL Web, edisaun Kinta (10/11/2016). Raimundo S. Fraga

Suara Timor Lorosae

LERE: ARTEMARSIAIS LABELE KOKO FORSA ESTADU

Xefi Estadu Maior das Forsas Armadas, FALINTIL Forsa Defeza Timor Leste (F-FDTL), Maijor Jeneral Lere Anan Timur apela ba Grupo Arte Marsial (GAM) sira ne’ebé ikus-ikus ne’e komesa fali ona provoka situasaun iha fatin-fatin atu labele koko forsa Estadu, tanba Estadu iha duni forsa.

“Ikus-ikus ne’e, problema komesa mosu iha fat-fatin, hanesan horikalan, (horibainruak), iha Hera ne’ebá ema tá malu, sunu uma. Problema ne’e mosu bebeik, mas ha’u dehan katak, di’ak liu ita labele koko Estadu nia forsa,” dehan Lere Anan Timur ba Jornalista sira iha Palácio Prezidénsia Aitarak Laran Díli, Kuarta (09/11), hafoin hasoru malu ho Xefi Estadu Taur Matan Ruak.

Iha sorumutu ho Prezidenti Repúblika (PR) ne’e, Lere Anan Timur hatutan katak, sira ko’alia liu kona-ba seguransa iha rai laran, tanba situasaun ikus-ikus ne’e, komesa mosu provokasaun oi-oin, inklui koalia konaba situasaun iha forsa armada nia laran.

“Foin dada’uk ita rona, problema Oe-cusse ninian ho problema Lospalos ninian, jerasaun foun iha mentalidade ida ke tenki muda, kilat ne’ebé mak ita kaer, hanesan mós ita nia povu, hanesan mós Polisia Nasionál Timor Leste,” katak Lere Anan Timur.

Lere esplika katak, membru Polisia ho membru F-FDTL lori kilat no pistola ke dezkontroladu ba festa ka diskoteka, ameasa fali komunidade ho kilat.

“Ba ha’u nu’udar Komandante Forsas Armadas ninian, situasaun ba ami agora oin seluk, uluk ha’u tolera demais, tanba katuas sira ne’ebé mak mai husi ailaran tinan 24, mai servi tan instituisaun, ha’u hanoin sira, tanba ne’e mak ha’u tolera, entaun kuaze disiplina militar ne’e, fraku oituan, mas agora jerasaun foun de’it, ha’u komesa duru,” Lere Anan Timur deklara.

Konaba kazu Oe-cusse ho Lospalos nian, Lere Anan fundamenta katak, agora dada’uk prosesu la’o hela, kuandu membru sira ne’e komete duni, sei iha sansaun ba sira.

Tuir Lere Anan Timur katak, kazu Lospalos ninian, membru F-FDTL ameasa membru PNTL ho kilat no tiru kilat, entaun hahalok ida ne’e krime, i kazu Oe-cusse nian mós hanesan, membru PNTL ho membru F-FDTL rezolve fali problema ho koko forsa.

Lere dehan, membru sira hanesan ne’e, lahadomi sira nia instituisaun, entaun sira tenki fila fali ba vida sivil ou vida seluk. Tanba tuir Xefi Estadu Maior ne’e katak, hasai membru F-FDTL ka PNTL ne’e, sei la sai ameasas ba Estadu Timor Leste (TL).

“Estadu ne’e Estadu, ita labele koko Estadu, Estadu ne’e, nasaun Timor Leste mak forma Estadu, no povu nia riku hot-hotu mak forma Estadu, ema ida labele koko Estadu, tanba Estadu iha forsa, i Estadu harii ho ruin no ran,” tenik Xefi Estadu Maior ne’e.

Lere Anan Timur dehan tan katak, ema barak hakarak tama forsa armada no Polisia, tanba servisu laiha, entaun sira hakarak mai simu osan de’it, iha forsa nia laran la’os hanesan ne’e, tama forsa ka polisia ne’e, tenki iha vokasaun atu servi Estadu.

Jura ba Merah Putih, traisaun ba TL

Iha okaziaun ne’e Lere Anan Timur mós hateten katak lamenta tebes, ho Timoroan sira ne’ebé involve-an iha organizasaun artemarsiais PSHT, ne’ebé ba jura fali ho bandeira Merah Putih. Tanba hahalok ne’e, Lere Anan Timur dehn, halo traisaun bo’ot ba Estadu Timor Leste (TL) no sira nia nasaun, tanba sira ba halo fali juramentu ba bandeira Merah Putih iha Atambua Indonesia.

“Sira ba jura ba saida, sem dúvida ita kuandu ba jura iha ema nia rai, tenki jura ba ema nia bandeira, ida ne’e traisaun bo’ot ne’ebé mak nia halo ba ninia Estadu,” katak Lere Anan Timur.

Lere haktuir, artemarsiais li-liu PSHT, sira hot-hotu ba halo juramentu iha Atambua, imajen ida ne’e ladi’ak.

“Artemarsiais ba halo juramentu iha ema nia rai. Kazu ida ne’e ha’u hanoin katak, Governu tenki haree forma ruma, atu ita Timor ne’e, Timor duni, ita Timor-oan ne’e labele fahe ba rua, sorin Indonesia sorin Timor ne’e ladun di’ak,” Lere Anan Timur fundamenta.

Jeneral F-FDTL ho fitun rua ne’e husu ba Governu atu toma desizaun no medidas ruma para artemarsiais tenke obedese.

Lere Anan Timur tenik tan, Timor-oan tenki jura ba ninia bandeira, la’os ba jura fali ba ema seluk ninia bandeira. Lere fó ezemplu katak, aban bainrua kuandu problema ruma mosu entre Timor Leste ho Indonesia, Timor-oan sira ne’ebé ba halo juramentu ba Indonesia nia bandeira ne’e, tenki hamutuk ho Indonesia, tanba nia jura tiha ona ba ema nia bandeira.

“Tanba ne’e mak ita nia Governu, li-liu parte justisa ninian tenki buka forma ida atu rezolve kestaun ida ne’e, lor-loron mak ita tau sala hela de’it ba artemarsiais, maibé ita laiha forma ida atu kombate artemarsiais,” katak Lere.

Nia afirma, iha tinan hirak liu ba, eis Primeiru Ministru, Kay Rala Xanana Gusmão haruka suspende tiha ona artemarsiais ne’e, maibé suspensaun de’it ne’e la responde situasaun, tenki  ho régras ne’ebé mak rigorozu.

“Aat liu mak sira ba jura fali ba bandeira Indonesia ne’e, li-liu ha’u apela ba artemarsiais PSHT sira, imi nia bandeira mak ida ne’e, mai jura ba ida ne’e, labele ba jura fali ba bandeira Merah Putih ne’ebé mak uluk kontra ita,” esklarese Lere.

Maibé Lere dehan, artemarsiais sira ne’e, hakarak ka lakohi sira tenki ba ne’ebá, tanba Governu laiha forma ida atu sira jura iha Timor Leste (TL).

Laiha rezolusaun foun, konfrontu GAM kontinua

Husi sorin seluk, Adjuntu Direktur ONG Fundasaun Mahein (FM), João Almeida hateten katak, atu evita konfrontu entre eis Grupu Arte Marsiais (GAM) iha rai laran ne’e, Governu tenke halo rezolusaun foun, sé la’e konfrontasaun entre GAM sei kontinua akontese.

Rezolusaun ne’ebe mak Governu fo sai iha tinan 2013 ba GAM tolu kompostu husi, Persaudaraan Setia Hati Terate (PSHT), Ikatan Kera Sakti (IKS) no KORKA, iha rezolusaun ne’ela deskreve kriminalidade nian ba atividades ne’ebé mak sira kontinua hala’o.

“Karik laiha rezulusaun ka regulamentu foun la kriminaliza, ha’u fiar katak kontinua akontese, porque sira nia abut ne’e metin ona iha ita nia sosiedade, abut metin tanba GAM sira ne’e ezisti ona iha ita rai iha Tinan sanulu ka rua nulu liu ba,”Adjuntu Direktur ONG Fundasaun Mahein (FM), João Almeida, hato’o asuntu ne’e ba Jornalista sira iha ninia knar fatin, Fomentu-Dili, Kuarta (09/11/2016) relasiona konfrontasaun entre GAM ne’ebe akontese semana ne’e iha Suku Hera, Munisipiu Dili.

Nia esplika, desde rezolusaun ne’ebe Governu fo sai la hakerek konaba diskriminilidade nian, rezulusaun ne’e hatete deit arte marsiais hanesan PSHT, Kera Sakti no KORKA la ejsiti ona iha Timor Leste no taka total sira nia atividade, maibe konfrontu kontinua mosu.

Rezolusaun ne’ebe fo sai la’os sai deit preokupasaun autoridade seguransa nian, maibe sai mos preokupasaun husi publiku tomak husi rezolusaun ninia haruka, tanba wainhira autoridade seguransa sira kaptura elementus arte marsiais ne’ebe deskonfia mai husi GAM tolu ne’ebe mak rezolusaun bandu ikus mai livre.

Iha oportunidade refere adjuntu diretur FM rekomenda ba Governu tenke halo regulamentu ka rezolusaun ne’ebe mak rigorozu, tanba rezolusuan ne’ebe fo sai iha tinan 2013 la diskriminaliza konaba atividade ne’ebe kontinua iha, no wainhira hetan kapturasaun husi autoridade seguransa tanba lá viola buat ruma sira tenke livre husi desizaun Tribunal nian.cos/eus 

Jornal Nacional

TL – AUSTRALIA IHA AKORDU EXTRADISAUN…?!

Jornal Nacional, editorial

Kazu eis Ministra Finansas, Emilia Pires ho eis Vice Ministra Saude, Madalena Hanjam nebe prosesu julgamentu lao iha Tribunal Distrital Dili, dadaun nee sai dezafia boot ba sistema justisa iha Timor Leste tamba arguida, Emilia Pires ba Australia seidauk fila fali mai timor hodi tuir prosesu julgamentu iha tribunal.

Arguida Emilia Pires halo viajen Estranjeiru hetan autorizasaun husi Tribunal ho razaun arguida nee halao servisu estadu nian iha rai liur maibe konfiansa tribunal nian nee  nakfila kongfu tamba arguida too ohin loron la fila mai timor tuir prosesu iha tribunal.

“Arguida Emilia ne’ebe ba estranjeiru to’o agora la mai, tribunal tenki responsabiliza, tanba iha prosesu julgamentu tribunal autoriza sai ba estranjeiru, ema seluk labele Emilia bele fali,”, “Kazu Emilia Pires nian sai dezafiu boot ba tribunal enjeral, tanba tribunal iha juiz, prokurador no defensor, kazu ne’e sai dezafiu ba sira no mos implementasaun sistema judisial iha Timor Leste,” Adriano do Nascimento, Jornal Nacional Diario edisaun 8 Novembro.

Agora hakarak ka lakohi, Tribunal tenki halo esforsau atu lori Emilia Pires mai tuir julgamentu iha timor ba kazu nebe deskonfia nia komete konaba projetu Kama ba Hospital Referal nebe projetu nee entrega ba ninia laen kaben. Nunee mos durante nee arguida Emilia la kumpri xamada tribunal nian, li-liu prazu hatama passaporte maibe too data termina arguida la hatama passaporte hodi nunee Ministeriu Publiku alega tan artigu seluk konaba dezobidensia tamba la kumprimente ordem tribunal nian.

Kazu Emilia ho Madalena Hanjam nee iha ona faze ikus atu tribunal primeira distanisa toma desizaun maibe arguida Emilia seidauk fila husi ninia viajen ba estranjeiru tan nee prosesu desizaun sei adia too ohin loron.

Ohin loron nee, prosesu julgamentu ba kazu Emilia ho Hanjam lao iha tribunal. Ba arguida Madalena Hanjam laiha problema tamba mono sidadani maibe Emilia Pires dui sidadania ( Timor Leste – Australia) hodi halo prosesu sira nee komplikadu.

Kestaun mak se karik Emilia la mai timor, kontinua iha Australia iha posibilidade halo extradisaun Emilia mai Timor Leste ka le? Timor Leste ho Australia ona koperasaun ba extradisaun nian ka lae? tamba laos fasil atu halo extradisaun ba sidadaun nasaun seluk nian.

Kazu Emilia Pires nebe diskonfia komete krime partisipasaun ekonomiku no negociu nian nee ohin loron publiku timorense no nasaun balu mos akompanha hela oinsa ninia finalidade.

Agora Emilia iha Australia la fila mai Timor nee kulpa Tribunal nian tamba tribunal mak autoriza fofila ninia passaporte hodi halo viajen estranjeiru tan nee responsabilidade tribunal nian atu oinsa arguida nee bele devolve fali passaporte hodi tuir julgamentu.*

Ema na’in rua kanek no ka’er ona ema na’in ualu durante problema entre grupu arte marsiál iha TL

Ema na’in rua kanek no uma lima maka hetan sunu, durante konfrontu entre grupu arte marsiál rua iha zona Hera, parte leste ho kilómetru 10 hosi Dili, tuir komadante polísia haktuir ba Lusa. 

“Estraga ona motór rua no ida seluk fali mos at. Ami konsege ka’er ema na’in ualu no fó sai ona orden atu ka’er tan 10 seluk”, tenik komandante Polísia Nasionál Timor-Leste (PNTL), Júlio Hornay.

Problema entre grupu rua ne’e akontese iha Hera, findesemana ne’e, tuir komandante ne’e esplika, pois maka hahú fó sai vídeo kona-ba konfrontu ne’e iha Facebook.

“Sira fó sai vídeo kona-ba problema refere iha Facebook, hodi provoka malu no ódio malu. Ne’e problema bot ida, tanba sunu uma barak”, esplika tan responsável PNTL ne’e.

Iha fulan hirak ikus ne’e, mosu sirkulasaun vídeo kona-ba problema entre element hosi grupu arte marsiál, iha Timor-Leste nomós Irlanda, tanba joven timor-oan barak maka iha Irlanda.

Konfrontu hanesan ne’e, hetan ona alerta hosi autoridade irlandeza sira, tanba sira tenke halo intervesaun ba problema ne’ebé akontese, ka’er no lori ona timor-oan balun ba julga.

Maski autoridade sira halo hikas esforsu hodi kontrola problema hosi grupu arte marsiál nian, maibé problema sempre mosu beibeik, no envolve grupu tolu: Korka, Kera Sakti ho PSHT (Persaudaraan Setia Hati Terate).

Harii Java Orientál, Indonézia, tinan 1922, oras ne’e daudaun PSHT iha ona membru millaun ida resin iha nasaun refere, inklui element iha Malázia, Singapura, Olanda, Fransa no Portugal, hosi nasaun seluk ne’ebé iha.

Iha Timor-Leste, PSHT hahú tama iha 1983, ho “guru” besik 3.500 "gurus", instrutor sira ne’ebé graduadu liu, ho membru hamutuk rihun 30 resin iha teritóriu laran. Korka no Kera Sakti ninia apoiante tokon-ba-tokon.

Pelumenus partidu rua maka iha ligasaun ho grupu arte marsiál, tanba iha partidu laran ezisti partikante antigu, no membru Governu atuál nomós individualidade timor-oan nian seluk tan.

Organizasaun Fundasaun Mahein (FM), ne’ebé monitoriza seguransa iha Timor-Leste (hosi aspetu seluk ne’ebé iha) dala-barak, halo ona alerta kona-ba risku hosi problema entre grupu marsiál sira, iha zona Dili nian balun.

Problema ne’e akontese beibeik ona iha Timor-Leste no iha 2002 to’o 2003 organizasaun arte marsiál sira, kria ona problema hanesan ne’e, ho konflitu no odio malu tanba problema antigu.

Iha janeiru-2015, primeiru ministru Xanana Gusmão prezidi ona serimónia ne’ebé konta ho partisipasaun hosi membru PNTL no F-FDTL, besik 290 envolve ba grupu arte marsiál, hodi renova fali sira-ninia juramentu ba Estadu.

SAPO TL ho Lusa 

Prezidente xinés ansiozu hodi serbisu ho Trump

Prezidente xinés, Xi Jinping, hatete iha loron-kuarta ne'e katak senti ansiozu hodi serbisu ho Donald Trump "lahó konflitu sira" no "ho baze iha respeitu maka'as", iha telegrama ida hodi fó felisitasaun ne'ebé haruka ba prezidente eleitu Estadus Unidus nian.

"Ha'u senti ansiozu hodi serbisu ho Ita, lahó konflitu ka konfrontu sira" no "ho baze iha respeitu maka'as no koperasaun", refere hosi prezidente xinés.

Xi Jinping destaka ona nia "ligasaun boot ba relasaun sira" entre Xina ho Estadus Unidus, apela ba nia futuru homólogu hodi hametin diálogu entre poténsia rua ne'e hodi "jere diverjénsia sira ho dalan konstrutivu ida".

Tensaun entre Pekin ho Washington aumenta iha tinan hirak ikus ne'e, iha planu ekonómiku no mós iha área sira siberseguransa no jeopolítiku nian.

Kandidatu republikanu ba Prezidénsia Estadus Unidus nian, Donald Trump, manán eleisaun sira, halakon, hasoru previzaun hosi sondajen sira, adversáriu demokrata, Hillary Clinton.

Iha diskursu vitória nian, Donald Trump garanti ona katak sei sai hanesan Prezidente hosi ema amerikanu tomak no oras to'o hodi ema norte-amerikanu sira kura kanek sira haketak malu nian no hamutuk "hanesan povu unidu ida".

SAPO TL ho Lusa

Trump 'pragmátiku' komprometidu ona ho Ázia, haktuir PM australianu

Prezidente norte-amerikanu eleitu Donald Trump kompremetidu  atu hametin  poder militar EUA no  mantein ninia prezensa iha Ázia, informa iha ohin  primeiru-ministru australianu, hafoin dada-lia  ida"maka’as  no nakloke" ho magnata. 

Primeiru-ministru australianu haktuir katak koa’lia ho  Donald Trump liuhosu telefone ne’ebé  Prezidente norte-amerikanu eleitu konkorda ho importánsia aliansa militar EUA ho Austrália no importánsia prezensa militar norte-amerikanu ba seguransa Ázia-Pasífiku.

Malcom Turnbull hatete katak Trump "apresia, onra" no "admira" ba paktu defeza bilaterál ne’ebé firma ona durante tinan  65  hodi husu ba parseiru seguransa na’in rua konsulta ba malu karik ida hetan atake, maibé laobriga halo reajen defende ida hosi seluk.

Primeiru-ministru australianu laklarifika karik Trump planeia kontinua aumenta  prezensa norte-amerikanu iha Austrália.

Turnbull informa  dada-lia  telefónika ne’ebé mantein ho Trump hanesan "enerjiku" no "nakloke  tebes".

SAPO TL ho Lusa

PM hato’o parabéns ba Trump no haktuir hikas kona-ba apoiu ne’ebé amerikanu ne’e fó ba TL

Primeiru ministru, Rui Maria de Araújo horisehik hato’o parabéns ba Donald Trump, tanba eleitu hanesan Prezidente norte-amerikanu foun, no haktuir hikas kona-ba solidariedade no apoiu ne’ebé Estadus Unidus fó ba dezenvolvimentu Timor-Leste nian. 

“Estadus Unidus nu’udar belun di’ak ida ba Timor-Leste. Ninia nasaun hatudu solidariedade maka’as ba ita-ninia povu, hafoin restaurasaun independénsia no ita kontinua iha lasu amizade no koperasaun ne’ebé forte”, tenik Rui Maria de Araújo liu hosi karta ne’ebé haruka ba Trump no hetan asesu hosi ajénsia Lusa.

“Estadus Unidus Amérika fó apoiu maka’as ba dezenvolvimentu hosi ita rain no ami hein katak parseria ne’e sei kontinua iha futuru”, nia hatutan.

Xefe Governu ne’e, hato’o ninia parabéns ba Trump, relasiona ho ninia “vitória eleitorál istórika”, no konsidera katak reprezenta “nasaun ninia fi’ar, iha ninia vizaun ba nasaun no hakarak atu halo mudansa”.

Rui Araújo konsidera katak, eleisaun Trump nian “hatudu konfiansa bot hosi povu amerikanu ba iha ninia lideransa, hodi lori Amérika ba futuru nomós ajuda hatan ba dezafiu internasionál hothotu nomós atu promove prosperiedade globál”.

Kandidatu republikanu ba Prezidénsia Estadus Unidus, Donald Trump, maka manan iha eleisaun norte-amerikana nian, iha tersa-feira foin dadaun, hodi halakon, adversária demokrata, Hillary Clinton.

Iha diskursu vitória nian, Donald Trump garante katak sei sai Prezidente ba amerikanu hothotu no to’o ona tempu atu norte-amerikanu sira lafahe malu tan, maibé sei hamutuk “hanesan povu unidu”.

SAPO TL ho Lusa – Foto: GPM