Komunidade Tapo/Memo Lamenta Deskoñesidu Na’ok Pipa Bee Moos

MALIANA: Komunidade Suku Tapo/Memo lamenta tebes ba grupu deskoñesidus ne’ebé na’ok komunidade sira nian pipa bee moos privadu, iha Aldeia Lepguen, Suku Tapo/Memo, Postu Administrativu Maliana, Munisípiu Bobonaro.

Sabino Moniz nudar komunidade hatete, akontesementu ne’e akontese iha loron 29 Setembru kalan. Iha dader no loraik komunidade sira baibain ba loke bee sempre bee moos iha, maibé iha loron kuarta-feira dader 30 Setembru komunidade atu ba kuru bee moos maibé hare ba tanki bo’ot laran mamuk tia ona.

Hafoin akontese ida ne’e, komunidade sira balun iha loron 01/10 ba buka tuir pipa bee moos nian ne’ebé lakon. La’o to’o dalan klaran área ida naran Mabiltil ba to’o Mape-gel komunidade hetan duni pipa bee moos grupu deskoñesidu mak tesi no na’ok. Pipe bee moos ne’e nia naruk maizemenus kuaze metru (100) atus ida.

Pipa bee moos privadu ne’e komunidade iha aldeia Lepguen, Suku Tapo/Memo mak iha inisiativa rasik hakarak dada bee moos iha tinan 2014 liu ba, iha mota ida naran Sivilgulo, tanba tinan ba tinan komunidade sempre susar bee moos, komunidade ne’ebé dada bee moos hamutuk uma kain (15) sanu resin lima.

Iha sorin seluk, Xefe Suku Tapo/Memo, Gaspar de Jesus da Conceição hatete seidauk simu informasaun husi komunidade sira kona-bá akontesimentu ne’e. (*/ida)   

Timor Post, Loron Sesta, 09 Outubru 2015

Iha julgamentu ba eis-ministra testamuña sira dehan katak kama ne’ebé sosa ba ospitál hothotu hala’o ho urjénsia

Testamuña dahuluk ba akuzasaun ne’ebé halo parte iha julgamentu eis-ministra Finansas, Emília Pires nian, fó sai argumentu defeza relasiona ho prosesu sentrál sosa kama urjente ba iha ospitál hothotu. 

Hahú halo julgamentu ba Emília Pires iha Dili, segunda-feira foin daudaun, tanba nia hetan akuzasaun ba prátika krimi ekonómika iha negósiu no administrasaun danoza bainhira sei asumi knar hanesan ministra Finansas.

Pires ho eis-ministra Saúde, Madalena Hanjam hanesan arguida tanba deskunfia sira hamosu iregularidade durante sosa kama ba moras sira iha ospitál liu hosi kontratu ne’ebé halo ho empreza hosi Emília Pires ninia la’en nian ne’ebé tuir supostu konklui entre tolu ba negósiu ho valór dolár rihun 80.

Tuir akuzasaun ne’ebé iha katak lapresija kama hirak ne’e tanba komplexu liu ba Timor-Leste ne’ebé laiiha surtu kona-ba dengue iha 2012 – no husu urjente atu sosa kama hirak ne’e – no kama refere “kontinua tau hela iha ninia fatin no lauza”.

Argumentu hirak ne’ebé fó sai hosi testamuña sira hato’o duni kona-ba akuzasaun ne’e rasik.

Testamuña dahuluk hosi akuzasaun ne’e, Manuel Silva Sousa, xefe lojístika hosi Ospitál Nasionál Guido Valadares (HNGV), iha Dili dehan katak kama hirak ne’ebé sira atu uza ho kaulidade bot tebes no ho kondisaun ne’ebé di’ak.

Depoimentu ida ne’ebé mos ajuda defeza ne’e maka testamuña prinsipál hosi akuzasaun ne’e, hanesan eis-ministru Saúde Nelson Martins ne’ebé haktuir katak kona-ba kualidade kama nian, nia rasik halo ona verifikasaun liu hosi vizita bá to’o iha fábrika ne’ebé arguida rua sosa ba.

Iha ninia depoimentu, hatutan tan katak tanba iha 2011 no 2012 kontinua ho surtu moras nian, maka presija sosa tan kama, no ida ne’e hanesan aspetu ne’ebé fó sai ona iha relatóriu rua.

Relatóriu ida prepara hosi sistema informasaun ba kontrolu moras nian hosi Ministériu Saúde, ne’ebé konfirma kona-ba topu hosi kazu dengue iha inísiu tinan 2012, bot liu hanesan iha tinan 2011.

Relatóriu daruak, kona-ba atividade iha HNGV hosi 2007 to’o 2012, inklui mós kuadru ida ne’ebé konfirma kona-ba taxa hosi pasiente ne’ebé uza kama, barak liu fali to’o 97% iha 2011 no iha 2012 ultrapasa ba 106%.

Testamuña seluk hosi akuzasaun ne’e maka Odete Silva Viegas, ne’ebé iha tempu ne’ebá hanesan diretora jerál HNGV nian, halo kedas kontradisaun direta hosi saida maka nia dehan iha ninia depoimentu ba Ministériu Públiku no ho saida maka nia dehan agora iha tribunál.

Ninia depoimentu ba akuzasaun balun ladun pozitivu, tanba konfrontada ho dokumentu hosi ninia ospitál rasik hodi kontradis ho ninia teze.

Testamuña na’in tolu seluk, hanesan funsionáriu hosi Departamentu Finansas Ministériu Saúde nian mos lamantén ho sira-ninia argumentu rasik kona-ba akuzasaun ne’e.

Dala barak juis sira husu ba testamuña hothotu karik sira sente tauk atu ko’alia no karik hakarak atu haruka sai tiha arguida sira hosi sala, maibé sira hotu lakohi.

Bainhira Ministériu Públiku no juis sira husu diretamente no dala barak, karik arguida ida maka fó orden atu “prepara CPV (Commitment Payment Voucher), instrumentu ne’ebé iha sistema blokeia funsu ba pagamentu bens ka serbisu, sira hotu dehan la’e”.

Bourdaloue Fernandes Moniz, diretór hosi Ospitál Maliana nian ne’ebé hanesan mos testamuña dehan katak nia rasik mos dala barak husu atu sosa kama foun, maski ninia unidade kontinua uza kama hosi okupasaun indonézia.

Iha ne’e mosu mosu ona kontradisaun, tanba dehan katak ninia pedidu ne’e la’os urjente, maibé tuir dokumentu ne’ebé asina hosi nia rasik, hateten katak kama hirak ne’e urjente.

Julgamentu kontinua ohin no sei hala’o hikas iha tersa-feira.

SAPO TL ho Lusa 

Timor hanesan mós fundadór hosi V20 ne’ebé halibur Estadu sira mak hetan ameasa tanba alterasaun klimátika

Timor hanesan mós Estadu fundadór ida hosi grupu V20, ne’ebé halibur nasaun vulnerável sira ba alterasaun klimátika, hodi buka atu mobiliza influénsia favorável ba sira-nia interese.

V20 halibur nasaun sira ne’ebé kiak liu iha planeta no aprezenta diretamente iha antípoda G20 nian, ne’ebé halibur Estadu 20 ne’ebé iha liu podér iha planeta, ne’ebé ministru Finansas sira hala’o sorumutu iha kinta-feira iha Lima, iha okaziaun asembleia anuál Fundu Monetáriu Internasionál no Banku Mundiál nian.

"Ami hanesan nasaun ho rendimentu kiik ka natoon, menus dezenvolvidu, “áridos”, peninsulár, “encravados”, foho, foho kiik sira ne’ebé iha dezenvolvimentu", haktuir komunikadu ne’ebé fó sai bainhira kria grupu ne’e, ne’ebé preside hosi ministru Finansas filipinu, Cesar Purisima.

"Ami halibur ema millaun 700 (...) no ami hamutuk iha ami-nia vulnerabilidade kontra alterasaun klimátika", esplika grupu foun ne’e iha komunikadu.

Kriasaun ba V20 hala’o bainhira finansiamentu iha luta kontra alterasaun klimátika okupa fatin relevu iha ajenda ministru Finansas sira nian, ne’ebé hala’o sorumutu iha Lima, no bainhira falta fulan rua tama ba simeira klima nian, ne’ebé organiza hosi Organizasaun Nasoins Unidas (ONU), iha Paris.

Christiana Figueres, responsável hosi klima iha ONU, sauda kriasaun ba V20 no apela ba "finansiamentu ambisiozu no lalais" nasaun sira ne’e nian.

V20 aleinde Timor-Leste inklui mós Afeganistaun, Bangladesh, Barbados, Butão, Costa Rica, Etiópia, Gana, Quénia, Kiribati, Madagáscar, Maldivas, Nepal, Filipinas, Ruanda, Santa Lúcia, Tanzânia, Tuvalu, Vanuatu no Vietname.

SAPO TL ho Lusa - Foto: Joalarcao @SAPO TL

Magistradu timor-oan sira simu formasaun kona bá violénsia jéneru

Magistradu hosi Tribunál Rekursu Timor-Leste, hetan apoiu husi ekipa unidade jéneru no igualdade Nasoens Unidas nian, hakotu ona programa debate no formasaun kona-ba violénsia jéneru, ohin. 

Formasaun ne’ebé sentra ba iha aspetu judisiál relasiona ho problema ne’ebé komun iha Timor-Leste, sei ajuda atu hatene klean liu tan kona-ba númeru hosi kazu violénsia doméstika nomós abuzu hasoru feto ne’ebé lori ba to’o iha tribunál.

Tuir esplikasaun hosi unidade ONU nian iha komunikadu katak, enkontru ne’ebé hala’o iha semana ne’e, hakarak atu fó hatene ba majistradu sira kona-ba importánsia atu implementa protokolu ba kazu hanesan ne’e. Iha programa ne’e, hala’o mos debate kona bá estratéjia judisiál, substantiva nomós prosedimentu, no atu halakon obstákulu ba iha asesu ba justisa.

Objetivu maka atu aumenta konsiênsia entre autór judisiál kona-ba importánsia hosi Konvensaun kona-ba Halakon forma Diskriminasaun kontra feto (CEDAW), esplika Sunita Carminha, responsável interina programa feto ba ONU iha Timor-Leste.

Liu hosi formasaun ne’e atu bele harii fatin ba juiz, prokuradór, defensóre públiku no advogadu sira hodi fahe koñesimentu, lisaun ne’ebé sira aprende nomós ezemplu pozitivu husi estratéjia judisiál ba promosaun igualidade jéneru nian.

Tuir Sunita Caminha hatete, “sistema judisiál hanesan mekanismu importante atu asegura CEDAW, no implementa, tanba juiz sira iha oportunidade no poder atu interpreta no aplika dispozisaun hosi Kovensaun judisiál nasionál nian”.

“Ida ne’e bolu atensaun maka’as ba ema sira ne’ebé halo krimi bot”, dehan hodi hatutan tan katak maski ho posibilidade ida ne’e, maibé “infelismente, atór judisiál uitoan de’it, inklui juis, promotór, defensór públika ho advogadu sira iha Timor-Leste, maka hatene kona-ba CEDAW”, haktuir.

Problema iha nasaun ida ne’ebé kazu kona-ba violénsia doméstika barak tebes no lori ba to’o iha tribunál, halo ativista ho observadór sira sempre dehan katak dalabarak direitu hosi vítima hirak ne’e laasegura.

Prevalénsia hosi kazu hanesan ne’e iha Timor-Leste, tuir saida maka Merita Correia, diretora ezekutiva hosi organizasaun ALFeLA ne’ebé foin daudaun fó apoia jurídika ba feto no labarik sira, esplika katak iha 2014, feto besik 140 maka sai nu’udar vítima hosi abuzu sexuál iha Timor-Leste.

Iha totál, organizasaun ne’e fó ona apoiu jurídika ba vítima hosi violénsia ho jéneru ne’e iha tinan 2014 hamutuk 513 no númeru hosi kazu refere aumenta maka’as, lahanesan iha tinan 2013 (341) no 2012 (216).

Maioria hosi kazu hirak ne’e maka violénsia doméstika, abusu sexuál ho insestu.

Hosi 2005 to’o 2014, organizasaun ne’e ajuda ona feto no labarik kuaze 2.100.

Tuir dadus ALfeLA hatudu katak labarik feti ho tinan 16 hamutuk 46% ne’ebé hetan apoia iha tinan 2014, sai hanesan vítima ba abuzu sexuál hosi aman sira, tior ka viziñu ne’ebé hela besik sira, no maioria hosi ne’e lafó sai kona-ba agresaun ka krimi refere.

Organizasaun maka hanesan entidade timor-oan ida ne’ebé mos defende atu kria artigu foun kona-ba insestu ba iha Kódigu Penál nasaun ne’e nian.

Maria Barreto, Komisária ba Direitu Labarik nian, mos hatudu ninia preokupasaun kona-ba krimi sexuál kontra labarik ho idade kiik, ne’ebé aumenta tan.

SAPO TL ho Lusa 

POVU OECUSE SAI VITIMA BA PROJETU ZEESM

Jornal Nacional, editorial

Hela deit fulan ida ho balun, 28 Novembru mai nee atu selebra ona tinan 500 misionariu tama Timor maibe kondisaun nebe ZEESM prepara atu selebra loron importante nee seidauk masimu tamba nee autoridade ZEESM justifika asaun ho forsa hodi muda obrigatoriu populasaun sira husi sira nia uma hodi fo espasu ba ZEESM halao projetu.

Antes nee povu Atoni simu autoridade ZEESM nian ho orgulhu tamba sei desenvolve Oecusse hanesan mos Singapura maibe antes atu too ba iha neba tenki sakrifika proprietaria povu nian no povu barak sei sai vitima ba projetu ZEESM nee.

“Labele lori fali forsa ida ameasa povu, kuitadu povu ida hatais tais ne’e, halai hanesan ne’e, Governu nia hanoin oinsa. Se Ami ko’alia, buat hotu ameasa dehan forsa ho PNTL mai kaer ne’e, ami atu ba loos ne’ebé, ita bo’ot sira konsidera ami ne’e oinsa, ha’u pronto atu ita bo’ot sira mai kaer ha’u ba hatama kadeia,” Agustinho Magno.

Durante nee povu ejiji desenvolvimentu, pais kuandu desenvolve sei la satifas povi tomak tamba desenvolvmentu nebe lolos mak ‘ pengusuran’, governu atu halo desenvolvimentu presisa rai tan nee, governu atu hetan rai tenki halo pengusura hodi bele hetan espasu ba halo desenvolvimentu.

Projetu ZEESM nebe gasta osan miloens atus resin dolar Amerikanu nee hanesa mega projetu nebe fo konfinasa ba eis titular, atual Sekretario Jeral partido oposisaun FRETILIN mak ezekuta.

Projetu ZEESM nee iha inisiu lori esperensa boot katak Oecusse sei sai Singapura segundo iha Asia maibe ohin loron esperansa povu nian nee atu hela deit ona esperansa mamuk tamba projetu nee lao la tuir esperans apovu nian.

Projetu nebe gasta dollar miloens atus ba atus nee atu satifas deit grupo balu ka fahe osan deit ba kompanhia sira tamba projetu nee sei finaliza, autoridade ZEESM seidauk iha serteza retornu husi projetu nee.

Projetu nee bele lao diak teb-tebes, Oecusse bele sai segundu pais Singapura maibe kestaun mak manutensaun infra-estruktura nebe harii, laos despesa nebe oituan hodi halo manutensaun obra sira nebe finaliza tiha ona nee.*

VICENTE GUTERRES HUSU HAPARA DEMO MUTL

Prezidente Parlamentu Nasional (PN), Vicente Guterres konsidera manifestasaun ne’ebe mak Movimentu Universitariu Timor Leste (MUTL) hala’o iha kampus sentral Universidade Nasional Timor Loro Sa’e (UNTL) nia oin ne’e ilegal, tanba ne’e nia husu atu hapara manifestasaun refere.

Vicente Guterres deskontenti ho manifestasaun ne’ebe refere, tanba distansia manifestasuan besik liu iha edifisiu PN ninian, tanba tuir lolos distansia manifestasaun dok husi edifisiu publiku 100 metru.

Manifestaun MUTL ne’e nudar kontinuasaun hodi ejije ba PN atu halo lalais revizaun ba lei pensaun vitalisia ne’ebe konsidera fo benifisiu ba membru PN, membru Governu no orgaun Estado sira seluk.

Vicente Guterres hatutan liu tan katak, Timor Leste nudar pais demokratiku ema hotu iha direitu atu eskpresa ninia hanoin konsagra iha Konstituisaun Republika Demokratika Timor Leste (RDTL), maibe tuir lei manifestasaun regula katak, manifestaun labele besik edifisiu publiku nian.

Iha sorin seluk deputadu bankada FRETILIN, David Dias Ximenes “Mandati” afirma, preokupa mos distansia manifestasaun ne’ebe besik liu iha area edisfiu PN nian.

Deputadu bankada FRETILIN ne’e hatutan, sidadaun hotu-hotu iha direitu atu halo manifestasaun hodi eskpresa sira ninia hanoin, maibe lolos ne’e labele halo fali presaun hasoru PN.

“Hau mos dehan katak presaun hau la aseita, laos indonesia mak halo presaun, ita mos halo presaun ba malu, Ida ne’e orgaun de soberania, tenke kumpri. Deputadu sira laos tilun diuk, matan delek, ema neon laiha, povu labele eskolha ema matan delek mai tur iha ne’e, tamba ne’e husu ba presidente haruka kedas Polisia mai se lae hau latuir plenaria,”afirma deputadu Mandati.

Nune’e mos deputadu bankada Partidu Demokratiku (PD), Viregilio da Costa Hornai komenta mos katak, tuir regras manivestantes sira halo manifestasaun dok husi fatin edifisiu publiku sira 100 metrus.

Nai dehan, bankada PD mos hakarak atu halo revizaun ba lei ne’ebe refere, tanba ne’e PD hatama tiha ona projetu lei konaba halo revizaun ba lei pensaun vitalisia ne’e.

Tanba ne’e bainhira meja PN ajenda debate lei pensaun vitalisia PD prontu kontribui hodi halo revizaun ba lei ne’e rasik. “Hau hanoin hein ba prosesu ajendamentu ne’ebe karik imi rona ona katak ba kada parlamentar iha ne’e iha konsensus ona ne’ebe PD hatama ona proposta revizaun, maibe ba kada parlamentar hotu-hotu iha konsesus ona para atu haree lei refere nune’e bele halo revizaun ba lei ne’e,”koalia Virgilio.

Entertantu Deputada Albina Marçal Freitas husi bankada CNRT, haktuir liu tan katak, MUTL la presija halo presaun, tanba PN sei halo alterasaun ba lei refere.

“Hau hanoin bankada CNRT liu husi prezidente rasik koalia ona katak ami mos iha komitmentu atu halo alterasaun ba lei pensaun vitalisia ne’ebe la presija hakilar, halo presaun. Parlamentu seidauk halo revizaun ba lei ida ne’e, tanba laos lei ida ne’e maka prioridade, mas iha lei barak tebes mak sai prioridade, maibe molok mandatu ne’e remata PN sei altera lei ne’e,”espelika Albina.

MUTL Ejije PN

Entretantu iha kampus UNTL liu husi manifestasaun portavos MUTL, Faustino Soares deklara, kontinuasaun manifestasuan refere, tanba PN ladauk kumpri ejijensia MUTL hodi halo revizaun ba lei refere.

“Demonstrasaun ida ne’e nudar demosntrasaun kontinuasaun desde inisio iha Tinan 2007 bainhira PN aprova lei pensaun vitalisia,”afirma Faustino Soares.

Ejiejnsia MUTL hodi husu ba PN atu halo alterasaun ba lei ne’e, tanba konsidera pensaun vitalisia sei hamout orsamentu afeta ba Orsamentu Estado inklui afeta mos ba povu ninia moris.

“Estado TL iha direitu tomak atu fo valor ba nia sidadaun hotu-hotu ne’ebe dedika nia an hodi kontribui ba Estado katak, Estado tenki   fo rekoinesimentu ba sira. Maibe rekoinesimentu labele hamosu diskriminasaun, tanba ita nia sidadaun sira hotu-hotu fo kontribusaun ba Estado laos PN deit, laos Membro Governo deit no laos orgaun titulares sira deit. Maibe hahu husi Prezidente to’o mai povu bai-bain hotu nia kontribusaun mak ohin loron TL bele hetan nia ukun rasik an,”deklara nia.

Manifestaun refere hetan partisipasaun maksimu husi estudante Universitario npoo institutu iha Timor Leste. Tantu manifestaun ne’e hetan mos seguransa masimu husi Polisia Nasional Timor Leste (PNTL).

Entretantu tuir observasaun JN-Diario, husi manifestaun ne’ebe refere hamosu engrafamentu iha diresaun Palacio do Governo nia oan, tanba dalan diresaun Kampu Pramuka Bairo Formosa mai Parlamentu PNTL taka. Nes/Ola

Jornal Nacional

Parlamentu Deskuti Orsamentu, Deputadu Hornai Partisipa Asaun Antí Lei Pensaun Vitalísia

Bainhira Parlamentu Nasionál atu hahú halo diskusaun ba orsamentu privativa Parlamentu Nasionál nian ba tinan 2016, teki-teki Deputadu Bankada Partidu Demokrátiku (PD), Virgílio Hornai halo orasi iha manifestasaun pasífiku ne’ebé hala’o hosi Movimentu Universitáriu Timor-Leste (MUTL) besik edifísiu Parlamentu Nasionál, Kuarta (07/10/15).

Prezensa deputadu Virgílio Hornai ne’e, hetan krítika hosi nia maluk deputadu balun. Deputada Maria Angélica Rangel dehan, sira atu hahú deskusaun ba orsamentu privativa PN, maibé deputadu Virgilio ba halo fali orasi iha manifestasaun ne’e. Regras iha ka la’e? bele ka lae autoriza deputadu ida ba halo orasi iha ne’ebá?

Iha biban ne’e, Prezidente Parlamentu Nasionál, Vicente Guterres la fó resposta ida klaru maibé  kontinua dehan katak asaun MUTL nian ne’e illegál tanba kontra ona lei manifestasaun nian.

Deputadu Virgílio Hornai haktuir katak ninia prezensa iha momentu MUTL halo manifestasaun ne’e hodi esplika de’it katak ezijénsia públiku nian ne’e Parlamentu Nasionál tau iha konsiderasaun no sei halo diskusaun hodi altera lei pensaun vitalísia bainhira lei sira ne’ebé maka antes ne’e ajenda ramata ona diskusaun.

“Distánsia entre UNTL no PN ne’e besik malu. Tan ne’e, iha lei manifestasaun hatete katak atu halo asaun tenke dook ho distánsia metru 100. Distansia ne’e kestaun ida. Importante maka ita buka atu inteira no rona malu duké fó sala malu,” hatete deputadu Virgilio iha área Kampus UNTL.

Iha nia prezensa ne’e, nia husu atu estudante sira halo asaun ne’e tenke mantein nafatin responsabilidade no kontrola malu, nune’e labele fó espasu ba ema seluk (terseira parte) atu aproveita oportunidade.

MUTL nia asaun ne’e  hahú iha tuku 08.00 dader Otl. Iha asaun ne’e, manifestante sira husu deputadu bankada CNRT, FRETILIN, PD no Frenti-Mudansa atu bele aselera ona halo revizaun ba lei ne’ebé maka konsidera fó benefisiu de’it ba parte balun. (Anibal)

Matadalan

Prezensa Emilia-Madalena Iha Tribunal, Hatur Justisa Ba Ema Hotu

DILI - Prezensa Eis Ministra Finansas Emilia Pires no Eis vise Ministra Saude Madalena Hanjam durante governasaun Aliansa Maioria Parlamentar (AMP) iha Tribunal Distrital Dili, hatur ona Justisa ba ema hotu iha lei nia okos.

Tuir diretur Ejekutivu JSMP Luis Sampaio katak sidadaun hotu-hotu bele hare kazu neebe mak iha lahetan ona duvidas, justisa ba povu kiik deit maibe justisa ba ona ema hotu-hotu katak sidadaun hotu-hotu iha lei nia okos.

Ema sempre dehan lei ba povu kiik deit maibe oras nee Ita hare Realidade hatudu ita nia Eis membru governu sira prezensa iha tribunal neebe oras  kazu iha hela prosesu produsaun provas, tan justisa ba Ema hotu,” dehan Luis ba STL Kinta (08/10/2015) iha Palasiu Prezidensial Nicolao Lobato.

Nia hatete juiz sira neebe mak julga kazu eis Ministra Finansas Emilia Pires no Eis Vice Ministra Saude Madalena Hanjam nee juiz no prokurador sira mesak professional, no iha esprensia neebe boot.

Iha fatin ketak Diretur Ejekutivu Luta Hamutuk Mericio Akara katak tribunal Timor Leste forte tamba lidera husi joven sira neebe mak iha komitmentu hodi lori justisa ba oin tamba la hare ba ema ida-idak ninia pozisaun. Informasaun kompletu iha STL Jornal no STL Web, edisaun Sesta, (09/10/2015). Timotio Gusmao

Suara Timor Lorosae

Kazu Emilia, Sasin La Livre Deklara Lialos, Mosu Konfrontasaun Entre Tribunal-Defesa

DILI - Julgamentu ba loron hat loron Kinta (08/10/2015) sasin Manuel Rodrigues Soares neebe hatudu nia jeitu hanesan tauk no senti la livre hodi la resposta ho diak hodi hamosu konfronta entre tribunal ho defesa arguida Madalena simu malu iha sala audensia.

Testamunha akuzasaun nee durante iha audensia bainhira MP ho tribunal husu kona ba numeru projetu neebe junta iha autus nee numeru PO (ordem pagamentu) ou numeru kontratu nian. Pergunta ida nee deit mak halo sasin nee resposta lalos no hatudu nia jeitu hanesan tauk no la livre iha audensia laran.

Ho nia jeitu neemak halo juis Presidenti Jose Maria de Araujo hodi husu ba nia katak “ sasin senti livre ka lae, atu resposta buat neebe mak tribunal husu. Karik senti tauk no la livre ho arguida nain rua nian tribunal bele haruka sira sai ba liur. Hatan ba ida nee sasin nee dehan nia senti livre hela no la tauk ema ruma. Nunee tribunal kontinua ho pergunta neebe hanesan, tanba la responde ho diak MP mak husu fali ho pergunta neebe hanesan. 

Maibe sasin nee nafatin la responde hodi hatudu nia jeitu nee, neemak halo tribunal repete tan dala rua hodi dehan, “keta sasin la livre  atu koalia iha tribunal tanba arguida nain rua iha sala audensia. Maibe nia dehan laiha.

Nunee tribunal ho MP la iha ona pergunta ba sasin nee hodi fo fali tempu ba parte defesa. Iha neemak defesa arguida Madalena nian husu ba sasin nee hodi dehan katak,” karik sasin tauk ho perguntas neebe mak mai husi tribunal mak halo sasin nee lakohi koalia.Hodi tribunal haruka sai arguida nain rua.

Hare situasaun kuaze minutu tolu ka hat nia laran tribunal ho defesa simu malu. MP liu husi prokuradora Angelinha Saldanha mos demonstra katak, durante audensia nee MP mos sempre husu ho lian makas ba sasin sira maibe nee laos siak hodi hatauk ema ida. Maibe so atu dehan deit katak ida neemak karakter ema Timor nian, tanba defesa internasional sira seidauk akompania diak prosesu julgamentu iha tribunal Timor nian. Perguntas ho lian makas nee laos siak maibe ida nee mak karakter ema Timor nian. Informasaun kompletu iha STL Jornal no STL Web, edisaun Sesta, (09/10/2015). Domingas Gomes/Joao Almeida

Suara Timor Lorosae

Autoridade ZEESM Promesa Falsu, Povu Keixa ba Estadu

DILI - Autoridade Zona Ekonomia Espesial Sosial Merkadu Oe-cusse (ZEESM) seidauk kumpri nia promesa ba povu, halo povu Rejiaun Espesial Oecusse hatoo Keixa ba Estadu atu hare problema nee, tamba povu seidauk hetan indimisaun husi governu.

Povu Oecuse Agustinho hatete hanesan povu simu Programa ZEESM ho diak no kontente tamba atu dezemvolve nasaun, maibe situasaun neebe mak iha la premite tamba povu nia uma neebe sobu, kontinua uza lona hodi hela.

Autoridade ZEESM hatete projitu neebe mak iha afeita ba ema nia uma no ema nia rai fo fali rai no uma maibe realidade hatudu fahe material ba uma neebe afeitadu lakondus, tamba besik udan ona,” dehan Agustinho ba Jornalista Kinta (08//10/2015) iha Palasiu Prezidensial hafoin hasoru malu ho Xefi Casa Sivil.

Iha fatin hanesan povu Francisco Ais husi Oecuse too iha palasiu prezidensial tamba prozeitu boot neebe mak lao iha oecusse halo povu senti kontente, maibe rai no kintal povu ninia governu la konsidera povu hanesan nain ba rai.

Nia hatete dokumentu tempu portugues laiha tamba governu portugues lasukat rai hodi hetan sertifikadu no iha tempu okupasuan Indonesia konsege hetan dokumentu impostu ninian maibe iha tinan 1999 ahi han hotu.

Observasaun STL ninian iha Palasiu Prezidensial, Planu husi povu Oecusse ninian nee atu hasoru malu ho prezidente republika Taur Matan Ruak Maibe Prezidente husu licensa Annual tan sira  hasoru fali xefi Casa Civil maibe enkontru nee taka Publiku. Informasaun kompletu iha STL Jornal no STL Web, edisaun Sesta, (09/10/2015). Timotio Gusmao

Suara Timor Lorosae

Minarai Besik Maran, TL Tenki Kuidadu Despeza Estadu

DILI - Minarai no gas iha rai okos besik maran dadauk ona, tamba nee Governu tenki kuidadu despeza estadu, se lae krize ekonomia bele mosu iha pais ida nee.

Tuir Peskizador ONG Lao Hamutuk katak iha tinan hirak liu ba sira sosiadade sivil fo ona avisu ba Governu no Parlamentu Nasional, katak TL tenki kuidadu ba dezpesa estadu nian, tamba rezerva minarai neebe TL agora uza oituan liu.

Tamba ita nia fundu petoliferu neebe ita hetan nee liu 80%, husi Bayu Undang nia osan nee maka tama mai, tamba nee mina rai agora oitun deit ona maka iha rai okos, tamba nee ita tenki rekuinese rekursu petroleum hirak nee, mai husi rekursu naun renovavel, se ita foti hotu ohin loron nee la bele iha tan ona, tamba minarai laos hanesan bee, Timor laos nasaun ida riku minarai, se Timor nia minarai kompara ho fatin seluk nee dook liu, tamba nee jestaun ba rekursu petroleum nia nee tenki kuidadu, la bele foti tiha depois gasta arbiru deit, halo karidade tun sae depois halo povu maka sai kiak liu,” hateten Juvinal, ba STL iha nia knar fatin, kinta (08/10/2015).

Nia mos kestiona karakter Timor nia loron la kohi simu mina mara, tamba sintoma malisan rekursu, malisan rekursu nee katak lolos minarai nee tenki fo benefisiu ba povu, neebe sai nain ba rekursu ida nee.

Iha parte seluk Direitor Bisness Development Timor Galp Luis Martins hatete, Timor Leste iha riku soin barak, presiza halo estudu atu nune bele hatene riku soin mina matan foun iha neebe, tanba fatin barak seidauk halo estudu. Informasaun kompletu iha STL Jornal no STL Web, edisaun Sesta, (09/10/2015). Joao Anibal

Suara Timor Lorosae

Odete Hakfodak Kama Barak Tama HNGV, Pagamentu Sai Uluk Kontratu

DILI - Eis Diretora Hospital Nasional Guidu Valadares Dili (HNGV) Odete Viegas, hakfodak bainhira ekipamentus kama 200 no makina fase ran 3 too iha Hospital (HNGV) la tuir nia pedidu. Projetu kama nee PO (ordem pagamentu) sai uluk foin halo kontratu ho kompania Macs Metal Craft.

Liu husi audensia julgamentu nee sasin Manuel Rodrigues Soares hanesan xefi aprivizionamentu iha Ministeriu Saude (MS) iha 2014, neebe troka Emilia altura neeba. Iha 2011 no 2012 nia halao servisu iha finansas MS nian hanesan official hodi halo PO ka Ordem Pagamentu nian. Tuir strutura bainhira atu halo PO, tenke halo uluk kontratu, foin CPV mak halo PO.

Ba projetu ida nee hau iha konesementu, no PO neebe iha baseia ba kontratu neebe mak halo tiha ona,” tenik nia ba TDD, Kinta (08/10/2015).

Sasin nee dehan pedidu pagamentu nee baseia ba kontratu maibe iha kazu nee kontrario fali pagamentu ba projetu nee. Neemak MP husu ba tribunal atu verifika fali dokumentus neebe iha, hare tiha ida nee sasin nee rekonese katak iha kazu nee PO sai uluk mak foin halo kontratu, no nia rekonese duni failansu nee. Tanba iha projetu nee laos numeru PO nian mak tau maibe numeru kontratu nian fali.

Iha fatin hanesan sasin Inaçio de Oliveira Ximenes hanesan official financas iha Ministeriu Saude iha 2009 too 2012. Ba tribunal nia hatete, iha momentu neeba nia mak asina duni CPV projetu nee nian iha 2011 no 2012. Momentu nee nia asina deit hodi entrega ba iha aprovizionamentu katak buat hotu los ona hodi entrega ba prosesu aprovizionamentu nian. Maibe nia la hatene prosesu CPV nee ba los iha aprovizionamentu ida neebe nian. Maibe tuir nia depois asina haruka ba iha prosesu aprovizionamentu tuir regras.  Kona ba total orsamentu husi CPV nee nia rasik nia la hatene, tanba haluha ona.

Iha biban nee MP husu kona ba prosesu bainhira atu asina CPV ida iha finansas nian, nia estrutura nee oinsa. Hatan ba ida nee sasin nee la responde ho lolos, maibe nia dehan haluha ona tanba sai tiha ona husi kargu nee.

Entertantu sasin Odete Viegas iha 2011 too 2012 hanesan Diretora Geral iha HNGV. Ba tribunal nia hatete, iha 2011 nia halo duni pedidu ida ba iha MS hodi husu ekipamentus kama rua (2) ho makina fase ran ida (1).  So pedidu neemak nia hatoo ba iha MS iha 2011.

Nunee iha 2012 nia rasik hakfodak bainhira ekipamentus nee too iha HNGV, neebe  nia kuantidade liu fali pedidu neebe nia husu. Hare ida nee nia tenta husu tuir lista neebe mai husi MS no konfirma ho administrador HNGV nian katak los duni ekipamentus kama nee hamutuk 200 ho makina 3 no mai duni husi MS. Hare ida nee nia husik deit, bainhira monta kama nee nia duni maibe la hare kualidade husi kama nee tanba iha 2013 nia mandate hotu. Neebe nia parte la akompania prosesu nee. Informasaun kompletu iha STL Jornal no STL Web, edisaun Sesta, (09/10/2015).Domingas Gomes/Joao Almeida

Suara Timor Lorosae