Meza PN Baixa Ona Proposta Governu

DILI, (TATOLI) – Parlamentu Nasionál liuhosi reuniaun plenária estraordinária, ohin baixa ona proposta governu kona-ba transferénsia fundu petrolíferu ba komisaun C ne’ebé trata asuntu Finansa Públika.

Proposta ne’ebé tama iha loron 12 jullu inklui dispozisaun pedidu husi governu ne’ebé esplika detalla razaun lei ne’e ho karater urjénsia, nomós relatóriu hosi deloitte.

Prezidente Parlamentu Nasionál (PPN), Arão Noe, hatete proposta ne’e mai ho pedidu urjénsia, komisaun C sei halo apresiasaun kona-ba kontiúdu hafoin lori ba plenária hodi hetan apresiasaun.

“Komisaun C sei halo ninia funsaun apresiasaun hodi haree iha karater urjénsia ka la’e, hafoin aprezenta relatóriu no pareser mak foin ita debate”, katak iha plenária, ohin.

Deputada Fernanda Lay husi bankada CNRT, hanesan mós Prezidente komisaun C, hafoin simu admisaun hateten sei konvoka membru komisaun C. “Ha’u atu konvoka membru komisaun C iha oportunidade ne’e, hafoin reuniaun plenária ita ba komisaun atu trata asuntu ne’ebé ohin hato’o”, tenik.

Parte seluk deputadu Antoninho Bianco husi bankada FRETILIN, ne’ebé antes ne’e mós la konkorda ho pedidu ne’e hateten governu tuir loloos uza kompeténsia hodi prosesu ne’e labele han tempu.

“Proposta lei ne’e la prienxe rekezitu konstitusionál no rejimentál, satan urjente agora la’e ona. Tuir loos governu uza kompeténsi tuir prinsípiu duodésimu ne’ebé mak iha. Ita halo diskusaun atu disvaloriza governu anterior nia desizaun, buka tenta dehan sira mak di’ak liu”, katak.

Tuir antigu deputadu ne’e, lei iha ona atu uza kompeténsia hodi transfere osan, maibé agora bankada governu sira halo buat foun.

“Lei iha ona atu uza kompoténsia hodi uza osan transferénsia, agora halo buat foun ne’ebé la’ós tama iha prinsípiu duodésimu. Difikulta imi nia án, difikulta mákina Estadu no dada tempu atu halo krize despeza ba Estadu nian.

Deputadu Adriano do Nascimento husi bankada PD haktuir karta justifikasaun pedidu Primeiru-Ministru ho prioridade no urjénsia tama iha loron 12, maibé tanba sa iha loron hira nia laran to’o ohin mak foin baixa ba komisaun C.

“Difikuldade saida mak Parlamentu Nasionál enfrenta, ne’ebé hahú iha loron 12 to’o 19 mak foin hatun. Se Primeiru-Ministru  dehan urjénsia, Parlamentu Nasionál husik liu kedan loron hira? Ha’u nia proukupasaun, governu dehan urjénsia tanba iha justifikasaun motivu atu selu ema nia saláriu, veteranu no buat lubun ne’ebé urjénte tebes, nusa mak ohin foin hatun?”, katak.

Deputada Lídia Norberta husi bankada FRETELIN reforsa, bainhira parte ezekutivu hatan pedidu ho karakter urjensia, PN mós tenke konsidera.

“Parte ezekutivu dehan asuntu ne’e iha karater urjénsia. Se-karater  signifika kuandu ita simu, ita mós tenke tau nia hanesan karater urjénsia maibé buat hirak ne’e la akontese”, afirma.

Hatan ba kestaun ne’e, PPN klarifika prosesu hotu tenke la’o, tanba sistema PN ne’ebé regulariza.

“Prosesu la’o hela tuir sistema nafatin, la falla, ita iha ona ajenda plenária iha segunda no tersa, tanba ne’e labele perturba ajenda ne’ebé iha ona. Tanba presiza karater urjénsia, sekuénsia diskusaun ne’e tenke tuir malu no labele perturba ajenda seluk”, dehan.

Jornalista: Julia Chatarina | Editora: Rita Almeida

Imajen: Deputadu sira Parlamentu Nasional. Foto dokumentasaun Tatoli

Lee mos: http://www.tatoli.tl/2018/07/governu-aprova-proposta-lei-transferensia-orsamentu-husi-fundu-petroliferu/

Mídia Tenke Kontribui Ba Estadu Ho Integridade

DILI, (TATOLI) – Premiadu Nobel ba Dame iha 1996, José Manuel Ramos Horta, husu ba mídia sira atu kontribui ba Nasaun ho transparente, integridade no imparsiál tuir prinsípiu kode étika jornalístika nian.

Eis-Prezidente Repúblika ne’e husu mós orgaun Estadu sira respeita liberdade mídia, nune’e bele garante transparánsia no haburas demokrásia.

“Importante liu Estadu tenke respeita buat ne’ebé iha konstituisaun, katak mídia iha Timor-Leste tenke hetan liberdade imprensa duni hodi garante nafatin Estadu Direitu Demokrátiku”, Horta ba jornalista sira iha ámbitu Konferénsia Internasionál “Dili Dialogue Forum” ne’ebé organiza hosi Konsellu Imprensa TL iha salaun Ministériu Finansa, Aitarak-Laran, ohin.

Horta enkoraza jornalista sira tenke krítiku mezmu hakerek sala ruma hodi krítika governu, maibé ida ne’e normál. “Jornalista halo sala uitoan la’ós atu buka kedan hodi ataka, ema hotu la sees hosi sala, tantu ema baibain, governu no polítiku sira, tanba ne’e mak hakerek sala ne’e normál”, afirma.

Diplomata senior ne’e akresenta obrigasaun Estadu mak respeita liberdade imprensa no liberdade krítiku. Maibé jornalista sira tenke respeita ka obedese nafatin regra ka prinsípiu ne’ebé hatur ona iha ida-idak nia parte.

Okaziaun ne’e sita ho situasaun atuál, Horta hatan ba jornalista sira dehan laiha papél atu rezolve situasaun polítika rai-laran. “Ha’u laiha papél atu rezolve impasse polítika, maibé enkuantu parte sira bolu ha’u atu sai ponte hodi buka solusaun ba situasaun polítika ne’e, ha’u prontu”, katak nia.

Horta konfesa to’o agora seidauk simu konvite ruma hosi parte hotu oinsá bele tuur hamutuk hodi rezolve impasse ne’e, maibé espera katak polítiku sira bele rezolve lais, nune’e povu hakmatek hodi moris di’ak.

“Ha’u nia odamatan loke ba ema hotu, ha’u nunka ódiu no hirus ba ema ida, mezmu ha’u iha pozisaun polítika”, katak. “Ema atu tuda fatuk mai ha’u, entaun ha’u tuda fali ho aifunan, sira hakilar hodi tolok ha’u, ha’u fó fali múzika violinu”.

Tuir nia tempu ona atu hakotu situasaun ne’e. Maske nune’e, Horta agradese no kontente tanba halo reuniaun no prepara ona programa, orsamentu atu aprezenta iha Parlamentu Nasionál (PN), mezmu elementu balun sei falta iha governu maibé prezidente bele iha tempu badak, solusiona.

Horta akresenta importante mak governu prepara ona programa no orsamentu atu submete ba parlamentu, tanba governu ho nia membru sufisiente hodi ba oin ka hatudu sira nia servisu.

Jornalista: Zezito Silva | Editora: Rita Almeida

Imajen: Premiadu Nobel ba Dame iha 1996, José Manuel Ramos Horta. Foto Fanpage FB Konsellu Imprensa

Fatuk Lenuk Bele Prezerva Atrasaun Turístika

DILI, (TATOLI) – Atrasaun turístika la’ós haree de’it ba tasi no foho, maibé objetu sira ne’ebé úniku, forma naturalmente husi natureza nian hanesan Fatuk Lenuk iha Autoridade Munisipál Baukau, Suku Buruma, nu’udar sasán úniku ne’ebé bele atrai ema sira atu bá fatin ne’e, tanba ne’e presiza prezerva.

Relasiona ho kestaun fatuk ne’ebé tuir informasaun katak kompañia ne’ebé halo dalan iha planu atu hasai fatuk ne’e, Diretór Jerál Turizmu, José Filipe Dias Quintas, hatete husi perspetiva Ministériu Turizmu nian seidauk simu karta ofisiál ruma husi abitante suku ne’e oinsá mak ministériu bele halo intervensaun.

Nia dehan ko’alia kona-ba infraestrutura halo dalan ne’e la’ós kompeténsia ministériu nian, maibé ministériu relevante liuliu Obra Públika no asuntu kona-ba rai ne’ebé halai ba Ministériu Justisa.

“Asuntu kona-ba Fatuk Lenuk iha Baukau, komunidade barak mós kestiona katak fatin ne’e mós sai atrasaun ida ba turista doméstika nomós internasionál”, Quitas afirma iha Farol, ohin.

Quintas hatutan relasiona asuntu ne’e presiza iha koordenasaun no konsultasaun ba malu oinsá fatin ne’ebé sai atrasaun presiza prezerva, tanba ko’alia sobre setór turizmu ema husi rai-li’ur ka laran bá vizita tanba iha atrasaun, fatin úniku ne’ebé atrai ema.

“Atrasaun ne’e la’ós ita haree ba tasi, foho de’it, maibé buat sira ne’ebé úniku, fatuk ida ne’ebé nia formasaun úniku ita bele prezerva sai hanesan atrasaun para atrai ema, kundu atrai ema bá ne’ebá konserteza nia impaktu ekonómikamente ba komunidade”, katak.

Nune’e presiza iha kolaborasaun tanba Ko’alia kona-ba turizmu área ida boot no kompleksu tanba iha setór ne’e haree kona-ba infraestrutura, seguransa, saúde no buat barak ne’ebé interligadu, entaun presiza kria ekipa sólidu para haree dezenvolvimentu turizmu bá oin.

“Se ita liga ba fatuk ne’e kompténsia husi Ministériu Obra Públika nia, entaun presiza halo koordenasaun liuhusi autoridade lokál sira nomós Ministériu Turizmu para oinsá fatin hirak ne’e ita bele prezerva, tanba Fatuk Lenuk ne’e úniku uitoan liuliu Baukau oan sira oinsá hakarak prezerva sai atrasaun ida, entaun ita tenke rona husi komunidade sira, fatin ne’e bele prezerva para atrai ema sira bá ne’ebá”.

Liuhusi publikasaun mídia sosiál sobre Fatuk Lenuk dada atensaun ministériu relevante sira nune’e tenta atu halo koordenasaun atu haree sítiu ne’e no fó hanoin ba malu.

“Kadavéz informasaun ita haree husi mídia sosiál tanba mídia sosiál mós ajuda publika entaun oinsá reasaun ministériu relevante sira, ami sei tenta koordena para haree hodi prezerva sítiu hirak ne’e tanba ema barak kestiona fatin ne’e furak no úniku uitoan atu labele destroe”.

Quintas afirma Fatuk Lenuk ne’e ladún famozu liu hanesan ikóniku ba munisípiu ida hanesan Malina ne’ebé koñesidu ho Marobo, Lautein ne’ebé famozu liu ho Jako no husi Baukau sei iha buat barak liuliu nia Tasi, entantu fatuk ne’e tama iha kategoria sítiu úniku, maibé ho mídia sosiál nia sai famozu tanba daudaun timoroan uza meiu ne’e hodi promove fatin sira ne’ebé seidauk koñese.

Mauricio da Silva, Prezidente Unidade Sientista Jeolojia Timor-Leste (USJTL), dehan fatuk ida ne’e tama ona ba planu Ministériu Turizmu nian ne’ebé halo identifikasaun liuhusi nia mapeamentu no nia sai objetu ne’ebé identifikadu no aponta ona sai objetu iha país ne’e no hatama ona iha mapa laran sobre nia informasaun sira.

“Ita presiza kria lei konservativa ida atubele konserva ita-nia objetu sira, signifika tenke halo lei orgánika para konserva buat sira ne’e tanba ko’alia konserva de’it, mas laiha baze fundamentál entaun laiha forsa atu defende. Ida ne’e serbisu Ministériu Turizmu no stakeholders (parte interesada) turizmu nian para proteje buat ne’e. Se bele Ministériu Obra Públika servisu hamutuk ho Turizmu para konserva ida ne’e tanba barak lahatene”, sujere.

Mauricio esplika jeolojikamente fatuk ne’e tama iha parte jeolojia nian no dalaruma mós iha aspetu kulturál balun ne’ebé liga ba objetu ne’e, tanba ne’e presiza hakle’an informasaun para valoriza buat sira ne’ebé iha país.

Ministériu Turizmu serbisu hamutuk ho USJTL hodi halo indentifikasaun ba objetu turístiku iha munisípiu neen no Fatuk Lenuk ne’e tama iha objetu identifikadu.

Hatutan kona-ba fatuk ne’ebé atu hasai ne’e nia hetan informasaun husi USJTL balun ne’ebé envolve iha serbisu kompañia ne’ebé halo dalan, tanba ne’e sira publika iha mídia sosiál no haree katak líder balun  apoia atu halo protesaun ba objetu refere no ida ne’e mak presiza atu halo.

Jornalista: Maria Auxiliadora | Editora: Rita Almeida

Fatuk Lenuk. Foto/Google.

Abitante Lokál Bele Aprezenta Fatin Turístiku Ne’ebé Seidauk Deskobre

DILI, (TATOLI) – Diretór Jerál Turizmu, José Filipe Dias Quintas, husu ba abitante lokál sira atu aprezenta ba Ministériu Turizmu fatin sira ne’ebé daudaun ne’e seidauk deskobre, nune’e bele dezenvolve iha futuru.

“Komunidade lokál bele aprezenta tanba haree ba limitasaun rekursu umanu ho lojístika kadavés ita lato’o iha área rurál sira, fatin furak ne’ebé ita seidauk deskobre, entaun nu’udar abitante iha suku, bairru, aldeia ida iha responsabilidade morál atu aprezenta ba ministériu relevante para bele hatutan, tau iha programa oinsá para ita dezenvolve”, Quintas sujere iha Faról, ohin.

Quintas hatutan ministériu mós iha ona baze dadus sobre fatin no objetu turístiku munisípiu 13 nian, tanba ko’alia kona-ba atrasaun turístika ne’e fahe ba buat rua mak ida ne’ebé harii husi ema no seluk mak halo husi natureza.

“Dadus barak lahalimar tanba ko’alia produtu turístiku ne’e fatin istóriku, natureza, tasi-laran no buat oioin, ne’ebé natureza ne’e fahe ba tasi-laran no rai-maran ne’ebé dadus ne’e ami sei dezenvolve nafatin para iha futuru sai baze dadus importante hodi haree no hato’o ba na’i-ulun sira para halo investimentu, tanba turizmu ne’e labele temi setór importante lahalimar, maibé sein investimentu sente setór ne’e labele la’o bá oin”.

Quintas afirma investimentu katak bele investe iha setór infraestrutura tanba ida ne’e prinsipál tebes liuliu aeroportu, portu, estrada tanba liga ba konetividade husi fatin ida ba fatin seluk.

“Entaun husi fatin turístiku bá fatin ida presiza iha konetividade ida di’ak, infraestrutura, eletrisidade nomós distribuisaun bee importante tebes”.

Tanba ne’e presiza iha kooperasaun no ekipa ida sólidu interministeriál, setór privadu, sosiedade sivíl no hotu-hotu servisu hamutuk para haree setór ne’e sai produtivu hodi lori kreximentu ekonómiku iha país.

Jornalista: Maria Auxiliadora | Editora: Rita Almeida

Imajen: Diretór Jerál MT, José Dias Quintas. Foto Tatoli/Egas Cristovão.