AMP Ameasa Lori PM Mari Ba Tribunal

DILI - Relasiona ho deputadu Aliansa Marioria Parlamentar (AMP) neebe maka husu ba Ministru Finansas atu halo esklaresementu iha parlamentu kona ba orsamentu dua desimu neebe maka gasta ba eleisaun antisipada, tanba sira deskonfia katak restu husi orsamentu dua desimu  neebe ho montante 3 mill governu rai iha banku hodi uza ba eleisaun antisipada.

Tuir Primeiru Ministru Mari Alkatiri hateten, laiha orsamentu restu husi orsamentu dua desimu neebe maka governu rai iha banku atu uza ba eleisaun antisipada, tanba nee iha osan rasik.

Hatan kona ba kestaun nee deputadu AMP atu lori Primeiru Ministru ba Tribunal Mari hateten, nia parte hamnasa fali.

“Halo hau hamnasa fali, hau as vezes  isin la makili maibe halo hau isin makili fali,” dehan PM Mari ba jornalista hafoin remata enkontru ho Prezidente Republika Francisco Guterres Lu Olo iha Palasiu Prezidensial Bairru Pite, Kinta, (22/2/2018).

Nia dehan, karik AMP maka lori nia ba tribunal, nee nia parte permite ba AMP, lori nia ba tribunal maka justifika. 

Notisia kompleta lee iha jornal edisaun Sesta, (23/02/20118)  

Natalino Costa | Suara Timor Lorosae

GMN TV | Jornal Nacional

Dixiplina-Vontade Servisu Determinasaun EA

DILI, (TATOLI) - Prezidente Partidu Libertasaun Popular-PLP apela ba kuadru militante, simpatizante  partidu nian, atu mantein dixiplina no vontade servisu hodi nune’e Aliansa Mudansa ba Progresu (AMP) ne’ebé PLP hola parte bele atinje determinasaun iha Eleisaun Antisipada (EA).

Tuir Taur AMP nia mehi mak atu reforsa, haboot no habiit an hodi manan EA atu forma VIII Governu Konstitusionál iha 2018. Maski AMP enfrenta risku ida mak “hadau malu” kadeira no rekursu.

“Ne’e normál akontese maibé oinsá Aliansa Mudansa ba Progresu halo servisu makas atu ita bele manan iha Eleisaun Antesipada,” Eis Prezidente Repúblika, Taur Matan Ruak hato’o iha nia intervensaun iha Konferénsia Nasionál PLP nian iha Metiaut, Kinta (22/02).

PLP parseria ho partidu rua, ida mak partidu Kongresu Nasionál Rekonstrusaun Timor-Leste (CNRT-sigla Portugés) ho Partidu Kmanek Haburas Unidade Nasionál Timor-oan (KHUNTO) ida idak mai ho programa polítika no programa diferente, maibé ho deferénsia ne’ebé mak iha presiza halo ezersísiu hodi buka konsensu atu aserta pozisaun ba partidu tolu ne’e ba ida de’it mak AMP.

“Ida ne’e la fasil atu buka identidade rasik satan hamutuk hodi nakfila-an ba identidade ida maibé ita konsege halo esforsu no hetan entendimentu liga ba partidu tolu nia sobrevivénsia,” Eis Jenerál Taur Matan Ruak kontente.

Entretantu partidu CNRT-PLP-KHUNTO, ohin loro kraik ne’e sei hamutuk iha Sentru Konvensaun Dili (CCD-sigla Portugés), hodi aprova aprova no asina plataforma koligasaun AMP atu nune’e bele ba rejistu iha Tribunál Rekursu, iha tempu besik.

Jornalista: Zezito Silva | Editór: Manuel Pinto

Imajen: Prezidente PLP, Taur Matan Ruak

Prezidente CNRT Husu Lista Deputadu Tenke Reprejenta Votante

DILI, (TATOLI) – Prezidente Partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, husu ba konferesista atu hasai rezolusaun ida hodi hatete lista deputadu ba Parlamentu Nasionál tenke reprejenta votante.

“Nu’udar prezidente partidu husu atu hasai rezolusaun ida iha konferénsia ida ne’e, kuadru sé de’it no ne’ebé de’it simu konfiansa partidu nian atu bele tama iha lista ba parlamentu”, hatete Xanana iha nia mensajen liuhosi vídeo durante konferénsia extra-ordináriu ne’ebé hala’o iha Sentru Konvensaun Dili (CCD-sigla portugés), ohin.

Mensajen ne’ebé halo iha Kuala Lumpur, Malázia iha loron 20 fulan-fevereiru foin lalais ne’e, Xanana afirma hodi esklarese rezolusaun ne’ebé temi, kandidatu ba deputadu ne’e tenke rejigna án ba lista aprejentadu, karik rezultadu eleisaun iha fatin ba proposta munisípiu, partidu la hetan votu ou lakon.

“Kuadru sira ne’e sei rejigna án hodi fó fatin ba kuadru sira seluk iha lista hodi nune’e ita bele haree katak bainhira ita tuur iha parlamentu ita reprejenta duni votante barak ne’ebé fó fiar ba partidu, ne’e importante”, reafirma.

Tanba ne’e konferénsia ida ne’e, katak nia sei toma desizaun balun, diskute, fó hanoin ba malu, simu ho opiniaun ne’ebé di’ak ba partidu hodi ida-idak hakruk ba interese partidu nian.

“Tinan kotuk ita hala’o ita nian konferénsia tanbasá, kauza saida no iha ne’ebé mak kontribui ba ita nian insusesu iha eleisaun. Ha’u hein katak ita hotu sei lembra konklusaun, ita hotu halibur iha konferénsia ne’eba, ha’u husu atu reflete, labele repete iha eleisaun antesipada” katak tan.

Mensajen ne’e mós nia dehan konferesista iha konferénsia ida ne’e la’ós fatin atu lakon tempu hodi krítika malu no ema seluk maibé objetivu haree ba partidu nia estratéjia no planu asaun nune’e nu’udar kuadru bele kontribui oinsá simu desizaun partidu nian.

“Ita ida-idak tenke hatudu ita nian militansia ba ita nian partidu, ida-idak tenke tau iha laran katak partidu só bele materializa nia vizaun ba rai ida ne’e, sé ita fó laran tomak hodi serbí ba partidu”, tenik Xanana.

Eis Prezidente Repúblika ne’e fó hanoin ba kuadru no militante sira atu labele husu ba partidu saida mak sira nian hakarak, maibé tenke husu ba án rasik saida mak partidu presiza atu halo.

Nia ho esperansa konferénsia ne’e bele la’o ho amizade, onestidade ho konfiansa mutua.

Jornalista: Rita Almeida

Imajen: Prezidente Partidu CNRT, Kay Rala Xanana Gusmão

Lú Olo Fó Xamada Ba Parpol Labele Soran Povu

DILI: Kampaña eleisaun antesipada seidauk hahú, maibé Prezidente Repúblika, Francisco Guterres ‘Lú Olo’, fó xamada atensaun ba partidu polítiku sira hodi labele hamosu issue ne’ebé fahe povu durante tempu propaganda polítika.

Xefe Estadu hateten, povu sei partisipa no rona partidu polítiku sira nia programa no planu atu hadi’a povu nia moris, maibé iha tempu kampaña ne’e la’ós atu fahe povu.

Nia dehan, kampaña atu hametin unidade iha povu nia leet bazeia ba programa ne’ebé di’ak liu ba povu nia moris.

"Ita labele fó fatin ba ema aproveita períodu kampaña hodi insulta malu, fahe malu bazeia ba saída de’it, autonomista ka nasionalista, relijiaun, rasa, frente klandestina, armada ka diplomátika. Ita uma kain ida de’it. Nasaun Timor-Leste", dehan Lú-Olo liu husi nia mensajen ba eleisaun antesipada, horisehik.

Nia hateten, só ema ne’ebé la hadomi povu Timor-Leste maka bele aproveita kampaña hodi fahe povu, kuda ódiu, ka halo vingansa ba malu.

"Ita nia kultura no demokrasia la hanorin ita insulta malu, ita nia povu la gosta buat ida hanesan ne’e, no la respeitu inan-aman la respeitu ita nia na’in ulun sira. Tempu to’o ona atu fo lima ba malu”, deham Xete Estadu.

Lú-Olo dehan, atu hakat ba eleisaun, iha loron 12 fulan Maiu, molok atu ba eleisaun, partidu polítiku no koligasaun sira, sei tama ba kampaña eleitorál, fulan ida tomak atu hakbesik-aan ba povu. Ho respeitu, esplika didi’ak no fó-hatene sira-nia programa.

Nia dehan, importante ba partidu polítika mak esplika ba povu medida saída sira sei foti atu hadi’a kualidade edukasaun no saúde? Dalan ida ne’ebé sira sei tuir atu hadi’a povu nia moris, povu nia ekonomia oinsá loos maka sira hakarak ukun povu? Oinsá sira nia hanoin kona-ba povu nia partisipasaun, hodi ukun nasaun Timor-Leste? Hotu-hotu akompaña katak partidu polítiku sira konsentra daudaun sira nia atensaun no organizaaan atu kampaña.

Nia dehan, nu’udar Prezidente Repúblika husu ba militante no simpatizante partidu polítiku hotu-hotu atu prepara-aan no ajuda aprezenta didi’ak programa ba povu tanba saída maka sira nia programa di’ak liu.

“Ita hotu tenke tane aas interese povu no nasaun ida ne’e nian. Ita hotu tenke serbisu hamutuk ba pás no dezenvolvimentu, ba estabilidade no progresu hodi kaer metin nafatin domin, lia loos no justisa iha ita-nia rai lulik Timor-Leste," tenik PR Lú-Olo.

Prezidente Repúblika, ho haraik aan, husu ba hotu-hotu haka’as-aan hamutuk partisipa eleisaun antesipada, hodi defende direitu ba dezenvolvimentu no demokrasia tuir nafatin bei'ala sira nia mehi, atu labele sai atan ba ema ida.

Alende ne’e, nia parte fó obrigadu ba organizasaun sosiedade sivíl, partidu polítiku no povu tomak ne’ebé simu desizaun husi Prezidente Repúblika hodi konvoka eleisaun antesipada.

Independente

Riak Leman: Se Maka Naok Povu Nia Osan Ba Sulan Iha Kadeia

DILI - Eis deputadu Riak leman hateten, se maka halo korupsaun ou naok povu nia osan, tenke ba hatan iha Tribunal, atu nunee bele toma responsabilidade ba aktu neebe nia komete.

Se deit maka halo korupsaun nee katak naok povu nia osan, entaun povu nee nia moris nee laba oin, tanba sira neebe koruptor diak liu ba responde iha Tribunal no ba kadeia,” dehan eis deputadu Riak Leman ba STL, iha Palasiu Governu, Kuarta (21/02/2019).

Nia dehan Buat ida korupsaun nee kaundu lao iha nasaun ida, nasaun nee nunka lao ba oin ho diak, I povu nee kontinua terus. Exemplu nasaun balu kiak laiha minarai, laiha buat mais jestaun kuandu diak sira nia povu nee moris diak.

Eis deputadu Riak Leman mos husu ba KAK atu halo investigasaun ba projetu sira neebe gasta osan bar barak, depois dala balu nee soe hela sasan sira nee, nunee mos kualidade ladiak tenke hare ida nee foti, levanta problema.

Iha parte ketak Reitor UNTL Francisco Miguel Martins hateten, nee evidensia ida presiza hatene deklarasun KAK, nunee kazu sira neebe irregular sira neebe ema hotu iha responsabilidade ba kaer orsamentu povu nian, kaer ho kuidadu, atu nunee bele evita iregularidade neebe povu lagosta. 

Carme Ximenes/Maria Lay | Suara Timor Lorosae

GMN TV | Jornal Nacional

MP ho PNTL Hahú Kompleta Dadus Hosi Kontentór Sia

DILI, (TATOLI) – Ministériu Públiku (MJ) liuhosi Prokuradór Jerál Repúblika ho Komandante Polísia Nasionál Timor-Leste (PNTL), Komisáriu Júlio Hornay, ohin informa ba jornalista sira katak kontentór sia ne’ebé foin lalais ne’e aprieende iha Portu Dili hatudu iten 18 bele suporta ona prosesu investigasaun inisiál.

“Sasán sira ne’e la’ós ho totál tonelada 150, maibé tonelada 162, tanba Polísia Nasionál Timor-Leste iha kooperasaun di’ak ho BNN (Badan Narkotika Nasionál) entaun ita aproveita halo teste ida ne’e iha Indonézia”, PJR, José Ximenes, hatete iha konferénsia imprensa ne’ebé hala’o iha PJR, Kolmera.

Hatutan tan: “Como ita-boot sira (jornalista) hatene matéria ne’e sei iha faze investigasaun, sei sujeta ba segredu justisa entaun ami labele fó informasaun pur detallu kona-ba ámbitu investigasaun, envolve sé, oinsá, ami labele fó esplikasaun”.

José Ximenes afirma tan: “Mais de ida ne’e ha’u labele ko’alia tanba sei sujeta ba segredu justisa, ha’u hanoin tonelada 162 ne’e komunidade sira presiza hetan informasaun. Ami lako’alia kona-ba matéria profundu, objetu sira ne’e mas ami ko’alia kona-ba rezultadu ne’ebé ita halo ne’e pozitu tebes ita-nia investigasaun inisia ne’ebé halo tiha ona”.

Komandante Jerál PNTL, Júlio Hornay, reforsa seidauk bele ko’alia kle’an bainhira prosesu investigasaun seidauk remata.

“Tanba ne’e mak ita hotu hein, matéria ida ne’e apoiu tebes lala’ok investigasaun, to’o iha nia rohan mak foin ita hatene katak loos duni hanesan ne’e ka la’e, depois mai ita bele ko’alia ninia rezultadu”.

Rezultadu hosi iten 18 ne’e deskobre bainhira PNTL servisu hamutuk ho BNN lori matéria prima hosi kontentór sira ba teste iha laboratóriu.

Jornalista: Maria Auxiliadora | Editora: Rita Almeida

Imajen: Prokuradór Jerál Repúblika, José Ximenes (liman karik), akompaña hosi Komandante PNTL, Komisáriu Júlio Hornay, bainhira ko'alia ho jornalista sira iha edifísiu PJR Kolmera, ohin. Foto Tatoli/Egas Cristovão

Abílio Araújo “La Kontente” Rona Propaganda Fahe Lideransa

DILI, (TATOLI) - Lider Istóriku Partidu Frente Revolusionáriu Timor-Leste Independent (Fretilín),  Abílio Araujo la satisfás bainhira rona propaganda polítiku atu fahe lideransa sira, tanba ne’e nia husu lideransa jerasaun 1974/1975 tenke unidade atu responde ba verdade istóriku.

   

Sentimentu la kontente ne’e, mak dudu Eis-Prezidente Partidu Fretilín ne’e hasoru malu ho Primeiru Ministru, Mari Alkatiri iha Palásiu Governu, ohin.

“Ha’u manifesta ba Primeiru Ministru, Mari Alkatiri katak ha’u la satisfás ho ema balun ne’ebé halo propaganda hodi hafahe lideransa sira rai laran no rai li’ur, maibé atu evita lideransa istóriku sira tenke hamutuk hodi responde verdade istóriku,” Eis Ministru Estado ba Asuntu Ekonomia no Sociais iha I Governu RDTL, ba Jornalista sira hafoin hasoru malu ho Xefe Governu, Mari Alkatiri.

Eis alunu ba Institutu Superior Ciências Económicas no Financeiras iha Universidade Téknika Lisboa, ne’e konta katak, frente esterna mosu tanba momentu ne’ebá Nicolau Lobato (lider Fretilín) mak haruka delegasaun sai ba rai li’ur.

“Enkuantu molok sira ba ha’u reprezenta Fretilín nian iha Portugal eh Eropa iha 1974 hafoin sira ba hamutuk ho ami hodi hala’o servisu diplomasia ba luta Timor-Leste nian,” nia fó hanoin.

Hodi kontinua fó sai katak, iha tempu rezisténsia nian la iha ema mak fahe malu, maibé ema hotu hamutuk mak hanaran frente interna no esterna hafoin Timor-Leste hetan ukun rasik-an.

“Ha’u kondena makas ba ema ne’ebé la respeita eh hakarak fahe lider istóriku sira,” Autór ba Programa no Manual Politico FRETILÍN ne’e hirus.

“Nunka konkorda bainhira ema balun hakarak hafahe lider istóriku sira no ita fiar katak lider istóriku sira sei la fahe malu mezmu sira iha deferénsia ideolojia polítika iha Estadu Direitu Demokrátiku.”

Entretantu Abílio husu ba lider istóriku sira tenke hamutuk nafatin mezmu ida-idak ho nia partidu rasik, maibé objetivu mak hadi’a povu nia moris no dezenvolve nasaun Timor-Leste.

Ba sidadaun hotu iha direitu atu hili nia partidu polítiku, maibé konxiente nafatin hodi kontribui ba estabilidade nasionál.

“Ha’u prontu apoia festa demokrasia, enkuantu partidu ne’ebé mak manan, espera katak sei hamosu governu inkluzaun no unidade nasionál liuliu atu halibur lider istóriku sira.”

Frente Ida Mesak Sei La Manán Funu

Frente Esterna-Interna Maka Hahoris Libertasaun Nasionál

Jornalista: Zezito Silva | Editór: Manuel Pinto

Imajen: Eis-Prezidente Partidu Fretilín, Abílio Araujo (kazaku metan) tuur ho Primeiru Ministru, Mari Alkatiri iha Palásiu Governu, ohin. FOTO GPM

Aban, Jogadór Estranjeiru To’o Dili Atu Haforsa Cacusan CF

DILI, (TATOLI) – Jogadór estranjeiru na’in tolu hosi Indonézia sei to’o ho aviaun Sriwijaya iha aban (kinta) meiudia atu haforsa ekipa Primeira Divizaun iha Liga Futeból Amadora (LFA), Cacusan CF.

Tuir informasaun ne’ebé Ajénsia Tatoli asesu hosi treinadór Cacusan CF, Vasco Fernandes, via telefónema kuarta ne’e katak jestoriál Cacusan kontratu jogadór hirak ne’e tanba iha ambisaun atu sai kampiaun ba LFA époka 2018, maibé rejeita fó informasaun kona-ba valór orsamentu ne’ebé uza hodi kontrata jogadór sira ne’e tanba segredu.

Jogadór hira ne’e maka hanesan (1) Muhammad Alfin Zulkarnain “Febrian” (19),  antes ne’e joga iha PS. Bandung ho númeru kamizola 13, pozisaun avansadu.  (2) Rivaldi Dwi Kurniawan “Ivan” (19), joga iha PS. Bandung ho númeru kamizoa 37, pozisaun defeza sentrál. (3) Dani Ardianto “Dani” (19), joga iha PS. Bandung ho númeru kamizola 2, pozisaun médiu volante/defeza sentrál.

Treinadór Vasco optimista katak ho prezensa jogadór estranjeiru na’in tolu ne’e sei hasa’e kualidade jogu Cacusan nian no iha espetativa atu sai kampiaun LFA.

Jornalista: Xisto Freitas | Editora: Rita Almeida