AMRT Tranzmite Faktu Istóriku ba Jerasaun Foun

DILI, (ANTIL) – Múzeu la-halo istória ka sai istoriadór, maibé halo prezervasaun faktus, dokumentus rezisténsia nian no la-halo konkluzaun ba istória nomós la-halo análize.

”AMRT rekolla de’it faktus istória atu transmite ba jerasaun foun no públiku atu hatene”, Diretór Ezekutivu no Prezidente Arkivu no Múzeu Rezisténsia Timor-Leste (AMRT), Antoninho Baptista Alves Hamer hatete durante audiénsia iha Konferénsia Internasionál Daruak ne’ebé realiza hosi AMRT iha Sentru Konvensaun Díli, Kinta(18/8).

AMRT kumpri misaun oinsá mak bele fó importánsia ba prezervasaun faktu istóriku ne’ebé nesesáriu inklui transmite dokumentu orijinál ne’ebé eziste ba públiku, ba investigadór sira nomós ba estudante atu bele asesu.

Tanba ne’e, tuir nia, AMRT eziste atu bele sai fonte informasaun no prezerva faktu istóriku no memória TL nian.

Estudante Universidadede Dili (UNDIL), José Rui Fátima agradese ba komisaun organizadora, tanba konsege bolu oradór sira hodi fahe informasaun kona-ba istória TL ba luta libertasaun patria nomós oradór internasionál sira liliu Comunidade dos Países da Língua Portuguesa (CPLP) mai hodi fahe mós sira nia esperiénsia kona-ba sira nia luta rezisténsia hodi hetan indepedénsia.

Estudante ne’e rekomenda, aumenta atividade iha munisípiu, nune’e komunidade sira bele akompaña no hatene prosesu luta TL nian.

Husu mós ba fundadór nasaun ka líder istóriku sira bele tuur hamutuk hodi bele tau istória hamutuk hosi istória ne’ebé ho versaun frente armada, klandestina nomós diplomátika hodi halo istória ida justu.

AMRT inagura iha loron 7 fulan-Dezembru 2005 hodi hanoin tinan 30 tropa Indonézia tama Timor-Leste.(jornalista: Rafy Belo; editora: Rita Almeida)

Foto: Primeiru Ministru, Rui Maria de Araújo hamutuk Diretór Ezekutivu AMRT foto hamutuk ho oradór sira, hafoin ensera Konferénsia Internasionál Daruak ho tema Memoria no Identidade Nasionál ne’ebé realiza hosi AMRT iha Sentru Konvensaun Díli, Kinta (18/8). Foto ANTIL/Egas Conceiçao

Lere Sauda Povu Timor

DILI, (ANTIL) – Maijór Jenerál Forsa Armada Timor-Leste (FALINTIL) Forsa Defesa Timor-Leste (FDTL), Lere Anan Timur sauda povo Timor tomak iha komemorasaun tinan FALINTIL ba dala 41.

“Ha’u hakarak hato’o ha’u nia saudosoens ba povu Timorense, independenti sira nia orijin no konviksaun politikus e religiosas apoiu iha luta armada”, Lere afirma iha nia diskursu, Sabadu, (20/8) iha kuartel jerál Fatuhada Dili.

Luta Timor, ema barak mak hatudu sira nia brani ho ispiritu no sakrifísiu inkondisionál, liliu sira ne’ebé lakon vida.

Tuir Lere, atu marka loron FALINTIL nia lori memoria koletiva ho hanoin ba ema hotu ne’ebé sakrifika vida, luta ba rai Timor.

“F-FDTL hela ho valores, tradisaun no esperénsia hosi FALINTIL ne’ebé agora kontinua la’o ba dezenvolvimentu no progresu hodi halo defesa ba teritoriu nasionál no povu liu-hosi koordenasaun no kolaborasaun ho instituisaun seluk,” Lere realsa tan.

Hodi dehan, ho haraik-án haree konsiderasaun ba militar sira iha sosiedade ne’ebé ho verdade fó omenajen ke bele halo iha eransa Ida ne’e, kontinua infrenta dezafiu foun.

Realidade ne’ebé mosu iha konseitu foun teknolojia moderna hodi konstrui sosiedade ida ne’ebé mak di’ak liu.

Selebrasaun tinan ne’e halo mos promosaun ba membru F-FDTL nain 10 ida mak Maukalo.

Seremonia ne’e mos hetan partisipasaun hosi membru governu, deputadu no vereranus Timor inklui vereranus Austrália. Bainaka espesial iha mak Primeiru Ministru Reinu Kambodia, Hun Sen. (jornalista: Manuel Pinto; editora: Rita Almeida)

Sai Profesional, F-FDTL Tenki Iha Sentimentu Servi

“Forsa profesional mosu wainhira iha ona sentimentu servi, iha ona konsiensia kumpri no mos konsensia la mete politika no negosiu hanesan temi iha konstitusaun no lei  nia laran,” Eis Sekretariu Estadu Defesa Julio Tomas Pinto, informa ba ANTIL Sesta, (19/08) relasiona ho loron komemorasaun FALINTIL ne’ebe sei monu iha 20 Agostu (aban-red).

Tuir Julio Tomas Pinto, selebrasaun loron FALINTIL kada tinan labele sai hanesan rutinidade ida de’it ba FALINTIL-FDTL, maibe tenki sai nudar espiritu ida ba jerasaun foun sira liu-liu jerasaun foun iha F-FDTL laran hodi banati tuir.

Maske estadu investe makas ona iha F-FDTL, esplika Julio, maibe sei dalan naruk ida mak Forsa F-FDTL sei hakat liu atu sai forsa profesional.

“Governu investe ona iha infrastrutura e mos seitor sira seluk iha F-FDTL, maibe governo ne’e sidauk to’o, portantu sei investe nafatin, militar rasik tenki esforsu an,” Julio haktuir tan.

Hodi dehan, F-FDTL tenki iha vontade hanesan ofisiais barak mak iha ona kunesementu diak iha area militar nia, maibe persija implementa kunesementu sira ne’e iha realidade.

Programa ba aniversariu FALINTIL dala-41, sei konsentra iha Edifisiu Minesteriu Defeza no Kuartel Jeral F-FDTL Fatuhada ho programa sei hahu uluk formatura ne’ebe hahu tuku 08.30 OTL. Primeiru Ministru Kambodia, Hun Sen mos konfirmadu sei partisipa iha seremonia refere. - Jornalista: Manuel Pinto / Editor: Gantry Meilana

Foto: Julio Thomas Pinto

Área Tekniku ho Ekonomia Hakesi Relasaun Bilaterál TL-Kambodia

DILI, (ANTIL)  – Primeiru Ministru Timor Leste, Rui Maria de Araújo ho nia homologu Kambodianu, Samdech Akka Moha Sena Padei Techo Hun Sen, Sesta (19/8) iha Palasiu Governu hakesi relasaun bilaterál entre rai rua liu-hosi koperasaun tekniku ho ekonomia.

Xefi Governu TL, Rui Maria Araújo, informa, Timor ho Kambodia asina ona nota intendimentu hodi servisu hamutuk iha àrea tekniku no ekonomia.

“Ami ko’alia mos kona-ba vistu livre ba pasaporte diplomatiku no pasaporte serbisu ho asina MoU kona-ba serbisu hamutuk iha área traballadór”, PM Rui Araújo hatete iha nia intervensaun konferénsia hamutuk entre xefi governu rai rua ne’e iha Palasiu Governu.

PM hatutan, área potensia ne’ebé mak Kambodia ho Timor identifika nu’udar parte potensia mak agrikultura ho petroleu.

“Ministru Negosiu Etranjeiru rai rua nian sei servisu hamutuk hodi implementa programa servisu  iha área potensiál ne’ebé mak identifikadu ona,” Rui Araujo salienta.

Xefi Governu Kambodia, Hun Sen promete ba nia homologu, sei buka esforsa hodi ko’alia ho entidade relevante iha Kambodia para fasilita bolsa estudu ba Timor-oan atu bele kontinua estudus iha Kambodia ba futuru mai. (jornalista: Manuel Pinto)

Foto: Primeiru Ministru Rui Maria Araujo kaer liman ho Primeiru Ministru Kambodi Hun Sen, Palasio Governu, Sesta. Foto ANTIL

Hun Sen: TL Merese Tama Ona ASEAN

DILI, (ANTIL) – Primeiru Ministru Kambodia, Samdech Akka Moha Sena Padei Techo Hun Sen observa katak Timor-Leste merese ona sai membru ASEAN.

“Ha’u nia vizita ne’e hatudu Kambodia suporta Timor-Leste tama iha ASEAN, tanba ha’u nia haree Timor Leste laiha problema atu Timor tama iha ASEAN, Timor-Lleste serve atu tama nu’udar membru ba ASEAN,” Hun Sen rekuñese durante konferénsia imprensa hamutuk ho Primeiru Ministru, Rui Maria Araújo iha Palasiu Governu, Sesta, (19/8).

Ho kondisaun ne’ebé mak ohin loron Timor iha, Hun Sen afirma, sei fó suporta tomak atu TL sai nu’udar membru ASEAN relasiona ho pedidu ne’ebé hato’o hosi PM Rui Araújo.

“Husu atu Primeiru Ministru Kambodia suporta Timor-Leste tama iha ASEAN,” Rui Maria Araujo husu. (jornalista : Manuel Pinto)

Foto: PM Rui Maria de Araujo lao hamutuk ho nia Homologu Hun sen

PARABENS BA LORON FALINTIL BA DALA 41

VIVA TIMOR LESTE!

ROGERIO LOBATO: INDEPENDENSIA LA OFERESE HOSI BANDEZA

DILI - Eis Ministru Interior,Rogério  Lobatohatete, nia nu’udar Fundador FALINTIL sente komemorasaun loron FALINTIL 20 de Agostu ba dala 41 nu’udar orgullu boot ida tanba FALINTIL kumpri duni ona nia misaun istórika  ne’ebé promote antes ba povu katak sei liberta pátria, ohin loron promesa ne’e realiza duni.

“Hanesan fundador ba FALINTIL, ha’u sente, ita haree ba kotuk, to’o ohin loron FALINTIL kumpri duni nia misaun istórika. Tan ajuda povu Timor Leste  ba ukun rasik án. Tan FALINTIL iha tinan 1975 sai hanesan liman kro’at povu no FRETILIN ni’an, altura ne’ebá istória hanesan ne’e duni, ikus kumpri ona nia misaun istóriku,”hatete Rogério  bainhira dada lia ho diáriu  iha nia kna’ar fatin Timor Lodge, Comoro (18/08).

Rogério  hatete, Ne’e sai izemplu bo’ot ba patriotismu povu enjeral no joven sira hotu  ne’ebé agora bo’ot dadaun, dalaruma la hatene istória Timor nian, FALINTIL nia sakrifisu ho FRETILIN nian. Tan independensia ne’ebé Timor Leste hetan, la’ós  ema maka oferese hosi bandeza maibé sosa ho ran no ruin.

Maibé depois ikus mai, Komandante Kay Rala Xanana Gusmão halo despartidarisaun FALINTIL nian hodi sai forsa ida ne’ebé nasionál, la’ós  ona forsa partidaria. Halo povu Timor hamutuk liutan, hanoin ne’e mós mehi Prezidente Nicolau Lobato ne’ebé saudozo tiha ona. Ikus misaun istória kumpri tiha ona.

“Ha’u atu prontu konta istória ba povu, hamutuk ho istoriador sira seluk, nune’e ita nia sidadaun sira bele hatene klean kona-ba istória lolo’os  hosi FALINTIL nian,” Rogério  hatete.

Iha okaziaun ne’e ne’e Rogério  fó hanoin ba governu presiza tebes dezenvolve institusaun FALINTIL Forsa defeza Timor Leste (F.FDTL). Iha Institusaun F-FDTL foin iha forsa Infantaria, seidauk iha Forsa  Aero, tasi nian. Mais importante tebes fó hanoin atu governu tenke kapasita Ministériu defeza.

“Hakarak ka lakohi Estadu tenke dezenvolve F.FDTL sai forsa iha modernu, ho meus hotu. Koalai infantaria, tenke iha kilat modernu, no ekipamentu seluktan, ne’e la’ós  atu halo funu, mais nu’udar nasaun soberania, ita nia forsa tenke iha kompletu fasilidade no ekipamentu funu ne’ebé modern duni,” Rogério  fo hanoin.

Iha parte seluk, Maijór Jeneral Fórsa Defeza Timor-Leste (F-FDTL), Lere Anan Timur hato mensajen ba F-FDTL atu banati tuir Disiplina FALINTIL ne’ebé hatudu husi saudozu sira nian atu nune’e bele lori Nasaun Timor Leste ba oin.

Tuir Lere, loron 20 de Agustu 2016 FALINTIL halo tinan 41 ninia ezistensia, FALINTIL mai husi 1975 ne’ebé uluk sempre dehan FALINTIL Liman kro’at povu maubere nian, mais FRETILIN mak harii atu FALINTIL sai liman kro’at.

Timor-Leste ukun án FALINTIL tranzita ba F-FDTL, Timor Leste nia fórsa agora iha kondisões hotu-hotu, FALINTIL ulun husi gerilla transfórma mai fórsa regular, hanesan espiritu no klamar F-FDTL ninian.

“Ha’u husu ba Fórsa jerasaun fóun atu banati tuir komandate sira ne’ebé ohin loron la hamutuk ona ho ita tanba sira fó ona sira nia vida ba nasaun no instituisaun ida ne’e nia disiplina, sakrifisiu atu lori nasaun ida ne’e ba oin,”dehan Maijór Jeneral Fórsa Defeza Timor-Leste (F-FDTL), Lere Anan Timur iha kuartel jeral, Fatuhada, Dili, Kinta (18/08).

Nune’e nia dehan, F-FDTL sempre dezenvolve, maibé  dezenvolve bele dehan hakiduk no mós bele ba oin.

“Ita nia Fórsa Defeza ba oin nafatin apezar de obstaklu no difikuldade barak ne’ebé sira hala’o nafatin no ita nia Governu preokupa halo oinsa professionaliza ita nia fórsa defeza liu-liu kapasitasaun iha rekursu umanu par ita nia ema tenke sai matenek hodi lori ita nia instituisaun ne’e ba oin,”hakotu Gerilleru 24 anos ne’e.

FALINTIL nia Istória

Liu hosi semináriu hodi komemora loron FALINTIL, dia 20 de Agostu, ne’ebé hala’o iha kuartel jeral F-FDTL, Fatuhada, kinta (18/08), Fundador RDTL, José  Ramos Horta ne’ebe sai orador iha semináriu ho tema “FALINTIL Iha Istória Timor Leste nian”, hatete, rezultadu hosi Timor Leste nia ukun an la ses mós hosi prosesu Relasaun Diplomasia ne’ebé hala’o iha momentu ne’ebá.

“Ita Timor Leste labele haluha agradese ba komunidade interNasionál sira ne’ebé apoiu Timor Leste iha momentu defisil,”hatete Ramos Horta.

Iha momentu sira halo Diplomasia hetan apoiu makas mós husi Jornalista sira nian liu husi fó infórmasaun no mós lori sira buka dalan oinsa bele hetan ligasaun di’ak atu halo diplomasia.

Tan ne’e agora ba oin Jerasaun fóun Timor Leste nian tenke hatene oinsa mak halo polítika ho matenek hodi bele lori Timor Leste ba oin.

Nune’e mós tuir, Prezidente Atual Zona Espesial Oecusse, Marí  Alkatiri katak, prosesu kriasaun partidu polítika no FALINTIL ne’ebé iha momentu ne’ebá iha uluk mak Partidu lima hanesan, Partidu UDT ho ASDT.

Maibé  partidu sira hotu hari loloos ona iha tempu neba mak hanesan, Partidu UDT, Fretilin, Apodete, Kota no Traballista, maibé  iha momentu neba iha de’it partidu tolu mak importante ba Portugal hanesan, UDT, Fretilin no Apodete hodi halo konversasões Preliminariu iha Dili.

Maibé  bainhira atu hari FALINTIL ne’e iha Munisipiu Aileu, maibé  iha momentu neba lidera Rogério  Lobato.

Entertantu, Prezidente Atual Partidu FRETILIN, Francisco Guteres Lu-olo katak, Timor Leste tenke prezerva FALINTIL tanba naran FALINTIL ne’e mai husi funu naruk ida.

Tanba ne’e F-FDTL ne’e nia misaun simu husi FALINTIL tanba ne’e jerasaun foun sira tenke hatudu disiplina tuir FALINTIL sira ne’ebé uluk iha tinan 24 nia laran.

Fundadór FALINTIL

Diplomata Timor oan, José Ramós Horta hatete, Saudozu Nicolau Lobato no Marí Alkatiri maka Fundadór ba FALINTIL iha tempu ne’ebá.

“Ita nia Fundadór ba FALINTIL mak Saudozu Nicolau Lobato tanba iha momentu neba nia hanesan Vice Prezidente Frente Revolusionariu Timor-Leste Independensia (Fretilin), hamutuk ho Marí  Alkatiri ho mós sira seluk, maibé  hamutuk liu-liu mak ho Marí  Alkatiri hodi iha 20 de Agustu 1975 funda FALINTIL,” dehan Diplomata Timor-oan, José Ramós Horta hafóin sai oradór ba seminariu Nasionál ne’ebé ho Tema FALINTIL iha istória Timor Leste nian iha kuartel jeral, Fatuhada-Dili, Kinta (18/08).

Nune’e nia dehan, sente hakfódak uitoan sekuandu sei dabate fali Fundadór ba FALINTIL ninian, Nicolau Lobato mak uluk bot FRETILIN iha momentu neba no hamósu hanoin sira ne’e hodi hari FALINTIL.

Entertantu iha fatin hanesan, Sekretaria Jeral Partidu FRETILIN, Marí Alkatiri haktuir mós katak, ema barak mós sempre husu kona-ba  loron FALINTIL nian iha loron tolu kedas hanesan loron 15, 18 no 20 fulan Agostu nian.

“Ha’u lahatene atu esplika loloos halo nusa maibé  ha’u hatene mak ne’e loron 15, 18 labarik fóin moris ne’ebé halo tinan no loron 20 fulan Agustu maka sai hanesan simu baptismu,” dehan Prezidente Atual Zona Espesial Oecusse, Marí  Alkatiri.

Tan ne’e fóti loron 20 mak sai hanesan loron importante atu komemora tinan ba FALINTIL eziste hahú husi 1975 ate agora ne’e.

Entertantu, Prezidenti Partidu FRETILIN, Francisco Guterres Lu-olo hatete Fundador loloos ba FALINTIL nian mak Marí Alkatiri no Saudozu Nicolau Lobato.

“FALINTIL ne’e FRETILIN maka funda liafuan ida Forsa Armadas de Libertasaun Nasional Timor Leste (FALINTIL) ne’e dotor Marí Alkatiri mak sai hanesan testamuña loloos ba fundasaun FALINTIL inklui mos Nicolau Lobato no sira seluktannian,”haktuir Lu-Olo.

Entretantu, tuir artigu ne’ebé hakerek nain Caetano Guterres Maulori ho títulu “sé maka fundador FALINTIL?” ne’ebé Timor Post sita, Kuarta (17/08), iha http://kiakilir.blogspot.com haktuir, FALINTIL, Forças Armadas da Libertasaun Nasional  Timor-Leste,  mai hosi transformasaun naran ne’ebé  Primeiro Comandante Rogério  Lobato ho pioneiros FALINTIL sira fo nanis kedas, ne’ebé  bolu “Forças Armadas da Desfesa do Povo Maubere”. Naran ne’e  iha tiha ona molok tama iha 1975.

Iha artigu ne’e hakerek nain hatete, Rogério  Lobato merese, iha direitu atu bolu fundador das FALINTIL.

Iha artigu ne’e nia konkluzaun mos hakerek nain haktuir, iha tempu ne’eba, Kay Rala Xanana Gusmão mos fo orientasaun barak oin sa atu forma Forças Armadas da Libertasaun nasional ida urgente atu desarma UDT bainhira hakerek nain hasoru Xanana iha sede Comite Central Fretilin nian, iha avo Xavier nia uma (Santa Kruz).

Hakerek nain haktuir, Xanana fo mos konsellos no orientasaun barak sobre sistema demokratiku, oin sa bele hetan relasoens di’ak  ho nasaun viziñu sira i kontribui ba paz i estabilidade rejional no internasional.

Tanba ne’e, hakerek nain konsidera Xanana hanesan konsilleru do kontra golpe no merese i iha direitu atu fo naran Fundador FALINTIL.

Entretantu hakerek nain haktuir mos katak, iha momentu ne’eba mos membros do Comite Central da Fretilin mos iha ona ideias atu forma Forças Armadas da Libertasaun Nasional  ida, iha sorumutu ne’ebé  hala’o iha Alarico Fernandes nia uma, ho prezensa Marí  Alkatiri, Alarico Fernandes, saudozo Carapinaalias Lelo ho saudozu Nicolau Lobato, depois ikus mai, iha 20 de Agostu, saudozu Nicolau Lobato ho Marí  Alkatiri  muda fali naran ida “Forças Armadas da Desfesa do Povo Maubere”ne’e  ba naran FALINTIL.

Tanba ne’e, hakerek nain mos hatete, Marí  Alkatiri ho Alarico Fernandes, Saudozu Nicolau no Saudozu Carapina mos merese no iha direitu atu bolu Fundador FALINTIL.(max/rio/van)

Timor Post

EIS TROPAS PORTUGUES SEI KONSENTRA IHA TAIBESI

DILI - Atu relembra no hamoris espíritu Patriotismu iha komemorasaun loron FALINTIL loron 20 Agostu ba dala 41 tinan ne’e, tuir ajenda eis Militar Portugues (eis tropas) kuaze rihun tolu sei konsentra iha eis kuarter Jeral Taibessi.

Rogério  hatete, iha tinan 1975 militar Timor-oan sira iha ezersio military portugues, halibur hamutuk sai forsa bo’ot ida iha eis kuarte jeral Taibessi hodi adere ba Partidu FRETILIN, haforsa liutan partidu FRETILIN no ikus transforma án ba FALINTIL.

“Sé ita dehan loloos, hun FALINTIL mai hosi timor-oan sira iha altura servisu nu’udar tropas iha Portugues ni’an. Ita labele kaer fali FALINTIL nee hosi klaran de’it. Lae tenke haree ba iha hun,”hatete fundador FALINTIL, Rogério  Lobato ba diáriu iha Timor Lodge Comoro, kinta, (18/08).

Komemorasaun loron FALINTIL bad ala 41 iha 20 Agostu, nu’udar data ida importante ba eis tropas tan sira sai premeiru Pinonerus hodi funda FALINTIL. 

Objektivu hosi konsentrasaun ne’e atu fó hanoin ba governu katak labele haluhan eis tropas sira, pelumenus tenke tau konsiderasaun ba sira, tan sira mós halo servisu bo’ot ida ba ita nia ra’in.

Alende ne’e konsentrasaun ida ne’e mós atu relembra hikas espíritu Patritoismu eis tropas portugues sira adere funda FALINTIL.

Tuir eis Ministru Interior, Ai ida, kuandu nia bo’ot, tenke iha nia abut, hun, to’o sanak. Eis Militar Portugues sira akordu ona konsentra iha eis kompañia Taibesai, fatin konsetra sira uluk hodi kontra Golpe 1975.

Agora tuir nia, sé hun, laiha oinsa maka FALINTIL bele moris, iha 20 Agosto eis tropas portes sira mai hosi munisipiu 13. Depois selebra serimónia ofisial 20 Agostu remata, sei halo konsentrasaun iha eis Kaurtel Taibesi hodi konfersa ba malu ho almosu. Hodi rekorda ba istória sira ne’ebé pasadu ona.

“Eis militar portugues sira sei moris agora kuaze rihun tolu ida hanesan ne’e, iha konsentasaun Taibesi, ha’u sei koa’lia oituan hodi fó hanoin ba governu , nune’e bele tau konsideasaun ba eis tropas portugues sira nia direitu, rona sira nia halerik, difikuldade saida maka sira hasoru iha sira nia moris durante  ne’e.

Iha konsetrasaun eis Militar portages sira, dehan  fndador FALINTIL ne’e, laos atu hala’o aktividade partidaria lae. Eis tropas portugues sira uulu, adere ba partidu FRETILIN, mais agora adere ba partidu seluk. Presiza respeita sira. Mais konsentra hamutuk konsidera hanesan eis Militares.

“Iha konsentrasaun ne’e, ami sei koa’lia forma asosiasaun eis militares ne’ebé sai hun, no abut ba FALINTIL. Komisaun organizador konvida eis lider Nasionál sira hodi partisipa iha konsentrasaun eis militar portugues iha Taibesi,”hatete Rogério.

Konsetrasaun ne’e, atu hamoris fali espíritu Patriotismu iha momentu ne’ebé bo’ot tebes iha ami nia hanoin, bainhira atu harii FALINTIL,kuarte jeral taibesi fatin uluk, ami hamtuk ho saudozo David Alex Daitula, ami adere ba FRETILIN hodi hatun bandeira Portugal no hasa’e Bandeira FRETILIN.

“Momentu ne’ebá, bandeira Nasionál ita nia seidauk iha, entaun ami tenke hasa’e duni bandeira FRETILIN,”hatete Rogério  hodi relembra hikas akontesementu iha 20 Agostu tinan 1975.(max)  

Timor Post

DIVIDA HATUDU GOVERNU LAHIA KAPASIDADE

DILI - Eis Prezidente Repúblika, José  Ramos Horta hatete, tuir nia haree polítika governu anterior nian kona-ba jestaun orsamentu estadu durante ne’e la’o la di’ak, problema ne’e akontese tanba governu rasik laiha kapasidade jestaun.

Ramos hatete, governu seidauk iha jestaun ida di’ak atu maneija kona-ba orsamentu estadu nian ho di’ak, realidade bele haree foin lala’is governu tenke aprova orsamentu retifikativu hodi selu dívidas hosi tinan 2013 nian to’o agora.

“Kapasidade governu nian agora laiha, buat balun la’o di’ak, maibé  prova mak ne’e dívida  barak to’o iha 2013 la selu, fóin mak atu selu ne’e signifika laiha kapasidade ba jestaun, projetu no pagamentu,” dehan Ramós Horta bainhira sai oradór ba seminariu Nasionál ne’ebé ho Tema FALINTIL iha istória Timor Leste nian iha kuartel jeral, Fatuhada-Dili, Kinta (18/08).

Kestaun kapasidade laiha tanba ema hotu hatene esperiensia tinan 14 nia laran to’o ona tempu eleisaun mesmu antes buat lala’o tanba ruguranga ho eleisaun, depois tranzisaun muda governu tanba ne’e pagamentu bele demora to’o iha 2017 ou 2018.

Atu rezolve ba problema ida ne’e, tuir diplomata Timor-oan ne’e hatete, agora tama ona tinan 2016 no iha 2017 sei realiza eleisaun jeral, tanba ne’e agora governu persiza sukat didiak kuandu Governu iha kbi’it no kapasidade no iha nesesidade duni ba orsamentu bot ne’ebé ho montante 1.2 billões ne’e.

Tuir Ramos horta, di’ak liu projetu balun bele dudu neneik ona par aguenta to’o iha 2018 Governu fóun mai.

“Ha’u la hatane tanba ha’u lakoñese argumentu Governu nian, orsamentu ne’ebé sira aprezentasaun tanba ne’e ha’u  lakohi kritika, mais ha’u hatete de’it, ita hatene ona eleisaun besik ona tanba ne’e buat barak sei lala’o,”hakotu Premiadu Nobel da paz ne’e.(rio)

Timor Post

POVU HUSU ESTADU HALOT FALI FATUK LULIK AI LULIK

Povu iha Suku Holpilat, Postu Administrativu Maukatar, Munisipiu Covalima, husu ba Estadu atu halot fali lulik sira ne’ebé uluk sobu iha tempu rezistensia nia laran, hodi husu sira nia tulun ba luta libertasaun.

“Ohin loron ami nia Suku Holpilat, kona-ba kultura, durante okupasaun, ita sobu ita nia fatuk lulik sira ne’e sai hotu, to’o agora ami seidauk aruma, tanba ne’e ami husu Prezidenti Reúblika atu oinsa mak ami bele foti fila fali,” dehan lia nain Hilario Mendonca, ba Prezidenti Repúblika, liu husi dialogu komunit’aria, Xefi Estadu ho povu iha Suku refere, Kuarta (17/08).

Alende ne’e, komunidade Mario Gusmão mós dehan, iha Suku refere povu atu dezenvolve sira nia moris difisil tebes, tanba  estrada ladiak, no rai henek mos dok tebes.

“Tanba ne’e ami husu ba Estadu atu loke netik estrada husi ami nia Suku ne’e ba Tavara, tanba rai henek ne’e besik, no kareta nia folin ne’e mós baratu,” dehan Mario.

Purtanto, komunidade António Marsal Amaral mós, husu ba PR Taur loke eskola pre eskolar iha Suku refere.

Purtanto, komunidade Alberto Guterres mós dehan, oinsa kompañia sira ne’ebé mak loke loke estrasa iha Suku refere, hodi estraga tiha sira nia aihan no ai oan sira ne’e.

Hatan ba preokupasaun ne’e, Prezidenti Repúblika (PR), Taur Matan Ruak hatete katak, persija duni atu halo fali fatuk lulik no ai lulik iha sira nia fatin.

“Lulik sira ne’e, agora ita bele foti fali, tanba uluk situasaun obriga ita mak ita uza sira, agora ita livre ona, ita halot fali sira,” dehan Xefi Estadu ne’e.

Kona-ba atu loke eskola pre eskolar ne’e,  PR Taur Matan Ruak dehan, atu loke eskola ne’e, povu iha fatin barak husu hotu, inklui mos sentru formasaun.

“Maibé ha’u triste los, bainhira rona informasaun katak, iha Munisipiu Covalima ne’e, Governu loke tiha sentru formasuan, laiha ema ida atu ba tuir,” dehan Taur Matan Ruak.

Xefi Estadu ne’e haktuir, kuandu sentru formasaun ne’e iha ona mak joven sira lakohi aproveita, sira mak sei lakon, entaun ema seluk mak mai aproveita fali oportunidade.

Kona-ba kompañia estrada estraga povu nia sasan, PR Taur Matan Ruak dehan, nia husu ona ba Governu atu selu hotu.

“Ha’u husu para Governu fo indeminizasaun, hanesan iha Aileu, estrada ne’ebé Governu loke uluk, la fó indeminizasaun ba povu, maibé ida loke ikus ne’e, Governu fo fali indeminizasaun, entaun ha’u dehan, sei fo ona balu, entaun tenki selu hotu,” informa Taur Matan Ruak.cos

Jornal Nacional