DILI
- Governu seidauk uza mákina imprime ne’ebé ajénsia KOICA hosi Korea Sul fó
apoiu iha tinan hirak liu ba, tanba tékniku laiha atu halo instalasaun. Tanba
ne’e, durante ne’e governu liuliu Ministériu Edukasaun kontinua loke tender ba
kompaña privadu sira maka halo imprime ba matéria ezame nasionál.
Ministru
Estadu Koordenador Asuntu Sosiais no Ministru Edukasaun (ME), António da
Conceição, hatete, nia rasik tau ona prioridade iha orsamentu tinan 2017
funsiona ona mákina ne’e atu governu labele hasai tan osan ba selu mákina
impreme seluk.
Material
ezame nasionál ba periodu tinan 2016 no tinan 2017 prosesu sira liuhosi
aprovizionamentu Ministériu Edukasaun nian, maibé ba tinan oin bele uza
ona mákina ne’ebé iha.
Iha
parte seluk, Ministru António hatete, haré ba material nasionál
konfidensialidade no seguransa tenke maka’as, entaun mákina imprime ne’ebé iha
seidauk iha kondisaun, tanba ne’e maka iha tinan 2016 komisaun aprovizionamentu
maka sei halo hela produsaun ba material ezame.
Ministru
António hatutan, mákina ne’ebé maka KOICA ofrese, ne’e manual. Tanba
ne’e, presiza haruka tan funsionáriu sira ba tuir formasaun iha Jakarta
Indonézia hodi halo operasaun mákina.
“Ho
planu sira ne’e maka ha’u hanoin iha tinan oin produsaun mákina sei la
halo hosi empreza no bele halo ona ho mákina governu nian,” subliña
Ministru António ba jornalista sira iha Palásiu Governu, Tersa, (11/10).(gus)
Timor
Post
