Grotus, Asika no Noi Diwake Iha Ona Sentru Jestaun Krokodilu

HERA, (ANTIL) - Governu Timor-Leste liuhusi Ministeriu  Komérsiu Indústria no Ambiente, estabelese ona Sentru Jestaun Krokodilu iha Hera, Dili, Kinta (10/1/2016). Inaugurasaun sentru ne’e, simboliza liuhusi haki’ak lafahek tolu, Grotus Slebor (lafaek aman), Asika (Lafaek Inan) no Noi Diwake, lafahek Inan.

Husi Krokodilu tolu ne’e, Grotus Slebor mai husi Autoridade Munisipál Dili ne’ebé durante ne’e haki’ak  iha Markoni, Fatuhada honia medida métru 2,30.  Asika mai husi munisípiu Manufahi, durante ne’e haki’ak iha área Welala, suku Letefoho, Postu Administrativu Same ho nia métru 1,70 no Noi Diwake mai husi munisípiu Baukau ne’ebe durante ne’e haki’ak iha suku Bahú, Postu Administrativu Baukau ho métru 1,30.

Hafoin inaugurasaun ba Sentru Jestaun Krokodilu, Ministru Komérsiu Indústria no Ambiente, Constâncio Pinto ba ANTIL,  hateten, lafahek tolu mak oras ne’e iha ona sentru jestaun refere maibé sei kaer tan krokodilu iha tasi ibun sira bainhira hetan.

Tuir ministru, konservasaun ba lafahek iha oin rua, mak insitu no exitu. Insitu signifika, fatin ne’ebé lafahek moris nanis ona, mota ka tasi. Husi ne’eba, MKIA sei koopera ho autoridade lokál atu proteje tiha fatin ne’e, atu  lafahek bele hela nafatin iha fatin protejidu . Exitu  signifika, muda tiha lafahek husi fatin ruma ne’ebe eziste, lori ba haki’ak iha sentru jestaun.

Ministru Constancio husu ba komunidade sira, bainhira hetan lafahek iha área ne’ebé ameasa komunidade, tenki fó hatene ba Ministériu Komérsiu no Ambiente (MKIA), liuliu Diresaun Nasionál ba Biodiversidade atubele kaer hodi lori ba sentru jestaun krokodilu iha Hera. (jornalista: Maria Auxiliadora/Editor: Otelio Ote)

Foto: Ministru Komérsiu Indústria no Ambiente, Constâncio Pinto ho Vise-Ministru, Filipus Nino Perreira bainhira vizita luhan Krokodilu hafoin inaugurasaun ba Sentru Jestaun Krokodilu. Foto/Midia MKIA.

DESTAK BA PLP, OPINIAUN HUSI AQUITA TAMA LAKA – iha Salvio Online

Partido Politico e Figura:

1. CNRT Kay Rala Xanana Gusmao.
2. PARTIDO FRETILIN Marie Alktiri e Lu-Olo.
3. PLP Taur Matan Ruak.
4. PD ? Hein Resultado Congresso.
5. FRENTI MUDANCA Jose Luis Guteres.
6. Khunto?
7. PST Avelino Coelho

Se mak iha posibilidade ba tur Kadeira PM?

Hosi observasaun konsolidasaun PLP nian sai hanesan Fatin ALTERNATIVO ba ema hosi Partido FRETILIN, PD, Frenti Mudanca no partido seluk tan no partisipasaun maximo hosi Membro Reformado FFDTL. Hosi sorin seluk PD barak kuaze 20% tuir deklarasaun Mariano Sabino nian. Balun ba Partido FRETILIN balun PLP. CNRT continua konsolida nia baze kuaze ita acompanha konsolidasaun maximo atu bele hetan 35 kadeira ba leten. PARTIDO FRETILIN nia Eleisaun Direita ho nomeru votantes nebe foin dadaun fo sai 35% garantia, tuir comentario balun dhn katak agora esforsu tan para bele atinji 45% ka 50%. Maibe labele contente ho ida ne hanesan indikator ida atu manan ka atu ba ukun fila fali iha 2017. Partido seluk hanesan FM, KHUNTO, PST mos kontinua konsolida sira nia estrutura. Mas tudo isso poder ba 2017 sei iha povo nia liman.

Ema hotu koalia, ema hotu rona, ema hotu hatene no ema hotu preokupa. Tamba sa mak Katuas TMR ho Katuas Xanana Gusmao hirus malu makaas. Maibe hau nia hare. Lae karik! Se ita hare hosi kotuk ba oin. Iha momento wainhira acontecimento diferensas idea iha Ai Laran entre Xanana Gusmao nudar Cmdt em Chef das FALINTIL ho comandante Mauk Moruk no comandante sira seluk TMR mak nudar kolaborador hodi ajuda Cmdt em Chefe das FALINTIL iha procesu tomak to Cmdt Mauk Maok tun mai rende.

Hare procesu luta too iha faze ikus Taur Matan Ruak tenki kumpri ordem atu labele hatan tiru hasoru wainhira Milisi Pro Otonomi ho Tentara Indonesia sunu oho iha territori Timor-Leste laran tomak. Hosi ida ne’e signifika Xanana Gusmao e TMR ALMATER ida deit. Tuir hau nia opiniaun mak se PLP sai hanesan Fatin ALTERNATIVA ba ema Partido FRETILIN nebe la satifas ho modelo Lideransa mak iha halai ba PLP nune mos ba ema PD nebe la satifas ho Lideransa PD halai ba PLP nune ho ema iha Mudanca la satifas ho Lideransa halai ba PLP.

No ikus liu saida mak acontece iha Eleisaun Geral 2017 oin mai maka PLP sei foti votos barak hosi Partido FRETILIN. Partido FRETILIN se hela ho kadeira 15 ou bele menus liu 15, no PD se menus tan 3 k 4, Frenti Mudanca se la liu 3%. CNRT se aumenta kadeira 5 k 6 tan. Partido seluk ida sei troka FM. Ita hotu sei la hatene. Se PLP mak sigundo partido mais votado Iha PN maka Lideransa Partido FRETILIN Marie Alktiri nian hotu ona iha secretario Geral no ZEEMS mos hotu ona. Se mak sei ba PM Taur Matan Ruak mak sei ba PM ho liu hosi nia maun Cmdt em Chefe nia liman mak ba PM. Tamba sa? Tamba laiha ema ida mak bele fahe maun ho alin e laiha ema ida mak bele halibur maun ho alin so comprimisso iha ai laran mak sei halibur sira hasoru desafio nebe Timor-Leste hasoru iha futuru oin mai. Obrigado e abracos forte ba le nain sira. (Opiniaun husi: Sr. Aquita Tama Laka)

Iha SALVIO ONLINE, 18.09.2016 - Título TA

PARCERIA TIMOR AGORA COM SALVIO ONLINE

Prezidente ko’alia kona-ba serbisu hosi jornalista sira ne’ebé fó sai kona-ba masakre Santa Cruz

Prezidente Taur Matan Ruak, horisehik hato’o parabéns ba serbisu hosi jornalista sira ne’ebé “fó sai ona ba mundu kona-ba krimi iha Santa Cruz”, bainhira komemora tinan 25 hosi masakre ne’ebé muda istória ba luta independénsia nian.

“Masakre Santa Cruz akontese tinan 25 ona. Infelismente, iha mos masakre terivel seluk iha ita rain. Maibé, masakre Santa Cruz maka hetan atensaun maka’as hosi mundu internasionál, relasiona ho sakrifisiu hosi ita-ninia joven sira – no ita ninia povu – tanba jornalista sira ne’e maka iha duni Santa Cruz, inklui jornalista hosi nasaun seluk”, dehan Taur Matan Ruak.

“Imajen hirak ne’ebé maka jornalista sira ne’e grava no notisia sira ne’ebé sira hakerek, espalla iha mundu tomak no fó sai kona-ba krimi ne’ebé akontese iha Santa Cruz, 12-novembru-1991”, hatutan tan Prezidente.

Iha 12-novembru-1991, hala’o misa no serimónia ida hodi fó omanejan ba Sebastião Gomes, ne’ebé mate iha forsa indonézia ninia liman, iha bairu Motael molok loron refere, no ema tokon-ba-tokon maka la’o bá to’o iha rate Santa Cruz.

Durante la’o bá Santa Cruz, balun loke kartas no faixa protestu. Hodi halo forsa indonézia sira, nervus no kria violénsia maka’as hasoru ema sira ne’e, no oho ema 250 resin.

Imajen hothotu kona-ba masakre Santa Cruz, ne’ebé rekolla hosi jornalista Max Stahl, no ne’ebé halo ema barak foin hatene kona-ba problema Timor-Leste nian iha Dili, bainhira liu tiha loron rua, iha 14-novembru-2014, ho intervensaun olandeza Saskia Kouwenberg, ne’ebé tau subar kasete iha “bolsa” hosi roupa laran, tuir saida maka nia konta ba Lusa.

Horisehik, Taur Matan Ruak rekoñese serbisu hosi "jornalista Allan Nairn no Amy Goodman nian, iha Santa Cruz, tinan 1991", no liu-liu ba "Timor-Leste ninia belun bot, Max Stahl, ne’ebé mos marka prezensa iha loron trájiku ne’e, tanba hosi ninia serbisu, profesionalismu no ninia korajen maka hatudu ona ba mundu, kona-ba timor-oan sira-ninia sakrifisiu iha nasaun ne’ebé okupa hosi Indonézia”.

"Ho nune’e, imprensa livre no valór jornalista nian, kontribui ona ba liberdade timor-oan nian", dehan. Taur Matan Ruak hato’o mos “agradesimentu espesiál” ba jornalista hosi ajénsia Lusa António Sampaio, tanba “fó sai ba mundu tomak, kona-ba luta hosi povu maubere”.

Bainhira akontese masakre ne’e, António Sampaio iha hela Austrália, hodi akompaña mos masakre refere hosi dok, ba imprensa portugeza.

"Liu tiha tinan rua nulu resin-lima, Timor-Leste hanesan nasaun independente no liberdade imprensa permanese ho valór bot importánsia bot ida, hodi hato’o ba sosiedade no sidadaun hothotu kontra violénsia no abuzu hothotu”, nia dehan.

Ba Taur Matan Ruak, tempu ne’ebá "maka luta ba moris di’ak no dezenvolvimentu siknifikativa hodi liberta nasaun", no timor-oan sira “hatudu sira-ninia kbi’it, hanesan povu”.

Prezidente Taur ko’alia liu ba “sakrifisiu eroiku hosi joven barak, ne’ebé fó-aan kontra okupsaun” no “ba libertasaun povu timor-oan nian”.

"Ha’u fó omenajen ba memória hosi mártires Santa Cruz no ba mos juven hothotu ne’ebé mate iha masakre seluk ne’ebé akontese iha Dili nomós fatin seluk”, dehan hodi rekoñese mos “família hirak ne’ebé sira-ninia oan feto no mane mate tanba defende povu ninia dignidade no independénsia hosi ita rain”.

Iha loron fó omenajen ba mártires 12-novembru nian sira, ne’ebé mos hanesan Loron Nasionál Juventude nian, Taur Matan Ruak apela “ba unidade nasaun, estabilidade nomós dezenvolvimentu ba oras ne’e”.

Alénde ne’e nia mos haktuir kona-ba papel rezisténsia juvenil ba Frente Klandestina, tanba halo planu hodi halo manifestasaun bá to’o rate Santa Cruz, no Komité 12 novembru maka kontinua ho serbisu ne’e.

“Ohin (horisehik) hanesan mos selebrasaun ida, tanba horisehik maka hahú ho atividade hosi Komité foun ida. Komité Orientadór ba Elaborasaun hosi Istória Organizasaun Luta Juventude nian, ho nune’e ha’u hato’o ha’u-nia votu parabéns nomós estima pesoál ho apoiu”, dehan.

SAPO TL ho Lusa - Foto PR Taur Matan Ruak / em SAPO TL

Estadu sei Konvida Veteranu Kondekoradu Na’in 36

DILI, (ANTIL) – Governu Timor-Leste liuhusi Sekretariu Estadu Administrasaun Estatál, Samuel Mendonça informa, estadu sei konvida kondekoradu veteranu no kombatente ba luta libertasaun nasionál partisipa iha komemorasaun 28 Novembru ne’ebé sei hala’o iha muníspiu Lospalos.

“Eventu ne’e sei konvida mós Prezidente Repúblika, Taur Matan Ruak no sei konvida mós kondekoradu na’in 36,” informa sekretáriu estadu ne’e ba profisional komunikasaun sosiál sira iha Arkivu no Múzeu Rezisténsia Timor-Leste (AMRT), Dili, Sesta, (11/11).

Orgaun soberanu sira, membru governu, veteranu libertasaun nasionál no identifika mós estranjeiru sira balun sei partisipa iha eventu ne’e, maibé depende ba komisaun organizadora.

Preparasaun atinji ona pursentu 60 no iha tempu badak sei remata preparasaun. Orsamentu ba eventu ne’e hamutuk milaun 4000. Tipu eventu ne’e sei hala’o hanesan mós ho munisípiu sira seluk ne’ebé hala’o ona.

Mesmu preparasaun hasoru difikuldade maibé buka maneira hodi rezolve. “Ita kontinua nafatin haree ba nia difikuldade ne’ebé mak iha no ita buka oinsá atu rezolve ba problema ne’ebé mak sei mosu mai,” nia rekoñese.

Ho nune’e, Samuel Mendonça husu ba komunidade sira hotu, lideransa komunitária, joven sira no entidade sira hothotu atu fó apoi tomak ba eventu ida ne’e tan loron ida ne’e importante tebes.

“Istória ida ne’ebé mak boot teb-tebes iha luta ba libertasaun nasionál hodi tinan-tinan ita komenora loron ne’e hodi fó ita-nia onra ba sira atu dignifika ita-nia eroi no libertadór sira ne’ebé mak ohin la hamutuk ho ita,” nia husu.

Komemorasaun 28 Novembru proklamasaun indepedénsia Timor-Leste dala 41 ne’ebé sei hala’o iha munisípiu Lospalos ne’e sei harame mós ho atividade motocross no atividade seluk. (jornalista: Rafy Belo; editora: Rita Almeida)

Foto: Sekretariu Estadu Administrasaun Estatál, Samuel Mendonça

TL Poténsia ho Biodiversidade

HERA, (ANTIL) – Ministru Komérsiu Indústria no Ambiente, Constâncio Pinto iha inaugurasaun Sentru Jestaun Krokodilu, Hera, Kinta (10/11) hatete, Timor-Leste (TL) nasaun ne’ebé ki’ikoan maibé iha poténsia biodiversidade boot.

“Hateke ba sorin-sorin,  haree biodiversidade iha foho leten, mota-laran, tasi-ibun poténsia mós ba dezenvolvimentu turizmu. Maibe realidade, biodiversidade iha Timor Leste  sai fali ameasa ba komunidade.”, Constâncio informa.

Tuir peskizadór, populasaun krokodilu iha Timor-Leste aumenta ba beibeik, atinji ona rihun 10. Movimentu abitante krokodilu domina iha tasi kosta súl no norte.

Tuir Peskizadór Sebastião, bainuira halo peskiza  tinan 2014 kona-ba krokodilu nia ameasa, hatudu katak totalidade husi krokodilu boot liu malária no denge. Entre 2013 no 2016, polísia relata kazu hamutuk 66. Entre kazu ne’e,   40 resin mate no 16 kanek todan.

“Tanba ne’e, ho harii krokodilu iha zona eskuteiras, tantu norte no súl maka sua eslénsia Prezidente Repúblika iha 2013 hola inisiativa hodi halibur informasaun husi expert sira kona-ba estratéjia oinsá ita hapara asidente krokodilu nian no konsulta sira ne’e halo ho esperiénsia iha rai-laran nomós husi Austrália”, Ministru relata.

Timor-Leste iha krokodilu ne’ebé bolu rai-na’in no migrante sira haburas no namkari iha Timór laran. “Korkodilu ida rai-na’in rona ita-nia hamulak sira maibé ida migratóriu la-koñese ita-nia lian, ita-nia rain tan ne’e, dalaruma agresivu tebes. Tanba ne’e, ita presiza prepara didi’ak ita-nia tékniku sira, ita-nia koñesimentu ne’ebé kle’an hodi bele kaer sira, arruma sira iha fatin ida ne’e”, Ministru hatutan.

MKIA iha kooperasaun ho Austrália, atu treinu tékniku sira ho selesaun no rekursu ne’ebé di’ak para bele halo treinamentu. “Treinamentu de’it la-sufisiente maibé presiza mós ekipamentu ne’ebé adekuadu para sira halo servisu”, Constâncio subliña.

Konstrusaun ba Sentru Jestaun Lafahek kontrui husi kompañia Fantija ho lori tempu ne’ebé naruk uitoan.

Diretór kompañia Fantija, Carlito X. Araújo hatete, projetu luhan lafafek ne’e asina kontratu ho parte MKIA iha fulan-Juñu 2015 tanba, rezolve problema uitoan sobre rai, kultura no buat seluk entaun hahú konstrusaun iha iha fulan-setembru 2015 ho orsamentu $215,936.40.

“Tuir planu kontrusaun remata iha fulan 4 ka 5 maibé ami hasoru dezafiu no difikuldade husi traballadór sira, materiál no pagamentu ne’ebé tarde maibé nu’udar kompañia ami timoroan ami hakarak ho laran no responsabilidade boot realiza projetu ida ne’e to’o remata tuir dezeñu no BoQ”, Carlito hatete.

Marka prezensa iha inaugurasaun luhan lafahek ne’e partisipa husi Ministru Constâncio Pinto, Vice-Ministru, Filipus Nino Pereira ho nia estrutura, reprezentante husi Prezidente Repúblika, Ministru Estadu Koordenadór Asuntu Ekonómiku, Korpu Diplomátiku, Autoridade Lokál,  F-FDTL, PNTL no konvidadu sira. (jornalista: Maria Auxiliadora; editora: Rita Almeida)

Foto: Sítiu Krokodilu ne’ebé konstroe husi kompañia Fantija no daudaun ne’e iha ona krokodilu Grotus Slebor, Asika no Noi Diwake mak prienxe ona fatin refere. Foto mídia MKIA 

PNTL PRONTU FO SEGURANSA ELEISAUN SUKU SEGUNDU VOLTA

Polisia Nasional Timor Leste (PNTL) prontu fo apoiu seguransa ba eleisaun suku segundu volta ne’ebe mak sei hala’o iha loron 13 Novembru 2016 semana ne’e.

“Ita agora dadaun prepara hela planu ba eleisaun suku segundu volta ninian ne’ebe mak sei realiza loron 13 ne’e ba eleisaun sugundu ronde parte polisia kontinua fo apoiu seguransa,”afirma Komanadante Operasaun PNTL, Superintendenti Xefe, Henrique da Costa, ba Jornalista iha ninia knar fatin, Kuartel Jeral PNTL, Caicoli-Dili, Tersa (08/11/2016).

Nia hatutan, eleisaun segundu volta iha munispiu balun nia membru sira ne’ebe mak la sufsiente, entaun husi  parte komandu jeral nian sei desloka tan membru PNTL ne’ebe mak bele fo apoiu ba iha Munisipiu.

Munisipiu ne’ebe mak sei hetan fo apoiu maka hanesan, Munispiu Ermera tanba eleisaun suku ba segundu volta nian barak liu, Munisipiu Aileu mos sei hetan nafatin apoiu husi  membru PNTL iha komandu jeral desloka membru balun iha ne’eba hodi bele garante segurnsa eleisaun segundu volta nian.

Entertantu iha Munisipiu Liquisa mos hanesan sei desloka membru balun ba iha ne’eba hodi asegura eleisaun suku segundu volta. Munisipiu Bobonaru sei kontaktu ho komandante Unidade Polisia Fronteira (UEP) atu bele fo apoiu seguransa iha munisipiu Bobonaro tanba membru sira ne’e besik iha ne’eba inklui mos Munisipiu Covalima.

“Ita nia Unidade Espesial Polisia (UEP) mos kontinua halo kontrollu ba iha Munispiu ne’ebe mak iha momentu eleisaun suku ne’e halo konflitu ba entaun ita desloka membru UEP ba hodi asegura seguransa bele lao ho diak iha eleisaun segundu volta” dehan Henrique.

Iha oportunidade ne’e nia hateten moa katak, PNTL liu husi  Polisia inteljensia ho Polisia Tranzitu sei kontinua buka tuir motorizada ne’ebe mak durante ne’e lakon iha Munisipiu Dili.

“Los duni katak durante vitima balun mak mai keixa iha Polisia Nasional Timor Leste (PNTL) konaba morizada ne’ebe mak lakon liu-liu iha Munispiu Dili ninian entaun durante ne’e polisia intelejensia mos esforsu hodi buka tuir hela motorizada ne’ebe mak lakon,”esklarese nia.

Nia hatutan, liu husi  polisia intelejensia nian no polisia tranzitu atu nune’e bele buka tuir sasan ne’ebe mak lakon atu nune’e ho esforsu ne’ebe mak membru sira hala’o hodi bele indetifika motorizada lakon.

Durante ne’e PNTL mos konsege kaptura autor balun ne’ebe mak deskonfia na’ok morizada hodi halo ona prosesu invetigasaun nomos balun aprezenta ona ba iha Ministeriu Publiku. Eus 

Jornal Nacional

US$ 400 MIL BA KOMEMORASAUN 28 NOVEMBRO, SEREMONIA NASIONAL HALA’O IHA LOSPALOS

VI Governu konstitusional sei aloka orsamentu US$ 400 mil hodi komemora loron historiku 28 Novembru, tinan 2016 nian iha Munisípiu hotu, inkui seremonia nasional ne’ebé mak sei hala’o iha Postu Administrativu Lospalos, Munisípiu Lautem.

“Tinan-tinan  orsamentu ne’ebé  mak bolu  fundu komemorativu ba buat sira ne’e hotu ita providensia, entre U$ 200 mil to’o 400 mil ba Munisípiu hotu,”esplika Ministro de Estado Coordenador  dos Assuntos Administração do Estado Justiça e Ministro Administração  Estatal, Dionisio Babo, ba  jornalista iha edifisiu, Ministériu Administrasaun Estatal, Caicoli, Dili, Kuarta (09/11).

Dionisio Babo, dehan, husi osan  hirak  ne’e sei uza  ba  preparasaun  isar bandeira,  hodi  han hemu, depois mós sei transporta ema husi Postu Administrativu sira mai iha fatin seremonia hanesan iha Munispiu laran.

Relasiona  ho komemorasaun 28 Novembru tinan 2016 ninian ne’e, Governu hahú dadauk  ona hala’o  preparasaun desde fulan kotuk.

“Ami haree tiha ona fatin iha Lospalos sei konsentra iha besik Titilari,  ami koordena ona ho Ministériu seluk,   hanesan Obras Públikas para  haree oinsa  hadia infraestrutura balun  iha fatin seremonia  ne’e rasik,”hatete Dionisio Babo.

 Hodi festeza seremonia  komemorasaun 28 Novembru iha Munisipiu Lautem  ne’e mak, Dionisio Babo dehan,   antes   ne’e Ministério Comersio Industria e Ambiente (MCIA) sira komesa loke feira ho  jogu tradisional sira hotu.

“Nia (MCIA) mós husu ba  liña Ministériais no Sosiedade sivil sira, Setor Privadu sira   ne’ebé hakarak partisipa  iha feira  ne’e bele,  nun’e hodi  promove  ita nia produtu  antes  ita halao  iha Munisipiu Lospalos.Hanesan tinan-tinan  komemorasaun loron bo’ot 28 Novembru selebra  iha Munisipiu hotu,  membru  Governu sira mak apoiu   prijidi seremonia ho aktividades sira hanesan jogu tradisionais   para nune’e hodi lembra fali loron nacional ne’e,”hatete Dionisio Babo.

Dionisio Babo afirma tan katak, Estatal  iha osan oituan ba komemorasaun loron bo’ot sira,  ida mak 20 Maio,  ida seluk mak ajuda komemorasaun loron  Falintil 20 Agostu,  hanesan  ajuda tenda kareta no buat sira seluk.

“Eventu 28 Novembro ne’e  Estatal mak kaer. Ami tenki poupa osan halo didiak, tanba 31 Dezembru ne’e sai hanesan dia dos Herois  ne’ebé koñesidu ho  loron matebian  Saudozu Komandante  Nicolau Lobato  iha batalia,”hatete Dionisio Babo.avi

Jornal Nacional