Troka La Sama, Governu Desidi Hafoin Aifunan Fulan 3

DILI - Sestu Governu Konstitusional desidi sidadaun neebe maka atu troka Saudozu Fernando La Sama de Araujo, hodi Asumi Kargu Ministru Kordenador Asuntu Sosial no Ministru Edukasaun hafoin kari Aifunan fulan 3.

Tuir Primeiru Ministru Rui Maria de Araujo katak Sekretariu Jeral Partidu Demokratiku (PD) seidauk aprezenta lista maibe sira hato ideia no prekupasaun, governu seidauk disidi ema nebe mak atu troka tamba hein liu loron 40.

Hau hanesan xefi governu hau hanoin katak husik too loron 60 lai ba, ita ninia sentiment tristeza, pois mak ita hare mak ita atu halo,” dehan PM Rui ba Jornalista, Kinta (02/07/2015) iha Palasiu Prezidensial Nicolao Lobato.

Iha fatin hanesan Prezidente Partidu Demokratiku Interino Adriano Nacimento katak Oras nee partidu Seidauk Koalia hodi troka Saudozu La Sama Hanesan Prezidente Partidu, tan nee hein to loron 40 deslutu mak foin hanoin hodi halo diskusaun.

Nia hatete kona ba aifunan ba Saudozu la Sama loron 14 nee tuir Familia Manutasi nian, maibe partidu nian sei hare halo deslutu nee loron 40 mak foin koalia kona ba pozisaun no prezidente nebe mak troka ninia fatin. Informasaun kompletu iha STL Jornal no STL Web, edisaun Sesta (3/7/2015). Timotio Gusmao

Suara Timor Lorosae

Xanana Fo Ordem Haruka Fila Autor Droga, “Tribunal Labele Kastigu Calisto”

DILI - Eis Primeiru Ministru Kay Rala Xanana Gusmao deklara ba tribunal katak nia mak fo ordem, hodi haruka fila autor droga nain lima ba Indonesia ho rajaun tanba rede internasional.

Liu husi audensia julgamentu tribunal kontinua rona deklarasaun sasin defesa Kay Rala Xanana Gusmao katak, nia maka fo ordem hodi haruka fila autor droga nain lima ba Indonesia. Iha ordem nee laiha ordem verbal ou ordem eskrita, maibe ordem iha forsa nian mak tenke kumpri. Neebe tribunal labele dehan ordem nee ilegal.

Ordem nee mai husi hau, tribunal labele dehan ordem nee ilegal. Hau mak autoriza, sira labele koalia buat barak. Tanba segredu nasaun nee hau hatene barak liu sira. Neebe iha forsa laiha ordem verbal ou eskrita maibe kumpri deit. Calisto so kumpri deit ordem superior nian. Tuir los laos nia mak sai arguidu maibe hau mak sai arguidu ba kazu nee. Neebe tribunal labele fo kastigu ba nia, maske kastigu nee fulan ida. Calisto kumpri deit ordem, no ordem neebe hau fo tanba iha interese rede internasional,” tenik Xanana ba tribunal iha TDD, Kinta (020715).

Calisto lori autor nain lima nee ba Indonesia laos uza nia osan, maibe governu mak fasilita nia. Neebe Tribunal tenke konsidera sirkuntansia neebe maka momentu halo iha kazu nee, maske Tribunal tenke halao nia dever. I kazu nee rasik konkretu no uniku kompara ho kazu seluk, tanba kazu nee iha interese rede internasional nian. Labele tau interese nasional nian as liu, tanba TL iha kooperasaun ho nasaun sira nee.

Iha biban nee Xanana mos fo nia esplikasaun kona ba ordem neebe nia fo katak, momentu neeba nia rasik nunka hasoru malu ho sidadaun nain lima nee. Maibe iha kazu nee uniku, la hanesan ho kazu sira seluk tanba kazu nee rasik iha kooperasaun bilateral ho nasaun TL. Bainhira iha kazu ruma mosu hanesan nee, estadu tenke haruka fila ba Indonesia hodi simu pena morte tuir lei kodigu penal Indonesia nian. Rajaun seluk mak para labele uza TL hanesan baze trafiku droga nian hodi ba Indonesia. Informasaun kompletu iha STL Jornal no STL Web, edisaun Sesta (3/7/2015).Domingas Gomes/Guihlermina Franco

Suara Timor Lorosae

India Sei Apoiu TL iha Area Transporte E Komunikasaun Ho Agrikultura

DILI - Governu India ho komitmentu boot prontu azuda Timor Leste (TL) iha area 4 hanesan Trasporte e Komunikasaun, Agrikultura, liga mos ba Trenamentu ho kapasitaasaun inklui  promove paz no estabelidade.

Tuir Vice Ministru Negosiu Estranjeiru Roberto Soares katak sira halo enkontru ho Embaixador India mai TL Gurjit Singh. Iha enkontru nee embaixador nee aprezenta sira nia komitmentu protidaun nafatin atu reforsa koopersaun bilateral entre TL ho India.

Relasiona ho hametin relasaun bilateral nee, Governu India mai ho sira nia prioridade 4, atu koresponde forsa liu tan ba programa Governu nia neebe iha, tamba nee maka sira aprezenta sira nia protidaun iha area 4, hanesan area Trasporte e Komunikasaun liu-liu iha area teknolozia no sensia ninia, area Agrikultura, liga mos ba seitor treinamentu no kapasitasaun ba ofisial hotu-hotu, neebe maka hakarak aproveita bolus estudu neebe Governu oferese, nee husi India prontu tebes atu reforsa ida nee,” hateten Roberto, ba Jornalista sira hafoin remata enkontru ho Primeiru Ministru Rui Maria de Araujo, iha Palasiu Governu, Kinta (02/07/2015).

Iha parte seluk Observador Politika Manuel da Costa Pinto hateten Nasaun barak hakarak azuda  TL iha area oi-oin, maibe susar, tamba TL seidauk rezolve nia problema rasik. Informasaun kompletu iha STL Jornal no STL Web, edisaun Sesta (3/7/2015). Joao Anibal

Suara Timor Lorosae