Alkatiri: Mina Maran Veteranus – Idozu Simu Nafatin Pensaun

MANUFAFI – Kampania partidu FRETILIN ba dala sanuluh resin ida, iha Munisipiu Manufahi, Sekretariu Jeral Partidu FRETILIN Mari Alkatiri hateten bainhira Mina maran, veteranus no idozu sira sei kontinua simu pensaun, FRETILIN nia planu ba dezemvolvimentu modernizasaun.

“FRETILIN sei garante veteranus no idozu sira nia pensaun wainhira mina maran, tanba FRETILIN nia planu ba dezemvolvimentu modernizasaun, nee duni mina maran mos ita nia veteranus no idozu mos sei kontinua simu sira nia pensaun,” dehan Sekjer Partidu FRETILIN Mari, iha diskursu, bainhira halo kampania partidu FRETILIN, iha Munisipiu Manufahi, Sabadu (02/06/2017).

Governu AMP no Bloku, tuir Sekjer Partidu FRETILIN Mari katak, maka halo diskriminasaun ba veteranus balun nia direitu, tanba sira taka lista inskrisaun maske veteranus balu seidauk rejistu.

Entretantu FRETILIN hakarak fila ba ukun nee obrigasaun ida FREILIN nian, atu hatutan tan luta ba libertasaun de patria, atu liberta povu, tanba nee FRETILIN halo tuir prosesu demokratiku maka atu fila ba ukun.

Iha fatin hanesan Jose da Silva hanesan veteranus hateten, Komisaun homenajen durante nee halo deskriminasaun verifikasaun dadaus veternus sira nian, tanba ema neebe uluk laluta ba rai ida nee sira mos veteranus hotu, ema ida neebe luta ba rai ida nee ukun aan laveteranus fali. Carme Ximenes/ET2

Suara Timor Lorosae

CNRT Kaer Ukun Infraestrutura Boot Nafatin Prioridade

DILI – Partidu Congresso Nacional Reconstrução Timorense (CNRT) kompromete katak, wainhira povu fo konfiansa ba sira atu kaer ukun iha eleisaun parlamentar nee, sei kontinua tau prioridade ba projetu boot sira iha Timor Leste laran tomak.

Tuir Reprezentante Partidu CNRT, Nelio Izaac Sarmento dehan, iha programa importante CNRT nian tinan ida nee, kontinuasaun ba infraestrutura boot mak oras nee lao dadaun.

Programa importante CNRT nian iha tinan ida nee, kontinuasaun ba infraestrutura boot,” dehan Neliowainhira hatan ba perguntas jornalista nian konaba programa prioridade CNRT liu husi sesaun diskusaun entre partidu politik hojornalista sira iha studiu GMN TV, Sabadu (01/07/2017).

Nelio haktuir, bainhira CNRT kontinuasaun Governasaun mak projetu sira nee sei sai prioridade nafatin ba CNRT iha mandatu tuir mai. Tanba nee, sai ona programa prioridade CNRT ninia iha tinan ida nee.

Iha fatin hanesan, Reprezentante Partidu KHUNTO, Julião da Silva dehan, partidu KHUNTO ninia vizaun mak atu harii sosiedade neebe livre, justu, akuntabel no demokratiku iha fee esperansa no kariedade.

Nunee mos, Reprezentante Partidu PEP, Francisco da Costa dehan, PEP nia vizaun katak ukun dia no ukun ladiak signifika ukun neebe diak ona atu kontinua deit no ukun neebe mak ladiak nee atu halo diak. Raimundo S. Fraga

Suara Timor Lorosae

Sosiedade Sivil Konsidera Kampania Elpar 2017 Laprodutivu

DILI – Organizasaun Naun Governamental (ONG) hanesan sosiedade sivil iha Timor Leste fo nia konsiderasaun ba atividade kampania partidu politik nian iha tinan 2017 nee laprodutivu.

Tuir Peskizador Lao Hamutuk (LH), Juvinal Dias hatete katak, klaru katak ho modelu eleisaun ida agora nee, funsionariu publiku ka politiku nain sirasei gasta deit sira nia enerjia hodi halo kampania iha tempu badak, nee hatudu kampania laprodutivu.

Hau hanoin katak modelu kampania neebe Timor Leste halo agora nee laprodutivu tanba halo tempu badak liu,” dehan Juvinal ba jornalista wainhira partisipa iha serimonia selebrasaun loron kanada nian iha Timor Plaza-Dili, Kinta (29/06/2017).

Juvinal salenta, razaun kampania ida nee laprodutivu tanba halo tempu badak liu no mos han tempu servisu, halo ema hadau malu deit atu uza tempu hodi halo kampania haluha hotu servisu estadu nian.

Juvina husu ba provedoria direitus umanus no inspektor jeral iha ministeriu idaidak tenke tau matan tanba konstituisaun fo dalan ba sira atu taumatan ba ida nee.

Iha fatin ketak, Juis Timor Oan, Manuel Tilman dehan, funsionariu publiku no mos Governante sira Cuti sira nia servisu tanba lei fo dalan tanba nee mak sira hanesan sidadaun bele partisipa iha atividade kampania. Raimundo S. Fraga

Suara Timor Lorosae

Divorsiu Lori Problema Ba Feto

DILI, (TATOLI) - Universidade La Trobe, Austrália ho Universidade Nacional Timor Lorosa’e (UNTL), Fakuldade Medisina no Siénsia Saúde, Departamentu Parteira aprezenta rezultadu peskiza kona-ba problema feto iha Timor-Leste tuir kontestu sosio-kultura, identifika divorsiu sai nu’udar fator ida ne’ebé lori problema ba feto.

Ekipa peskizadora sira aprezenta iha Auditóriu, UNTL, Sesta (30/06) katak problema mosu tanba kuaze feto sira moris ho família mane nian, barlake, desizaun ne’ebé hola, estigma divorsiu, katolizismu no servisu referál limitadu.

Hodi reforsa mós katak bainhira problema mosu, feto sira la loke aan tanba konsidera estatutu feto nian fraku, papel jéneru no prátika kazamentu.

Tanba ne’e, sira sujere katak autoridade sira presiza  dezenvolve estratéjia, fo konsellu no fó atensaun ba feto sira.

Halo protesaun ba feto envolve autoridade seguransa formál hanesan polísia, inklui lider komunitáriu no autoridade igreja serbisu hamutuk hodi haree situasaun feto nian no operasaun sistema saúde fasilita feto sira bainhira iha kompleksidade.

Razaun tuir, ekipa peskizadór sira ne’e katak família no komunidade nu’udar rekursu importante, família no polísia nu’udar fatin protesaun no hakbiit direitu vítima.

Referál saúde bele mós sai fatin rezolve komplesidade liliu ligadu ho kazu violénsia doméstika nian.

Entretantu ekipa peskizadora kompostu husi ema na’in walu no aprezentasaun relatóriu hato’o husi Kayli Wild, Guilhermina de Araújo no Lívio da Conceição.

Peskizadór sira hala’o peskiza iha munsípiu Díli, Baucau no Liquiça ho amostra feto na’in 48, parteira na’in 36 no komunidade na’in 12.

Katak Díli ema na’in 15 kompostu husi parteira na’in 11 no komunidade na’in haat, Baucau ema na’in 22 kompostu husi parteira na’in 16 no komunidade na’in neen, Liquiça ema na’in 11 kompostu husi parteira na’in sia no komunidade na’in rua.

Informasaun kona-ba rezultadu peskiza bele mós asesu iha: www.latrobe.edu.eu/jlc/research/reducing-violence-against-women-and-children

Jornalista: Rafy Belo | Editór: Manuel Pinto

Foto: Aprezentasaun

Xefe Estadu Simu Vízita hosi Almirante Portugal

DILI, (TATOLI) – Prezidente Repúblika, Francisco Guterres Lú Olo simu vízita kortezia hosi Almirante (xefe supremu forsa naval) Xefe Estadu Maior Forsa Armada Portugal, António da Silva Ribeiro iha Palásiu Prezidensiál Nicolau Lobato Bairo Pite, ohin.

Hasoru malu ne’e hodi komprimenta, tanba xefe estadu maior forsa armada durante iha tempu libertasaun sempre akompaña Timor Leste nia luta.

Alende ne’e, sorumutu refere ulun boot forsa armada Portugal ko’alia mós kona ba prosesu dezenvolvementu ne’ebé mak la’o iha Timor, liu-liu rekursu umanu.

Sira mós ko’alia konaba asuntu tasi nian, oinsá atu labele reklama de’it direitu maibé importante mak utiliza tasi ne’ebé mak pertense tuir lei internasionál. Tanba ne’e importante ba oin, Portugal apoiu ka fó asisténsia nafatin ba Timor Leste kona ba tasi nian.

Tuir nota komunikadu ne’ebé Tatoli simu hosi mídia Palásiu Prezidensiál loraik ne’e hatutan, Xefe Estadu, Lú Olo sensível tebe-tebes ba asuntu ne’ebé mak ko’alia durante sorumutu. ki

Foto: Xefe Estadu Maior Forsa Armada Portugal, António da Silva Ribeiro. Foto mídia Palásiu Prezidensiál | Foto PR@Julião Fernandes Guterres - 2017

MINISTERIU EDUKASAUN ABANDONA BOLSEIRUS TIMOROAN IHA CABO VERDE

Liu husi karta ida ne’e ami bolseiro Timoroan ne’ebé hala’o estudu iha nasaun Cabo Verde hakarak informa ba iha Públiku katak S.E. Ministru Edukasaun horas ne’e dadaun abandona hela ami nia problema ne’ebé ami enfrenta iha Cabo Verde, problema sira ne’e mosu  ninia hun lolos maka ekipa fiskalizasaun husi Ministeriu Edukasaun nebe lidera husi Sr. Aquiles Guterres nian iha tinan 2016 ne’ebé antes ne’e mai halo estudu viabilidade la klean no haruka ami (Estudantes) mai estuda iha ne’e to’o ikus ami mak sai vítima. Kuando ME haruka ekipa mai halo fiskalizasaun, sira la envolve embaixada RDTL iha portugal, tamba diplomaticamente, embaixada RDTL iha Portugal maka halo cobertura to’o iha Cabo  Verde, maibe to’o mosu ona  problema maka obriga embaixada atu atua, maibe tarde liu ona.

Situasaun lolos ne’ebé ami enfrenta maka durante ne’e laiha embaixada Timor nian iha cabo Verde, Adido Edukasaun Timor nian mos laiha, residensia universitario laiha. Bazeia ba plano Ministeriu Edukasaun nian hodi haruka ami mai estuda iha Cabo Verde hodi melhora Língua Português hodi prepara rekursu humanu ne’ebé qualifikadu no iha dominio ba lingua português hodi enkaixa an ba iha careira professores. Ami ne’e hanesan futuros professores lian Portugues iha Timor, maibe processo no ambiente nebe ami enfrenta la garante ami nia dominio ba lian Portugues, problema seluk mak hanesan Inseguransa ba ami núdar estudante bolseiru ne’ebé estuda iha ema nia rai, realidade ami nia estadia fulan sanulu ona mais ami la konsegue adapta ho kondisoens sociais no akademicos iha ne’e, konaba saude nian mos sai preukupasaun boot mai ami no problema seluk nebe mak ami kontinua hasoru maka ami nia bolso do estudo mos sei atrazu to’o agora desde fulan março to junho.

Ami mos hakarak klarifka ba iha publiku katak oras ne’e ami la ba eskola, razaun ami halo greve tamba ami senti abandonado liu ona husi parte ME, ami nia karta sira nebe desde tinan 2016 nian nebe envia ba GCAE (Gabinete Coordenação do Apoio ao Estudante) sira nunka fo resposta até relatorio de visita nebe halo husi Gabinete Adido Educação iha 27/11/2016 nian nebe envia ba sira maibe laiha nafatin resposta no atuasaun imediato husi parte ME atu hatan preukupasaun ami nian.

Iha momento ami hasoru problema nebe grupos bandidos sira halo asaltos mai apartamento estudantes nian, ami informa kedan ba Timor, iha neba kedan S. E. Ministro delega kedan Director Jeral Sr. Antoninho Pires hamutuk ho Adido Educação iha Portugal hodi mai hasoru ami hodi hare no obeserva direta ami nia problemas sira hotu, iha momento neba ami relata hotu kedan, maibe wainhira ekipa ne’e fila ba Timor infelizmente  la relata lolos situasaun nebe ami enfrenta ba S.E. Ministro Educação, depois de visita DJ nian, ami mos simu fali visita husi Embaixada Timor nian iha Portugal Sra. Maria Paixão Costa ho nia Segundo Secretario nebe mai halo visita hodi rona no observa dala ida tan ami nia problema no iha momento neba maka ami foin hatene katak embaixada Timor nian iha Portugal hetan mos credencial ida nebe kobre area mai to iha Cabo Verde, ami relata hotu kedan problemas nebe ami hasoru ba Senhora embaixadora, maibe nafatin laiha resposta nebe atu hodi muda ami sai husi Cabo Verde.

Senhor Ministro nafatin hodi poder fo presaun makas mai ami hodi ami kontinua ba eskola, maibe ami nia desizaun nebe ami 43 foti hamutuk maka, foti ami sai husi ne’e ba fatin seluk, no laos haruka ami fila ba Timor ou mantem, tamba ami hatene katak Senhor Ministro ignora nafatin ami nia problema no aat liu tan mak husi Ministeriu Edukasan  fo sala fali mai ami bolseiro sira, dehan ami bolseiros mak la kumpri contrato no Pior liu tan fo sala fali ba ami nia inan aman dehan ami nia inan aman la kolabora diak ho Parte Ministeriu Edukasaun, ami hakarak relata lolos katak durante ami nia bolsu atraju husi fulan Marsu to’o agora dadaun ne’e ami nia inan aman mak dezenraska buka osan hodi envia mai ami para aguenta moris iha Cabo Verde. Husi ne’e hatudu momos katak  Ministeriu Edukasaun haruka estudantes mai eskola to ikus ignora tia. Husi parte ME la tuir ona kontrato ida nee hodi abandona ami.

Tamba ne’e ami ho hakraik an ami husu ba Sr. Director Jeral Antoninho Pires hodi relata lolos imformasaun ne’ebé ami hato’o atu nune’e públiku bele hatene katak situasaun ne’ebé ami enfrenta durante ami nia estadia iha Cabo Verde ne’e los no tebes duni ami enfrenta situasaun hirak ne’e, laos mai koalia ida no fila ba Timor relata oin seluk fali.

Ami husu ho hakraik an ba S.E. Ministro Edukasaun foti lalais solusaun tuir ami nia ejijensia hodi ami husi ne’e ba nasaun seluk tamba ami vitima tiha ona desde inisiu.

Hakuak boot husi Bolseirus Timoroan iha Cabo Verde