Devemvolvimentu ZEESM Povu Tenki Simu Konsikuensia

DILI - Prosesu dezenvolvimentu neebe mak lao hanesan Projeitu pilotu Zona Ekonomia Espelsial Sosial Merkadu (ZEESM) iha Oecuse povu tenki simu konsikuensia.

Tuir Deputadu Bankada CNRT Agustinho Lay hatete ema barak kestiona kualidade projeitu ZEESM maibe tenki hare didiak labele hare deit buat Aat, tamba programa iha Oecuse nee hakerek iha konstitusaun.

Ita povu tenki simu konsikuensia ba iha dezenvolvimentu neebe lao maibe laos todan ba povu mais konsikuensia mak balun simu no balun la simu,” dehan Agustinho ba Jornalista Kinta (09/06/2016) iha Parlamentu.

Nia hatete konsikuensia husi prosesu dezenvolvimentu mak balun tenki husik uma, Ai horis hodi loke dalan no halo edifisiu neebe mak boot tan nee povu tenki simu konsikuensia maibe autoridade iha responsabilidade hodi fo indimizasaun.

Iha fatin hanesan Deputadu Bankada Fretilin Paul Moniz Maia hatete orsamentu neebe gasta ba dezenvolvimentu nia benefisiu mak ekonomia no sosial mak povu sira goza tamba estrada diak. Informasaun kompletu iha STL Jornal no STL Web, edisaun Sesta (10/6/2016). Timotio Gusmao

Suara Timor Lorosae

Baku Paul Too Ran Sai, Nito-Zeto Ameasa Selu $150

DILI - Ministeriu Publiku akuza arguidu Tonito Alvez Sarmento no Zeto Correia Vidigal atu selu indimizasaun $150 ba lezadu Paulo dos Santos, hodi kura fali kanek neebe mak arguidu nain rua halo ba nia.

TLiu husi audensia julgamentu, tribunal lee sai akuzasaun husi Ministeriu Publiku katak, iha loron (15/12/2014) tuku 09:05 iha aldeia Leopa, distritu Liquiça lezadu atu ba foti dokumentus (deklarasaun) iha eskola sekundariu publiku Liquiça. Depois simu tiha dokumentus husi diretur eskola nian, lezadu ho nia kolega sira ba foto kopia iha fatin rental ka fotokopia nian.

Depois fotokopia tiha, nia sai mai hamrik hein nia kolega sira iha liur, derpenti arguidu Tonito Alvez Sarmento ho ai baku husi kotuk kona iha nia ulun parte karuk, rezulta ran sai no baku tan iha kotuk laran too nia monu ba rai. Lezadu hader mai no halai tama ba uma rental nia laran, arguidu Zeto Correia Vidigal duni tuir nia tama ba uma laran, hodi ain tebe no lori liman neebe tau ho pregu hodi tuku dala barak iha lezadu nia liman no isin lolon too hetan kanek no ran sai. No tenta mos atu sona ho tudik dala rua maibe la kona, no kontinua tebe lezadu too nia monu ba rai no hotu nia halai ses aan tiha husi fatin nee.

Konsekuansia husi hahalok arguidu sira nian halo lezadu hetan moras iha isin, kanek kortante iha ulun 3 ho naruk mais menus 6cm, 4cm no 3cm. Ho nia profudidafe mais menus 2cm iha ulun parietal los no hetan suku pontu 14 no hetan kanek pumante iha hirus matan ho profunidade mais menus 3cm. Lezadu simu tratamentu no internadu loron ida iha hospital Liquiça hanesan mostra iha relatoriu medicu. Nunee Ministeriu Publiku akuza arguidu nain rua komete krime ofensas integridade fisika simples.

Hatan ba akuzasaun nee arguidu Tonito Alves Sarmento konfesa hotu ba faktus neebe mak konsta iha akuzasaun nia laran. No arguidu Zeto Correia Vidigal mos konfesa hotu agresaun neebe mak nia halo ba lezadu. Maibe kona ba lori tudik ka pregu fai ba lezadu nia ulun no liman rua nee lalos. Los mak momentu nee nia uza xavi motor nian mak fai ba iha lezadu nia ulun no liman. Informasaun kompletu iha STL Jornal no STL Web, edisaun Sesta (10/6/2016). Domingas Gomes

Suara Timor Lorosae

EDUKASAUN MAK SAVI BA DEZENVOLVIMENTU

Xefi Fundasaun AN’NUR, Mohammad Anwar da Costa,  informa katak, edukasaun mak sai hanesan savi ba dezenvolvimentu no progresu nasaun nian, tamba bele hanorin ema hotu hatene oinsa bele moris iha paz, toleransia, respeitu no desiplina.

“Papel husi instituisaun relijiaun nian ba dezenvolvimentu iha pais ida ne’e mak liu husi edukasaun, igreja sira hotu, hanesan Katólika mós halo ida ne’e iha eskola sira husi nivel Pré-Primária to’o Sekundária. no iha eskola An’nur ne’e, ami mós iha eskola konaba edukasaun, liu husi ne’e, ita presiza hanorin ita nia komunidade sira para hametin unidade, Paz no toleránsia”, hateten Mohammad Anwar da Costa ba JN-Diario, Kuarta (08/06), iha  Meskita An’nur, Kampung Alor Dili.

Tamba tuir nia pontu de vista katak, laiha paz, unidade no toleránsia, dezenvolvimentu mós labele hakat ba oin, nune’e, maski relijiaun diferente, nu’udar Timoroan ne’ebé hela iha nasaun ida de’it, tenki hametin unidade no paz, tenki serbisu hamutuk, respeitu malu no ajuda malu hodi bele dezenvolve país ida ne’e ba oin no bele iha progresu di’ak liutan.

“Ha’u hanoin, atendimentu Estadu nian ba relijiaun sira hotu iha Tmor Leste di’ak tebes, tamba durante ne’e Estadu fó buat barak, mesmu Estadu la interven iha relijaun ida-idak nian, maibé nia fasilita relijiaun hotu-hotu, liu husi apoiu rekursu humanus ba eskola sira hotu, inklui mós eskola An’nur, apoiu orsamentu, hodi hadia igreja, halo Meskita. Ida ne’e di’ak no ami apresia teb-tebes”, fundamenta Xefi Fundasaun AN’NUR, Mohammad Anwar.ias

Jornal Nacional

PRESIZA TAU FETO IHA KARGU XEFIA

Secretaria Estadu Apoiu Promosaun Socio Ekonomia Feto (SEM) Veneranda Lemos hateten katak, presiza enkoraza ministériu hot-hotu liu husi Funsaun Publiku atu tau feto iha  kargu ba xefia.

“Ita enkoraza sira atu bele mós haree, hanesan iha funsaun publiku, ita mos enkoraza sira,  atu tau kargu de xefia la’os mane deit, maibé tenki iha 30% ba feto sira,”hateten Veneranda Lemos ba JN-Diário iha Hotel Timor foin lalais ne’e.

Veneranda Lemos hatutan tan katak, wainhira tau ona igualadade jéneru  iha asuntu kargu de xefias ninian, presiza mós tau orsamentu iha ne’ebá.

Venerenda Lemos esplika katak, iha Ministeriu Solidaridade Social (MSS), Ministéri Saude (MS), SEM, Ministeriu Interior (MI). Por ezemplu iha Ministeriu Interior haree katak, Polisia sira tuur iha kargu xefia ne’e iha ka la’e.

Veneranda salienta katak, iha semana kotuk SEM iha enkontru ida ho Ministru Interior ho ninia komponentes tomak, atu tau ida ne’e hanesan atensaun importante ba feto sira.

“Polisia sira ne’ebé ita bolu VPU unidade ba ema vulneravel sira, ita mós tenki tau orsamentu iha ne’ebá, para sira bele hala’o servisu ho di’ak, atu nune’e sira bele halo atendementu ba vítima violensia doméstika sira. Sé sira halo atendementu ba vítima VD maka laiha orsamentu ne’e oinsa,”katak Veneranda Lemos.

Tuir Veneranda Lemos katak, ho orsamentu ne’ebé iha sira enkoraza, agora ministeriu lubuk ida maka tau ona orsamentu, hanesan MI, Ministeriu Estatal ho mós ministeriu lubuk ida maka iha ona orsamentu.

Veneranda Lemos akresenta liu tan katak, orsamentu sei reforsa iha Parlamentu Nasional (PN), agora Papel SEM ninian halo advokasia atu haree deit iha komisaun divizaun orsamentu nian,  SEM sei partisipa mós iha ne’ebá, hanesan observador atu enkoraza ministériu hotu-hotu.

“Hau atu hatete katak, agora dadaun SEM manda ona karta ba ministeriu hotu-hotu ho koñesementu husi Primeiru Ministru Rui  Araujo  ninian,  atu koalia ho ministeriu hot-hotu para bele aloka orsamentu ba sensivel jéneru nian,” Veneranda Lemos.eni

Jornal Nacional

SAUDOZU LENITA FÓ NIA KONTRIBUISAUN BA TL

Helena Maria Guerra Carlota de Araújo, koñesida ho naran Lenita, moris iha aldeia Fatuhada, suco Uma Ki’ik, Munisipiu Viqueque iha loron 15 de Novembro de 1945; oan feto husi Senhor Euricles Dolor Jordão de Araújo no Senhora Clotilde Teresa Nunes. hamutuk maun alin nain sanulu resin rua, ho naran hanesan Dulce Maria Carlota de Araújo, Jose Francisco Rafael Jordão de Araújo, Maria Carlota de Araújo, Helena Maria Guerra Carlota de Araújo (Matebian), Octávio Maria de Fátima Jordão de Araújo, Helder Maria Bonaparte Jordão de Araújo, Agapito Jordão de Araújo, Euricles Maria Hitler Jordão de Araújo, Cesar Jordão de Araújo, Jacinta Carlota de Araújo, João Jordão de Araújo, Leonilde Carlota Assunção de Araújo.

Husi maun alin nain sanulu resin rua, nain lima mate sei kiik no nain tolu mate iha luta ba Libertação Nacional hanesan, Jose Francisco Rafael Jordão de Araújo, força Indonesia oho iha area Kairui iha tinan 1981 wainhira hala’o operasaun kikis, Euricles Maria Hitler Jordão de Araújo, assassinado iha Lequidoe iha 1979, Helder Maria Bonaparte Jordão de Araújo,lakon iha Novembro 1983 iha prisão Indonesia.

Iha loron 3 fulan Juñu tinan-2016, Helena Maria Guerra Carlota de Araújo ho nome da guerra Kai’Iku iis kotu iha Hospital Royal Darwin-Australia tanba moras Hemoregia Cerebral.

Helena Maria Guerra Carlota de Araújo, Lenita,  oan husi desendente India no Timor Euricles Dolor Jordão de Araújo no  inan husi desendente mista Xina-Portugues Clotilde Teresa Nunes de Araújo husi Ermera.

Lenita iha nia infansia estuda iha koléjiu femininu Imaculada Conçeicão Soibada,  remata nia eskola primária iha Koléjiu Oscar Ruas,  Ossu, Ciclo Preparatório iha Dili no finaliza nia estudu too quinto ano iha Escola Liceu Dr. Francisco Machado. Iha tinan 1964, bainhira Lenita ho otas 19 (sanuluresin sia),  nia sai ona profesora hodi hanorin iha nia avo Dom Mateus da Costa Rangel Sarmento Pinto nia rai, Viqueque.

Bainhira Governador José Alberty Correia halo vizita ba eskola, tanba Lenita sei idade kiik, Governador rekomenda Lenita atu kontinua fali nia estudu iha Dili. Remata tiha nia estudu iha Liceu, Lenita serbisu iha Departamento Veterinária, tuir mai iha Departamento Saude too funu tama iha 1975.

Lenita kaben ho Sargento Isidoro Martins,militar Portugues. Iha tinan 1969, Lenita tuir nia kaben halao serbisu militar iha Nakala-Mosambike.Husi casamento ida neeLenitahetanoan mane ida, Carlos Manuel (Carlinhos). Iha tinan-1971 Lenita deside fila mai Timor tanba kondisaun saúde nia aman nian.

Rebulusaun dos Cravos nebe akontese iha Portugal loke dalan ba Timor oan sira atu deside rasik nia futuru. Lider sira iha partidu polítiku nudar belun diak Lenitanian, hanesanfundador APODETE, Jose Osório Soares, konvida nia atu sai membru APODETE.  Maibe, tanba nia alinOctavio Maria de Fatima Jordão de Araújo hanesan fundador Assosiação Social Democrático de Timor (ASDT), ikus mai  FRETILIN, Lenita desidi hili FRETILIN.

Entertantu iha loron 25 fulan Agustu 1975, Lenita ho nia oan mane Carlos Manuel desloka husi Dili ba Maubise, hamutuk ho señora sira seluk tau matan ba oan kiak sira iha Creche Maukoli,Pousada Maubise. Lenita hamutuk ho señora  Ermelinda Carapinha, Margarida Bonaparte no Isabel Tavares hanorin suku roupa ba feto sira nebe sai membru Organisação Popular da Juventude Timor (OPJT).

Iha dia 5 Dezembru 1975 nudar responsável Creche Maukoli nian, Lenita  tun husi Maubise mai Dili atu rekizita nesesidade Creche iha Manuntenção Militar, Taibesi.  Molok atu fila fali ba Maubise, iha loron 7 (hitu) fulan Dezembru tinan-1975, tanba militar Indonézia invade Dili,halo Lenita ho nia oan Carlinhos,tinan hat, no nia maun alin nain rua, Jose Jordão de Araújo no Euricles Jordão de Araújo, halai sai husi uma fatin Kuluhun liu husi Ai-Tahan Belar ho destinu Laulara.

Avansu militar Indonezia iha Betano, Lenita hamutuk ho nia oan no nia alin Euricles Jordão de Araújo mai iha Leohani, parte Remexiu ninian atu bele iha kontaku nafatin ho nia inan Clotilde no nia kunhada Ines Lay de Araújo iha Kuluhun,hodi halo ligasaun klandestina ho Maria Goreti Joaquim, atu hetan apoiu hanesan: aihan, roupa, aimoruk no gasolina ba funsionamentu radio Maubere iha ai-laran.

Nudar kolaboradora OPMT, Lenita fó asisténsia ba nia feto maluk sira atu prepara ração de combate ba FALINTIL iha linha de fogo. Ho nia esperiensia nudar profesora,iha tinan 1977, FRETILIN hili nia sai asistente polítiku ba komisariadu Sektor Sentru Norte, hodi tau matan liu-liu ba setor edukasaun.

Iha ai-laran nia hasoru malu ho nia companheiro da luta Oscar Lima, komandante ba companhia de Aniquilamento. Sira nain-rua deside harii uma kain no kaben rejistu sivil, tuir norma Governu FRETILIN. Husi casamento nee, sira hetan oan rua, Paulo Jorge (Oscarito), Carla Lima (Luxa) no aperfilha Sonia Lima.

Iha nia entrevista ho OPMT, Lenita temi katak moris iha zona libertada nudar esperiensia nebe nia nunka haluha no forma nia konsiensia polítika foun nudar ema Timor atu luta ba ukun rasik an.

Iha operasaun Cerco e Aniquilamento nebe militar Indonesia lansa, Lenita ho kondisaun isin rua todan,rende ba batalhão 410 iha Remexiu. Tuirmai submete ba interogatóriu no halao aprezentasaun regular iha Satgas Intel Colmera-Dili, durante tinan rua.

Preokupa ho familia nia subsistensia, Lenita ho nia kaben Oscar Lima hili dalan negosiu nian, ho kapital $3.50.Sira nain rua fa’an modo iha balkaun merkadu munisipal Dili. Loron-loron lao haklili bote husi Kuluhun ba kintal malae Albano iha Komoro sosa modo hodi fa’an fila fali iha Merkadu Munisipal.

Lucro husi negosiu nee, Lenita hahu sosa botir mamuk no fa’an ba toko Lai Kian Fung. Iha tinan 1981, Lenita hahu halo negosiu aguardente no hetan lukru diak hodi sosa rai iha Balide. Bainhira negosiu komesa sae neineik, sira loke sira-nia empreza komersial no konstrusaun CV “Surik Mas”. Hili naran Surik Mas atu fo omenajen ba Komandante Sentru Norte, Amadeu dos Santos-Mabai Surik.CV Surik Mas hahu negosiu perumahan iha Manleuana, Aimutin no Osindo. Konsistente ba nia militansia no prinsipiu polítiku, sira halibur empregado barak ema FRETILIN.

Iha tinan-1990 Naldo Rei ‘Puto’ lori karta husi Comandante Xanana Gusmão entrega ba Lenita. Iha karta nee Xanana Gusmão hakerek: ‘Ami susar no dezesperadu; Hau hakarak  foti rikusoin balun husi o nia Surik osan-mean.’ Lenita hatan ba Xanana Gusmão: ‘Hau lakon maun alin nain-tolu iha luta. Hau iha sentimentu hanesan ita. Luta hodi reziste iha ai-laran sai ita-nia luta ba liberdade. Hau mos uluk iha ai-laran. Labele duvida hau tanba hau nia klamar no fuan parte husi rai ida nee.’

Lenita haruka harii abrigu iha D. Aliança Araújo nia uma iha Lahane. Lenita fo apoiu diretamente ba Comandante Xanana Gusmão no Konis Santana, liu husi Secretário do Comité Executivo da Luta Frente Clandestina, Kery Laran Sabalae, asistente pessoal, Puto Oan Kiak Funu, Doben Hadomi Timor, Hakilar Nain, Moris Nafatin, Buka Tuir no sira seluk. Maski nia viziñu iha uma sorin maka kuartel Polisia Militar Indonesia.

Lenita uza nia rezidénsia ba Xanana Gusmão atu halo entrevista ho jornalista husi tasi-balu.  Simu tiha Xanana Gusmão iha nia rezidensia, maka Lenita foin fo hatene ba nia kaben, Oscar Lima. Aktividade klandestina barak Lenita halo, ema lahatene.   Iha nia aktividade klandestina,Lenita serbisu hamutuk ho nia kuñada nain rua, Ines Oliveira Lay de Araújo no Merita Alves.

Iha fulan Juñu tinan-1992, Comandante Xanana Gusmão fo orientasaun ba Lenita atu sakrifika nia vida emprezarial hodi lori mensajen gravada ba lideransa rezisténsia diplomátika iha rai liur, hanesan Ramos Horta, Mari Alkatiri, Abilio Araújo, Rogerio Lobato no João Carrascalão,atu sira bele simu polítika konverjensia nasional.  Ho nia osan rasik, nia ba hasoru malu ho lider rezisténsia balun hodi hatoo mensajen husi Comando Superior da Luta.

Iha loron 20 fulan Novembru tinan-1992, ho kapturasaun Xanana Gusmão, Lenita nia naran tama lista mean. Militar Indonesia kaer Oscar Lima, nia alin Octavio Jordão de Araújo no nia kuñada Merita Alves tanba sira nia involvimentu hodi fo apoiu ba Xanana Gusmão.

Lenita nia rezidénsia iha Sydney, Australia, sai fatin ba lider FRETILIN sira bain hira halao konferénsia partidu iha 1998.

Depois de tinan 9 (sia) refujia iha Australia, iha tinan 2000, Lenita fila hikas mai Timor. Ho tempu separasaun ne’ebé naruk la konsege rekonsilia fila fali nia familia, nune’e Lenita ho Oscar Lima deside fahe malu, hanesan Lenita hateten: “Konsekuensia funu nian no libertasaun povu Maubere, hau tenki prontu atu simu realidade nebe iha.”

Iha tinan 2014, ekipa husi Gabinete Primeiru Ministru, Xanana Gusmão, halo levantamentu ba Helena de Araujo konaba nia partisipasaun iha luta libertasaun nasionál. Lenita hatan ba sira: “Hau kontribui ba rai ida nee tanba hau nia hakarak rasik, laos tanba halo komprimisu ho Xavier Amaral , Nicolau Lobato ka Xanana Gusmão. Hau konsiente hanesan Timor oan hakarak liberta rai no povu ida nee. Se Estadu iha posibilidade, tansa la liberta povu ne’ebé sei moris mukit.”

Iha loron 11 (sanulu resin ida) fulan Setembru tinan-2015, Lenita simu omenajen ba nia partisipasaun iha luta, Sertifikadu nu’udar kuadru OPMT husi lideransa FRETILIN iha selebrasaun komemorasaun loron pasajen ASDT ba FRETILIN.****

Jornal Nacional

Pe. Juvito: Halo Sala Ema Krítika Ita ne’e Isin-Kanek Toh!

Krítika ne’e labele? Tanba sá maka alerjia ho krítika? Kuandu ita halo sala ne’e ema krítika ita ne’e ita isin kanek toh! Kuandu halo di’ak ema krítika ita hanesan ne’e la buat ida. Ko’alia dehan hasai batina-hasai batina ne’e, durante 24 anos nia laran amu lulik sira ne’e involve an iha polítika prátika, nusa ema ida la dehan amu lulik sira hasai tok batina iha momentu ne’ebá.

Kesatun ne’e hatoo hosi Pe. Juvito do Rego Araujo, haka’it ho artigu “Carta Aberta ba Deputadu sira iha Parlamentu Nasionál no Ministru sira iha VI Governu Konstitusional; Hanoin Loron 20 de Maiu Hamutuk ho Nicolau dos Reis Lobato” ne’ebé foin lalais ne’e Pároku Parókia Santo António Manatuto, Pe. Martinho Gusmão hakerek hodi krítika líderes nasionais, partidus polítikus, no mós membru Parlamentu Nasionál (PN) balun hodi hamosu reasaun pro no kontra.

Reasaun balun hosi membrus deputadus sira iha uma fukun PN lamenta tebes hodi hakarak lori Pe. Martinho Gusmão ba tribunal no husu ba Martinho Gusmão atu hasai tiha batina mutin hodi involve an iha partidus polítikus atu nune’e bele ko’alia polítika.

Hatan ba kestaun ne’e, Vigáriu Re-Evanjelizasaun Dioseze Díli, Padre Juvito do Rego hateten, sidadaun hotu-hotu iha direitu polítiku ida. Sai amu lulik la lakon tiha ninia sidadania, nia amu lulik nia sidadaun nafatin no nia hanesan sidadaun, nia responsável nafatin.

Hanesan uma kreda no amu lulik, tuir Pe. Juvito katak, Pe. Martinho presiza fó hanoin ba ema ne’ebé konxiensia ne’e mate tiha ona ou malae nia lian katak consiensia cauterisada. Amu ne’e dehan, consiensia cauterizada ne’e katak, ita nia konsiensia la funsiona, ita haree buat ne’ebé at mós ita halo di’ak hotu. Ne’eduni, presiza ema ne’ebé fó hanoin.

Nia dehan, biblia tomak ko’alia kona-ba profeta sira ne’ebé ba ataka liurai sira hodi ko’alia kona-ba Maromaka nian, tan ne’e nia husu katak, buat sira ne’e karik sala? “Ha’u hanoin katak, direitu kanóniku ne’e hateten, amu lulik ne’e labele halo polítika prátika, katak amu lulik ba sai deputadu, Ministru, Diretór Jeral sira hodi ba ukun. Maibé, ko’alia fó hanoin atu polítiku sira labele vandal, katak ema sira ne’ebé halo vandalizmu iha polítika nia laran,” Amu ne’e dehan iha ninia serbisu fatin Dioseze Díli foin la-lais ne’e.

Padre ne’e haktuir, sidadaun hotu-hotu sé maka iha kapasidade atu ko’alia bele ko’alia, ne’e liberdade, no konstituisaun ida ne’ebé maka bandu ema iha ne’e. “Konstituisaun RDTL ne’e bandu sidadaun ida atu ko’alia ka, liberdade de espresaun? Ne’e direitus umanus fundamental. Ba loke direitu umanu universal ne’e katak, liberdade de espresaun ne’e iha ka laiha,” nia ko’alia ho lian maka’as.

Nia mós lamenta tebes ho liafuan ne’ebé hasai hosi deputadus sira hosi bankada CNRT, no FRETILIN ne’ebé husu atu hasai batina hodi ko’alia polítika. “Krítika ne’e la bele? Tanba sá maka alerjia ho krítika, kuandu ita halo sala ne’e ema krítika ita ne’e ita isin kanek to. Kuandu halo di’ak ema krítika ita hanesan ne’e la buat ida. Ko’alia dehan hasai batina-hasai batina ne’e, durante 24 anos nia laran amu lulik sira ne’e involve an iha polítika prátika, nusa ema ida la dehan amu lulik sira hasai tok batina iha momentu ne’ebá,” nia husu.

Nia haktuir, iha momentu ne’ebá polítikus sira barak maka ohin loron balun subar iha batina nia okos, ne’eduni lalika ko’alia kona-ba batina ne’e nia la konkorda. “Ko’alia hanesan ha’u ko’alia dau-dauk ne’e ha’u la iha direitu atu ko’alia? Husik hela buat át sira ne’e mesak la’o de’it? Ne’e labele,” nia katak.

Tuir nia, ema barak tan de’it pozisaun, tan de’it lakohi lakon kadeira, tan de’it la gosta hodi halo polítika asal bapak senang, bo’ot sira kontenti ne’e to’o ona. Atu bele iha fatin nafatin, bele naok no halo buat sira ne’e konforme hakarak. Ne’e politik ida ne’ebé bele dehan hakru’uk de’it ona.

La iha tan konxiénsia hodi hateten katak, ida ne’e sala, no ida ne’e los. Ida ne’e bele, no ida ne’e labele. Kuandu ita la hatene ona distigue karuk ho los, ne’ebé buat hotu-hotu ne’e laiha tiha ona orizonte ida, iha ema ruma ne’ebé ke tenki hateten, no uma kreda nia lian nia presiza rona.

Nia hatutan rona uma kreda nia lian atu hadia, la’os rona ne’e sente fuan kanek, no haree ba ema ne’ebé ko’alia. La presiza haree ba ema ne’ebé ko’alia, sidadaun hotu-hotu iha direitu atu ko’alia, soke ema barak liu la iha kapasidade atu ko’alia. Uluk Don Carlos hakerek surat ba PBB (ONU) nusa ema la dehan hasai tiha batina.

Don Carlos ba simu prémiu Nobel da Paz nusa la dehan hasai tiha batina, ne’e polítika. Agora ne’e hotu-hotu ko’alia ne’e fásil teb-tebes. Ne’ebé polítiku sira kuandu laiha ona argumentu la bele uza dehan katak, batina-atina, ne’e polítika.

Ne’eduni, nia husu ba polítikus sira karik la iha argumentu lalika ko’alia. Nia dehan, batina la sai tiha direitu nu’udar sidadaun no nia mós husu ba deputadus sira katak, karik sira ne’ebé sai Amu Lulik la iha direitu ba sidadania? Tan ne’e, tuir nia la loos ida.

Nia dehan, ema ida laiha direitu atu hasai amu lulik ida, só amu papa de’it maka iha direitu, no manda amu bispu, ema seluk sei labele manda bispu atu hasai amu lulik ida. Bispu nu’udar autoriedade suprema, defende ba Vaticano. Tan ne’e, Amo Juvito husu ba deputadus sira atu hakerek surat ba Vaticano hodi husu iha ne’ebá. “Ko’alia arbiru de’it, ne’e asal bunyi maka hanesan ne’e ” nia dehan.

Tuir nia, eskándalu boot mós sei la hasai ema arbiru ida, tan ne’e amu Bispu sei la hakru’uk ba membru Governu ka sé de’it nia hanoin. Tanba atu hasai amu lulik ida la’os fásil, ne’eduni, tuir nia, bainhira ko’alia tenke hatuur iha kabas leten, la’os hatur fali iha ain-tuur.

Amu ne’e afirma mós katak, uma kreda nia dignidade ne’e la depende ba ema ida, no lalika ko’alia ba buat ne’ebé la hatene ida. Tan ne’e, tuir nia, deputadus sira ne’e nar-naran de’it, no sé hatene halo polítika ne’e ko’alia tuir dalan.

Nia husu, tanba sá sira mós la hakerek, no argumenta sé kakutak iha hodi defende, lalika krítika de’it. Tan ne’e, tuir nia Pe. Martinho fó fali mai ita hanoin polítika, konxiénsa polítika atu ita moris hadeer. Nia mós konkorda atu lori tok Pe. Martinho ba tribunal karik buat ne’ebé nia ko’alia sala no krime. Nia dehan, la’os batina ne’e maka halo nia amu lulik, batina ne’e hanesan frada ida bainhira atu ba selebra atividade kreda nian, maibé ita haree katak, ema ne’e halo buat át ruma, ne’e maka bele dehan halo foer nia batina, hanesan halo eskandalu, korupsaun, no seluk tan.

Entretantu, Diretór Asia Justice And Right (AJAR), Jose Luis Oliveira hateten deputadu sira dehan ne’e la’os katóliku ne’ebé di’ak, ka katóliku KTP. Tanba sira la hatene kona-ba Konsili Vatikanu II, ne’ebé defini kna’ar sosiál Igreja iha kontekstu aktual hodi involve iha problema sosiál liu-hosi asaun konkreta hodi liberta povu husi injustísa no mukit.

“Ha’u preukupa deputadu sira dehan ne’e keta-halo ba uluk involve hodi krítika ka demo hasoru Amo Bispo Belo ne’ebé ko’alia maka’as hasoru injustisa ne’ebé Rejime Soeharto halo ba povu Timorense,” Jose Luis dehan.

Hatan kona-ba Fretilin sei lori amu Martinho ba Tribunal. Jose Luis esplika lori ema ruma ba tribunal la’os buat át ida. Tribunal fatin atu buka lia loos no justísa. “Ha’u aseita duni atu sira lori duni ba tribunal nune’e hodi ita bele hatene lia loos,” Jose dehan.

Maske nune’e Jose konfundi katak sira lori ba tribunal ba kazu saída, krimi ka sivil? Se krimi, entaun susar oituan, tanba ita nian kodigu Penal la kriminaliza defamasaun. Se sivil, entaun sira tenki hatudu prejuizu (kerugian) saída maka sira hetan tanba Amu Martinho nian artigu.

Tanbasá Parlamentu sente ofendidu ho Pe. Martinho nia artigu, “Tanba sira preukupa Amo Martinho nian observasau ne’ebé levanta sira nian frakeza. Bai-bain, so ema labarik sira maka senti ofendidu ho krítika ema seluk, tanba ninian “jiwa” sei domina ho egoismu. Sé ema adolesente ka “dewasa” maka sei iha kapasidade atu konsidera ema nian krítika nu’udar aktu responsavel. Ne’e duni, reasaun deputadu balun ne’e nu’udar sinal katak sira nian hahalok polítika sei infantil (labarik),” Oliveira esplika. (Efrem/John)

Matadalan

Madian Line: Xavi Maka Eduka Povu Austrálianu

Sim! Problema fronteira marítima ne’e importante teb-tebes bele rezolve lalais. Ha’u rasik partisipa atividade advokasia iha Austrália hodi koko muda pozisaun Governu Austrálianu nian. Ha’u sinti katak, xavi maka ita tenki eduka povu Austrálianu kona-ba asuntu ida ne’e, tanba povu Austrálianu ne’ebé hatene kona-ba asuntu ida ne’e hatene katak ne’e violasaun boot ida ba Timor-Leste nia direitu.

Problema soberania froenteira tasi entre Timor-Leste ho Austrália oras ne’e daudaun seidauk hetan solusaun. Austrália mantein ho ninia pozisaun hodi defende akordu balun ne’ebé hala’o tiha ona entre rai rua (2) ne’e. Australia lakohi kumpri pedidu TL nian atu tuur hamutuk iha meja hodi deskuti hikas fronteira marítima ne’e. Hili dalans eluk, Timor-Leste tenki haruka karta ba ONU hodi obriga Austrália tuur hamutuk atu ko’alia problema refere.

Ho problema fronteira marítima ne’ebé iha prosesu nia laran ne’e, hatudu ba povu Timor-Leste katak Timor-Leste restaura ninia independénsia ba dala-14 nia laran ona maibé seidauk hatuur soberania ne’ebé kompletu lolos.

Kona-da’et ba problema ida ne’e, eis espoza Xefi Negosiadór TL Nian ba Fronteira Marítima no  Minístru Planeamentu Investimentu Estratéjiku (Kay-Rala Xanana Gusmão), Kirsty Sword Gusmão hateten problema ida ne’e importante tebes atu rezolve lalais liu-hosi dalan edukasaun tanba xavi importante maka tenki eduka povu Austrálianu.

“Sim! Ne’e problema [marítima] ida ne’ebé importante teb-tebes bele rezolve lalais. Ha’u rasik partisipa atividade advokasia iha Austrália hodi koko muda pozisaun Governu Austrálianu nian. Ha’u sinti katak, xavi maka ita tenki eduka povu Austrálianu kona-ba asuntu ida ne’e, tanba povu Austrálianu ne’ebé hatene kona-ba asuntu ida ne’e hatene katak ne’e violasaun boot ida ba Timor-Leste nia direitu,” dehan Kirsty iha komemorasaun tinan 14 Restaurasaun Independénsia nian iha Gleno, Munisípiu Ermera, Sesta (20/05/2016).

Nia dehan, hotu-hotu sente katak, ne’e buat ruma ne’ebé sira labele simu nu’udar sidadaun Australia. Ne’eduni, Kirsty espera katak, iha eleisaun nasionál federal Austrália nian ne’ebé sei hala’o iha fulan Jullu ne’e bele iha mudansa pozisaun ruma ba kestaun fronteira marítima nian. Nia fiar katak Timor-Leste sei la rende, hodi kontinua luta ba ninia direitu soberanu ida ne’e.

“Ha’u espera katak, líderes sira iha Austrália bele sente sira nia dever nu’udar sidadaun global atu halo buat ruma ne’ebé respeita Timor-Leste nia direitu,” dehan fundadora ONG Alola ne’e.

Nia dehan, Governu ne’ebé kaer poder agora la iha sinal katak, sira prontu atu muda, maibé partidu sira seluk deklara tiha ona katak, sira prontu atu tuur hamutuk ho Timor-Leste no halo negosiasaun, ne’eduni ita haree lai rezultadu hosi eleisaun tuir mai.

Kona-ba nomeasaun Kay-Rala Xanana nian ba Xefi negosiadór, tuir nia hanoin ne’e nomeasaun ne’ebé di’ak teb-tebes, no haree ba maun boot nia domina didiak ba asuntu ida ne’e. No mós nia kahur realizmu ho idealizmu.

“Ha’u sente nia sei konsege doko Austrália nia pozisaun. Espera katak, ho ninia prezensa iha pozisaun importante ida ne’e bele iha rezultadu di’ak ba Timor-Leste nian futuru,” nia hatutan.

Entretantu, Portavos Movimentu Okupa Tasi Timor (MOTT), Juvinal Dias hateten oras ne’e dadaun Timor-Leste ho Austrália oras ne’e dau-daun iha ona komite konsiliasaun obrigatóriu ne’ebé prezidi hosi Organizasaun Nasoens Unidas (ONU) hodi hetan rekomendasaun ida ba rezolve problema fronteira marítima.

“Austrália ho Timor-Leste to’o ona iha prosesu konsiliasaun obrigatóriu. Timor no Austrália hili ona nia Juiz na’in rua-rua atu ba iha komite konsiliasaun,” Juvinal hato’o kestaun ne’e iha nia kna’ar fatin, Bebora, Díli, foin lalais ne’e.

Nia dehan komite konsiliasaun ne’e rasik sei hala’o serbisu durante tinan ida (1) liu molok hetan rekomendasaun. Tanba ne’e ita hein de’it rekomendasaun saída maka komite ne’e rasik deside hodi it abele hakat ba rezolve problema fronteira marítima.

Nia dehan ho estabele komite konsiliasaun refere fó vantajen boot ba Timor-Leste tanba it abele ona implementa mekanizmu internasionál. Juvinal espera katak komite ne’e rasik bele hato’o rekomendasaun ida di’ak ba Timor-Leste.

 Peskizador ONG Lao Hamutuk, Juvinal hateten maske prosesu lao ba oin, MOTT kontinua orgazi eventu importante balun hanesan iha tempu badak sei organiza ativista internasionál sira hodi lao ain husi CCD ba embaixada Austrália nia oin.

Iha parte seluk, veteranu, no eis Minístru Interior Rogério Tiago Lobato hateten, problema entre Austrália ho TL ba fronteira marítima maka ne’e, konflitu entre nasaun rua (2) besik malu tenki fahe ba rua (2) hanesan metade ida ba rai ida, no ida ba rai seluk. Maibé, entre TL ho Austrália nian, métade ne’ebé mai TL maka iha kampu mina sira, ne’eduni ida ne’e maka problema no Austrália hakarak aproveita mós mina hirak ne’e. Ne’eduni, tuir nia la los, no tenki luta ba ita nia independénsia iha tasi laran.

Nia dehan, vontade estadu no Governu Austrálianu nian la di’ak, no sira labele hanoin de’it ba osan. “Austrália labele hanoin de’it osan, maibé nia tenki hanoin katak, Timor-oan iha segunda guerra mundial mate barak tanba defende Austrália,” dehan Rogério.

Eis ministru ne’e hateten, Austrália tenki hanoin mós ba pasadu, labele hanoin ba osan de’it. No sé Austrália mantein ninia pozisaun maka TL kontinua nafatin ezizi, maibé la’os atu halo funu ho sira.

Entretantu, timoroan ida ne’ebé simu Prémiu Grande Colar no Orden Timor-Timor-Leste iha aniversariu Restaurasaun Independensia ba dala-14 (20 Maiu 2016), Antero Benedito da Silva hateten maske ita restaura ona idenpendensia ba dala 14 maibé ita iha funu ida ne’ebé seidauk hotu tanba ita nia soberani maritima.

“Ita nia funu ida ne’ebé seidauk hotu. Maibé funu ida ne’ebé ho matene, ho lapizeira, funu ho ita nia diplomasia. No dalaruma ita halo demostrasaun iha estrada maibe importante maka ita atu halo diálogu,” Antero dehan.

Nia dehan, ita seidauk bele garante katak bainhira maka ita bele hetan soberania kompletamente tanba atu rezolve problema fronteira marítama ne’e lori tempu naruk dalaruma bele to’o tinan 20 ou 25 hanesan ne’e.

Timor-Leste ne’e ukun-án loloos ona ka la’e? Nia dehan, eransa kolonializmu sei metin hela iha ita nia sosiedade tanba ne’e presiza matenek atu bele transforma situasaun ne’e sai di’ak. Dalan ne’ebé di’ak, tuir Antero, ita tenke eduka ita nia sidadaun, transforma ita nia kultura hodi lori ba oin nafatin no halakon tiha buat át ne’ebé la fó valor ba ita nia rain, para oinsa ita bele konsentra hamutuk ho hanoin ida de’it atu luta ba ita nia fronteira maritima.

Ba asuntu ida ne’e, Eis Prezidente Parlamentu Nasional, Francisco Guterres “Lu-Olo” hateten Timor-Leste tenke hamrik metin nafatin hodi luta ba soberania liña fronteira maritima  ninian tanba ne’e ita nia direitu.

“Ko’alia kona-ba fronteira ho interese nasaun ida nian la’os liu-hosi dalan funu para atu bele rezolve. Sé nasaun ruma maka hanoin atu lori forsa maka rezolve ne’e ha’u hanoin laiha juiju ona,” dehan Lu-Olo.

Nia hatutan, tuir lei internasionál ba fronteira maritima, Timor-Leste mós iha direitu tanba ne’e ita hotu hamriik metin ho hanoin ida de’it atu fó apoiu ba ita nia negosiadór Xanana Gusmão hodi lidera prosesu negosiasaun refere.

Hosi akadémika nia prespetiva, Reitór Díli Institute of Technology (D.I.T), Manuel Vong e hateten katak, liña fronteira ne’e sei iha prosesu negosiasaun nia laran, no estadu ho Governu no mós sosiedade tomak iha nafatin obrigasaun ho dever tomak atu luta ba direitu ida ne’e.

No nia fiar katak, liberta ona ita nia nasaun ba oin sei liberta tan ita nia territóriu tanba hotu-hotu hakarak moris iha nasaun ida ne’ebé iha direitu ba territoróriu tomak, iha parte rai maran, tasi no mós lalehan nian. (Efrem/Jon)

Matadalan

Estadu Besik Povu, Povu Mukit Nafatin

Dezde ha’u-nia mandatu hahú, ha’u hala’o ha’u-nia kna’ar bazeia ba objetivu fundamentál rua; (1) Hakbesik Estadu ba sidadaun sira no (2) Hametin estabilidade nasaun nian. Ha’u tuba metin nafatin ba programa hirak-ne’e.

Durante hala’o ninia mandate nu’udar Prezidenti de Republika, Aktual Prezidente da Repúblika, Taur Matan Ruak (TMR) kaer papel rua (2) importante iha nia mandatu Sefe Estadu hanesan lori estadu hakbesik ba povu no garante estabilidade hodi atinji dezenvolvimentu.

Prezidenti Taur vizita ona suku 400 resin iha nia mandatu ikus ne’e. Durante la’o haleu Timor, povu área rural halerik sofrimentu oin-oin ne’ebé sira ladauk sente maka hanesan, problema estrada, saneamentu báziku, kondisaun eskola, eletrisidade, asesu ba saúde, nst.

“Dezde ha’u-nia mandatu hahú, ha’u hala’o ha’u-nia kna’ar bazeia ba objetivu fundamentál rua (2), habesik Estadu ba sidadaun sira no hametin estabilidade nasaun nian. Ha’u tuba metin nafatin ba programa hirak-ne’e,” Taur Matan Ruak hato’o iha diskursu ikus, restaurasaun 20 de Maiu 2016, iha Glenu, Ermera.

Sera ke, estadu besik ba povu hakotu ona mukit no ki’ak ne’ebé durante ne’e povu hasoru? Halerik hirak ne’ebé povu hato’o ba Prezidente Repúblika atu lori lerek ba ne’ebé? Saída maka governu ida ne’e halo ona ba povu iha aspetu dezenvolvimentu?

Peskizadór ONG La’o Hamutuk (LH), Juvinal Dias hateten povu seidauk sente soberania ekonomia, povu rasik seidauk goja benefísiu hosi restaurasaun ida ne’e. “Ita seidauk restaura independensia povu nian. Ita presiza restaura pobreza, restaura tristeza sira ne’e. ita ba suku sira povu barak moris ki’ak, hahan laiha, osan laiha,” Juvinal dehan ba Matdalan iha nia serbisu fain, Bebora, Díli, 30/05/2016.

Nia dehan independensia nia objetivu maka fó moris di’ak ba povu, maibé infelizmente to’o ohin loron independensia ida ne’e seidauk atinji hosi povu, povu seidauk livre hosi la’o kalan, seidauk livre hetan edukasaun ne’ebé adekuadu, povu seidauk livre atu hetan hahan ne’ebé saudavel.

Juvinal espera katak Estadu no Governu rasik tenke valoriza independensia liu-hosi fó valor ba povu atu moris di’ak. Nia dehan prezensa estadu la’os de’it vizita maibé liu-hosi mós atendimentu sosiais, loke kampu de traballu iha suku, fó valor ba produtu agrikultura, dezenvolve povu nia moris di’ak.

Hatan kona-ba Taur nia vizita ba povu hamosu preokupasaun barak no preokupasaun hirak ne’e atu lori ba ne’ebé iha mandatu ikus ne’e. Juvinal esplika “Infelizmente Prezidenti da Repúblika laiha kompetensia atu halo dezenvolvimentu. Ne’e so kabe ba Governu no Parlamentu Nasionál. Prezidenti da Repúblika tenke husu ba Parlamentu ho Governu atu fó prezensa iha povu”.

Juvi dehan estadu seidauk iha prezensa ba povu nia moris, estadu nia prezensa iha Díli de’it tanba hetan valor barak, osan barak la’o iha Díli, desizaun polítika barak sentralizadu, iha kampu de traballu balun kompara ho povu sira iha suku no área remotas. Povu nia halerik, Governu maka tenke responde la’os Prezidente Repúblika. Juvinal dehanto’o ohin loron Governu liuhosi polítika orsamentu estadu seidauk responde ba preokupasaun povu nian.

Prezidente halo ona nia kna’ar katak krona povu nia aspirasaun tanba ne’e hodi veta orsamentu jerál du estadu, maibé parlamentu ho governu rasik maka seidauk intende didi’ak saída maka PR no povu nia hakarak.

Entretantu Diretór Ejekutivu Luta Hamutuk, Mericio Akara dehan prezidente konsege lori komunikasaun ida di’ak ba povu tanba durante ne’e orgaun soberanu sira dook demais hosi povu tanba ne’e PR Taur kosege hamosu rezultadu ida di’ak.

“Normalmente Minístru sira mós akompaña ba vizita. Ne’ebé serbisu governu nian maka atu responde ba povu nia halerik sira ne’e. Prezidente hanesan fontes ida atu liga, la’os kaer osan atu ezekuta, rezultadu di’ak maka Prezidente konsege dada besik komunikasaun entre governu ho povu,” nia dehan.

Mericio dehan to’o ohin loron Governu seidauk hatan ba nesesidade povu nian tanba ejekusaun orsamentu de’it la to’o 100%, tanba ne’e preokupasaun barak hanesan Estrada rurais, fasilidade eskola no klínika, saneamentu báziku povu nian seidauk di’ak.

Nia esplika Governu tenke define ona polítika mapeamentu para oinsa bele hakbesik liutan ba povu hanesan Prezidente halo ona, nune’e bele rora no hatene saída maka povu preukupa hodi tau ba konsiderasaun polítika implementa orsamentu estadu kada tinan.

Alende ne’e, Deputadu CNRT, Cesar Valente “Pilotu” hateten, atu lori estadu hakbesik ba povu la’os vizita, maibé liu hosi desentralizasaun poder lokal nian. Maibé, nia hatutan, vizita Xefi Estadu nian ne’e hanesan komprimisiu ida ne’ebé Prezidenti kompromete ona durante kampaña.

“Ha’u hanoin katak, ida ne’e sidadaun sira hatene, vizita ne’e iha ninia aspetu pozitivu no mós iha nia aspetu negativu tanba depois de vizita ita tenki ko’alia polítika uituan, konvida malu ba partidu no buat sira ne’e hotu,” dehan Pilotu iha uma fukun PN foin la-lais ne’e.

Iha papel Prezidenti nian ne’ebé atu garante estabilidade iha rai laran Deputadu ne’e ko’alia katak, estabilidade sim, tanba líderes istóriku sira sei kompletu . No tuir nia, hafoin situasaun iha primeira no segunda lejislativa to’o terseira tama iha situasaun polémika ida. Maibé, lideres másimu sira garante katak krize ida la mosu iha Timor-Leste.

“Depois de na’in Prezidente nia diskursu mai iha PN provoka situasaun, ne’e mós deputadu sira hakmatek, mezmu ke ofende maka’as. Bankadas sira ne’ebé hetan ofende maka’as hosi deskursu ne’e rasik mós la book an hodi kontinua respeita. Ne’e signifika katak, ita nia integriedade ba estadu povu  nia dignidade maka as liu,” dehan Pilotu.

Pilotu akresenta, estabilidade nasional, Prezidenti Repúblika maka hanesan primeiru homén, no konstituisaun hateten katak, nia maka símbolu nasional nian. Maibé, tuir nia tama iha desizaun sira haree katak, failla tanba la salva guarda konstituisaun ou halai ses hosi konstituisaun.

“Ha’u refere kazu ida ne’e ba nomeasaun jeneral forsas armadas nian ne’ebé ikus mai la’o nafatin hela hanesan ne’e. Podia kria polémika de’it, ne’e sorte ita nia lideres sira hamri’ik metin, selae ita monu ba krize,” nia katak.

Iha sorin seluk, Deputadu Eládio Faculto apresia ho prezensa PR nian ba komunidade sira iha área remotas. Maske nune’e prezidente laiha kompetensia atu bele responde serbisu konkreta ba nesesidade povu nian tanba lei la fó dolan.

Nia hatutan, durante ne’e Prezidente da Repúblika sempre hato’o preokupasaun povu nian ba ita nia membru du governu sira. Nia dehan antesedentes seluk maka Prezidente da Repúblika veta orsamentu estadu.

Eládio dehan implementasaun balansu ejekusaun orsamentu ladun adekuatu ba ejekusaun ho kualidade. PN husu atu governu konsistensia ho planu polítika ne’ebé difini ona, la’os planu 2016 maibé implementa fali iha 2017. Nia dehan, atu hatan ba preokupasaun povu nian la’o neneik demais tanba kapasidade ejekusaun governu mukit tebes tanba Governu nia interpretasaun ba lei orsamentu menus tebes.

Nune’e mós, hosi parte akadémika nian, Dosente Departamentu Polítika iha Universidade Nasional Timor Lorosa’e (UNTL), Camilio Ximenes Almeida hateten, Prezidenti Repúblika, nu’udar komandante em xefi iha luta ba libertasaun nasional nian durante tinan 24 ne’ebé iha FALINTIL, sira nia filozofia ida ne’ebé hateten katak, povu maka bee, no FALINTIL nu’udar ikan. Ne’eduni, iha sira nia hanoin katak, ikan ho bee ne’e presiza malu.

Nu’udar Xefi Estadu, bainhira ita ba fatin ida povu nia preukupasoes ne’e la hanesan ho fatin seluk, ne’e signifika katak, iha parte balun halo ona, no balun seidauk, ida ne’e normal. Camilio mós afirma liu tan katak, Timor-Leste presiza figura ida di’ak hanesan Prezidenti Repúblika agor, tanba nia figura ida ne’ebé la’os ba elite de’it, maibé fugra ba ninia povu rasik.

Sai figura ba ninia povu rasik maka liu-hosi ninia deskursu iha komemorasaun Restaurasaun Independensia TL ba dala-14 iha Gleno-Ermera, Prezidenti Taur Matan Ruak konsidera katak sei dezafiu boot liu ne’ebé maka ita iha, nu’udar dezafiu sira seluk hotu nia aman, maka nesesidade atu halo ekonomia mina-rai nian nakfila ba ekonomia ida diversifikada no sustentavel atu bele halakon ki’ak.

“Timor-Leste presiza atu hasa’e setór produtivu nasionál hodi valoriza ita-nia rain nia rikusoin, inklui mós serbisu ne’ebé halo hosi ita-nia agrikultór sira no mós traballadór timoroan sira seluk,” Taur Ezije. (Efrem/John)

Matadalan

Faan Feto Ba Katuas, Autor Nain 5 Hatan Tribunal

DILI - Tribunal Distrital Dili (TDD) halao julgamentu ba kazu krime eksplorasaun seksual neebe Ministeriu Publiku akuza arguidu nain hat mak Domingos Gusmao, Nazario de Oliveira, Apolinario Sarmento, Cersio Borges.

Iha audensia julgamentu nee tribunal taka ba publiku. Tuir data akontesimentu neebe iha katak, arguidu sira faan lezada nain lima ho idade 18 mai kraik hodi kontratu ho katuas sira iha restaurante neebe iha Dili laran iha tinan 2012 liu ba. Ho arguidu sira nia hahalok nee Ministeriu Publiku akuza arguidu sira komete krime eksplorasaun seksual neebe previstu iha kodigu penal TL. Julgamentu nee halao iha TDD, Mandarin, Kinta (09/06/2016).

Husi arguidu nain hat nee, nain tolu hanesan prezu Nazario de Oliveira, Apolinario Sarmento, Cersio Borges. No Domingos Gusmao mak hetan aplikasaun TIR.

Audensia nee prezide husi juiz kolektivu, Juiza Prezidenti Ana Paula Fonseca, Adjunta Jasinta Correia no Eusebio Xavier. Reprezenta Ministeriu Publiku Prokurado Antonio Guterres no arguidu sira hetan assistensia legal husi Defensor Publiku Sebastiao Amadio no Ruben Pereira. Informasaun kompletu iha STL Jornal no STL Web, edisaun Sesta (10/6/2016). Domingas Gomes

Suara Timor Lorosae

Atu Asegura Parseiru Hotu Proteje Labarik Husi Abuju

TAF Realija Refresher Training Politika Protesaun Labarik

Dili, Radio Liberdade Online_The Asia Foundation (TAF)-Programa Nabilan, halao refresher training Politika Protesaun Labarik ba Parseiru sira, iha salaun engkontru TAF, Pantai Kelapa, Dili, Quinta Feira, 9/6/2016, tamba konsidera politika protesaun labarik nudar responsabilidade sabi ba parseiu hotu nune’e mos TAF.

Anna Yang, nudar Access To Justice Coordinator-Nabilan-iha The Asia Foundation (TAF), haktuir objectivu husi treinamentu ne’e katak atu asegura aktividade hotu ne’ebe TAF suporta liu husi parseiru TAF nian sempre hanoin oinsa atu proteje labarik hotu nia direitu humanus.

“Ami fasilita treinamentu ida ne’e, kona ba politika protesaun ba labarik tamba ami hanoin atu proteje labarik husi abuju hotu maka responsabilidade sabi ba ami nia parseiru hotu no mos ba Fundasaun Asia, ami hakarak asegura aktividade hotu ne’ebe ami suporta  liu husi ami nia parseiru sempre hanoin kona ba oinsa ita bele proteje labarik, oinsa ita bele proteje labarik sira nia direitus humanus, tamba ne’e ami fo treinamentu ida ne’e, atu ami bele halo diskusaun oinsa bele proteje labarik, politika ne’ebe diak no oinsa bele implementa ita nia politika,” isplika Anne.

Anna mos isplika tamba saida politika protesaun labarik importante atu iha, iha kada instituisaun parseiru TAF nian katak karik organijasaun sira laiha politika, labele fo orientasaun ba staff hotu ne’ebe servisu ho labarik.

  

“Karik ita laiha politika, labele fo orientasaun ba staff hotu ne’ebe servisu ho labarik, politika ida ne’e hanesan mata dalan kona ba hahalok ne’ebe diak, hahalok ladiak, oinsa ita bele asegura staff hotu hotu iha atetudi ne’ebe diak no oinsa sira bele halo servisu ho diak, komunika ho labarik, karik ita laiha politika, laiha mata dalan, ita bele iha asaun arbiru , mata dalan ka politika ida ne’e importante atu asegura ema hotu hotu komprende kona ba sira nia responsabilidade,” dehan Anne. 

Radio Liberdade Dili

GOVERNU ATRAI ONA INVESTEDORES INVESTE IHA TL

Governu atrai ona investedores barak husi rai liur atu mai investe iha Timor Leste (TL).

Primeiru Ministru (PM), Rui Maria de Araújo informa katak, iha sorumutu ho Prezidenti Repúblika (PR), Taur Matan Ruak ne’e, nia hato’o kona-ba ambiente investimentu ninian, ne’ebé durante ne’e Governu buka esforsu atu hadia.

“Sinais pozitivu balu ne’ebé hahú mosu dada’uk mak, iha investedor balu hanesan semente ninian ho mós investimentu ne’ebé halo hamutuk ho Estadu iha portu Tibar,” katak PM Rui Araújo ba jornalista sira iha Palácio Prezidensial Aitarak Laran Dili, Kinta (09/06).

Rui Araújo hatutan, nia informa ba PR, kona-ba aspeitu balu iha dezenvolvimentu ekonómiku ho investimentu iha TL ninian.

“Iha Segunda feira liu ba, ita halo konferensia internasionál ida investedores sira nian, partisipa husi investedores lubuk ida,” informa Rui Araújo.

Xefi Governu ne’e hatutan katak, iha konferensia ne’e mós, iha vontade di’ak husi potensiais investedor sira atu haree oinsa mak sira bele hahú halo investimentu barak iha TL.

Rui Araújo dehan, hanesan ema hotu hatene katak, iha semináriu internasionál ne’e mós, ko’alia kona-ba potensialidade ne’ebé TL iha, no ko’alia mós kona-ba, medidas saida mak Governu foti ona atu bele fasilita investedor sira ninia servisu iha rai laran.cos

Jornal Nacional

PROJETU SUPPLY BASE PENDENTI IHA TR

Projetu Suai Supply Base oras ne’e kontinua pendenti hela  iha Tribunal Rekursu (TR), tanba seidauk iha Juiz hodi foti disizaun hasoru Kompañia Hyundai.

“Projtu Suplply Base iha prosesu tenderizasaun  agora sei iha parte Tribunal ninian, ne’e ita tenki hein deit,”esplika Ministru Petroleu Rekursu Minerais (MPRM), Alfredo Pires ba jornalista iha Timor Plaza Kinta (09/06).

Nune’e Alfredo Pires hateten, Kompañia Hyundai nia hatene katak, bainhira Tribunal la fó vistu nia sei labele  bo’ok-an.

‘Sira Kompañia Hyundai hatene ita nia dezafiu ne’ebé maka akontese iha ne’e, mas agora prosesu maka hanesan ne’e hela,”tenik Alfredo Pires.

Relasaun ho prosesu projetu Supply Base nian ne’e, parte Governu mos to’o agora seidauk simu informasaun ruma husi parte TR kona-ba iha mudansa ruma ka la’e ba kestaun ne’e.

“Ita iha dezafiu ida tanba ita la iha Juiz naton para haree ba Governu nian ida ba rekore ne’e, tanba  ne’e maka situasaun ita nia nasaun nian,”dehan Alfredo Pires.avi

Jornal Nacional