MINISTRU ESTADU KOORDENADOR LAIHA POLITIKA PUBLIKU

DÍLI - Parlamentu Nasionál (PN) no Organizasaun Naun Govermental (ONG) sira rekoñese, Ministru Estadu no Koordenador (MEK) sira ladun iha politíka públiku ne’ebé adekuadu, li-liu oinsá atu eleva servisu iha ministériu sira ne’ebé tutela iha sira nia responsablidade.

“Ministru Estadu no Koordenador sai de’it ministru iha ministériu refere, ida ne’e bele loos. Tanba ami mós observa maizumenus hanesan ne’e,” Francisco Miranda Branco ba Timor Post iha PN, Kinta (30/7).

Deputadu hosi bankada FRETILIN hatete, hafoin formasaun VI governu no loron 100 dahuluk, loloos oparlamentu bolu membru governu sira hodi esplika programa, maibé tanba tama ona periodu resesu, no sei bolu fali membru governu sira hafoin feriadu resesu.

Formasaun VI Governu, konsege hamosu Ministru Estadu no Koordenador hamutuk haat mak Ministru Estadu Koordenador Asuntu Sosial, Ministru Estadu Koordenador Asuntu Ekonomia, Ministru Estadu Koordenador Asuntu Administrativu no Ministru Estadu no Prezidensia Konsellu Ministru.

Branco dehan, loron 100 dahuluk, membru governu deklara sira nia progresu no rezultadu servisu liu-hosi mídia, no seidauk informa detallu no formalmente ba PN.

Nia hatutan, frakeza ne’e mosu tanba formasaun VI Governu foin mak hamosu Ministru Estadu no Koordenador ne’e. Tuir nia, ida ne’e hanesan ezersisiu ida ne’ebé Ministru Estadu no Koordenador sira presiza halo.

Deputadu ne’e tenik tan, Ministru Estadu no Koordenador hala’o servisu ida foun iha Timor-Leste nia sistema laran.

 “Entaun ba sira hanesan buat ida foun atu implementa. Tuir observasaun públiku nian loos no ami deputadu mós observa hanesan, maibé tanba ita foin implementa pasta ida ne’e, sira buka halo ezersisiu ida atu dezempeña sira nia funsaun hodi koordena ho ministériu ne’ebé tutela iha sira nia okos”, Branco afirma.

Parte seluk, Diretór Ezekutivu Asosiasaun HAK, Manuel Monteiro hatutan, Ministru Estadu no Koordenador sira ladun iha politíka públiku ne’ebé adekuadu tanba komplikadu.

“Ministru ida nia labele atu koordena fali ministru hot-hotu ninia servisu. Tanba Ministru ida rasik de’it ninia problema barak ona, tenki tau matan fali ba Ministériu sira seluk? ne’e defisil”, Monteiro tenik.

Tuir nia, sé-karik PM nia politíka hakarak harii Ministru Estadu no Koordenador ne’e tenki iha Ministru ida ketak, no Ministru ne’e mak tau matan ba iha Ministériu hot-hotu.

“Agrikultura Ministru ida, no seluk mós tenki Ministru ida, depois Ministru ida ne’ebé mak ka’er kargu hanesan Ministru Estadu no Koordenador hanesan ne’e, no nia mak koordena hot-hotu, agora iha nivel ONG nian karik ami hanaran Program Manajer ka jestór programa, no Ministru ne’e mak haree programa hot-hotu, tantu agrikultura, komersiu, turismu inklui ezekusaun orsamentu, no seluk tan, ” Manuel tenik.

Manuel hatutan, situasaun agora, Ministru ida ka’er ona ninia ministériu depois tau matan tan Ministériu seluk, ne’e la-la’o, la’os atu halo integrasaun servisu, maibé pratika labele la’o, tanba Ministru rasik iha Ministériu ida iha problema barak.

Kona-ba mekanismu, Manuel dehan, susar tebes ba Ministru Estadu no Koordenador sira atu halo. Tanba, atu halo politíka públika foun hodi rezolve no dezenvolve Ministériu ida, hakarak ka lakohi Ministru Estadu no Koordenador ne’e tenki iha Ministru ketak.

“Tenki koloka ema ida no nia hanesan Ministru atu tau matan asuntu sosiais ka ekonomia ninian, ne’e ema ida mak tau matan ba ida ne’e, nia koordena Ministériu hira por ezemplu, ninia job ne’e tenki hanesan ne’e, mas se ita tau ema ida nia ka’er tiha ona Ministériu ida depois atu tau matan tan ba Ministériu sira seluk, ema ne’e bele jagoan oinsá mós nia sei labele rezolve problema sira, tanba Ministru Estadu no Koordenador mós iha nia Ministériu iha hela problema”, nia realsa.

Ho strutura Ministru Estadu no Koordenador nian ne’ebé Asosiasaun HAK konsidera komplikadu sei fó impaktu maka’as ba povo ne’e rasik ninia vida ekonomia.

Nia dehan, ekonomia povo nian sei la’o la-di’ak tanba impaktu hosi produsaun, oinsá mak Ministériu ida-idak atu hodi sira nia programa besik liu ba povo ne’e labele la’o tanba konfuzaun ho strutura.

“Ezemplu iha foot ball karik, formasaun ne’e la-di’ak, strutura ne’e la-di’ak, ema bilan iha kampu laran atu tebe bola halo nusa? mediu ita tau fali avansadu, avansadu ba fila fali defesa ne’e atu halo nusa, no ida ne’e la-di’ak, tanba ne’e formasaun strutura ne’e menentukan suatu kesuksesan satu pemerintahan, susesu governasaun ne’e hosi nia strutura, sé strutura komplikadu fó konfuzaun ba ema no labele halo servisu ho di’ak”, Manuel katak tan.

Nia optimista, ho strutura ne’ebé mak komplikadu sei la-hamosu programa foun iha Ministériu ida. “Tanba Ministru foun sira ba tinan rua ne’e atu rezolve problema, programa ne’ebé iha ne’e governu anterior halo ona ba tinan lima nian, agora sira nai’n hira ba ka’er pasta foun iha tinan rua nia laran ne’e sira labele halo buat ida, sira ba só atu raut fo’er”, hakotu nia.(tay)

Timor Post

Politika Protesaun Labarik Nian Importante ba staff TLMDC No FUNDEP

Dili, Radio online- Organijasaun Nao Govermental Timor Leste Media Development Centre (TLMDC) no Organijasaun Nao Govermental FUNDEP, liu husi suporta husi The Asia Foundation halao work shop loron ida ba staff TLMDC no FUNDEP hodi sosialija politika protesaun labarik nian husi organijasaun rua refere, TLMDC no FUNDEP, ba nia servisor sira.

Luisa Marsal de Jejus, Fasilitador WorkShop, esplika objetivu husi workshop mak atu fahe informasaun konba politika protesaun labarik nian ba staff husi organizasaun rua ne'e .  Nia mos dehan katak “materia sira ne’ebe fo, ida ne’e hanesan konhesementu ida kona ba politika protesaun labarik ne’ebe sosialija deit ba staff sira husi organijasaun nao Govermental rua, atu kolega sira bele iha konhesementu kona ba oinsa halo protesaun ba labarik husi abuju sira hanesan abuju fisiku no seluktan”.

Nune’e mos ho partisipantes husi TLMDC, Teresa de Almeida haktuir katak sosialijasaun ne’e importante atu staff hotu bele iha konhesementu ba politika protesaun labarik ne’e, laos ba parte ne’ebe halao servisu ba proteje labarik deit maibe staff hotu bele hatene”.

Workshop loron ida ne’ebe realija iha loron 23/7/15 iha salaun ingkontru The Asia Foundation,

Rádio Liberdade Dili – Maria Bibel

SISTEMA INFORMASAUN BEE NO SANEAMENTU APREZENTA IHA WASHINGTON

Dili, Radio Online- Timor-Leste uza dadus hodi kompriende no enfrenta dezafius iha setór bee liu husi oferese modelu ne’ebé bele uza globalmente. Ezemplu di’ak mak Timor-Leste nia komitmentu ba transparánsia liu husi suporta ba Water Point Data Exchange”. Liafuan louva ne’e hato’o husi Brian Banks, Directorde Iniciativas Estratégicaspara aGlobal Water Challenge, iha Konferénsia Internasionál kona-ba Bee, Saneamentu, no Ijiene & Teknolojia Informasaun no Komunikasaun ne’ebé hala’o fulan kotuk iha Washington DC, Estados Unidos da America.

Konferénsia ne’e partisipa husi Chefe Departamento ba Programa Apoiu e Tecnico husi Direcção Nacional de Serviço Agua, Ministério das Obras Pública, Transportes e Comunicações, Martinus Nahak, akompaña husi nia homólogo Australian Aid programa BESIK (Bee, Saneamentu, no Ijiene iha Komuniade), Information Management Advisor, Paul Van Breemen.

Enkontru ne’e hanesan enkontru ba dauluk ne’ebé hala’o hodi diskute kona-ba Teknolojia Informasaun no Komunikasaun (TIK) liu-liu haree kona-ba setór Bee, Saneamentu, no Ijiene (besi).

Durante konferénsia Nahak halo mós aprezentasaun kona-ba SIBS (Sistema Bee no Saneamentu) Timor-Leste nian. Delegadus hotu louva ho servisu governu Timor-Leste nian ne’ebé iha komitmentu hodi kontinua fornese nafatin informasaun ne’ebé kompriensivu kona-ba sistema informasaun BESI nian. 

SIBS hanesan sistema integradu ida ne’ebé uza dadus husi fontes oin-oin hodi analiza prestasaun servisu no komunidade nia asesu ba prestasaun servisu sira, ba planeamentu, orsamentu no ezekusaun. SIBS ne’e sistema governu nian ne’ebé dezenvolve ho suporta husi governu Australia liu husi programa BESIK.

Iha konferénsia ne’e halo mós lansamentu ba inisiativa internasionál hodi estandariza dadus no mapa pontus bee nian. 

Alem de ne’e investiga mós kona-ba sistema informasaun BESI husi partes hotu, no SIBS Timor-Leste nian konsidera uza teknolojia ne’ebé apropriadu no sujere atu Timor-Leste kontinua ho sistema ne’ebé estabelese ona.

Partisipa iha konferénsia ne’e, organizasaun boot sira husi setór BESI, doadór sira, ofisiál governu oin-oin, nune’e mós espesialistas teknolojia foun.

Rádio Liberdade Dili – Maria Bibel

Kampanha Imunijasaun Nasional Hasae Labarik Nia Imunidade

Ministeriu Saude halao kampanha Imunijasaun Nasional hodi hasae labarik nia imunidade hasoru moras sarampu, rubella no polio hahu husi 13 Juliu ate 1 Agustu, nune’e iha loron 17/7/2015, iha kapela Maria Auxiliadora, aldeia Terra Shanta, suku Komoro,  servidor saude husi klinika Komoro halao imunijasaun ba labarik iha aldeia refere.

Fatima Barreto de Jejus nudar inan ida ne’ebe lori nia bebe partisipa iha kampanha imunijasaun ne’e haktuir ba Radio Liberdade Dili katak “ Vasinasaun nudar meus diak tebes atu proteje oan husi moras oioin”.

Iha fatin hanesan Oldi nudar inan ne’ebe lori mos nia bebe ba tuir imunijasaun espresa katak “hau kontenti hau nia oan bele hetan imunijasaun tamba sei hadok nia husi moras”. 

Iha sorin seluk, Doutora Maria Angelina Pereira, husi klinika Comoro isplika katak “Vasina polio ne’e atu prevene moras aleijadu, liman ain kleuk, iha lia fuan mediku hateten katak polio melitis siginifika katak atu prevene moras aleijadu, no vasina sarampo e rubella atu prevene moras isin manas, mosu kafuak kafuak iha isin lolon hotu no muta”.

Grupu alvu ba vasinasaun ne’e tuir isplikasaun Doutora Maria Angelina Pereira katak “ ba labarik ne’ebe foin moris, jero dias ate 15 anos, hetan deit vasinasaun polio, tau turuk ba ibun, no husi  idade seis mejes ate 15 anos nia hetan sona sarampo ho rubella”.

Rádio Liberdade Dili - Maria Bibel

POLISIA PROTEZE MALU

DILI - Prezidenti  Komisaun B asuntu Seguransa no Defeza, Parlamentu Nasionál Deputadu David Diaz Ximenes Mandati informa, Komisaun B haruka bei-beik ona karta ba komandu PNTL kona ba involvimentu membru PNTL iha kazu krimi, maibé rejultadu la iha tanba sira rasik proteze malu.

“Ita koalia mos Maun bo’ot iha hela sira nia kotuk ne’e halo nusa ami ejiji nafatin sala ami tenki koalia mais ami la halo desijaun sira rasik mak proteze malu,” Deputadu David Dias Ximenes informa ba jornalista iha Balide, Kinta (30/07).

Hodi hatutan, komandante sira iha krize de autoridade, krize Identidade entaun sira proteze malu ne’e para hetan forsa husi autoridade no sira nia autoridade hetan tuir represaun.

Iha parte seluk, Diretór ezekutivu Organizasaun Non -Govermental Fundasaun Mahein (FM) Nelson Belo dehan, polísia sira durante ne’e komete krime tanba sasaun hosi institusaun mak la dun todan.

“Ita hare barak mak la kompriende lei tanba lei ne’e la iha tradusaun ofisial ba Tetun entaun ida ne’e mos sai kauza bo’ot ida halo sira la kuñese lei,” dehan Nelson ba Timor Post iha Balide Kinta (30/07).   

Nia hatutan, faktor seluk mak kontribui membru polísia  involve kazu tanba iha kazu barak mak la prosesa ba Ministériu Publiku (MP) para prosesa.

Liu-liu kona ba agresaun fiziku fo de’it sansaun fulan ida ka rua la tama servisu, maibé depois nia tama fali servisu halo hikas tanba sansaun ne’e la todan.

Tanba ne’e mak nia rekomenda ba Komandu PNTL atu foti sansaun ne’ebé  mak forte ba membru kriminozu liu-liu sira komete krimi lori ba tribunal. (Way)

Timor Post

TEME SADAR DIRI HUSIK KARGU SEKRETARIU JERAL FRENTE MUDANSA

DILI - Jorge da Conceicão Teme atual deputadu iha Uma Fukun Parlamentu Nasionál (PN) deklara ofisialmente ona hodi rejigna án hosi kargu nu’udar Sekretariu Jerál Partidu Frente Mudansa (FM) relasiona ho problema pessoal ne’ebé involve eis Ministru Administrasaun Estatal (MAE).

Tuir Vise Prezidente FM, Egidio de Jesus Amaral hatete, desizaun Jorge Teme rejigna án hosi kargu Sekretariu Jerál FM ne’e desizaun pessoal no la’os desizaun hosi partidu nian.

Partidu Frente-Mudansa oras ne’e nakdoko tebes ho problema pessoal eis Ministru Jorge da Conceição Teme ne’ebé deskonfia hasai lia fuan la’os edukadu (tolok) ba Madre sira.

 “Ida ne’e nia na’in maka deside. Hanesan ema politíku sadar ba ida ne’e, kuandu sente kestaun ne’e muito privadu, ita nai’n hanesan ema intelektual no ema politíku ita presija haree konjuntura politíku, entaun nia na’in foti desizaun ho kesadaran penuh katak buat ne’ebé nia halo no nia haree katak asuntu ne’e afeita oituan mós ba nesesidade partidu nian, entaun nia na’in maka husu rejigna án hosi kargu Secretariu Jerál Partidu Frente Mudansa,”Vise Prezidente FM, Egidio ba Timor Post via telephone, Kinta (30/7).

Tanba ne’e kargu refere agora, kontinua asumi hosi Vise Primeiru Sekretariu Jerál, Cesar Morreira.

Entertantu kona-ba pozisaun Jorge Teme nian hanesan deputadu iha Parlamentu Nasionál ne’ebé reprezenta bankada FM karik sei iha mós mudansa, Egidio hatete, presiza mós tenke haree ba lei.

 Tanba iha tinan 2012, FM tau sira nia naran (pessoal) maka povu no eleitores sira hili.

 “Agora ita tenke haree fali mós alterasaun lei partidu politíku foin lalais ne’e, entaun talvez ida ne’e iha buat rua. Primeiru tenke konsulta lai lei ne’ebé maka vigora, tanba Parlamentu Nasionál mai hosi partidu politíku no bainhira nia efetivu ona iha partidu nia laran hanesan Sekretariu Jerál no iha artigu ruma hatete kona-ba ne’e (troka Jorge), se la hatete kona-ba buat ne’e ita tenke propoin ba iha Parlamentu ka ba iha Konsellu Ministru,”Egidio, esplika.

Maibé, nia dehan, Frente Mudansa mós sei reuniaun para haree asuntu ne’e.

Entertantu, jornalista konfirmarazaun rejina-án hosi kargu Sekretariu Jerál FM, maibé eis Ministru Administrasaun Estatal iha V governu Konstitusionál, Jorge Teme lakohi fó komentariu.

 “No Comment, no comment,” Jorge Teme, hatan ho oinbuis no mean bajornalistaTimor Post iha PN, horiseik.

Tuir Informasaunne’ebémaka antes ne’e Timor Post rekollakatak, eisMinistru Jorge Temedunisaiona Madre Asosiasaun do Menino de Jesus (AMJ) ihaPermunasho labarikorfonatuhamutukna’in 30, tanbakonsideraraine’eTemenian. Madre Marisa ho nia kolega Madre seluk maka hela iha fatin ne’e hodi hala’o misaun.

Maibé, Madre Marisa hatete eis Ministru Administrasaun Estatal ne’e ba haruka nia parte sai husi uma ne’e ho razaun Madre sira  laiha responsabilidade hodi haree didiak labarik sira ne’e.

Tuir informasaun balun ne’ebé Timor Post iha katak fatin ne’ebé maka Madre sira hela ne’e, Teme mak sosa husi komunidade ida iha Perumnas, hodi oferese ba AMJ hodi uja. Folin rai ne’e hamutuk $20,000 no  autoridade lokal balun mós sai sasin ba asina dokumentus sosa rai ne’e.

Madre Marisa hatete, nia rona husi doador balun katak osan ne’ebé maka eis Ministru uza hodi sosa rai ne’e mai husi doador nian ne’ebé fó ba governu hodi bele ajuda labarik orfonatu sira iha AMJ.

Teme deside haruka Madre nai’n rua sai husi nia uma iha area Perumnas, Bairo Pite, Dili, foin lalais ne’e tanba sira ladun iha kapasidade hodi haree didiak ba labarik sira ne’ebé hela hamutuk ho sira.

Teme konsidera akuzasaun sira ne’ebé maka responsavel Asosiasaun do Meninu Jesus (AMJ), Madre Marisa Fernandes hasai hodi hasoru nia ne’e laiha fundamentu. Maibe, nia dehan so investigasuan mak bele hatudu lia los.

Iha Kinta (21/05), Madre Marisa ho nia kolega Madre ida nomos labarik sira sai husi uma ida iha Perumnas, ne’ebé sira uza desde tinan 2014 tanba eis Ministru Teme ne’ebé nu’udar uma nain maka duni sira sai. Labarik sira ne’ebé maioria orfonatu ne’e hetan apoiu evakuasaun urjente husi Ministériu Solidaridade Sosial (MSS) hodi ba hela iha fatin seguru ida iha Dili.

Entretantu, Madre sira ba buka fatin rasik. Responsavel AMJ, Madre Marisa Fernandes dehan nia parte sente triste los tanba molok sira sai husi hela fatin ne’e Jorge Teme haruka lia fuan tolok liu husi SMS ba nia. Madre mós hatete katak nia parte haree labarik sira ho diak lós. Membru komunidade balun iha Perumnas mós la kontente ho lia fuan sira husi eis Ministru Estatal ne’ebé mós nu’udar Sekretariu Jeral partidu Frente-Mudansa.(tay)

Timor Post

SEKOMS BOLU MEDIA DESKUTE FIGURA KONSELLU IMPRENSA

DILI—Iha tempu badak, governu liu hosi Sekretaria Estadu Komunikasaun Sosiál (SEKomS) sei bolu Asosiasaun inklui instituisaun Mídia deskuti reprezentasaun ka figura iha Konsellu Imprensa (KI).

KI hetan ona apresiasaun pozetivu hosi Konsellu Ministru no estatutu aprova tiha ona iha fulan juñu liu ba. No hetan ona promulgasaun hosi Prezidente Repúblika.

“Parese semana ida ne’e, sei ba ninia publikasaun, depois ninia prosesu nomeiasaun ba membru sira, dadaun ne’e, ami ho hanoin ida, atu kontaktu asosiasaun jornalista sira, kontaktu mós instituisaun mídia sira, hodi hasoru malu ho sira, nune’e hakarak ba prosesu nomeasaun,”Diretór Disseminasaun Informasaun SEKomS, Orlando da Conçeição ko’alia iha nia kna’ar fatin, Palásiu Governu, Kinta (30/07).

Estatutu konsellu imprensa aprovadu ne’e ona, asosiasaun mídia sei reperezenta na’in rua (2), hili hosi Parlamentu Nasional (PN) na’in rua (2) no reprezenta jornalista hodi ba tu’ur iha Konsellu Imprensa ne’e.

Bainhira parlamentu, governu, mídia nomeia ona hodi tu’ur iha Konsellu Imprensa, sei simu tomada de pose iha Uma Fukun Parlamentu Nasionál. Hafoin liu hosi prosesu tranzisaun harii KI.(vas)

Timor Post

MAP Municipiu Bobonaro kordena ho emprezariu sosa produto agrikultor

MALIANA - Ministeriu Agrikultura no Pesca (MAP) liu husi diresaun nasional agro-comercio iha Munisipiu Bobonaro hahu kria ona  liña kordenasaun diak ho emprezariu sira iha Munisipiu refere hodi sosa agrikultor sira nia produtu. “Ministeriu Agrikultor no Pesca iha Munisipiu Bobonaro kada tinan halo ligasaun ho emprezariu lokal ne’ebé mak parseiru ho Ministeriu Comercio Industria no Ambiente oinsa mak atu sosa produtu ne’ebé husi agrikultor produs kada tinan,” Xefe departamentu agricultura, hortikultura no irigasaun Municipio Bobonaro, Alfredo soares hatete lia hirak ne’e ba jornalista BT iha nia knar fatin Odomau semana foin lais ne’e.

Nia haktuir katak orsamentu hirak ne’ebe atu hodi sosa produto agrikola ne’e nia orsamentu sei mai husi Ministeriu Comercio Industria no Ambiente (MCIA) tanba ne’e MAP liu husi diresaun agro-comercio halo kordenasaun deit kona-ba atu sosa produsaun ne’e. “Husi MAP liu husi diresaun agro-comercio nia serbisu mak identifika produsaun hirak ne’e iha fatin ne’ebe deit depois husi MAP liu husi diresaun  agro-comercio sei halo ligasaun ho MCIA atu bele sosa,”esplika nia.

Nia informa  durante ne’e MAP kria rasik nia asosiasaun agrikultor ne’ebé mak produs fini no produtu ba konsume nian entaun husi asosiasaun ne’e mos laos fa’an deit produtu atu ba konsume nian maibe asosiasaun ne’e fa’an fini entaun ho ida ne’e ministeriu halo kordenasaun ho ministeriu kompatente oinsa mak atu sosa produtu hirak ne’e. Nia dehan asosiasaun habarak fini komersial iha Munisipiu Bobonaro iha tolu ne’ebé durante ne’e produs produtu fini komersial hanesan aosiasaun LAKABASI, agrikultor unidade Samaklot no Renova timatan.

Nia dehan  asosiasaun tolu ne’ebé  durante ne’e produs fini komersial ne’e mak lao ho diak entau ba oin MAP Munisipiu Bobonaro sei propoin tan asosiasaun foun ne’ebé produs fini komersial ho varidade sele no hare ne’ebé sei estabelese iha postu Atabae Suco Raerobu ho Atabae no Balibo iha Suku Leolima. Agrikultor iha Municipio Bobonaro maioria halo produsaun ba  hare so iha postu Lolotoe mak  la disponivel atu produs hare maibe iha postu 5 refere maioria ho produsaun hare entau postu ne’ebe ho produsaun hare ne’ebe barak liu mak permeiru iha postu Maliana ne’ebé  kuaze maioria nia potensia  hectare 5000 ne’ebe tinan-tinan ne’e  bele kultiva hectares 3000.

Haree ba produsaun agrikultor nia ne’ebé makas maka MAP liu husi diresaun agro-comersio halo ligasaun ho parte governu kompatente no emprezaria sira oinsa mak bele sosa produtu agrikultor atu bele hasae ekonomia familia. Nia informatan atu garante kualidade ba produsaun haree ho batar kada tinan mak sira tau atensaun iha iha pos koileta ou lian Indonezia  paska panen  mak nudar tempu importante tanba wainhira atu garantia nia kualidade iha merkadoria bainhira konsumedor sira atu sosa produsaun ne’e tuir tekniku nia ne’e ema sei utilize makina ida para koko nia kadar air ne’e hira  mak foin sosa. (BT)

Business Timor - Letto