TIMOR IHA AVIAUN

Jornal Nacional - editorial

Foin Timor Leste ukun an iha ona aviaun rasik nebe sosa ho Orsamentu Jeral Estadu 2015 ho valor 7.2 milloens dolar amerikanu husi Canada. Aviaun nee Governu sosa atu bele fasilita bainaka espesial nebe atu mai partisipa iha serimonia tinan 500 evanjeliasaun no mos komemorsaun 28 Novembru ba dala 40 nebe sei halao iha Zona Esepsial Sosial Merkadu – Ambeno, Oecusse.

Timor Leste iha ona aviaun rasik nee orgullu boot ida, maske nasaun kiik, nasauk kiak no saun joven nebe sei frajil hela maibe iha ona transporte aero hodi fasilita movimentasaun komunidade nian.

Laiha problema governu sosa aviaun nee maibe kestaun mak se mak sei pilotu ba aviaun nee no mos oinsa ninia manutensaun? Klaru timor seidauk iha esperensia ba transporte aero.

Tan nee hakarak ka lakohi, governu tenki kontrata pilotu husi Canada atu bele lori aviaun nee, se lae sosa tiha labele utiliza ho masimu tamba rasaun seidauk iha kapasidade no koñesimentu voo ninian.

“Ho haksolok tebes ita hot-hotu hamutuk hodi simu primeiru aviaun mai ita nia rai ne’ebe foin tinan 13 ukun a‘an,” Kay Rala Xanana Gusmão.

Los duni señor, orgulhu tamba timor mos iha ona aviaun rasik maibe kestaun mak nee transporte aero, aviaun nee lao kustu ida nebe laos oituan, investmentu ida mene boot teb-tebes.

Agora duvida mak ho serimonia tinan 500 evanjelisaun no tinan 40 proklamasaun independensia.

Agora duvida mak nee ho serimonia tinan 500 evanjelisaun nia proklamasaun independensia, hodi nunee governu tenki hasai ba gasta. Maske ita iha aviaunfoun nee.

“Dala barak ita halo viazen ba Oecusse liu husi fronteira sei mosu nafatin sensasaun ida katak, iha laran ida karik ita atu liu ba kuartu ida tenki liu husi vizinhu nia uma laran, agora liu husi inisiativa sira halo transporte aeros diak liu tan mai ita, transporte maritima mos reforsa dadauk ona halo metin liu tan prosesu intrusaun Oecusse ho Timor Leste,” Rui Maria de Araujo. Ho aviaun nebe iha , governu bele aproveita ona timor oan sira nebe iha abilidade lori aviaun nian, tamba durante nee governu haruka joven sira nee ba tuir formasaun iha Indonesia no halo ona esprensia.

Timor- leste iha aviaun rasik ona, nee diak maibe tenki kuidadu di-diak atu nunee aviaun nee bele dura ba tinan naruk, labele ohin sosa aban halo at ,sa tan manutensaun ba aviaun ida laos osan oituan. *

TINAN 13 UKUN AN, TIMOR-LESTE FOIN SOSA AVIAUN IDA

Hafoin ukun an iha tinan 13 nia laran, Estadu Timor-Leste foin sosa aviaun ida husi Canada ho valor Orsamentu Jeral Estadu US$ 7.2 milloens.

Aviaun ne’e to’o ona Aeroportu Internasional Nicolau Lobato Comoro, Dili, Timor Leste, Kuarta (28/10) tuku 03:30 lorokraik OTL.

Husi aviaun nia marka iha lolon C-GVTU no iha marka iha odamatan Zona Espesial Ekonomia Sosial Merkadu (ZEESM) Adminsitrativa Oecusse.

Aviaun ne’e sei tula pasajeirus hamutuk 19, no Piloto ba aviaun ne’e husi nasaun Canada, depois aviaun ne’e sei semo Dili-Oecusse no TL tomak.

Aviaun ne’e tun iha Aeroportu Nicolau Lobato Dili, asiste diretamente husi Xefi Governu Rui Maria de Araújo, Prezidente Adminsitrativa ZEESM Oecusse, Mari Alkatiri, Ministru Obras Publikas Transportes Komunikasoens (MTK) Gastão Sousa Eis PM Xanana Gusmao, Eis Prezidente Repúblika, José Ramos,membros Governu no Deputadus Parlamentu Nacional sira.

Liu husi diskursu Primeiru Ministru, Rui Maria de Araújo hateten, lori Governu nia naran felisita Prezidente Administrativa ZEESM Mari Alkatiri no povu Oecusse, tanba inisiativa murak ida ne’ebe diak tebes.

“Dala barak ita halo viazen ba Oecusse liu husi fronteira sei mosu nafatin sensasaun ida katak, iha laran ida karik ita atu liu ba kuartu ida tenki liu husi vizinhu nia uma laran, agora liu husi inisiativa sira halo transporte aeros diak liu tan mai ita, transporte maritima mos reforsa dadauk ona halo metin liu tan prosesu intrusaun Oecusse ho Timor Leste,”esplika PM Rui Maria de Araujo iha Aeroportu Internasional Comoro Dili Kuarta (28/10).

PM Rui hatutan, maske aviaun bele kiikoan, maibe ninia kapasidade la’os kiikoan, tanba aviaun nia laran bele modifika nia tu’ur fatin redus numeru kompatibel liu. Ho fasilidade sira ne’e hotu prosesu dezenvolvimentu iha Timor Leste bele hetan dinamika foun ida tan.

Nune’e mos Prezidente Administrativa ZEESM Oecusse, Mari Alkatiri senti kontente haree aviaun ne’e to’o ona iha Timor Leste, maske ho kritika dehan povu sei kiak no aviaun kiik.

“Kritika normal. Ha’u dehan biasa (toman) tiha ona, ha’u biasa tiha ona, enkauntu ha’u sei moris ha’u sei atende hetan kritika nafatin, halo diak a’at kritika nafatin la buat ida, ne’e maka ha’u nia sorte, ne’e maka ha’u nia distinu,”haktuir Mari Alkatiri.

Tuir Alkatiri, Aviaun ne’e la’os deit atu semo ba Oecusse ho Dili, maibe aviaun ne’e para atu hakbesik Dili ba Atauro, Atauro-Oecusse no ba Timor Leste tomak, no mos ba Suai, Maliana, Manufahi, depende deit Governu sentral hadia Pista Aeroportu sira iha Munsipiu dezafiu bo’ot maka ida ne’e.

“Ha’u husu ba Govenru sentral MTK hanoin atu haree lai pista alternative iha Oecusse para mais ou menus hanesan iha fatin sel-seluk,”haktuir Mari Alkaitiri.

Mari Alkatiri realsa katak, aviaun ne’e ba Oecusse 40 minutus   no aviaun ida bele mos ba to’o Darwin bele mos ba to Kupang Indonesia, ne’e hatudu katak, bele halo voo sub rejional.

“Ne’e importante hahú ita nia politika ida, ita ilha pedasuk ida ninian ita moris iha arkipela ida bo’ot teb-tebes, se ita investe deit iha Estrada, ponte, ita bele la’o ba mai ita la sai husi ita nia rai, se ita investe ba transporte aero no transporte maritima, entaun ekonomia do mar bele ajuda ita, ne’e realidade,”tenik Mari Alkatiri.

Iha parte seluk, Ministru Planementu Investimentu Estrategiku (MPIE) Kay Rala Xanana Gusmão, mos senti haksolok tebes, tanba Timor Leste ukun a’an tinan 13 foin maka iha aviaun ida.

“Ho haksolok tebes ita hot-hotu hamutuk hodi simu primeiru aviaun mai ita nia rai ne’ebe foin tinan 13 ukun a‘an,”esplika Xanana.

Xanana dehan, ema balun kritika dehan Governu sosa aviaun ne’e kiik demais, balun kritika tanba sa maka Governu sosa ona aviaun, maibe povu sei kiak? Xanana dehan, ema sira kritika ne’e prosesu dezenvolvimentu maka nune’e, prosesu ne’ebe lori tempu.

“Importante tebes ita iha aviaun ida, ita hotu bele felisita Dr.Mari nia hanoin luan ida ne’e, tanba ita hatene katak, ba mai Oecusse mos ho aviaun, kria sentimentu seguransa no serteza no konfiansa liu ba investor sira atu mai,”tenik Xanana.Avi

Jornal Nacional

LEI PARTIDU POLITIKU FOUN, BANDU UZA LIAFUAN VETERANU-REZISTENSIA

Lei foun partidu politiku nian ne’ebe Parlamentu Nasional aprova final global ona, Tersa (27/10/2015), bandu partidu foun sira atu uza liafuan veteranus ho rezistensia nian.

Votasaun final global proposta lei No. 21/III hodi altera lei No.3/2004 sobre partidu politikus ho votus afavor 44, kontra zero, apstensaun 6.

Prezidenti Komisaun A PN, Carmelita Moniz esplika katak, alterasaun ba lei ne’e bandu mos partidu foun ida la bele uza naran Veteranu no Rezistensia.

“Atu hari’i partidu politiku ida, la bele uja naran ou palavra Veteranus I Rezistensia, palavra rua ne’e labele uja,” dehan Carmelita Moniz.

Lei ne’e sei lori hikas ba Prezidenti Republika atu halo promulgasaun. Carmelita Moniz, esplika, pontu inportante ba alterasaun lei ne’e mak hanesan rekejitus rejista partidu ida tenki iha asinante 20.000.

“Lei ejistente rekejistus inskrisaun partidu ida hari’i persija deit 1.500 eskritus, katak ema nain 1.500 halo inskrisaun bele hari’i ona partidu politiku ida, maibe iha alterasaun ba lei ida ne’e, muda husi 1.500 ba 20.000 sub inskritus,” informa deputada bankada CNRT ne’e liu husi sesaun plenaria.

Subvensaun ba partidu politikus iha prosesu eleitoral nia laran, Carmelita dehan, Estado sei la selu subvensaun ba partidu politiku antes da kampanha eleitoral, maibe Estado liu husi Governu fo subvensaun ba partidu politiku depois eleisaun.

“Subvensaun ba partidu politiku bazeia ba rejultadu eleisaun ka rejultadu votu ne’ebe partidu politiku ida-idak hetan, rejultadu votu ne’e ami limita kedas katak kada votu nia valor atu hetan mak valor minimu $ 1 no valor masimu $ 10, maibe Governu mak determina tuir nia regulamentu rasik,” dehan deputada Carmelita.

Carmelita hatutan, iha alterasaun ne’e hatete, partidu politiku ida bele prende nia estatutu bainhira la partisipa iha programa propio iha eleisaun poder lokal ka eleisoens nasionais.

Iha alterasaun lei partidu politiku ne’e, Carmelita hateten, muda mos loron apresiasaun ba dokumentus partidu politiku ida.

“Lei antes fo loron lima deit ba tribunal rekursu para atu halo apresiasaun ba dokumentus partidu politiku sira, loron lima tanba razaun inskretores 1.500, mais agora hasa’e tiha ona 20.000, entaun Juiz sira mos sente katak todan oituan ba sira atu halo verefikasaun ba 20.000 sukritores, tanba ne’e muda husi loron lima ba loron 15,” dehan Carmelita.

Ikus liu mak alterasaun iha lei ne mak, Carmelita dehan, partidu politiku ida atu tuir eleisaun tenki hari fulan nen (6) antes. mia

Jornal Nacional

PRESIZA INJETA TAN KAPITAL BA BNCTL

Atu bele fasilita kbi’it finansiamentu ba seitor privadu nasional hodi kontribui ativamente ba dezenvolvimentu nasional, presiza tebes Governu injekta tan orsamentu sufisiente ba aumenta kapital Banco Nacional Comerçio Timor Leste (BNCTL).

Vise Prezidenti Conçorsio Nacional Timorense (CNT), Agostinho Gomes, haree katak, banko nasional ho internasional ne’ebe halao nia funsaun diak ona hodi fasilita asesu kreditu ba seitor privadu nasionais maka BNCTL, maibe ninia montante foin maka provolta deit milaun 6 USD. Basaa, BNCTL nia kapital seidauk sufiesiente atu bele fo liu ida ne’e.

“Ita koalia investimentu, ita nia emprezariu nasional osan la iha. Banko sira ne’ebe ejiste iha Timor Leste defisil tebes fo imprestimu ba seitor privadu nasional, maibe grasa boot tanba BNCTL komesa fo ona imprestimu, maibe kapital BNCTL nian maka ki’ik liu no presiza tebes Governu atu injekta tan kapital ba iha BNCTL hodi fo kbi’it ba BNCTL atu fasilita kredidu ho montante minimu milaun 10 USD ba leten hodi suporta atividades seitor privadu nasionais nian,” hateten Agostinho Gomes, hodi responde JNDiário iha nia servisu fatin, Audian, Dili, Tersa (27/10/2015).

Director TINOLINA, Lda ne’e fo exemplu deit katak, wainhira Governu injekta tan osan minimu miloens 100 USD ba kapital BNCTL nian, maka NBCTL bele ona fo imprestimu ba seitor privadu nasional sira liu husi milaun 10 USD.

“Pelumenus Banko ida diak maka ami haree agora ne’e maka BNCTL, tanba ne’e, Governu presiza iha politika diak ida para injekta tan osan iha kapital BNCTL nian para bele fo impresitmu boot ba seitor privadu. Se lae, susar atu koalia invesitmentu tanba seitor privadu la iha asesu ba finansiamentu,” hateten Agostinho Gomes.

Nia mensiona mos katak, banko estranjeirus sira ne’ebe ejiste iha ne’e fo kreditu ki’ik liu ho jurus boot. Maioria banko estranjeirus sira iha Timor Leste mos hadau malu maka projetu hotu deit. Tanba ne’e, CNT nudar parseiru estrateziku Governu nian iha dezenvolvimentu nasional suzere ba Govern, atu iha tinan ne’e, bele injekta tan osan ba kapital BNCTL nian.

OJE 2016 refleta politika Governu

Biban ne’e, Agostinho Gomes mos fo nia afirmasaun katak, proposta Orsamentu Jeral Estadu (OJE) tinan fiskal 2016 ho montante Bilaun 1.4 USD ne’e, talves refleta ba politika Governu nian.

“Hau laos ema ekonomista, maibe se la sala OJE 2016 ki’ik liu OJE 2015 nian. Oinsa maka OJE 2016 ne’e ki’ik liu, talves Governu iha nia nia politika rasik, mas normalmente OJE tuun ne’e bele afeta ba dezenvolvimentu,” hateten Agostinho Gomes.

Tuir nia haree, seitores prioritariu ne’ebe presiza atu Governu tau atensaun masimu iha OJE 2016 nian maka ifnra-estrutura, edukasaun, saude, agrikultura no tenke haree ona mos seitor turismu.

Tinan-tinan OJE sempre mosu carry over, tanba ne’e, Agostinho Gomes, suzere atu iha ejekusaun OJE tinan foun 2016 nian tenke iha eskedul. Exemplu, projetu ida atu halo ezekusaun iha 2016, maka iha Janeiru tenke tama ona tenderizasaun nune’e iha Fevereiru ou Marsu bele komesa ona.

Nia hateten, ejekusaun projetu fiziku hotu ne’ebe Governu iha komesa kedas husi fulan Abril ne’e diak tebes para to’o Dezembru bele ejekuta orsamentu ho masimu. Se lae, susar oituan.

Koalia kona-ba infra-estrutura, esplika Agostinho Gomes, ministeriu hotu-hotu iha nia servisu infra-estrutura, maibe kuandu koalia infra-estrutura hanesan estradas, pontes, eletrisidades no bee mos, pelumenus eletrisidade diak oituan ona, maske ahi sei mate lakan.

Husi parte infra-estrutura estrada nian, Agostinho Gomes, fo sasin katak, auto estrada Suai komesa halo ona, estrada Dili laran paritikamente 70% diak hotu ona, estrada liga minisipiu, liu-liu Dili-Lautem, Baucau-Viqueque, Dili-Bobonaro komesa diak ona mas sei kotu-kotu hela, Dili-Aileu, Mubisse, Ainaro to’o Suai, Ministeriu kompetenti tenke haree atu tinan ne’e bele hadia hikas.

Naturalmente, Agostinho sublinha tan, Governu mos tenke haree ona rengrout ida, liu-liu iha Dili para sai hanesan alternativa kuandu iha engrafamentu. Tanba, lor-loron kareta aumenta ba bei-beik mais estrada maka nune’e nafatin deit.

Nia hatutan, se la aumenta tan estrada, maka tenke helo rengrout ou bele mos halo fly over . Se lae,   iha oras servisu, liu-liu tuku 08:00 Otl, tuku 12:00 Otl ho tuku 17:00 Otl, kareta la’o fatin la diak.

Buat seluk ne’ebe sai preokupasaun ba Agostinho Gomes maka Timor Leste seidauk iha master plan. Tanba ne’e, dezenvolvimentu infra-estrutura iha Timor laran, liu-liu iha Dili laran la’o sabraut hela. Tanba la iha master plan atu sai guia ba servisu hotu infra-estrutura fiziku ninian.

Nia rekonhese katak, agora maka Governu halo master plan sei karun tebes, tanba buat hotu rungu-ranga tiha ona. Tanba ne’e atu hadia fali tuir master plan ne’e susar oituan.

“Se ita halo tiha ona master plan ne’e tinan 10 ba kotuk, maka to’o oras ne’e, ita la ulun moras, tanba ita iha buat ida maka kondus ita hodi lori ita halo dezenvolvimentu iha Dili,” hateten Agostinho Gomes.

Iha perspetiva balun katak, proseus birokrasia Governu nian ho mos pagamentus atrazu, sai mos imbstaklu ba deznevolvimentu nasional, Agostinho Gomes friza katak, de faktu pagamentu atrazu afetadu tebes ba seitor privadu nasionais sira iha tinan ne’e, maibe tenke komprende mos katak, iha tinan ne’e mos iha alterasaun politika (remodelasaun) ne’ebe afeta mos ba prosesu finansiamentu. Espera katak, tinan oin 2016 buat hotu sei sai diak, tanba remodelasaun lao efetivu liu ona kompara ho 2015. nia

Jornal Nacional

ADOPTA MERKADU LIVRE, NEGOSIANTES CHINEZES DOMINA TL

Timor Leste (TL) adopta sistema merkadu livre, tan ne’e ema hotu-hotu iha direitu halo aktividade negosio no komersiu iha Timor inklui fo fatin ba ema estrangeriu sira, inklui Chinez sira mai halo atividades negosiu hodi domina merkadu nasional.

Vise Ministru Comerciu Industria e Ambiente (MCIA) Filipus Nino Pereira hatete, Timor nia merkadu livre, ema hotu iha direitu halo aktividade somersiu ho negosiu inklui mos ema estrangerio sira.

‘’Ema estrangerio sira ne’ebe halo aktividade negosio no comersiu ne’e mos kontribui hotu ba dezenvolvimentu ekonomia iha rai laran,’’ dehan Nino ba jornalista sira, Kuarta (28/10/2015) iha Fomento.

Nino Pereira hatete, maske adopta merkadu liver, maibe Governu liu husi MCIA kria politika ida liu husi rezimentu merkadu nian la fo fatin ba negosiante estrangerio sira atu fan iha merkadu tradisional, merkadu tradisional ne’e ba deit negosinate rai laran. Tanba Governu hakarak negosiante rai laran mak domina duni sira nia merkadu laos negosiante estranerio.

Kona ba negosiante Chinez sira ne’ebe mak halo negosio to’o postu administrativu no suku-suku inklui aldeia, MCIA nafatin ho nia politika halo inspesaun no kontrolo ba negosiante sira ne’e, maibe tuir Nino dala ruma negosiante China sira to suku ne’e, tanab sira fan dereita sira nia sasan ba negosiante Timor oan sira ne’ebe hakarak hola duni sira nia sasan. Tanba tuir vise MCIA ne’e katak, maske Parlamentu inklui publiku balun kontinua kestiona prezensa negosiante China, iha parte seluk konsumidores barak gosta hola liu sira nia sasan.

‘’Maske la ita hatene sasan sira ne’e la iha kualidade, maibe konsumidores barak gosta sosa, ida ne’e mos sai prekupasaun ba ita hotu, tan ne’e ita presija hare fali attitude konsumidores sira nian ne’e,’’ hateten Nino Pereira. nia

Jornal Nacional

SEMANA OIN, MUTL KONTINUA HALO MANIFESTASAUN HASORU PN

Parlamentu Nasional (PN) to’o ohin loron sei kontinua nonok no taka an ba Movimentu Universitariu Timor Leste (MUTL), tanba ne’e MUTL la satisfas nune’e iha semana oin mai ne’e MUTL kontinua halo manifestasaun hasoru PN.

Enkuantu PN halo dialogu ho MUTL, entaun sei hapara manifestasaun, maibe kuandu PN nafatin taka an ba MUTL manifestaun sei kontinua halo.

Ejijensia MUTL ne’e hodi ejije ba PN atu halo revizaun ba lei pensaun vitalisia ou halakon pensaun vitalisia iha rai doben ida ne’e, tanba konsidera habokur ema balu deit ho pensaun vitalisia.

“MUTL sei kontinua ejiji ba Parlamentu Nasional hodi halo lalais ba alterasaun ba lei sira ne’ebe konsidera la benefisia ba povo no nasaun. Ho ida ne’e MUTL deklara, ami sei kontinua iha vontade no espriritu hodi halao aproximasaun ho nain deputadu sira PN liu husi dalan dialogu nune’e bele fo solusaun alternativu ba ejijensia publiku relasiona alterasaun ba lei pensaun vitalisia,”portavos MUTL, Faustino Soares ba jornalista sira Kuarta (28/10) iha kampus Central Universidade Nasional Timor Lorosae (UNTL) liu husi konferensia da imprensa.

Nia hatutan, MUTL sei kria ekipa ida hodi halao asaun sensabilizasaun tama uma sai uma iha kada suku hahu husi kapital Dili to’o Municipiu.

Tuir nia PN durante ne’e laiha liu vontade atu halo alterasaun ba lei pensaun vitalisia ne’ebe maka durante ne’e entidades barak kestiona ne’e.

“MUTL husu nafatin ba publiku hotu atu lalika fiar ona propaganda politika falsu ne’ebe lansa husi bankada parlamentar sira katak, sei halo revizaun ba lei refere, tanba realidade sira la hatudu no prova sira nia asaun. MUTL halao asaun pasifiku kuaze fulan 1 resin ona, maibe PN nunka iha inisiativa hasoru MUTL,”argumenta Faustino Soares. Ola

Jornal Nacional

SASIN LEKAR PAGAMENTU BA KONTA BANKARIA EMILIA

DILI - Eis Diretór  Planu Finansas Ministériu Saúde nu’udar  sasin ba kazu eis Ministra Finansas no eis Vise Ministru Saúde, Madalena Hanjam, deklara, pagamentu ba projetu sosa kama haruka direita ba konta bankaria privadu arguida Emília  Pires.

“Prosesu pagamentu ami transfere direita ba konta bankaria arguida Emília  Pires bazeia ba kontratu. Nune’e mos iha aprovasaun orsamentu ba projetu sosa kama ba Ospital Nasionál Guido Valadares (ONGV) arguida Madalena Hanjam indika kedas Kompañia Metal Craf, laen hosi arguida Emília  Pires”, Atual Diretór Jéral MS ne’e deklara.

Eis Diretór Planu Finansas MS iha 2010 to’o 2012 deklara, mosu proposta ida ba Primeiru Ministru iha 2012 atu sosa tan kama, proposta ne’e halo rasik hosi arguida Madalena Hanjam nu’udar  eis vise ministra MS, maibé nunka involve inkontru konsellu diretór sira.

Proposta ne’e, sasin hatutan, arguida Hanjam indika kedas kompañia Macs Metal Craft (MMC). Tanba antes ne’e, arguida Hanjam haruka xefi departementu aprovizionamentu MS ba vizita kompañia MCC iha Austrália.

Hodi hatutan, 2011 iha duni planu atu sosa kama ne’ebé osan ne’e mai hosi fundu kontijensia e fundus ne’e kompetensia tomak hosi arguida, altura nu’udar  vise ministra saúde mais projetu la’o la-involve inkontru konsellu diretores. Tan ne’e, nia laiha koñesementu kle’an ba prosesu refere.

“Prosesu projetu ne’e la’o laiha inkontru konsellu diretoral. Nune’e valor osamentu ba planu ne’e nia foin hatene, depois hetan ona aprovasaun hosi Primeiru Ministru e proposta ne’e vise ministra rasik mak halo hodi indika kedas kompania MCC nian naran, laiha inkontru kona-ba ida ne’e”, haktuir tan.

Hodi katak tan, tinan  2011 iha osan atu sosa kama rihun 300 resin dolar Amerikanu, kona-ba orsamentu global bilaun 1,300 resin dolar Amerikanu nia parte la-hatene. Kona-bá osan restu hosi bilaun 1,300 resin, nia parte haluha ona.

Tuir prosesu normal, nia informa, pagamentu ba kompañia MMC la-tuir prosesu legais. Maibé, bazeia ba proposta no kontratu iha ona. Ne’ebe tuir prosesu normal bainhira atu halo pagamentu tenki rejistu patrimoniu estadu hodi junta hoinvoicekontratu mak foin halo pagamentu.

Pagamentu halo dala hira, nia parte laiha koñesementu. Tanba prosesu ne’e sentraliza iha nivel altu ministériu saudé gabinete arguida nian.

Tuir akuzasaun, loron 9 Fevereiru 2011 arguida Madalena Hanjam haruka karta VMS/PM/11/50 ba Primeiru Ministru atu husu fundu adisionál ida MS ba alojamentu no alimentasaun mediku Kubanu sira ho $600,000 ba unidade kardiolojia no hematolojia $400,000 no kama ortopedika atus ida 100 ho $400.000.

PM despaisa pedidu ne’e haruka ba MF iha loron 6 Fevereiru 2011, liu-hosi ofisiu No. 203/GPM/II/2011, arguida Emília  Pires simu informasaun hosi despaisu PM nian iha loron 29 Marsu 2011. Arguida Emília  Pires liu-hosi ofisiu 104/GMF/III/2011 fó pareser kona-ba pedidu adisionál orsamentu formula hosi arguida Madalena Hanjam.

Audensia julgamentu prezide hosi juiz koletivu José Maria de Araujo, Fransisca Cabral no Maria Solana Fernandes. MP reprejenta hosi prokuradora Angelina Saldanha, Lidia Soares no Jacinto Babo.

Arguida Hanjam hetan asistensia legal hosi advogadu privadu José Guterres, advogadu internasionál Nuno Morais Sarmos no Rui Costa Fereira. Entertantu arguida Emília  Pires hetan asistensia legal hosi ekipa advogadu privadu internasionál nain rua foun no advogadu nasionál José Pedro Camoes.

                        

Deputada Lay Sai Sasin Defesa

Sikun seluk, deputadu sira ho votus a favor 28, kontra 19, abstensaun 2 no votus nolu 2 ba deputada Maria Fernanda Lay hosi bankada CNRT atu sai sasin defesa ba Hanjam ho Emília.

Liu-hosi plenária, Tersa, (27/10) mosu pro no kontra entre deputadu sira. Bankada CNRT ne’ebé fó votus barak liu ka’er prinsipiuprezunsaun inosensia.

Xefi bankada CNRT, Natalino do Santos hatete, ne’e direitu ida atu arguida hatudu ema hodi fó testamuña kona-ba faktus ruma iha tribunál no ka’er metin ba prinsipiuprezunsaun inosensiatanba seidauk iha desizaun final hosi tribunál.

“Testamuña hanesan deputada que atu ba halo fali defesa ba arguida kontra prinsipiu estadu nian, ha’u sente katak lae! tanba ita uza buat ida boluasas praduga tak bersalah”, Natalino haforsa.

Tanba ne’e, tuir Natalino, laiha problema deputada Maria Fernanda Lay sai sasin defesa ba arguida Emília  Pires no Madalena Hanjam.

Entretantu, xefi bankada FRETILIN, Aniceto Guterres hatete, deputadu nu’udar membru orgaun soberanu ida ba kontra fali akuzasaun estadu nian ne’ebé ministériu públiku halo, intermus polítika (luta kontra korrupsaun), ne’e buat ruma la-loos.

Deputadu FRETILIN, Joaquim do Santos hatete, desizaun PN nu’udar desizaun estadu nian, tanba PN labele foti desizaun ida hodi autoriza deputada ida ba defende arguida ida ne’ebé hetan akuzasaun hosi estadu liu-hosi MP.

“Aktu ida ita (PN) foti ne’e aktu estadu nian, katak ita autoriza deputadu ida ba halo testamuña kontra akuzasaun estadu ne’ebé reprezenta hosi ministériu públiku”, Joaquim do Santos hatete liu-hosi komunikadu ne’ebé Timor Post asesu, horiseik.(max/tay)

Timor Post

PROSESA IRREGULARIDADE MAP

DILI - Deputadu Joaquim dos Santos, Francisco Branco no Adérito  Hugo da Costa husu ba Ministériu Públiku atu prosesa irregularidade prosesu tenderizasaun projetu ne’ebé akontese iha Ministériu Agrikultura no Peskas (MAP), entre 2011 no 2013.

“Hato’o ba Ministériu Públiku atu prosesa ba tribunál”, deputadu bankada FRETILIN, Joaquim dos Santos ba jornalista sira iha PN, Tersa, (27/10).

Membru komisaun C ne’ebé trata asuntu finansas públika ne’e hatutan, komportamentu polítika hot-hotu tenki halo tuir lei. “Atu membru governu ka diretór  ka funsionáriu bai-bain, viola lei jestaun finanseira, ha’u hanoin tenki ba tribunál”, reprezentante povu ne’e katak.

“Julga uluk ami nai ulun ne’e, para povu haree mós tauk, labele nain ulun sira sala kontra lei i depois ministériu públiku túr nonok de’it hodi julga fali povu ki’ik ne’e labele. Ema na’ok manu ohin, aban ema julga kedas, mais na’ok juta ba juta ne’e nonok, taka metin tiha labele”, afirma nia.

Iha fatin hanesan, deputadu Francisco Branco hosi bankada FRETILIN husu ba MAP tenki hatan ba irregularidade ne’ebé akontese.

“Kestaun ne’ebé auditoria hetan ona, agora hosi ministériu mós fó resposta kona-ba buat sira ne’ebé sira hetan, depois enkamina ba ministériu públiku atu avansa ba oin”, membru komisaun C ne’e hatete.

Nune’e mós, deputadu bankada CNRT, Adérito Hugo hatutan, iregularidade ne’ebé Tribunál Rekursus liu-hosi Cãmara de Kontas detekta, ne’e obrigasaun estadu nian.

“Kada tinan, parlamentu nasionál rekomenda ba tribunál de kontas atu halo auditoria ba liñas ministériais ne’ebé ke tuir parlamentu haree presiza atu halo. Tan ne’e mak rezulta servisu ida ke tribunál de kontas halo”, segundu vise prezidenti PN dehan.

Membru komisaun C ne’e hatutan, kada tinan parlamentu halo diskusaun ba kontas jéral estadu ne’ebé ke auditoria externa mak halo.

“Parlamentu ninia obrigasaun mak atu rekomenda ba tribunál de kontas atu halo auditoria. Rezultadu auditoria fila fali ba instituisaun kompotente hanesan ministériu públiku”, tenik nia.

Nia informa, tribunál de kontas iha ona 30 auditoria ne’ebé mesak Timor-oan hotu, mesmu hetan akompañamentu hosi asesór internasionál sira para fó asistensia atu hasa’e sira nia kapasidade halo auditoria.

Sikun seluk, Ministru Estadu Koordenador assuntu Ekonomia no Ministru Agrikultura no Peskas, Estanislau Aleixo da Silva hatutan, rezultadu auditoria tribunál kamara de kontas haruka ona ba MP hodi aprofunda prosesu investigasaun.

“Horseik (segunda) ha’u ba komisaun C parlamentu nasionál, sira husu ha’u esplika ho rekomendasaun ne’ebé tribunál hasai. Ami konkorda, buat balun ami implementa ona no buat balun ami sei implementa antes proxima ezekusaun orsamentu”, Estanislau ba Timor Post iha Palasiu Governu, Tersa, (27/10).

Nia dehan, bainhira ministériu públiku hakle’an prosesu investigasaun, Komisaun Funsaun Públiku mos sei hola medidas disiplina ba funsionariu ne’ebé karik involve direita iha prosesu ne’e rasik.

Antes ne’e, Tribunál Rekursus liu-hosi Kamara de Kontas detekta ona iregularidade aprovizionamentu, li-liu tenderizasaun projetu MAP iha mandatu ministru Mariano Asanami Sabino.

Prezidenti Tribunál Rekursus, Guilhermino da Silva ba jornalista sira iha nia kna’ar fatin, Kaikoli, Sesta (23/10), hatete, nia parte haruka ona rezultadu auditoria  ba MP hodi prosesa tuir lei.

“Mosu iregularidade barak, tan ne’e rezultadu pareser ami haruka ba ministériu públiku hodi kontinua nia prosesu”, Guilhermino da Silva tenik.(jos/oki)

Timor Post

Tempu Sei Disidi, Taur Hari Partidu Politku

DUCURAI - Atu hari Partidu Politiku hodi Kompete iha elisaun parlamentar tinan 2017, Prezidente Republika Taur Matan Ruak hein tempu mak sei hatudu, tamba oras nee sei fo Importansia ba Ajenda Vizita suku.

Tuir Prezidente Republika Taur Matan Ruak katak iha nia vida tomak ba tinan nee kompleta  tinan 40 didika ba Timor, tamba nee sei mate ho timor no sei la husik Timor tamba fakar ran hanesan mos timor oan sira neebe lori ran lori mate sosa.

Hau agora preokupa los hau nia ajenda ba vizita suku sira, tamba nee hau kontinua nafatin, ida nee (Posibilidade hari’I Partidu Politku-red) tempu sei hatete no tempu sei hatudu,” dehan Taur ba Jornalista iha suku Ducurai, Postu Administrativu Letefoho, Munisipiu Ermera.

Nia hatete Osan mean, osan mutin no ropa neebe mak sosa la soe satan ida nee mak ida neeba mak Timor oan sira sosa ho ran no mate mak hetan, tan nee soe sei la soe nune sei fo kontribui nafatin hodi dezemvolve Timor.

Iha fatin ketak xefi suku Lour, Duarte Afonso de Araujo preokupa iha suku Lour iha dezafiu barak mak uma lulik neebe sai abut ikus, mai hare husi forma hetan degradasaun koinesementu komonidade sira nian laiha.

Nune mos Afonso da Costa husu Prezidente Republika atu hari Partidu Politiku, nunee iha tinan 2017 povu hili atu sai Primeiru Ministru hodi hare povu neebe mak hela iha area rural, tamba Prezidente mos uluk luta ba nasaun Timor Leste. Informasaun kompletu iha STL Jornal no STL Web, edisaun Kinta (29/10/2015). Timotio Gusmao

Suara Timor Lorosae

Sosa Kama Ba Hospital, Madalena Konvida Emilia-Worren Han Hamutuk

DILI - Arguida Madalena Hanjam iha 2011 konvida arguida Emilia Pires ho nia kaben Worren Macleod, nudar nain ba kompania Macs Metal Craft’s han meudia hamutuk iha nia uma Halilaran.

Iha audensia julgamentu sasin Getrudis Maia hatete, iha tinan 2011 too 2012 nia hanesan assisten privadu ba vice ministra Madalena Hanjam. Iha 2011 nee nia akompania arguida Madalena han meudia iha eis vice ministra nee nia uma Halilaran,Balide. Maibe kona ba data no fulan mak nia parte la lembra ona. I han meudia nee vice ministra neemak haruka sira ba han.

Hanesan assisten hau sempre akompania vice ministra kuandu bainhira nia presija hau. Neebe iha 2011 nee hau ho gabineti ministra nian konsentra hotu iha vice Madalena nia uma. Nunee mos arguida Emilia ho nia kaben hamutuk ho nia eskoltu sira mai han meudia hamutuk ho ami, neebe momentu nee hau duni mak ba hasoru ministra Emilia ho nia kaben iha nia uma Bairo Grilhos,”dehan nia ba tribunal, Kuarta (28/10/2015).

Ba tribunal nia hatete, durante han meudia hamutuk nee nia parte la rona no la hatene saida mak eis membru governu nain rua nee koalia. Tanba depois han hamutuk, sira la tur hamutuk ona ho arguida sira. Neebe nia parte la hatene kona ba saida mak sira koalia iha tempu neeba.

Prosesu Emilia ho nia kaben mai iha arguida Madalena nia uma, nia parte ho kondutor Madalena nian mak hasoru Emilia iha nia uma Bairo Grilhos. Wainhira too iha Emilia nia uma, arguida nee seidauk fila husi servisu neemak sira hein deit iha liur. Depois fila servisu mak Emilia ho nia kaben mos sai husi uma mai hamutuk ho sira ba Madalena nia uma. Sai husi Emilia nia uma, nia mak lao uluk hodi Emilia sira tuir husi kotuk. Too iha Madalena nia uma, nia mak simu duni bainaka sira nee tama ba uma laran hodi almoco. Iha almoco nee kala hamutuk ema nain 15 mak konsentra iha arguida Madalena nia uma neebe involve mos diretor sira, maibe nia so lembra deit mak diretor rekursu humanu MS nian Duarte Ximenes.

Han meudia hamutuk iha arguida Madalena nia uma nee tanba arguida nee rasik mak haruka. Kona ba pagamentu ba restorante rua nee nia parte la hatene, tanba depois han hotu tiha sira ho arguida hamrik fila kedas.

Audensia nee prezide husi juis kolektivu Jose Maria de Araujo, Fransisca Cabral no Maria Solana Fernandes. Reprejenta ministeriu publiku prokuradora Angelina Saldanha, Lidia Soares no Jasinto Babo. No arguida Madalena Hanjam hetan asistensia legal husi advogadu privadu Jose Guteres, Nunu Morais Sarmos no Rui Costa Fereira. Entertantu arguida Emilia Pires hetan asistensia legal husi ekipa advogadu privadu internasional ho nasional Pedro Camoes. Informasaun kompletu iha STL Jornal no STL Web, edisaun Kinta (29/10/2015). Domingas Gomes

Suara Timor Lorosae

Kombate Transaksaun Droga, Lere: “Ita Presiza Reforsa Siguransa Iha Fronteira

DILI - Timor Leste (TL) hakarak atu kombate transaksaun droga, presiza kria kondisaun ba siguransa maritima no haforsa siguransa iha Fronteira Terrestre.

Lia hirak nee hatoo husi Xefi Estadu Maior Jeneral F-FDTL, maior jeneral Lere Anan Timur, ba Jornalista sira, hafoin remata sosializasaun lei komunikasaun sosial, iha Kuartel Jeral F-FDTL, Fatuhada, Dili, Kuarte (28/10/2015).

Kombate transaksaun droga, Primeiru ba siguransa maritime ita tenki kria kondisoens, konaba siguransa fornteira terrestre, ita presiza reforsa ita nia siguransa iha rai maran ida nee maka importante liu,” hateten Lere.

Antes nee mos Deputada Josefa fo informasaun katak husi Bobonaro, iha fatin rua neebe deskontroladu husi Unidade Polisia Fronteira.

Iha fatin hanesan II Komadante Jeral PNTL, Komisariu Faustinho da Costa hateten iha 2009 PolisiaTimor Leste ho Polisia Indonesia asina ona akordu ida, iha akordu nee halo oinsa atu kombate transaksaun nune mos serkulasaun ba droga iha area fronteira. Informasaun kompletu iha STL Jornal no STL Web, edisaun Kinta (29/10/2015). Joao Anibal

Suara Timor Lorosae

Sosializasaun Lei KOMSOS, Nelio: Hametin Ligasaun Forsa ho Jornalista

DILI - Hametin ligasaun entre Jornalisa ho Falintil Forsa Defeze Timor Leste (F-FDTL) inklui Polisia Nasional Timor Leste (PNTL), governu halao sosializasaun lei Komunikasaun Sosial (Komsos) ba forsa rua nee.

Iha sosializasaun lei KOMSOS nee Sekertariu Estadu Komunikasaun Sosial, Nelio Isaac, entrega lei komunikasaun Sosial ba Xefi Estadu Maior Jeneral FFDTL Lere Anan Timur, II Komadante PNTL, Komisariu Faustinho da Costa inklui Asosiasaun media sira.

Tamba objetivu principal ba sosializasaun iha F-FDTL ho PNTL ida nee, atu fortifika relasaun entre F-FDTL-PNTL ho media sira, institusaun rua nee ho media sira halo ligasaun metin para azuda no tatoli informasaun sira neebe maka iha forsa rua nia laran,” hateten Nelio, liu husi sosializasaun nee, iha salaun F-FDTL, Fatuhada, Dili, Kuarta (28/10/2015).

Governante nee mos hateten katak buat ida segredu siguransa nee segredu duni, ida neebe maka bele hakat ida nebe maka la bele hakat, maibee segerdu siguransa, jornalista sira mos hakarak kee husi kotuk atu hetan buat ruma neebe maka la fo vantazen ba knar tomak estadu nia iha seitor ida iha defeza no siguransa.

Iha fatin nee mos Xefi Estadu Maior Jeneral F-FDTL Lere Anan Timur hateten atu difini no halo konseptu konaba saida maka komunikasaun sosial, ema hotu hatene katak nasaun foin hamrik sei joven, tamba nee buat barak presiza hadia no buat barak tenki aprende. Informasaun kompletu iha STL Jornal no STL Web, edisaun Kinta (29/10/2015). Joao Anibal

Suara Timor Lorosae

Tuku Fen Nia Kabun, Antonio Hatan Tribunal

DILI - Arguidu Antonio Ximenes tenki ba hatan iha Tribunal Distrital Dili (TDD) tanba halo agresaun fisika hasoru lezada Ana Maria Moniz hanesan nia eis fen kaben.

Iha audensia julgamentu tribunal lee sai akuzasaun husi Ministeriu Publiku katak, arguidu ho lezada hola malu hanesan fen laen desde tinan 2008 too 2012 no iha oan ida, depois ida nee fahe ka soe malu tiha. Iha (01/10/2013) tuku 09:00 ho balun kalan, iha area Farol Dili, wainhira arguidu hasoru fali lezada lao mai, arguidu hakat ba hodi tuku iha lezada nia kabun parte karuk,  no momentu neeba lezada isin rua fulan lima ho nee halo lezada nia parte kabun sorin moras no tenki hakat ba halo tratamentu iha hospital. Arguidu nia hahalok sira nee halo konsientemente no hatene katak ida nee krime, tan nee MP akuza arguidu komete krime Violensia Domestika ho forma Ofensas Integrade Fizika Simples.

Hatan ba akuzasaun nee arguidu hatete, akuzasaun sira nee los hotu. Sira nian rua hola malu iha 2008 too mai 2012 iha oan ida. Tanba nia la iha serbisu no lao badiu hela deit entaun nia ho lezada soe malu tiha. No iha( 01/10/2013) kalan tuku 09  nia ho kolega nain tolu hemu tua  sabu tur hela iha area Farol nian haree lezada lao mai, nia mos bolu no koalia abuja malu. Lezada fila tolok, nunee nia hakat ba hodi tuku iha kabun parte sorin karuk dala ida.

Iha momentu nee hau lanu maka tuku nia, no hau hirus tanba nia hola fali mane kiik seluk,” deklara arguidu nee.

Ho ida nee arguidu deklara ba tribunal katak nia arepende tebes ba nia hahalok neebe nia halo ba lezada no nia promete katak sei la halo tan.

Iha fatin hanesan lezada Ana Maria Moniz hatete, nia ho arguidu hola malu iha tinan 2008  too 2012 iha oan ida, depois ida nee sira fahe malu tiha. No iha (01/10/2013)  iha area Farol, nia lao ho kolega nain tolu ba buka katuas kiik iha area Farol nian. Nia mai haree ba arguidu iha neeba hodi bolu nia no hakat mai hakuak tuku dala ida iha kabun. Informasaun kompletu iha STL Jornal no STL Web, edisaun Kinta (29/10/2015). Domingas Gomes

Suara Timor Lorosae

Tribunal condena ex-secretário de Estado timorense a 12 anos de cadeia

Suai, Timor-Leste, 28 out (Lusa) - O Tribunal Distrital de Suai, a 180 quilómetros sudoeste da capital de Timor-Leste, condenou o ex-secretário de Estado das Obras Públicas Domingos Caeiro a uma pena de 12 anos de prisão por quatro crimes económicos.

Na mesma sentença, divulgada hoje pela imprensa timorense, foi ainda condenado o ex-coordenador regional de Obras Públicas em Maliana, José Augusto, a uma pena de 10 anos de cadeia, por irregularidades em projetos de estradas nesta região do país.

A decisão do coletivo de juízes é passível de recurso para o Tribunal de Recurs, em Díli, foi confirmada aos jornalistas.

Domingos Caeiro, que integrou o IV Governo constitucional, liderado por Xanana Gusmão, foi condenado pelos crimes de abuso de poder, administração danosa, falsificação documental e participação económica em negócio.

Este não é o primeiro membro de um executivo a ser condenado em Timor-Leste, tendo a anterior ministra da Justiça (também do IV Governo), sido condenada a cinco anos de cadeia em 2012.

Já este ano, em julho, foi condenado o ex-ministro da Educação, João Câncio Freitas, a uma pena de sete anos de cadeia e à restituição de 500 mil dólares pela sua participação económica na criação do projeto da Televisão da Educação.

Esse processo envolveu ainda o ex-diretor-geral do Ministério da Educação, Tarcisio do Carmo, condenado a uma pena de prisão de três anos e meio e à restituição de 200 mil dólares.

A decorrer desde o início de outubro está o julgamento da ex-ministra das Finanças Emília Pires e da ex-vice-ministra da Saúde Madalena Hankam que são acusadas da prática de crimes de participação económica em negócio e administração danosa.

Pires e Hankam são acusadas de alegadas irregularidades na compra de centenas de camas hospitalares em contratos adjudicados à empresa do marido da ex-ministra das Finanças, com um suposto conluio entre os três para a concretização do negócio, no valor de 800 mil dólares (cerca de 720 mil euros).

Responsáveis da Comissão Anti-Corrupção (CAC) timorense explicaram que cerca de 30 dos quase 100 casos que investigou, dizem respeito a membros dos IV e V Governos constitucionais ou de outros executivos anteriores.

ASP // ARA