Parpol Tenke Hadia Povu Nia Moris

DILI – Partidu Politiku (Parpol) 20 ho bloku koligasaun 1 neebe mak kompete iha eleisaun parlamentar, hothotu ho objetivu ida hakarak atu hadia povu nia moris diak.

Tuir Deputadu Bankada CNRT, Agostinho Lay katak, atu hadia povu nia moris diak, partidu politik sira tenke koalia programa ba povu atu sira bele eskoilla iha eleisaun mai nee.

Partidu politiku tenke koalia programa ba povu, se povu fo fiar ba o saida mak o sei halo ba povu ida nee, saida mak atu halo hadia povu nia moris,” dehan Deputadu ba jornalista sira iha PN-Dili, Segunda (10/07/2017).

Deputadu nee haktuir, tanba povu Timor Leste oras nee kontinua halerik hela ba estrada, eletrisidade, bee moos no seluk, tan nee partidu sira iha papel importante atu haree problema sira nee.

Iha fatin ketak, Adjuntu Sekretariu Jeral Partidu PDC, Geraldo Sarmento Ximenes dehan, PDC nudar forsa politika ida iha Timor Leste tanba nee, wainhira kaer ukun amandamentu konstituisaun nee prioridade.

Iha sorin seluk, Sekretariu Jeral UDT, Abono Ramkabia dehan, wainhira povu fo konfiansa ba partidu UDT numeru 9 mak sei jere didiak orsamentu estadu nian labele gasta arbiru. Raimundo S. Fraga

Suara Timor Lorosae

PN Preokupa Numeru Populasaun Partisipa Elpar

DILI – Reprezentante povu iha uma fukun Palamentu Nasional preokupa tebes ho numeru populasaun sira neebe sei partisipa iha eleisaun parlamentar, neebe sei monu iha loron 22 fulan Jullu tinan nee.

Tuir Deputadu Bankada CNRT, Agostinho Lay katak, iha eleisaun prezidensial sai ona esperensia, tanba populasaun kuaze 30% mak lapartisipa.

Numeru populasaun neebe mak atu ba vota nee mak ita tau kestaun tanba hanesan esperensia eleisaun prezidensial ninia kuaze 30% laba vota,” dehan Deputadu ba jornalista sira iha PN-Dili, Segunda (10/07/2017).

Deputadu nee haktuir, populasaun barak laba vota nee laos problema CNE no STAE nian maibe nee problema populasaun nian, depende ba sira nia konsiensia tanba vota laos obrigasaun. Agostinho esplika, maibe hanesan sidadaun neebe mak diak ba vota tanba ita nia votus nee mak termina mos futuru rai nee tanba liu husi partidu politiku sira.

Iha fatin ketak, Diretor Jeral Sekretariadu Tekniku Administrasaun Eleitoral (STAE), Acilino Manuel Branco hatete katak, tuir dadus neebe Sekretariadu Tekniku Administrasaun Eleitoral (STAE) rejista total eleitores partisipa eleisaun parlamentar nee hamutuk 744.613 husi rai laran no mos rai liur. Raimundo S. Fraga

Suara Timor Lorosae

Veteranu Baukau Lori Ema 8.000 Apoiu Xanana

BAUKAU: Veteranu Mário de Sousa Guterres da Silva ‘Nunura’ husi Munisípiu Baukau lori ema hamutuk na’in 8.000 hodi fó apoiu ba Kay Rala Xanana Gusmão, iha eleisaun lejizlativa.

Ema hirak ne’ebé veteranu ne’e lori kompostu husi faluk, oan-kiak, no joven sira iha munisípiu ne’e.

Liu ninia komísiu iha Kampaña polítika partidu CNRT nian iha Baukau, abertamente Nunura deklara katak, apoiu ne’e fó ba eis-Comandante em Chefe FALINTIL, Kay Rala Xanana Gusmão, la’ós ba partidu CNRT.

“Sira mai apoiu la'ós tanba partidu CNRT, deskulpa! Ha'u lori sira mai tanba Xanana,” deklara Nunura.

Nia hatutan, bainhira lider CNRT sira hatene hamaus ema barak sei hakarak mai iha partidu ne’e. Ne’e duni, polítika tenke hatene hamaus no loke odamatan ba ema hotu no partidu hotu-hotu.

RTTL | REPORTAGEM AO MEIO-DIA

RTTL | 10:48

Ró Kruzeiru Potensiál Ba Turíztika TL

DILI, (TATOLI) – Governu no nia parseiru foin lais ne’e relata iha relatóriu ida katak ró kruzeiru (ró pasiar) poténsiál ba turíztiku Timor-Leste (TL).

Relatóriu ne’e dezenvolve husi Market Development Facility, The Asian Foundation, Gabinete Ministru Estadu, Koordenadór Asuntu Ekonómiku (MEKAE) no Ministériu Turizmu, Arte no Kultura (MTAK) identifika turizta hamutuk 1.721 husi ró Pacific Dawn ne’ebé mai vízita Dili, gasta ona osan US$106.998 durante sira nia vísita.

Tuir relatóriu ne’ebé Tatoli asesu, maske iha limitasaun no dezafiu oin-oin ho pursentu 95 resin turizta husi ró ne’ebé tama, sente haksolok ho hetan esperiensia ne’ebé pozitiva no turizta ne’ebé hetan intrevista haktuir katak sei rekomenda TL hanesan fatin turíztiku ba sira nia belun no familia sira.

Besik pursentu 20 halo vizita, akompaña husi mata-dalan sidade, pursentu 39 sosa sasan lembransa, pursentu 20 uza bis-kota (autokarru) “Dili Explorer Hop-On Hop-Off” no pursentu 60 halo vizita rasik ba sidade kapitál. Atrasaun istórika no kulturál sira maka hetan vizita barak liu, hanesan Kristu-Rei pursentu 47, merkadu Tais nian pursentu 45 no Muzeu Rezisténsia pursentu 35.

Debate Parpol Sei Hahu, Ukun Ho Fuan, Lidera Ho Matenek

DILI – Debate entre Partidu Politiku (Parpol) 20 inklui bloku koligasaun ida (1) sei hahu iha dia 17 too 18, durante loron rua ho tema “Ukun ho fuan, lidera ho matenek.

Komisaun organizadora kompostu husi Komisaun Nasional Eleisaun (CNE), Komisaun Anti Korupsaun (CAC), Provedoria dos Direitos Humanus i Justisa (PDHJ), Konsellu Imprensa (KI) inklui Radiu Televizaun Timor Leste Empreza Publika (RTTL.ep).

Tuir Prezidente Komisaun Organizador, Alcino Barris katak, enkontru nee halo aprovasaun ba prosedementu, iha ona moderador no mos iha ona perguntas neebe mak atu husu ba partidu politik sira.

Ohin konklui ba realizasaun ba debate partidu politiku sira neebe planeia iha dia 17-18, loron rua nia laran,” dehan Alcino ba jornalista sira wainhira remata sorumutu iha salaun CNE, Caicoli-Dili, Segunda (10/07/2017).

Branco: Kongratula Kontribuisaun Parpol Ba Situasaun Hakmatek Iha Kampana

DILI – Durante nee kampana Eleisaun Parlamentar (Elpar) neebe lao semana 3, situasaun lao hakmatek, tanba nee Vice Prezidente Partidu Fretilin Francisco Miranda Branco kongratula Partidu Politiku (Parpol) hotu-hotu nia kontribuisaun.

Tuir Vice Prezidente Partidu Fretilin Farncisco Miranda Branco hatete, sira hakarak kongratula ba sira nia militante no strutura iha nivel hotu neebe mak sempre kontribui ba paz no hakmatek durante halao kampana eleisaun parlamentar. Nunee mos kongratula ba parpol sira hotu, tanba sempre kria situasaun hakmatek.

Hau haree ba durante nee kamapna situasaun lao normal, militante sira ih disiplina los, ida nee hatudu katak povu sira hotu iha maturidade politika. Aleinde nee mos kongratula ba parpol sira seluk, tanba parpol sira seluk mos nafatin kontribui ba paz no dame iha kampana nia laran,” katak Branco ba STL liu husi via telefone Segunda (10/07/2017).

Nia hatete, sira mos nafatin atu fo hanoin katak hotu-hotu tenke matan moris neon nain, hodi labele iha provokasaun atu nunee situasaun lao hanesan nee nafatin atu povu sira hotu lao ba vota tuir ida-idak nia konsensia, labele iha presaun no asaun, tanba ida nee mak tuir lei nia hakarak. Tanba Fretilin nia hakarak nee atu kria paz no estabilidade iha rai laran, hodi nunee ema ida-idak ba vota konsensia.

Iha parte seluk, Deputadu husi husi Bankada PD Adriano Joao hatete, kona ba disiplina militante parpol sira nian, diak, mezmu akontese situasaun neebe mak iha Luca iha Partidu balu nia militante sira estraga ema nia uma, maibe ida nee nia husu ba Stae ho CNE liu-liu polisia atu tau atensaun ba hahalok sira nee, atu nunee haree ema sira hatudu hahalok sira hodi lori prosesu nee ba iha jugamentu iha tribunal. Guilhermina Franco / Jacinta Sequeira

Suara Timor Lorosae

Prezidente timoroan defende revizaun ba lei forsa defeza sira nian

Iha loron-segunda ne'e, Prezidente timoroan defende ona revizaun ida ba lejislasaun kona-ba forsa sira defeza nian, hodi garanti katak adekuadu ba realidade hosi instituisaun nian, hanesan obrigasaun desmobilizasaun hosi sira ne'ebé iha liu tinan 60.

"Bainhira lei anterior sira ne'ebé la koresponde ona ba realidade ba dezenvolvimentu hosi instituisaun FDTL nian, lei sira ne'e tenki hetan revizaun", hatete hosi xefe Estadu, Francisco Guterres Lu-Olo, ba Lusa bainhira hala'o vizita dahuluk ba komando Falintil-Forsa sira Defeza Timor-Leste (F-FDTL) iha Díli.

"Bainhira iha lei ruma ne'ebé kona ba sira ne'ebé ho tinan 60 tenki desmobilizadu, ha'u hanoin katak asuntu ne'e tenki estuda ho di'ak hodi hametin forsa armada sira no nune'e bele dezenvolve iha futuru", nia explika.

Asuntu ne'e hanesan importante tebes tanba iha loron 06 Outubru hotu ona mandatu hpsi komandante prinsipal na'in tolu hosi F-FDTL nian, ne'ebé nia permanénsia iha kargu "aumenta ona" aleinde duké ida ne'ebé maka lei hatete no liuhosi alterasaun ida ho dekretu ba estatutu militar sira nian.

PM: Sivizmu hosi populasaun no komportamentu hosi líder sira fó hakmatek

Primeiru-ministru timoroan afirma iha loron-segunda ne'e katak komportamentu hosi líder polítiku sira no sentidu síviku maka'as hosi populasaun permiti daudaun atu kampaña ba lejislativu sira iha loron 22 Jullu sei la'o ho hakmatek no lahó insidente.

"Buat ne'ebé maka impresiona ha'u maka sentidu síviku hosi populasaun. Ami ba zona rural sira no ami haree fila ida hosi uma sira ne'ebé tau bandeira interkaladu hosi partidu oioin no ema sira aseita diversidade sira hosi opsaun polítika", Rui Maria de Araújo hatete ba Lusa.

Kampaña sira hosi partidu oioin halo daudaun "ho dignidade" no forsa sira ne'ebé halo parte iha kandidatura hetan daudaun "oportunidade hodi aprezenta sira nia programa" no, maski balun "uza lianguajen ne'ebé forte liu, ladún forte, ho tonalidade jeral hosi partidu sira maka tenta fó máxima explikasaun ba populasaun kona-ba sira nia programa no saida maka sira hakarak halo bainhira manán eleisaun sira".

Rui Araújo, ne'ebé ko'alia ba Lusa bainhira hakotu vizita ida ne'ebé niq halo hamutuk ho Prezidente timoroan ba kuarte-jeneral Forsa Defeza nian (F-FDTL) iha Díli, hatete katak ba Governu "hanesan motivu orgullu nian" tanba "polítiku sira no mós sidadaun sira, hanesan mós forsa defeza no seguransa sira iha komportamentu ne'ebé di'ak tebes".

Hanoin "iha futuru nasaun no povu nian", Xanana hanoin hikas avó sira

Hosi António Sampaio

Iha ponta hosi biti verde, iha palku ne'ebé monta iha resintu iha besik iha igreja Manatutu nian, iha kilómetru 65 hosi leste Díli nian, Xanana Gusmão haruka bolu entre ema barak nia leet katuas ida no ferik ida.

Loloos ne'e hanesan momentu nonook nian, hodi hanoin ba mártir timoroan sira, antes hahú komísiu ba dala 17 hosi CNRT nian iha kampaña ba lejislativu loron 22 Jullu, ne'ebé sei "ko'alia ba futuru nasaun nian, futuru hosi povu nian".

Katuas, ho xapeu 'cowboy', ho ferik ho fuuk metan ne'ebé kesi, sira na'in rua uza kamizola azul kampaña hosi Congresso Nacional de Reconstrução Timorense (CNRT) nian ne'ebé iha kotuk iha '7' mean - pozisaun iha boletin votu nian - hamriik iha líder nia sorin ne'ebé ko'alia ba multidaun.

"Bainhira ita ko'alia kona-ba futuru ita labele haluha pasadu. Ha'u senti haksolok haree iha ne'e joven barak. Maibé ita tenki hanoin mós ita nia "katuas sira", "ferik sira", ita nia avó sira", nia explika ba ema rihun resin ne'ebé iha minutu balun antes hakilar viva ba partidu no ba nia líder.

Kampaña profisional no aperfeisoadu tebes ne'ebé nunka akontese

Hosi António Sampaio

Hosi marketing polítiku to'o uza "drone", hosi debate sira iha estúdiu ho kualidade di'ak sira to'o intervensaun maka'as iha rede sosial sira, kampaña ba lejislativu sira 22 Jullu nian iha Timor-Leste sai daudaun hanesan ida ne'ebé profisional tebes ne'ebé nunka akontese.

Profisionalizasaun ida ne'ebé haree liuliu iha partidu boot sira - Congresso Nacional da Reconstrução de Timor-Leste (CNRT) hosi Xanana Gusmão ho Frente Revolucionária do Timor-Leste Independente (Fretilin) hosi Mari Alkatiri.

Hanesan ezemplu, iha Díli, ne'ebé partidu rua seidauk marka prezensa dezde inísiu kampaña nian, ne'ebé hahú iha 20 Juñu, nia prezensa haree maka'as ho "outdoor sira" ho dimensaun boot sira ne'ebé maka enfeita iha avenida prinsipal sira.

Kartaz sira ne'ebé maka domina hosi CNRT ho Fretilin, maibé iha mós sira seluk, hosi partidu timoroan ne'ebé antigu liu, União Democrática Timorense (UDT), no mós hosi partidu foun, Partido da Libertação Popular (PLP), lidera hosi eis-Prezidente Taur Matan Ruak.

Austrália ho Portugal sei aumenta koperasaun kona-ba Timor-Leste

Autoridade australianu sira hakarak aumenta koperasaun ho Portugal kona-ba Timor-Leste, informa hosi sekretáriu Estadu hosi Komunidade Portugeza sira, José Luís Carneiro, iha loron-segunda ne'e.

Hafoin enkontru sira ho entidade federal no lokal australianu sira, hatudu ona "disponibilidade hodi kopera liután ho Portugal iha polítika sira ne'ebé diresionadu ba koperasaun no dezenvolvimentu relasionadu ho Timor-Leste", hatete hosi responsável ba Lusa.

"Iha vontade hodi hametin koperasaun triangular entre Portugal, Austrália ho Timor-Leste iha área sira investigasaun no dezenvolvimentu nian, ne'ebé artikuladu ho kapasitasaun institusional hosi ator oioin hosi administrasaun públika timoroan nian", nia afirma.

Antes hakotu vizita dahuluk ba nasaun - ne'ebé vizita mós Sydney, Melbourne ho Canberra -, Carneiro aponta mós disponibilidade ne'ebé hatudu hodi diversifika komérsiu entre Portugal ho Austrália, hametin "koperasaun iha ámbitu komérsiu no investimentu sira iha área enerjia renovável sira, iha teknolojia informasaun nian no komunikasaun, iha turizmu no iha área viñu nian".

Governu Canberra nian hatudu interese hodi kopera ho "autoridade konsular portugés sira no movimentu asosiativu", hodi dezenvolve programa sira inovasaun nian iha apoiu sosial ba ema katuas-ferik sira no ema kiak sira, no mós hodi dezenvolve programa inovador sira ensinu lian portugeza nian ba sira ne'ebé joven liu", nia hatutan.

Tuir sekretáriu Estadu, iha asosiasaun ho orijen portugeza hamutuk 50 resin iha Austrália.

SAPO TL ho Lusa