Timor ameasa devolve ajuda esterna ne’ebé Austrália fó tanba hadau malu kona-ba Tasi Timór

Governu Timór ameasa ona atu devolve osan dolár milloens 80 ne’ebé simu hanesan ajuda esterna, ba fali Austrália karik Kambera kontinua ho argumentu katak fundu ne’e ekivale ba impostu relasiona ho gazodutu Bayu Undan nian. 

Tuir fonte ezekutivuTimór nian haktuir ba Lusa katak Governu rejeita “maka’as” ho argumentasaun foun hosi deklarasaun públika australiana nian kona-ba kestaun ne’e.

Díli protesta ho pozisaun Austrália nian, bazeia ba komunikadu ida ne’ebé iha finál fulan setembru ministra Negósiu Estranjeiru, Julie Bishop ho prokuradór jerál George Brandis ne’ebé argumenta katak ajuda estrenál ne’ebé kada tinan haruka mai Timor-Leste “la’os impostu gazodutu nian”.

“Dalaruma Kamberra sujere katak ajuda esterna ne’ebé sai hosi bolus kontribuinte australianu nian hodi ajuda Timor-Leste, afinál, impostu hosi empreza privada ida nian”, dehan fonte hosi Governu Timór.

“Timór lasimu ho argumentasaun katak ajuda esterna sai fali ba impostu. Karik sira mantén ho pozisaun ne’e maka Timor-Leste sei devolve fali osan ho valór refere ba Kamberra. Ami lasimu bainhira kontribuisaun orsamentu ne’ebé Austrália fó hanesan ajuda esterna, ikus mai dehan fali hodi selu impostu empreza nian”, hatutan.

Pozisaun timor-oan nian, haktuir lolos tiha ona iha karta ne’ebé haruka ba Kamberra, tuir fonte refere dehan.

Tuir Timor-Leste, problema hosi disputa ne’e maka relasiona ho “interpertasaun lolos hosi artigu 8(b) kona-ba Akordu Tasi Timor nian ne’ebé haktuir katak “oleodutu ne’ebé ba Timor-Leste sei ho jurisdisaun Timor-Leste nian” no “oleodutu ne’ebé pertense ba Austrália, sei ho jurisdisaun Austrália nian””.

Espesifikamente, kestaun hadau malu ne’e relasiona ho gazodutu entre kampo Bayu Undan, iha Tasi Timór nomós Darwin. 

Iha finál fulan setembru, Díli fó sai ona rekursu ba arbitrajen, hodi halo argumentasaun katak hakarak halo diálogu hodi rezolve impase kona-ba jurisdisaun, maski esforsu ne’ebé halo “lahetan rezultadu di’ak”.

“Ba Timor-Leste dalan ida de’it hodi rezolve litíjiu ne’e maka submete problema refere ba iha Tribunál Arbitrál ida, tanba bazeia ba Artigu 23 kona-ba Akordu Tasi Timór nian”, tuir komunikadu Governu nian.

Hanesan resposta Governu Australia sente “ladi’ak” ho desizaun ne’ebé ezekutivu timor-oan foti hodi hahú hala’o prosesu arbitrajen, hodi dehan katak nasaun rua ne’e tenke buka ko’alia ba malu ho “di’ak” atu nune’e bele rezolve kestaun hadau malu ne’e “liu hosi diálogu, duké ho fali asaun legál”.

“Governu Austrália ho Timór nian, atua beibeik katak Austrália iha jurisdisaun eskluziva ba iha gazodutu, inklui kona-ba kestaun tributária, hanesan buat ne’ebé konsistente ho Akordu Timór nian”, hatutan tan iha komunikadu australiana.

“Hanesan reprezentante australiana nomós timor-oan sira sira konkorda katak kada tinan Timor-Leste simu ona dolár milloens 8 hosi Austrália, desde gazodutu hahú funsiona iha 2006, la’os Timor-Leste simu fali impostu hosi gazodutu nian”, tuir komunikadu haktuir.

Timor-Leste rejeita pozisaun australiana ne’ebé konsidera tuir artigu 8 katak “fó absoluta no eskluziva jurisdisaun”, nune’e mos kona-ba tributasaun “ba iha estensaun oleodutu esportasaun nian nomós parte oleodutu ne’ebé situa iha Área Konjunta ba Dezenvolvimentu Petrolífera (ACDP)”.

Tuir Governu Timór, pozisaun Austrália nian ne’e “halo atu Timor-Leste lakon direitu jurisdisaun ba iha oleudutu nomós atividade hirak ne’ebé hala’o kona-ba ne’e”, hanesan buat ne’ebé “lakonsistente ho letra nomós espíritu hosi Akordu nian”.

Ba Estadu Timór, prinsípiu “jurisdisaun ne’ebé fó sai hanesan kompromisu ba konkluzaun hodi halo Akordu refere”, no dokumentu ne’e rasik hanesan “solusaun temporária ida ne’ebé halo atu parte rua hetan benefísiu hosi esplorasaun rekursu ne’ebé ezisti ba iha área maritime no ne’ebé oras ne’e hadau malu hela”.

SAPO TL ho Lusa 

Indonézia aseita ajuda internasionál hodi kombate inséndiu

Indonézia aseita ona ho ajuda internasionál hodi kombate inséndiu florestál no agríkola ne’ebé kria suar durante semana ida resin ba iha nasaun viziñu.

Inséndiu ilegál, uza hodi hamoos terenu ba plantasaun iha Indonézia, maibé afeta ona nasaun viziña hanesan Malázia ho Singapura, tanba kria suar maka’as no hamenus kualidade ar no tenke hapara atividade eskola nomós eventu ba iha nasaun seluk.

Jakarta haruka ona efetivu rihun 25 no aviaun hodi hapara ahi iha illa Sumatra no parte indonézia Bornéu, maibé bombeiru sira lakonsege hamate ahi hirak ne’e.

Iha inisiu, autoridade indonézia nian lakohi atu simu ajuda hosi Singapura – tanba nasaun problema entre nasaun aumenta --, maibé tuir fonte ofisiál sira ohin dehan katak Prezidente Joko Widodo fó sai katak aseita ho ajuda internasionál.

"Ami konkorda ona atu serbisu hamutuk ho parseiru barak hodi reforsa ami-ninia esforsu kombate inséndiu ne’ebé akontese", dehan ba AFP portavós hosi Ministériu Estranjeiru Indonézia, Arrmanatha Nasir.

"Ami serbisu hamutuk ho nasaun barak, inklui Singapura".

Nasaun hanesan Malázia, Rúsia, Austrália ho Xina mos sei fó ajuda.

SAPO TL ho Lusa 

FRETILIN HUSU REDUS OSAN PN

Xefe Bankada Parlamentar FRETILIN iha Parlamentu Nasionál Deputadu Aniceto Guterres husu orsamentu Parlamentu Nasionál ba tinan 2016 tenki halo korte barak ba planu sira ne’ebé desnesesariu hodi nune’e bele halo poupansa ba orsamentu jeral estadu 2016 nian.

Deputadu Opozisaun dehan ida ne’e, tanba dadaun ne’e PN hahu halo diskusaun orsamentu privativu tinan 2016 nian ne’ebé ho valór milloens $15.7 liu fali pakote fiskál ne’ebé governu deside ba PN ho montante Milloens $9.9.

Tanba ne’e, tuir Aniceto katak, importante tebes atu halo rasionalizasaun ba orsamentu PN ho kuidadu tanba situasaun ida ne’ebé akontese dadauk iha tinan 2015 halo folin mina rai tun.

“Hau la hatene derepenti ita hasoru krize hanesan rai sira seluk ne’e parese ita mate liu kedan tanba ita la hatene antisipa problema ne’ebé bele mosu I preve hela aban bainrua bele mosu, ita hatene hela katak buat ne’e potensiál hela bele akontese,” dehan Aniceto iha debate Jeneralidade orsamentu privativu PN (05/10/2015).

Tuir komunikadu imprensa ne’ebé JN- Diário asesu katak, Governu fó hanoin ba estadu tomak tenki akautela situasaun ne’e, tanba ne’e, Aniceto dehan, PN mak tenki hahu ona halo rasionalizasaun ba Orsamentu Jéral Estadu.

Aniceto dehan, Bankada FRETILIN konkorda atu koa osan PN nian husi milloens $15.7 tun ba Milloens $13.5, atu koa halo nusa? no koa husi ne’ebé? parlamentu mak tenki hahu.

Hare ba ejekusaun orsamentu PN tinan 2015 foin atinji 47%, tuir Aniceto , ida ne’e hanesan razaun ida atu halo kortes tuir kapasidade ejekusaun Parlamentu Nasionál nian.

“Orsamentu Parlamentu nia ejekusaun 2015, too 25 Setenbru foin atinji 47% , hau la hatene Outobru no Novenbru ne’e osan ita atu fakar deit karik (ida restu ne’e). Governu ezije estadu tomak atu halo rasionalizasaun, ita nia benses servisu ne’e sae tan, maibé liga ho kapasidade ejekusaun minimu tebtebes, ita atu defende mantein nafatin mos ita laiha autoridade atu defende,” dehan Aniceto.

Estrutura Orsamentu PN nian ba tinan 2016, boot liu iha kapital benses servisu, kapital dezenvolvimentu aloka $30 mill atu hadia uma pre frabrikadu,Aniceto kestiona planu PN nian atu hari edefisiu PN nian.

“Orgaun soberanu, uma fukun (parlamentu nasionál) ita agora perokupa hela deit (uma pre-frabrikadu), pelumenus planu iha tiha ona, agora ita la hatama planu halo nusa! Uluk segundu legislatura, iha prezidenti (Saudozu Lasama) parese tau $10 milloens tinan tinan investe, ita agora kontinua tanba gasta osan barak ona hodi halo perparasaun maibé agora nein hanoin kona atu halo edefisiu parlamentu nasionál. Agora hau hakarak hatene projetu ida atu halo edefisiu parlamentu nasionál ne’e too iha ne’ebé ona?,” dehan Aniceto.

Iha parte seluk Bankada FRETILIN, husu auditoria husi PN ou autoridade kompetente ruma relasiona ho sunvensaun ba bankada sira ne’ebé iha asentu iha PN.

“Tenki implementa se bele antes tinan ida ne’e remata (tenki) halo auditoria labele hein too 2016” dehan Aniceto.

Viajen ba rai liur , Aniceto dehan, tenki rasionaliza tanba viagen sira ne’e balun desnesesariu, delegasaun sira ne’e boot demais gasta osan maibé la hatene benefisiu too iha ne’ebé? atens PN julga governu , PN tuir lolos tenki julga uluk nia an.“Politika estudu komparativu ne’e diak liu hasai tiha, se ita hakarak halo kontensaun ne’e, halo kontensaun ba buat ne’ebé laos prioridade ba buat ne’ebé tuir lolos ita bele muda, laos viagen hothotu maibé estudu komparativu ne’e ita (persija) hare fila fali, iha segundu legislatura tinan estudu komparativu tinan lima tomak, mais kestaun mos ita hakarak hatene rejultadu ne’e saida?,” dehan Aniceto.

Iha fatin hanesan, Deputadu Bankada CNRT Arão Noé apoio ideia FRETILIN hodi hatun orsamentu PN ba tinan 2016 tanba governu halo jestaun ida makas redus orsamentu jeral estadu tinan 2016 husi billoens $1.5 billoens tun ba billoens $1.3.

“Se ita nia proposta ne’e (milloens $15.7) too iha governu, governu sei dehan parlamentu defende deit sira nia interese la hare ba interese nasionál, ita ejize fatin seluk hatun depois ita nian mantein ita rasik mak minimiza ita nia an,” dehan Arão.

Hatan ba kestaun ne’e, Prezidenti Parlamentu Nasionál, Vicente Guterres hatete, perokupasaun ne’e pertinente maibé importante funsionamentu PN tenki kontinua lao.

“It a bele diminui too iha ne’ebé deit, maibé labele kompremente funsionamentu orgaun soberania Parlamentu Nasionál,” dehan Vicente.

Tuir Vicente katak, proposta orsamentu PN milloens $15.7 ne’e hatudu katak PN hetan 1% husi OJE 2016 nian ne’ebé governu deside montante billoens $1.3.*/eni

Jornal Nacional

HATENE HALO, HATENE RESPONSABILIZA !

Jornal Nacional, editorial

Sai ukun nain, sai ministro ka ministra, sekretaio Estadu ka asumi kargu politiku iha governu, parlamentu, ka orgaun soberanu sira seluk nee orgullu boot ida ba kada sidadaun, maibe orgullu nee nakfilak ba trizteza kuandu durante asumi kargu nee komete iregularidades, pior liu komete korupsaun.

Iha governasaun Fretilin, Lideradu Mari Alkatiri husi tinan 2002 too 2006, kontinua ho Estanislau no Jose Ramos Horta nebe too iha 2007, laiha membru governu ida mak komete korupsaun.

Depois de tama ba IV governu konstitusional, Governu Aliansa Maioria Parlamentar, lideradu Kayrala Xanana Gusmão, membrus governu barak mak iha fileira tama Komisaun Anti Korupsaun (KAK).

No kazu Korupsaun nebe involve membru governu nebe desizaun tribunal tun ona mak, eis Ministra Justisa, Lucia Lobato, eis Ministra Edukasaun, João Cancio Freitas. Nunee mos membru governu nebe ninia kazu sei prosesu nia laran, eis Ministra Finansas, Emilia Pires, eis Vise Ministra Saude, Madalena Hanjam no mos balu sei iha prosesu investigasaun KAK nian.

Husi numeru kazu korupsaun nebe akontese iha IV governu konstitusional ka Governu Aliansa Mairia Parlamentar, CNRT, PD, ASDT, PSD no UNDERTIM, bele dehan governu Aliansa Maioria Parlamentra nee governu koruptu tamba kazu korupsaun kontra membru governu akontese iha governu AMP.

Alegasaun korupsaun ka membru governu komete korupsaun, karik sira hanoin katak sira nia xefi governu, Xanana atu defende sira tan nee halo asneiras tun sai, foti projetu estadu nian fahe ba familia, amigos ka parentes.

Membrus governu sira terlena ho asaun Xefi Governu Xanana Gusmão nebe fahe projetu eletrisidade ba Veteranu sira no single sources projetu estadu n ian ba kompanhia sira hodi ezekuta.

Agora, membru governu atu tuir esitlu (gaya) Xanana Gusmão nian lao sala tiha dalan. Foti proejtu sira mee ba familia sira, kolegas sira ho objetivu atu hetan jatah ka porcentu nebe ikus mai tenki responsabiliza iha lei nia oin.

Asves membru governu sira nee mos inosente, asina dokumentus la verifika didiak asina deit nee mak konsekuensia mak nee, simu alegasaun no ikus mai tenki responsabiliza ba aktu iregularidade nee iha lei nia okos.

Maske tribunal hatun ona sentenza hodi arguido kumpri maibe arguido mos iha direitu atu defende an, apresente rekursu ba tribunal rekursu atu bele evalua ba desizaun tribunal primeiria instansia.

Aprezenta rekursu ba iha tribunal rekursu nee diak maibe la signifika prosesu hotu iha tribunal rekursu hatun, lae, asevs aumenta depende ba grau komete krime. Juis la deside arbiru maibe baseia ba evidensia nebe iha.*

PM RUI LA POUPA OSAN ESTADU

Diretor Ezekutivu Luta Hamutuk, Mericio Akara hateten katak, Primeiru Ministru Rui Maria de Araújo mak viola maka’as politika ne’ebé nia hasai dehan halo poupansa ba despezas Estadu. Tanba salariu asesor PM Rui kada fulan $10.000, bo’ot liu fali salariu Prezidente Republika (PR) ne’ebé simu US$ 5000 kada fulan.

“Ita nia PM   Rui Maria de Araujo koalia A mas nia pratika ne’e oin seluk. Ne’ebe ha’u ladun optimista ba nia mak halo mudansa, maibe justru nia hakarak halo propaganda ema hanoin nia diak dehan poupansa osan Estadu, maibe agora nia la’o keliling ho rombongan bo’ot,”haklaken Mericio Akara ba Jornalista iha Farol, Dili, Tersa (6/10), bainhira husu Sosiedade Sivil nia haree kona ba politika popupansa ba despezas Estadu ne’ebé fo sai husi PM Rui ne’e.

Diretor Ezekutivu Luta Hamutuk, Mericio Akara deklara, PM Rui hatama asesor ho salariu bo’ot signifika nia la haree ba realidade ne’ebe nia rasik koalia. Ho ida ne’e, nia dehan, bele halo deit ba ema seluk, maibe iha nia gabinete rasik viola hela.

“Ema numeru 1 iha Timor ne’e nia salariu fulan ida 5000, agora PM Rui Maria rekruta nia ema sira ne’e balun simu $ 5000, balun simu $9000 balun to’o 10.000, labele halo hanesan ne’e,”esplika Mericio Akara.

Tuir Mericio Akara, lolos ne’e salariu Prezidente Repúblika mak $10.000, tanba povu mak hili.

“Agora rekruta ema ida mai mak hetan salariu bo’ot atu halo servisu saida. Balun dehan liga fali mai Sosiedade sivil, maibe ami koalia ho nia mos bilan bo’ot ida, ne’ebe selu karun-karun ne’e ladun produtivu,”afirma Akara.

Mina Timor maran afeta krizi

Nune’e mos, Diretor Ezekutivu Luta Hamutuk, Mericio Akara afirma katak, mina Timor maran bele afeta ba krizi finanseiru TL nian iha tinan 2021.

“Se ita halo prediksaun tuir realidade 2021 ne’e bele krizi mosu krizi ekonomia kuandu la iha setor seluk sustenta ita nia rendimentu,”esplika Mericio Akara ba Joranalista iha Farol Dili, Tersa (6/10), wainhira fo nia esplikasaun ba mina matan kitan ne’ebe mak komesa maran ba dadauk ona.

Mericio Akara,   rekonhese mina matan kitan atu maran ne’e realidade duni.

“Ami koalia ho sira Autoridade Petroleu sira mos rekonhese no sira mos lansa informasaun iha website,   ne’ebe agora kitan nian la fan, tanba produsaun menus liu,   depois folin mina internasional sa’e, entaun senti rugi bainhira ita fan,”dehan Akara.

Akara hatutan, mina menus ne’e la’os kitan deit, maibe Bayu undang mos menus. “Fofoun loron ida Bayu undang nian produs 90.000 to’o 120.000 por baril depois hodi fan, maibe agora tun liu ba 30.000 baril loron ida. Tanba ne’e ita halo predisaun tuir realidade ida ne’e 2021 bele krizi ekonomia,”dehan tan Akara.

Nia informa, agora ne’e US$17,1 fundu mina rai, entaun kada tinan Governu foti US$1.3 billoens to’o 1.5 biloens to’o 2021 rendimentu menus depois osan ne’ebe mak iha rekening fundu mina rai mos tun la iha rendimentu seluk,   ne’e bele hamosu krizi finanseiru iha tl.

Lolos ne’e, Akara dehan, Estadu liu-liu Governu lalikan taka informasaun ne’e demais ba publiku, nune’e ema bele hahú debate hodi buka alternativa seluk mina ho gas ne’e.

“Ita promeve kedas setor turismu ka setor peskas, tasa rai laran tenki hasa’e maka’as lalais, industria para to’o 2021   ita iha ona alternativa seluk,”tenik Akara.

Governu sosa aviaun komersial la refleta ba povu

Luta Hamutuk mos konsidera, planu Governu atu sosa aviaun komersial hodi tula pasajeirus ba Oecusse la refleta ba povu nia moris, maibe intrese ba ema bo’ot ka elite sira deit.

“Agora ita hanoin atu sosa aviaun ne’e se’e mak atu sae, husu karik atu ba halo sa ida, se’e ita hola aviaun ne’e so fasilita deit ita nia a’an laos povu nia nesesidade, maibe fasilita deit bo’ot sira nia intrese, ne’ebe ladun tuir priodade povu nian,”informa Mericio Akara.

Ne’e duni preokupasaun husi Luta Hamutuk ne’e mak Governu tenki preokupa uluk povu nia moris duke preokupa maka ema bo’ot sira mai husi rai liur.

“Ema b’oot sira husi rai liur ne’e laos ita nia populasaun nusa maka populasaun husik susar kiak hein hanesan ikan lata, agora sira mak fasilita sira nian, ida ne’e ladun iha sentidu hadomi povu ne’e,”tenik Akara. Avi

Jornal Nacional

FRETILIN HUSU ALKATIRI HADIA KUALIDADE JARDIM LIFAU

Membru Parlamentu Nasional (PN) husi Bankada FRETILIN, Manuel Castro, husu ba Prezidenti Zona Economica Espesial Sosial Merkadu (ZEESM), Mari Alkatiri, nudar mos Sekretariu Jeral partidu FRETILIN atu tau atensaun hodi hadia kualidade Jardim Lifau.

Membru Bankada FRETILIN, Manuel Castro hanesan membru komisaun E ne’ebe trata asuntu infrastruktura, transporte no telekomunikasaun hatete, tuir sira nia fiskalizasaun husi Komisaun E nian ba iha tereinu hare no nota katak, projetu ZEESM hahu husi auto estrada to elektrisidade lao ho diak, maibe ba jardim mak sei lao sabraut hela.

Jardim Lifaun nia ezekusaun la’o besik ona 78%, maibe presiza hadia buat balun, tanbas iha item balun la’op ulun-ain hela.

“Ami husu ba iha Prezidenti ZEESM atu hadia kualidade jardim Lifaun, tanba iha ne’eba iha uma oan balun maka seidauk halo,” hateten Deputadu Manuel Castro ba jornalista sira iha PN, Tersa (06/10/2015).

Komisaun E ba halo fiskalizasaun iha Oecusse durante loron 4 hodi ba haree mos irigasaun iha Mota Tono ne’ebe iha ona faze preparasaun.

Deputadu ne’e mos esklarese katak, fatin ba preparasaun atu simu bainaka ne’ebe maka Governu dehan atu halo andar lima, maibe la konsege halo, maibe sira foti fali desizaun ida katak, atu responde uluk lai emerjensia entau sira halo espesie de kobi house ne’ebe maka pre-fabrika husi Singapura.

Konaba serbisu elektrisidade, deputadu ne’e dehan ema tenkinu husi Timor-oan ladun, maibe ema kuaze mai husi rai liur maka barak ,tanba ne’e persija duni ema tekniku, maibe konaba serbisu ne’e trabailhador Timor oan deit, mais ba mega projetu bot sira ne’e ema mai husi rai liur hotu deit.

“Konsultan ne’ebe maka ami hasoru iha ne’eba barak liu mai husi Portugal, konsultan sira ne’e maka kaer obra hanesan aerportu, portu, ponte Tono ne’e husi ZEESM maka kontratu rasik,” dehan Manuel.

Iha fatin hanesan membru komisaun E deputado Paulino Monteiro hatete, programa ne’ebe maka ZEESM halao iha Oecusse hahu lao dadauk ona no sira prepara hela atu implementa.

Ho projetu ne’ebe maka barak tebes-tebes deputadu ne’e husu ba ZEESM atu kuidadu osan Estadu halo didiak atu nune’e projetu hirak ne’e bele lao ho susesu.

‘’Husu ba Prezidenti ZEEMS atu   halo atuasaun ida regurozu ba implementasaun ejekusun orsamentu ba ZEESM ne’e rasik, tanba orsamentu ba ZEESM ne’e bot tebes-tebes,” haklaken Deputado Paulino. Nia

Jornal Nacional

POVU KUDA GOVERNU SOSA ‘HELA NARAN’

Programa Povu Kuda Governu Sosa, ne’ebe estabelese iha IV Gopvernu Konastityusional no nia kontinuasaun to’o mai iha V Governu Konstitusional ne’e, ‘hela naran’ deit ona. Basa, povu to’os nain sira nia ai-han lokel dodok no fohuk deit ona iha kintal laran no iha suku-suku izoladu sira.

Diretur Exekutivu Asian Justice and Rigth (AJAR), Jose Luis Oliviera, konsidera katak, slogan Povu Kuda Governu Sosa ne’e kapas tiha, maibe Governu la hatene halo mekanismu diak hodi halo failha tiha programa kmanek ida ne’e.

Jose Luis Oliveira hateten, wainhira Governu trata ho igual programa Povu Kuda Governu Sosa ne’e, maka sei fo impaktu positivu boot ba ekonomia komunidade to’os nain sira nian, tanba to’os nai nsira hatene katak, ai-han ne’ebe sira kuda fo rahun diak ba sira, tanba Governu prontu atu sosa. Ironia liu, projetu ne’e lao la ho seriu desde inisiu kedas Governu sosa mos ba budu deit iha armajen to’o at deit, tanba Governu mos la dezenvolve mekanismu distribuisaun.

“Bainhira sosa tenki iha jetsaun merkadoria, maibe ita nia Governu liu husi Ministeriu Comercio, Industria no Ambiente (MCIA) la hetene distribuisaun ba produtu lokal,’’ hateten Jose Luis de Oliveira ba jornalista sira iha nia knar fatin, Farol, Segunda (05/10/2015).

Nia hatutan, MCIA sai intermediariu ba porudutu lokal, tan ne’e MCIA tenki kopera ho Ministeriu Edukasaun hodi distribui ba programa merenda eskolar, ho Ministeriu saude hodi distribui hahan liu-liu modo sira ba hospital no mos ba Sekretarido Estadu Defeza (SED) hodi distribui fos ho modo ba kajerna F-FDTL hodi tein.

Husi sorin seluk, Diretur Exekutivu Logistika Nasional MCIA Jacinto hatete, programa povu kuda Governu sosa agora lao dadaun hela, maibe depende ba iha orsamentu Estadu ne’ebe mak Governu aloka mai iha ministeriu.

Nia esklarese katak, konaba kompania ne’ebe mak kontratu ba iha faze primeiru no agora faze segundu ninia mos lao dadaun hela sira hatama produtu lokal mai iha ministeriu ne’e agora dadaun lao hela, liu-liu produtu hare kulit no batar.

“Durante ne’e sira nia koperasaun ne’e lao diak hela ho Ministeriu Agrikultura nian, tanba sira mak kuda no koileta, depois ami deside hamutuk konaba ninia presu husi povu agrikultura ne’e hira no presu atu tama ba iha merkadu ninia ne’e hira,’’ esplika Jacinto hodi responde preokupasaun Jose Luis Oliveira nian.

Jacinto mos informa katak, oras ne’e dadaun armajen iha Dili hamutuk 6, iha Maliana 1 i ba futuru sei halo koperasaun diak ho Governu China atu loke tan sentru ida iha Baucau no ida seluk iha Natarbora.

Miss Turismu La Iha Rezultadu

Antes ne’e, Diretur Exekutivu AJAR, Jose Luis Oliviera, mos afirma katak, programa Miss Turismo ne’ebe maka Ministeriu Turismu, Arte no Kultura (MTAK) realize, tinan hirak liu ba, la iha benefisiu no hanesan esplorasaun feto ba interese privadu.

Nia hateten, MTAK organiza tiha programa Miss Turismo, maibe to’o agora la hetene Miss Turismo sira nia paradeiru no agora sira halo saida.

Jose Luis Oliveira hateten, progaram miss ne’e dala barak kontraditoriu ho valor humanu ne’ebe Timor Leste defende ne’ebe hakribi esplorasaun ba intrese privadu nian, tanba ne’e’ mak uluk sosiadade sivil barak mak protesta programa ne’e.

‘’Hau sei hanoin kona bainhira sosiade sivil halo protesta ba programa miss ne’e ita nia maun Mari Alkatiri apoiu hodi dehan miss Timor ne’e diak, tanba sira ne’e atu embasador Timor Leste sei promove Timor iha rai liur, agora hau nia perguntas miss turimu ne’e ita hili iha tinan kotuk ne’e sira ba promeve Timor iha nebe ona, realidade sira ba sai faunsionario bain-bain ka balun sai resepsionista iha Ministeriu Turismu Arte Kultura (MTAK), ita gasta osan bot organiza eventu miss turismu atu rekrkuta deit staf ba iha MTAK, hau mosdiskunfia iha tendensia ba trafiku humanu iha misn ne’e, tanba ministeriu balun uza miss ne’e buka feto kapas depois fo ba maun bot balun, hau kulia hanesan ne’e tanba hau iha foto, ida ne’e ita hanesan mafia agora diskunfia ne’e de faktu lolos ema sira mis turimus ne’e la hetene agra halo saida,’’ afirma Jose Luis Oliveira. nia

Jornal Nacional

Lee mos iha Jornal Nacional

OJE 2014, Governu Fó Prioridade Mos Ba Roo Foun

Servisu intelejénsia fraku, Alcino-Juga Gama salva ona ukun na’in balu

Juventudi Distritu Dili Hala’o Konferensia Nasional

Desportu: SEINAS PALESTINA HAKSOLOK HO TIMOROAN NIA HOSPITALIDADE

DILI - Selesaun Nasional(Selnas) Futebol Palestina sente haksolok bainhira sama ain iha nasaun ne’e, tamba timoroan sira simu ho hospitalidade.

“Ami mai iha ne’e, simu ho laran diak hosi tmoroan sira. Povu laran diak, ema timor ema diak, maske foin ukun aan, buka hela hadia sira nia moris,”.

Treinador Selesaun nasional Palestina, Abdal Nasser Barakat akompañadu ho kapitaun ekipa nasional palestina, Imad Zatara esperesa lia hirak ne’e ba jornalista sira iha Maubara Room Timor Plaza (07/10).

Relasiona ho jogu aban, iha stadium Municipal Dili, sira observa ona Timor Leste ninia jogu no sira nota timoroan barak joga diak no iha mo snivel nebe kualidade.

“Ami haree ona sira joga ho Uni Emirate Árabe, jogador balun esperiensia iha liga Tailandia no Liga Arabe,”

Nia hatutan, Jogu ida ne’e atu suporta mós ba parte hotu hodi hatudu timoroan sira nia jogu. “Hau sente sira ekipa diak, maske ranking Timor foin sa’e, mais hau fiar sira iha future bele sai diak liu tan, tanba ekipa ne’e joga iha kapasidade diak,” tenik Treinador Palestina ne’e.

Timor Post

Lee mos iha Timor Post

Timor Labele Nakdoko Kontra Palestina
Timor Leste Vs Palestina, Adeptus Limita ba Estadium laran

Treinador Palestina Reseiu Ekipa Timor Leste

TDD Kontinua Julga Emilia-Madalena, Deklarasaun Eis MS Hamosu Pergunta ba MP

DILI - Deklarasaun sasin Nelson Martins iha julgamentu Emilia ho Madalena nian la hanesan tiha ho deklarasaun neebe antes nee nia fo iha Ministeriu Publiku (MP).

Liu husi audensia julgamentu ba loron tolu nee halo MP la satisfas ho deklarasaun Eis Ministru Saude nian neebe dehan nia laiha konesementu kona ba proposta iha 2012 ba kontratu B neebe arguida Madalena husu ajudikasaun direita ba osan ho valor $2.004,100,00 (dolar amerikanu millaun rua rihun haat atus ida), hodi sosa kama atus haat (400) ho osan hamutuk USD 995,000,00 (dolar amerikanu rihun atus sia sianulu-resin-lima).

Maibe antes nee sasin nee deklara iha MP katak nia iha konesementu kona ba proposta nee maibe liu husi karta depois hetan aprovasaun husi eis ministra finansas Emilia. Tanba deklarasaun arguidu nian iha tribunal la hanesan iha MP, halo prokurador hirus hodi dehan karik sasin hetan ameasa husi ema ruma bainhira atu mai fo deklarasaun iha tribunal.

Durante audensia Sasin Nelson Martins hatete, iha 2011 nia halo duni viagen servisu nian ba Australia ho membru governu seluk hanesan ministru educasaun, ministru economiu desenvolvimentu no sira seluk tan. Iha neeba tanba iha tempu livre nia aporveita oportunidade nee hodi halo kontaktu liu husi telefone hodi hasoru malu ho kompania Macs Metal Craft hodi hare direita fabrika kama neebe atu fornese ba iha hospital nasional guidu valadares nee iha duni ka lae. Kama refere ho tipu eletrika neebe iha kama nia sorin iha ai neebe bele satan netik pasiente bainhira fila an labele monu kuadu dukur.

Iha 2011 arguida Madalena halo pedidu pagamentu ba kompania ba iha arguida Emilia Pires hodi aprova kedas USD 1.300.000,00. Nunee arguida Emilia Pires fo hatene ba arguida Madalena Soares katak pedidu pagamentu liu husi rezerva kontijensia no despeza sira alojamentu no alimentasaun mediku kubanu sira, presiza ba unidade sira kardiolojia no hematolojia no sosa kama ortopedika atus ida (100), hamutuk USD 1.300.000,00, aprova tiha husi Primeiru Ministru no verba nee sei transfere kedas. Kona ba kontratu A nre nia parte laiha konesementu maibe so hatene deit kona ba asina kontratu nee.

Audensia nee prezide husi juis kolektivo Jose Maria de Araujo, Fransisca Cabral no Maria Solana Fernandes. Reprejenta ministeriu publiku prokuradora Angelina Saldanha, Lidia Soares no Jasinto Babo. No arguida Madalena Hanjam hetan asistensia legal husi advogadu privadu Jose Guteres, Nunu Morais Sarmos no Rui Costa Fereira. Entertantu arguida Emilia Pires hetan asistensia legal husi advogadu privadu Jose Pedro Camoes ho Angelica Moniz. Informasaun kompletu iha STL Jornal no STL Web, edisaun Kinta, (08//10/2015). Domingas Gomes/Joao Aniba

Suara Timor Lorosae

Governu Alemanha Kontinua Apoiu Joventude TL

DILI – Governu Timor Leste ho governu Alemanha kontinua kria koperasaun neebe metin iha area joventude mak hanesan politika estratejia joventude, liu hosi formasaun oin-oin neebe mak persija.

Tuir Sekretariu Estadu Joventude no Desportu (SEJD), Leovigildo Hornai, ba jornalista sira iha nia servisu fatin, Kuarta (7/10) depois remata halo enkontru ho reprejentante governu Alemanha hatete liu hosi enkontru nee atu halo kompremisiu entre governu rua iha area kapasitasaun joventude.

Enkontru nee hanesan kompremisiu ida tanba sira (Alemanha-red) mai atu halo avaliasaun ba koperasaun neebe mak iha ona tanba nee atu halo fali kompremisiu foun espesial liu iha area joventude nian hodi kapasita ita nia joventude sira liu hosi formasaun oin-oin too iha municipiu hotu,” dehan Leovigildio.

Nia hatutan koperasaun entre governu TL ho governu Alemanha nee hahu iha tinan 2005 too agora no kontinua ba oin, apoiu inisiativa no planu neebe mak SEJD hanesan planu politika joventude TL, hamoris formasaun ba sentru joventude sira no seluk tan neebe mak persija.

Iha fatin hanesan reprejentante governu Alemanha, Brunhilde Vest, hatete governu Alemanha orgulhu tebes atu servisu hamutuk ho governu TL, hodi fo tulun liu-liu atu kapasita joventude sira. Informasaun kompletu iha STL Jornal no STL Web, edisaun Kinta, (08//10/2015). Thomas Sanches

Suara Timor Lorosae

Selu Asesor Osan Boot, Governu Hamosu Injustisa

DILI - Salariu Asesor nasional no internaisonal neebe governu selu kada fulan, hamosu injustisa ba Povu tamba governu lakonsege poupa orsamentu estadu arbiru ba asesor neebe la halo servisu.

Tuir Prezidente Konseilu Nasional Joventude Timor Leste (CNJTL) Maria Dadi Soares Magno katak Governu hasoru injustisa ba povu Timor Leste, tamba selu asesor nain ida nia salariu fulan tolu bele hari tiha eskola ida.

Governu Selu Asesor sira nia osan fulan tolu nian bele hari ona eskola ida, no bele hari sanitasaun ba povu kiit laek sira, ida mak ita bele dehan governu hamosu injustisa ida ba ita povu kiik no kiak,” dehan Maria ba jornalista, Kuarta (07/10/2015) iha Ninia knar fatin Farol.

Nia hatete kuandu governu no estadu desidi atu selu pensaun ba vetaranu sira konsidera maibe foin sae sira konsidera sakrifisiu neebe mak veteranu sira halo ba nasaun atu fo onra ba sira komesa menus ona, tamba problema veteranu mos mosu barak los.

Iha fatin ketak Prezidente Board Reitor KIESP-TL Augosto Soares hateten salariu ba Asesor Internasional sira boot teb-tebes kompara ho asesor nasional sira, maibe halao servisu mos laiha mudansa, lolos governu uza orsamentu neebe mak iha selu nain ida deit diak liu selu timor oan. Informasaun kompletu iha STL Jornal no STL Web, edisaun Kinta, (08//10/2015). Timotio Gusmao

Suara Timor Lorosae

PN Tenke Altera Lei Pensaun Vitalisia Iha Tempu Badak

DILI – Movimentu Universitariu Timor Leste (MUTL), kontinua ejiji Parlamentu Nasional (PN) liu hosi segundu demostrasaun, tenke alteira lalais lei pensain vitalisia iha tempo badak nia laran.

Tuir Portavos Movimentu Universitariu Timor Leste (MUTL), Faustino Soares, ba jornalista sira Kuarta (7/10) iha Universidade Nasional Timor Leste (UNTL) nia oin hatete Universitariu hotu kontra lei pensaun vitalisia, tanba nee husu PN atu alteira lalais lei pensaun vitalisia iha tempo badak nia laran.

Nee manifestasaun kontinuaiade konaba lei pensaun vitalisia tanba hahu kedan iha PN aprova lei pensaun vitalisia universitariu kontra kedan tanba nee liu hosi demostrasaun ida nee atu husu ba Parlamentu tenke halo revijaun ou alteira lalais lei pensaun vitalisia tanba lei pensaun vitalisia durante nee sai problema boot ida ba ita hotu, tanba lei nee fo liu benefisiu ba ukun nain sira neebe mak la servisu ona maibe kontinua simu salariu hanesan ho ida neebe mak servisu,” dehan Faustino.

Nia hatutan lei pensaun vitalisia hanesan diskriminasaun boot ida neebe mak akontese iha rai laran no kaundu la hadia lei pensaun vitalisia maka sei fo nia impaktu boot tebes iha futuru.

Iha fatin hanesan, Inocencio Xavier, hatete katak riku soin Timor Leste nian tenke fahe ho hanesan ba povu tomak, laos kria fila fali diskriminasaun iha povu nia let tanba nee tenke muda lei pensaun vitalisia agora kedan laos kontinua dada tempo.

Manifestasaun neebe mak organija hosi Movimentu Universitariu Timor Leste nee kompostu hosi Universidade UNTL, UNPAZ, UNDIL nomos UNITAL tuir ajenda neebe mak iha sigundu manifestasaun nee sei halo durante loron tolu nia laran, maibe kuandu laiha rejultadu maka tempu ba manifestasaun sei kontinua too PN halo alteirasaun ba lei pensaun vitalisia. Informasaun kompletu iha STL Jornal no STL Web, edisaun Kinta, (08//10/2015). Thomas Sanches

Suara Timor Lorosae

Parpol Adora Vitalisia, Povu Tenki Julga Iha 2017

DILI - Partidu Politiku (Parpol) neebe eziste iha Timor Leste (TL) maka defende, adora no goza deit pensaun vitalisa, diak liu povu julga ona, para elisaun jeral 2017 lalika hili sira, tamba sira hakarak goza deit la hanoin povu nia susar.

Lia hirak nee hato husi Peskizador ONG Lao Hamutuk Juvinal Dias, ba STL iha nia knar fatin, Bebora, Dili, Kuarta (07/10/2015).

Tamba nee povu rasik mos tenki firme hatudu katak ami iha dignidade, liu husi afirma sira nia direitu katak, husu ba nain ulun sira atu fornese servisu ba sira povu la bele hakruk demais ona ba sira atu adora deit ukun nain sira neebe moris ho pensaun vitalisa, povu tenki julga ona sira, diak liu 2017 povu fo julga ba sira, la lika tan tuir sira, diak liu povu tenki hili partidu neebe hanoin povu nee deit, se partidu iha Timor maka la hanoin povu nia moris no la iha partidu ida rona povu nia halerik buka deit pensaun vita lisa diak liu povu la bele hili sira,” hateten Juvinal.

Nia hatutan povu nia votu nee fo iha loron no minute ida, maibe determina sira nia moris nee iha tempu naruk, hanoin hanesan nee tenki lao ona, atu bele ajuda Timor nee lao, se lae ukun nain sira nee deside dezisaun politika nee tuir sira nia interese, defende sira nia grupu nia hakarak.

Iha parte seluk Direitur Ejekutivu Luta Hamutuk Mericio Akara hateten sira apoiu estudante sira neebe ejiji atu halo mudansa ba lei pensaun vitalisa. Hodi halo revizaun ba lei pensaun vitalisa, tamba Pensaun vitalisa nee, halo ema neebe laprodutivu simu osan nafatin, nee fo impaktu negative ba orsamentu estadu. Informasaun kompletu iha STL Jornal no STL Web, edisaun Kinta, (08//10/2015). Joao Anibal

Suara Timor Lorosae

Problema Rai, Komunidade Husu Protesaun Direitu Povu Kiik

DILI ­- Problema hadau malu rai entre komonidade iha delta 4, Aldeia Sao Jose, Suku Comoro, povu kiik sira husu protesaun husi governu no Parlamentu Nasional atu fo atensaun ba lei rai hodi proteze povu nia direitu ba rai no proriedade.

Tuir Portavos Komonidade Bairo delta 4, Aldeia Sao Jose Suku Comoro, Jaime da Costa Soares katak povu kiik sira nia rai no propriedade neebe tempu uluk Malae hamutuk ho Timor oan sira hadau durante okupasuan portugues no Indonesia tenki ba fali nain rasik.

Kualker lei neebe governantes elabora no aplika tenki fo protesaun lolos ba povu kiik sira nia direitu atu restaura fali sira nia propriedade neebe lakon durante okupasaun estranjeiru,” dehan Jaime Liu husi Konferensia Inprensa, Kuarta (07/10/2015) iha Delta 4, Comoro.

Nia hatete oras nee Manuel Tilman ho nia grupu koko sorte no kahor sasan hodi manobra Justisa, tan nee husu atu labele haketak tanki uma, no rai tamba teranu neebe mak iha Parte Manuel Gusmao manan ona dala rua iha Tribunal.

Hatan ba Kastaun nee Advogadu Manuel Tilman hatete ema neebe maka hatama prosesu ba iha Tribunal iha nain tolu, hanesan Manuel Gusmao, Casilda Ximenes, no Ivo de Jesus Sequeira mak sai hanesan reo. Informasaun kompletu iha STL Jornal no STL Web, edisaun Kinta, (08//10/2015). Timotio Gusmao

Suara Timor Lorosae

Konfuzaun ho tradutór sira hanesan marka bainhira hahú julgamentu hosi eis-ministra timoroan

Konfuzaun ho tradutór ofisiál sira hosi Tribunál Díli nian marka loron rua dahuluk hosi julgamentu eis-ministru Finansa timoroan nian, Emília Pires, ho Ministériu Públiku no defeza husu troka interpréte sira.

Durante sesaun rua dahuluk hosi julgamentu, intérprete sira halo sala dalabarak iha tradusaun sira entre portugés no tétun, no visi-versa, halo juís sira, Ministériu Públiku no mós membru sira hosi públiku nebe marka prezensa sujere koresaun sira.

Iha kazu balun tradutór sira interpreta duni saida maka parte sira ne'e hatete, la'ós halo de'it tradusaun, nune'e halo atrazu ba prosesu tomak no hamosu konfuzaun, hanesan ezemplu, iha interpretasaun ba rekerimentu sira nebe aprezentadu.

Maski iha konfuzaun koletivu hosi juís sira nebe lidera hosi José Maria Araújo rejeita ona pedidu no mós akuzasaun, lidera hosi prokuradora Angélica Saldanha, nu'udar defeza hosi Emília Pires - advogadu portugés sira Frederico Bettencourt Ferreira ho Carolina Mouraz no timoroan José Camões - hodi hatudu intérprete foun sira.

Emília Pires hahú julgada iha loron-segunda, iha Díli, akuzadu ba hahalok krimi partisipasaun ekonómiku iha negósiu no administrasaun ladi'ak bainhira nia kaer knaar nu'udar ministra.

Pires ho eis-visi-ministra Saúde nian Madalena Hanjam sai hanesan arguidu tanba iregularidade balun bainhira sosa kama ospitalár atus resin iha kontratu deklaradu ba empreza hosi eis-ministra Finansa nia laen, ho supostu kombinasaun entre sira na'in tolu ba negósiu, ho folin dolár rihun 800.

Julgamentu adia tiha ona ba loron 23 fulan-Marsu hafoin aprezentasaun hosi Emília Pires nia defeza ba rekursu oioin tanba deskonfia iregularidade sira, nebe indeferidu.

Akuzasaun ne'e hakarak rona sasin na'in 24, no sasin destakadu liu maka Nelson Martins, eis-ministru Saúde nian, nebe hahú rona iha loron-tersa ne'e.

Defeza iha besik na'in ruanulu resin entre sira maka iha timoroan notável balun inklui eis-prezidente sira Repúblika nian Xanana Gusmão ho José Ramos-Horta, eis-primeiru-ministru Mari Alkatiri, eis-ministru Saúde Sérgio Lobo ho deputada Fernanda Lay.

Iha fulan-Setembru, Emília Pires nia defeza husu tiha onaba tribunál hodi hatudu intérprete ida ninian, hanoin ida nebe iha loron-tersa ne'e hetan apoiu hosi Ministériu Públiku nebe husu ona hodi troka tradutór, maibé juís la hatán, hodi hatete katak tradutór sira hanesan ema esperiente sira.

Konfuzaun hosi intérprete sira sai boot liu iha sesaun loron-tersa nian, bainhira hahú rona sasin dahuluk sira hosi akuzasaun, halo defeza husu atu tradutór sira halo juramentu honra nian, ideia nebe apoia hosi Ministériu Públiku.

Antes tribunál hatán ona, hanoin - tanba tradutór nia sala - nebe hanesan jura asesora ida hosi ekipa defeza nian, nebe hakarak tulun hodi tradús, maibé hafoin ne'e, bainhira kestaun hetan klarifikasaun, tribunál la hatán, hodi hatete katak tradutór sira jura tiha ona bainhira simu pose.

Nune'e defeza aprezenta ona rekerimentu foun ida, hodi hatete katk bainhira juramentu la halo entaun sei hasoru vísi prosesuál ida. Bainhira hasoru rekuza hosi tribunál avansa ona ba rekursu ida, hodi insisti katak lalika iha karater suspensivu.

Loron dahuluk nian marka mós hosi rekerimentu hosi Ministériu Públiku no hosi Madalena Hanjam nia defeza hodi halibur dokumentu foun sira ba prosesu - nebe tenki husu ba entidade oioin timoroan nian.

Rona mós sasin dahuluk akuzasaun nian, Manuel Silva Sousa, xefe lojístiku hosi Hospital Nacional Guido Valadares, nebe konfirma ona katak kama sira uza hela, iha kualidade nebe di'ak tebes no iha funsionamentu nebe di'ak tebes.

Tribunál hahú rona Nelson Martins nebe konfirma ona nesesidade hodi sosa kama sira no nia esplika katak prosesu tomak sosa nian aprova ona hosi Xanana Gusmão, nebe nu'udar primeiru-ministru iha tempu ne'ebá.

Audisaun ba sasin sira akuzasaun nian sei hanaruk iha sesaun oioin karik to'o loron 13 fulan-Outubru no julgamentu sei hahú hafoin loron 03 fulan-Novembru, tempu nebe sei hahú bolu sasin sira hosi defeza nian.

SAPO TL ho Lusa

“Timor-oan barak maka matenek” – reitór IOB

Reitór hosi Institute of Business (IOB), Augusto Soares dehan katak Governu tenke promove asesór nasionál sira, tuir informasaun ne’ebé fó sai hosi jornál Suara Timor Lorosa’e. 

“Timor-oan barak maka mateneke no bele sai hanesan asesór, tanba ne’e maka ita lapresija tan asesór internasionál sira”, dehan reitór.

Responsável hosi IOB ne’e hatutan tan katak Estadu tenke fó fi’ar ba timor-oan sira, tanba iha ona balun ne’ebé matenek.

Iha parte seluk, peskizadór hosi organizasaun la’os-governamentál La’o Hamutuk, Juvinal Dias fó sai katak Estadu gasta ona osan barak hodi fó formasaun ba tékniku profesionál sira no agora ema sira ne’e serbisu ona iha parte Governu nian, alénde ne’e saláriu hosi asesór sira labele bot liu fali Prezidente Repúblika.

SAPO TL ho STL