Dia 8 Janeiru, Governu esplika sosa asaun Conocophilips-Shell iha PN

Parlamentu Nasional liu husi reuniaun lideres bankadas Parlamentares aprova ajenda rua ba plenária semana oin nian. Ajende nee’ebe aprova iha reuniaun lideres bankadas maka, iha Tersa (08/02/2019) Parlamentu Nasional sei halo audensia ho Governu no ekipa negosiasaun Fronteira Marítima atu esplika prosesu sosa asaun husi kompañia Conocophilips no Shell, nune’e mos ninia vantagem ho desvantagem.

Delegasaun Governu sei xefia husi Primeiru Minstru (PM), Taur Matan Ruak no ekipa negosiasaun sei xefia husi Xefi negociador, Kayrala Xanana Gusmão.

“Normalmente antes ajenda ba plenária asuntus sira ne’e tenke lori mai iha reuniaun lideres bankadas, tan ne’e ami prioridade ajenda rua ba semana oin, primeiru maka kona ba audensia, tanba momento debate OJE 2019 deputadu sira insiste barak, tanba laiha informasaun detalhadu kona ba sosa asaun Conocophilips ho Shell ninian, tanba ne’e maka ami tau ne’e hanesan ajenda prioridade, tanba parlamentu hanesan segundu orgaun soberania tenke hetan informasaun formal liu husi plenária”, hateten Prezidenti Parlamentu Nasional, Arão Noe de J. A. ba Jornalista sira hafoin prezide reuniaun lideres bankadas, Sexta (04/01/2019).

Lider masimu PN ne’e, dehan, iha audensia ne’e sei esplika direta husi xefi negociador asuntu Fronteira Maritima, Kayrala Xanana Gusmão, ne’ebe hanesan representante Governu, nune’e bele esplika klean liu tan ba deputado sira, tanba durante diskusaun OJE labele halo esplikasaun klaru kestaun tempu.

“Audensia ne’e durante loron tomak, ne’ebe hein katak deputado sira bele hetan informasaun husi negociador relasaun ho sosa asoens sira ne’e”, dehan Arão Noe.

Reuniaun lideres bankadas ne’e mos aprova ajenda kona ba re-apresiasaun ba lei aktividade Fundus Petrolíferas ne’ebe foin lalais Prezidente Republika veta.

Iha parte seluk, Deputado Bankada FRETILIN, Joaquim dos Santos, hateten bankada FRETILIN sei partisipa tanba nudar aktividade Parlamentu nian.

“Ne’e programa parlamentu nian ne’ebe hot-hotu tenke partisipa, ne’e la’os seminar, ne’e ajenda parlamentu nian especial atu halo audensia ho Governu, ne’ebe deputado sira iha obrigasaun regimental tenke mai partisipa hodi koloka kestoens, husu esklaresementu tama iha regras regimental”, dehan deputadu Joaquim dos Santos.

Deputado bankada FRETILIN ne’e mos dehan, bankada FRETILIN lapresiza hatene Governu atu konvida mos xefi negociador, Kayrala Xanana Gusmão hodi marka prezensa mos iha audensia.

Antes ne’e, Xefi negosidador principal, Kayrala Xanana Gusmão hamutuk ho ekipa realiza ona seminário iha CCD, hodi esplika ba publiku relasiona ho sosa asoens husi kompañia petrolio rua.

Timor-Leste sosa asaun Conocophilips hamutuk % 30 ho total osan US$ 350 milhões, husi kompanhia Shell hamutuk % 26.25 ho total osan US$ 300, tanba ne’e total osan sosa asoens hamutuk US$ 650. No osan ne’e rasik prevê ona iha OJE 2019. Mia

GMN TV | Grupo Média Nacional

DJE-MAP Sei Halo Rekrutamentu Ba Pesoál Sensus Agrikultura 2019 Hamutuk 4.700

DILI, (TATOLI) – Diresaun Jerál Estatístika (DJE) Ministériu Finansas (MF) no Ministériu Agrikultura no Peska (MAP) iha ona planu atu halo rekrutamentu ba pesoál sensu agrikultura 2019 hamutuk 4.700.

Diretór Jerál Estatístika, Elias dos Santos Ferreira, hatete tuir planu sensu agrikultura ne’e atu halo fulan ida, maibé haree ba pilotu ne’ebé foin daudaun halo (3-22 dezembru 2018) fulan ida lasufisiente, tanba ne’e estende tan ba fulan rua atubele halo serbisu ne’e kobre territóriu Timor-Leste.

“Totál ne’e 4.700, pur tantu husi entrevistadór ne’e 2.350, supervizór 1.175 no ida ne’ebé ka’er GPS ne’e 1.175. Pur tantu ida ne’e maka ita sei rekruta, husi 4.700 ne’e ami sei fahe to’o iha nivel suku hanesan rekrutamentu pilotu ne’ebé ami halo. Ami sei serbisu hamutuk ho MAP, prezidente kámara munisípiu sira, nomós administradór postu administrativu inkuli xefe suku tanba ita sei foti ema sira ne’e husu kada suku”.

Hafoin rekruta tiha sei fó treinamentu iha nivel postu administrativu durante semana ida, maibé antes treinamentu ba entrevistadór sira sei iha mós treinamentu ba treinadór sira (TOT).

“Depois ida ne’e ami sei rekruta husi agrikultura nomós estatístika maizumenus ema na’in-20 para bele treinu sira iha kada munisípiu nune’e to’o ikus sira maka sei halo serbisu”.

Sensu agrikultura tuir planu sei halo iha marsu-abríl, maibé hatene katak orsamentu aprova ona husi Parlamentu Nasionál no hein promulgasaun husi Prezidente Repúblika.

“Maibé ami iha diskusaun kle’an ho parseiru dezenvolvimentu nomós parte tékniku katak hakarak ka lakohi tenke halo iha marsu, maibé orsamentu atraza karik ida ne’e hanesan obstákulu ida mai ami. Tanba sá tenke halo sensu iha marsu? Tanba marsu ne’e maka ita-nia umakain sira ne’e hahú kuda rai”.

Elias esplika diferensa ho sensu populasaun no umakain ne’e normalmente halo iha juñu no jullu tanba bailoro no sensu agrikultura tenke ema kuda rai maka bele bá husu sira.

Tanba ne’e entrevistadór sira sei rekruta husi kada suku tanba sira maka hatene liu sira-nia suku ida-idak no iha sensu ne’e sei utiliza kestionáriu tolu mak listajen, umakain no komunidade.

Jornalista: Maria Auxiliadora | Editora: Rita Almeida

Imajen: Diretór Jerál Estatístika Ministériu Finansas, Elias dos Santos Ferreira. Foto/MF.

GMN TV | Jornal Nacional - kalan